Dina uandanhiatechani jirinhakuarhiasïndi

¿EXEXAKIRI néchani niraxaki pʼorhembiani Dina? Niraxati pʼorhembiani máru Kanaani anapu uátsïchani. ¿I ambe sési pʼikuastapirini Jakobuni? Ma ambe engakini jarhuataka mókuntani i kurhamarhikuani, jindesti eskari miántaka na engaksï eratsianga Abraani ka Isaki, Kanaani anapu uátsïcheri.

¿Uékasïreni Abraani eska uájpa Isaki tembupiringa Kanaani anapu uátsïni ma? Nómbe. ¿Uékasïreni Isaki ka Rebeka eska uájpa Jakobu tembupiringa kananeani ma? Nómbe. ¿Mítiskiri andi?

Jimbokaksï Kanaani anapuecha kómarhiasïrengaksï diosï no jurhimbitichani. Nóksï ambakiti kʼuiripuespti para tembuani, níjtu para sési pájperakua ma jatsini imechani jingoni. Ísï jimbochisï újka jánhaskani eska Jakobu no tsitipiringa eska Dina, sési pájperapiringa kananeaechani jingoni.

Dina uandanhiata ambe jirinhakuarhispti. ¿Exexakiri dibujurhu indeni kananeuni enga Dinani exeni jaka? Sikemi arhinhasïndi. Ma jurhiatikua enga Dina nípka pʼorhembiani kananeaechani, Sikemi jupikaspti ka apondespti imani jingoni. I ambe kánikua no sési jarhaspti, jimbokaksï imechajku úsïnga apondeni engaksï tembuperatini jarhajka. I ambe enga Sikemi úkupka Dinani, sánderu uandanhiatechani juáspti.

Engaksï Dinaeri mímembecha mítipka, kánikuaksï ikiaspti. Simeoni ka Lebi, xánksï ikiaspti engaksï jamberi nípka sïpatekuarhu inchaakuni iretarhu espadechani jingoni. Simeoni, Lebi ka ermanembecha, uándikusptiksï Sikemini ka iámindu achatichani. I no sési jásï ambe engaksï úpka, kánikua ikiataspti Jakobuni.

¿Néna uénaspi jarhani i uandanhiatecha? Jindespti jimboka Dina sési pájperasïrenga imechani jingoni engaksï no kurhajchaenga Tata Diosïri juramukuechani. Jucha no pájperaka xarhati kʼuiripuechani jingoni, ¿a no?