Tsʼéjkunhasïndi Abraaniri jakajkukua

¿EXEXAKIRI ambe úxaki Abraani? Kuchiiu ma kámaxati, ka xarharasïndi enajki uékani jaki uándikuni uájpani. ¿Andi? Orheta ju exeni, Abraani ka Sara nénaksï niáraspi kánguarhini ini uájpani.

Miánta, Tata Diosï aiakuaspti eskaksï kánguarhipiringa uájpani ma. Úkua jukaspti paraka ísï úkuarhipiringa, jimboka Abraani ka Sara tʼarhepispkaksïa. Peru Abraani jakajkusïrendi eska para Tata Diosï no ma ambe úkua jukaska. Ísï jimbo, ¿ambe úkuarhispi?

Enga Tata Diosï i ambe aiakupka, nitamaspti ma uéxurhini. Jiájkani enga Abraani 100 ka Sara 90 uéxurhini jatiripkaksïa, kánguarhisptiksï charhakuni ma ka arhirasptiksï Isaki. ¡Tata Diosï ísï úspti eska na aiatspipka!

Peru enga Isaki kʼépkia, Jeoba tsʼéjkuspti Abraaniri jakajkukuani. Arhispti: ‘¡Abraani!’. Ka ima mókukuspti: ‘¡Ixú jarhaska!’. Ka Tata Diosï arhispti: ‘Jupika chíti uájpani, indentku engari kánguarhijka, Isakini, ka ni imani juátani jimbo engakini exeraka. Ka jimari uándikuaka chíti uájpani ka íntspeakari eska kéjtsïtakua ma’.

¡Abraani kánikua kómu pʼikuarheraspti i ambe jimbo, jimboka kánikua uékasïrenga uájpani! Ka miánta, Tata Diosï aiakuspti eskaksï imeri uájpecha irekapiringa echeri Kanaani jimbo. Peru, ¿néna úkuarhepirini i ambe enga Isaki uarhipiringa? Abraani no kurhangusïrendi, peru kurhajchaspti Tata Diosïni.

Enga Abraani niárapkia juátarhu, úspti altari ma ka jima jótaspti Isakini. Jimajkani pʼitaspti kuchiiu ma para uándikuni. Peru Tata Diosïri ánjili uandajpaspti ka arhispti: ‘¡Abraani, Abraani!’. Ka ima mókukuspti: ‘¡Ixú jarhaska!’.

Ka Tata Diosï arhispti: ‘Asï ma ambe úku tumbini’. ‘Iásï kʼóru mítiskia eskarini jakajkusïnga, jimbokarini íntskuxapkia chíti máechakuajku uájpani.’

¡Abraani kánikua jakajkusïrendi Tata Diosïni! Jakajkusïrendi eska para Jeoba no ma ambe úkua jukaska, ka eska Jeoba úpiringa tsítantani Isakini. Peru Tata Diosï no uékasïrendi eska Abraani uándikupiringa Isakini; jimbosï úpti eska karichi ma matotakuarhipiringa jima no iauani ísï, ka arhispti Abraanini eska karichini uándikupiringa ka no Isakini.