KAPITULU 13
Kʼuínchikuecha enga Tata Diosï no jeiapanhiantajka
“Jeiapanhinta je solu indeni ambe enga juchari Tata jeiapanhintajka.” (EFESU 5:10.)
1. ¿Néchani úsïni Jeoba eskaksï andarheraaka, ka andiksïsï jatsi para jingontku jarhani?
JESUSI uandaspti eska imecha engaksï jurhimbitku marhuakujka Tata Diosïni “kómarhiakaksï Diosï Tátini mintsita jingoni ka sési jimbo, jimboka Diosï Táti xárhati kómarhirichanisï jirinhaajka para eskaksï kómarhiaka” (Juanu 4:23). Jeoba exeantaasïndi imechani engaksï uékajka jurhimbikuani Tata Diosïri ambe, ka úsïndi eskaksï andarheraaka imani ka imeri Uájpani (Juanu 6:44). Ka juchachi kʼéri kóntperata ma jatsiska indeni grupurhu jarhani. Peruchi útasï uáka Noambakitiiri trampecharhu uekorhini, jimboka ima sési mítiska enganiarpini. Parachi no ísï úkuarhinchani, jatsiskachi para jingontku jarhani ka jánguarhintani “solu indeni ambe [úni] enga juchari Tata jeiapanhintajka” (Efesu 5:10; Jaŋaskuecha 12:9).
2. Uandanta je néna exesïni Jeoba jeuetani relijioni jurhimbitini no jurhimbitini jingoni.
2 Ju je miántani ambe enga ióntki úkuarhipka Sinai juátarhu no iauani. Engaksï israelitecha kurhakupka Aronini eska diosïni ma úkuapiringa, ima kasu úkuaspti ka beserruni ma úkuaspti orueri. Peru, uékaspti xarhatani eska ambe máespka enga Jeobani arhikuekenga, jimboka uandaspka: “Pauani kʼuínchikua ma jauati para Jeoba”. Peru ¿néna pʼikuarheraspi Jeoba? ¿No ma ambe úspi enga exepka eskaksï jeuetaxapka relijioni jurhimbitini no jurhimbitini jingoni? No ísku pakaraspti. Úspti eskaksï uándikuapiringa 3,000 kʼuiripuechani engaksï kómarhipka ini beserruni (Éxodo 32:1-6, 10, 28). ¿Ambejtsïni jorhendasïni i uandantskua juchantsïni engachi uékajka Tata Diosïri uékperakuarhu jarhani? Eska kánikua jukaparhakueska “no jáma[ni] no sési jásï ambe pʼárhini” ka eskachi jatsiska para jánguarhintani no jeuetani jurhimbikuani no jurhimbikuani jingoni (Isaías 52:11; Ezequiel 44:23; Galasia 5:9).
3, 4. ¿Andisï uétarhijki Bibliarhu anapu prinsipiuechani jingoni exeani pʼindekuechani ka kʼuínchikuechani engaksï meru únhajka?
3 Primeru kristianuecheri tiempuni jimbojtu, úndasptiksï apostatecha jarhani, jo, imecha engaksï úndapka támisï jorhentpini. Uénani jámani, no úsptiksï ísï úni, jimbokaksï apostulicha pʼíngusïrenga para no ísï úkuarhini. Peru engaksï na uarhipkia apostulicha, kristianu arhikatecha engaksï no jurhimbiti jorhentpienga, úndasptiksï imani pʼindekuechani, kʼuínchikuechani ka jurhiatikuechani jatsiani engaksï ima uénga engaksï no jakajkuenga Tata Diosïni ka engaksï iásï jamberi, ísï xarhatakuekajka enajkiksï kristianuecheri pʼindekue (2 Tesalonika 2:7, 10). Ini kapitulurhu, exeakachi máru ejempluechani. Exeakachi eskaksï i pʼindekuecha ka kʼuínchikuecha no xarhatasïnga Tata Diosïri espirituni sino parhakpini anapuni, ka eskaksï sáno iámindu májkuenksï jásï ambe xarhatasïnga: úsïndiksï eskaksï no uandanhiauaka máteruechani jimbo, etsakuasïndiksï no jurhimbiti jakajkukuechani ka Noambakitiri úkuechani, ka i ambe, “Kʼéri [...] Babilonia” uératinksï jorhenguarhiasti (Jaŋaskuecha 18:2-4, 23).a Nochi jatsiska para mirikurhini eska Jeoba kánikua sési mítiska ima ikichakueni jásï pʼindekuechani relijionirhu anapu, nani engaksï jimbo uéraka pʼindekuecha engaksï iásï meru únhajka, ka eska iásï májkueni ikichaasïnga eska ióntki. Jo ísïsti, eska na exejka Jeoba ini ambe, inde jindesti ambe enga sánderu jukaparhakueka para jucha (2 Juanu 6, 7).
