Jorhenguarhikua 4
¿Néski Diablu?
Satanási enga noambakitika, ¿néna uénaski jarhani? (1, 2)
¿Néna tsïjpasïni kʼuiripuechani? (3-7)
¿Cha andisï jatsi para uinhamu anhaxurhikuni noambakitini? (7)
1. Inde uandakua diablu o «noambakiti», nemani arhikuekasïndi enga no sési járhati chikuanderakua ambe uandajka máteru kʼuiripueri. «Satanási» arhikuekasïndi ikiatspiti o tájpanharikpeti. Ari uandakuecha pakarakusïndi imani, jimboka ima jindeska kʼéri ikiatspiti Tatá Diosïri. Uénakuarhu ánjili pímbinhasï máespti enga auandarhu irékapka Tatá Diosïni jingoni, joperu tátsekua kʼéri pʼikuarheraspti ka uékaspti eska intsïnhapiringa kómarhikuani enga Tatá Diosïrika (Mateu 4:8-10).
2. Ari ánjili, Satanási, akuitsini ma úraspti o marhoataspti para Ebani jingoni uandontskuarhini, ka imeri chikuanderakuechani jimbo, úspti eska Eba nóteru kurhajchapiringa Tatá Diosïni. Ísï tájpanharikuspti Tatá Diosïri «kʼéri juramukuani», o imeri Kʼérikuani. Uandaspti eska Tatá Diosï no úpiringa sési juramuni ka eska kʼuiripuechani no sési nikukuapiringa. Ístu uandaspti eska nóma kʼuiripu kurhajchapiringa Tatá Diosïni. Ka ísï úparhini, Tatá Diosïri ikiatspiti úkuarhispti. Jiájkani uénaspti ísï arhinhani Satanási noambakiti (Génesis 3:1-5; Job 1:8-11; Jaŋaskuecha 12:9).
3. Satanási jánguarhintasïndi kʼuiripuechani tsïjpani parakaksï imani kómarhiaka (2 Korintu 11:3, 14). Ma ambe enga ima marhoatajka jindesti no jurhimbiti religiónini. Enga ma religióni chikuanderakua ambe jorhentpijka Tatá Diosïri ambe, sési jimbo úxati ambe enga Satanási uéjka (Juanu 8:44). Kʼuiripuecha engaksï no jurhimbiti religiónichani jimbo jaka, jamberiksï jakajkujti eskaksï kómarhixaka Tatá Diosïni enga sési jimboeka, joperu sési jimbo Satanásinhksï marhoakuxati, jimboka ima jindeska diosïni ixu parhakpinirhu (2 Korintu 4:4).
4. Sïkuajperakua jindesti máteru ambe enga Satanási úrajka para kʼuiripuechani imeri jájki jimbo jatsiani. Máru kʼuiripuecha espírituechani uandajpasïndiksï paraksï kuájchakukuarhini, para máteruechani no sési úkuani, para mítini ambe enga úkuarhiaka o paraksï milagru ambe úkuani. Inde úkuecha Satanásiri uinhapikuani jimboestiksï. Enga jucha uéjka Tatá Diosïni jaiapanherantani, jucha nóma ambe jatsiaka sïkuajperakuani jingoni (Deuteronomio 18:10-12; Ukuecha 19:18, 19).
5. Ístu, Satanási tsïjpaxati kʼuiripuechani úparhini eskaksï kúnguarhikua politikechani kómariauaka ka enga ísï eratsitarajka eska imecheri iréta sánderu jukaparhakueska. Joperu no ísïsti (Ukuecha 10:34, 35). Máteruecha erokuarhisïndi eska kúnguarhikua politikarhu anapuecha sési péntauaka imecheri uandanhiatechani. Indeni jimboksï, xarhatasïndi eskaksï no jiókuarhisïnga Tatá Diosïri Juramukuani, imani enga uáka sési péntani juchari uandanhiatechani (1 Korintu 15:24).
6. Máteru ambe enga Satanási úrajka para kʼuiripuechani tsïjpani, jindesti, tsitirani no sési jásï ambe. Jeobájtsïni arhisïndi eska jucha no jámaka no sési jásï ambe úni, jimboka ima míteska eskajtsïni no sési nicheaka (Galasia 6:7, 8). Jauati máru kʼuiripuecha engaksï uékaka eska cha májkueni jámaka eska imecha. Joperu miánta je eska Satanásiska enga uéjka eska cha indeni ambe uáka (1 Korintu 6:9, 10; 15:33).
7. Satanási uáti úni eska cha no sési kánhaka parajtsï jurajkuni Tatá Jeobáni. Jamberi imecha enga cha kánikua uékajka, ikiachiatiksïni, oksïni teresmarhuni, jimbokajtsï jorhenguarhixaka Bibliari ambe. Joperu cha ¿néni kánguxaki tsípekuani? Satanásiksïni uékasïndi chérhani, paraka cha nóteru jorhenguarhiaka Tatá Jeobéri ambe. Ásï jurajku je eska ima andaka (Mateu 10:34-39; 1 Pedru 5:8, 9). Enga cha uinhamu anhaxurhikuaka noambakitini, uákajtsï Tatá Jeobáni tsíperani ka xarhatani eskajtsï Imeri juramukuani jingoni úkuarhixaka (Proverbios 27:11).
[Ilustrasioni pájina 9 anapu]
Religióni no jurhimbiti, sïkuajperakua, ka irétecha engaksï kʼéri pʼikuarherajka kʼuiripuechani tsïjpaxati
[Ilustrasioni pájina 9 anapu]
Enga cha chúngumaka jorhenguarhini Tatá Jeobéri ambe, cha uinhamu anhaxurhikuxaka Satanásini