Tatá Diosïjtsïni pʼímarisïndi jindéni imeri pʼíchpiricheni

Tatá Diosï uékasïndi eska jucha imeri pʼíchpiriuaka. ¿Cha mítespi eska jucha uáka Tatá Diosïri pʼíchpirini, imeri enga sánderu kʼéri ambeka auandarhu ka echerirhu? Abrani enga ióntki irékapka, isï arhinhaspti Tatá Diosïri pʼíchpiri (Santiagu 2:23). Biblia uandasïndi máteru kʼuiripuecheri engaksï imajtu niárapka Tatá Diosïri pʼíchpiri úkuarheni ka intsïnhasptiksï kʼérati kómperhatechani. Iasï, uánikua kʼuiripu iámindu parhakpinirhu anapuecha niárastiksï Tatá Diosïri pʼíchpiri úkuarheni. Chájtujtsï uáka Tatá Diosïri pʼíchpirini.

Sánderu sésisti Tatá Diosïri pʼíchpirini ka eska naki uéjki kʼuiripu ma jingoni. Tatá Diosï no méni jurajkuasïndi imeri pʼíchpirichani engaksï mintsinharijka (Salmo 18:25). Sánderu sésisti Tatá Diosïri pʼíchpirini eska uánikua tumina jatsini. Engaksï jatsikuarhiricha uarhijka, máterhuechaksï pakarasïndi imecheri tuminani jingoni. Joperu, engaksï Tatá Diosïri pʼíchpirika jatsikuarestiksï ambe ma enga sánderu jukaparakueka, enga no nema uáka euakuariani (Mateu 6:19).

Jamberiksï jauati kʼuiripuecha engaksï no uékaka eska cha jorhenguarhini jauaka Tatá Diosïri ambe. Úpirindiksï jindéni chári pʼíchpiricha o chári kʼumanchikuarhu anapuecha engaksï úpiringa indeni ambe (Mateu 10:36, 37). Enga nema chanhsïni teresmarhuaka o uinhamarichini paraksïni chérhani, eratsikuari je: «¿Ji néni uékasïni jaiapanherantani, kʼuiripuechani o Tatá Diosïni?». Eratsinta je, engaksïni nema arhipiringa ásteru tʼireia, ¿cha kurhajchapirini? Nombe, no nema kurhandipirindi, jimboka para uni irékani jucha jatsiska para tʼireni. Joperu Tatá Diosï uáti uni eska cha irékaka para méntkisï. Isï jimbo jorhenguari je néna uni Tatá Diosïri pʼíchpirini ka asï jurajku je eskaksïni nema pʼínguaka (Juanu 17:3).