Jeoba íntspeasïndi juramukuechani

TSIMANI kutsï ísï jimbo tátsekua engaksï na israelitecha uéakupka Ejiptu uératini, niárasïndiksï Sinai juátani jimbo enga ístu arhinhajka Orebi. Ixú jindespti enga anhatapu sapichu tixarani japka ka enga Tata Diosï uandajpapka Moisesini. Ka ixuksï pakarasïndi irekani sáno ma uéxurhini.

Moisesi karharasïndi juátarhu ka kʼuiripu kétsekua erontasïndi. Jini karhakua, Jeoba arhisïndi Moisesini eska Ima uékasïnga eska israelitecha kurhajchaka ka eskaksï niáraka Imeri iretaeni. Enga Moisesi kétsintajka, arhiasïndi israelitechani ambe enga Jeoba uandaka. Ka kʼuiripu uandasïndi eskaksï kurhajchaaka Jeobani, jimbokaksï uékasïnga imeri iretaeni.

Iásï Jeoba úsïndi ma ambe enga no méni xarharani japka. Úsïndi eska juáta sïraata uéjtsïaka, ka eska uinhamu kurhaakuarhiaka charani. Ístu uandajpasïndi iretani ka arhisïndi: ‘Ji jindeska Jeoba chíti Tata Diosï, engakini petantaka Ejiptu uératini’. Jiájkani íntsaasïndi ini juramukuani: ‘Nori jatsiska para máteru diosïchani kómarhiani sino jíndentku’.

Tata Diosï íntsaasïndi israelitechani máteru nuebi mandamientuechani o juramukuechani. Ireta kánikua chésïndi. Arhisïndiksï Moisesini: ‘Tʼujtsïni uandajpa, jimbokachi chésïnga uarhini engajtsïni Tata Diosï uandajpaaka’.

Sánderu tátsekua, Jeoba arhisïndi Moisesini: ‘Karhara ixú juátarhu. Íntskuakakini tsimani tsakapu kórhatichani nani engani karaaka juramukuechani engani uékajka eska ireta uáka’. Ísï jimbo, Moisesi ménderu karharasïndi juátarhu. Jini pakarasïndi 40 jurhiatikua ka 40 chúrikua.

Tata Diosï uánikua, uánikua juramukuechani jatsiasïndi para imeri ireta. Moisesi karaasïndi. Ístu Tata Diosï íntskusïndi Moisesini ima tsimani tsakapu kórhatichani. Íchani jimbo, Tata Diosï mísmu karaasti imani 10 juramukuechani enga iámu iretani arhipka. Arhinhasïndiksï Diesi Mandamientuecha.

Diesi Mandamientuecha, jindestiksï juramukuecha engaksï kánikua jukaparhakueka. Peru ístuksï jukaparhakuesti máteru juramukuecha enga Tata Diosï íntsaajka israelitechani. I jindesti ma: ‘Uékakari chíti Tata Diosï Jeobani méntku iámindu mintsita jingoni, ka iámindu chíti eratsikua jingoni, ka iámindu chíti alma jingoni, ka iámindu uinhapikua jingoni’. Ka máteru jindesti: ‘Uékakari máruteruechani eska tʼujkumindu na uékakuarhijka’. Jesukristu, Tata Diosïri Uájpa, uandaspti eskaksï i jindeska tsimani sánderu kʼérati mandamientuecha enga Tata Diosï íntskupka imeri ireta Israelini. Tátsekuachi jorhenguarhini jauaka uánikua ambe, Tata Diosïri Uájperi ka imeri jorhentperakuecheri ambe.