Dabidi andisï sïpakuarhijki

ENGA Dabidi uándikujkia Goliatini, Abneri enga juramukujka ejersitu Israeli anapuni pásïndi Dabidini Saulini jingoni. Sauli imeri kʼumanchikuarhu irerasïndi ka juramuti úsïndi ejersiturhu.

Engaksï sondaduecha uarhiperajkia filisteuechani jingoni ka engaksï kʼuanhatsintajkia, uarhitichaksï piresïndi: ‘Sauli mili jimbo uándikuasti peru Dabidi diesi mili jimbo’. Sauli úndasïndi enbidiarini Dabidini, jimbokaksï sánderu kʼéri ambe exesïnga. Peru Jonatani, Sauliri uájpa no májkuenisti eska tátemba. Ima uékasïndi Dabidini ka ístu Dabidi uékasïndi imani. Ísï jimbo, aiatsperasïndiksï eskaksï méntkisï sési pájperaka.

Dabidi sési kústasïndi arpani, ka Sauli tsitisïndi na enga kústajka. Peru ma jurhiatikua xáni enbidia jimbo Sauli uékasïndi úkuni ambe ma Dabidini. Enga Dabidi kústani jarhajka arpani, Sauli jupikasïndi lansani ma ka kʼuanirasïndi, uandaparini: ‘¡Chánharhiteraka Dabidini!’. Peru Dabidi kéndikusïndi. Sánderu tátsekua, ménderu kʼuanirasïndi lansani peru ístu no pʼitarasïndi. Dabidi iásï kʼóru mítistia eska jatsiska para méntkisï jingontku jámani.

¿Miásïniri ambe aiatspespi Sauli? Ima uandaspti eska imeri uátsïni íntskupiringa imani enga uándikupiringa Goliatini. Jimbosï Sauli arhijti Dabidini eska uáka tembuni imeri uájpa Mikalini, peru orheta jatsisti para 100 filisteuechani uándikuani. ¡Eranhaska! Sauli uékasïndi eskaksï filisteuecha uándikuaka Dabidini. Peru no ísï úkuarhisïndi ka Sauli íntskusïndi uájpani para Dabidiri témbaeni.

Ma jurhiatikua, Sauli arhisïndi Jonatanini ka iámindu imeri jántspirichani eska uékasïnga uándikuni Dabidini. Peru Jonatani arhisïndi: ‘Asï ambe ma úku. Ima nókini ambe ma úchisti. Méntkisïkini jarhuatasti. Úpirindi tsïtani tsípikuani enga Goliatini uándikupka, ka tʼuri tsípispka engari exepka i ambe’.

Sauli kurhajchasïndi imeri uájpani ka aiakusïndi eska no ma ambe úkuaka Dabidini. Juásïndiksï ménderu Dabidini ka ima ménderu marhuakusïndi Saulini. Peru ma jurhiatikua enga Dabidi kústani jarhajka, Sauli ménderu kʼuanirasïndi lansani. Dabidi kéndikusïndi ka lansa paredirhu chátakukuarhisïndi. ¡Ini jingoni tanimu ueltaestia! ¡Dabidi iásï kʼóru mítistia eska jatsiska para sïpakuarhini!

Ima chúrikua Dabidi níntasïndi chenemba, peru Sauli axaasïndi máru achatichani para niranksï uándikuni. Mikali mítisti ambe enga uékajka úni tátemba. Ka arhisïndi Dabidini: ‘Ni sïpakuarhini i chúrikua, jimbokari pauani uarhiri erandiaka’. Ka ima chúrikua Mikali jarhuatasïndi Dabidini bentanarhu ísï sïpakuarhini. Dabidi sáno siete uéxurhini jirikuarhikusïndi Saulini, ka jini ka jini jámasïndi irekani.