4 Kristianuechachi mítiska eska Jeoba no jeiapanhiantasïnga máru kʼuínchikuechani. Jimbochisï jatsika para méntku no jámani eratsini jimesïsï inchamukuni. Ju je ménderu exeni andisï Tata Diosï no jeiapanhiantajki. Engachi kurhanguaka eskajtsïni i ambe uáka ójkutani parachi Tata Diosïri uékperakuarhu jarhani, sánderuchi uékaaka méntku no jámani indeni ambe niátani.
NABIDADI, O JURHIATANI KÓMARHINI
5. ¿Andichisï seguru jaki eska Jesusi no 25 de disiembrini andajpenuska?
5 Biblia no nani uandasïndi eskachi jatsispka para Jesusiri andajpenukuani kʼuínchini. Ka ístu, no mítinhasti káni meru andajpenuski. Peruchi uáka seguru jarhani eska no 25 de disiembrini andajpenuska.b ¿Andi? Para uénani, jimboka imani jurhiatikuechani jimbo jini Israeli, imani tiempuesïndi enga kánikua tsʼirakuarhijka, ka eska na uandajka Lukasï 2:8-11 (TDU), jiáni enga Jesusi andajpenupka “karichi erangutichaksï jámaxapti engaksï juátarhu pakaremka” karichichani eranguani. (Seguruchi jarhaska eskaksï no interu uéxurhini juátarhu pakarasïrenga karichichani eranguani, enga ísïpiringa no jukaparhakuepirindi eskaksï Bibliaeri karantsticha ini ambe karapiringa.) Ka jini Beleni imani tiempuni jimbo enga kánikua tsʼirakuarhijka, ístu niárasïndi janini ka asta ménisï niebi uekorhini, jimboksïsï karichi eranguticha no uéndi “juátarhu paka[rani]” karichichani eranguani, sánderu sési, kʼumanchikuecharhuksï paantasïrendi. Ístuchi no jatsiska para mirikurhini andiksïsï Maria ka Jose nípi Beleni: paraksï apuntarikuarhini sensurhu ma enga Augustu juramupka eska úkuarhipiringa (Lukasʌ 2:1-7). Judiuechaksï no káni sési exesïrendi Romani, jimbosï Augustu no kurhakuapirindi eskaksï nipiringa apuntarikuarhini imani tiempuni jimbo enga xáni tsʼirakuarhenga asta jima jamberi enga ima juramupka eskaksï nipiringa.
6, 7. a) ¿Naniksï uéraski pʼindekuecha engaksï Nabidadi jimbo úkuarhijka? b) ¿Andisï no májkueni, na enga kristianu ma intsïkuarpijka ambe ma ka na engaksï kʼuiripuecha intsïkuarpijka Nabidadi jimbo?
6 Jimajkani, ¿nani uéraski Nabidadi? No Bibliarhu uérasti, sino ióntki anapu kʼuínchikuecharhu imecheri engaksï no jakajkuenga Tata Diosïni. Ma i jásï kʼuínchikua saturnalicha arhinhasïrendi ka míndakata jarhaspti para diosï Saturnu, diosï romanu ma enga jindepka diosï agrikulturaeri. Máteru jindespti, “Jurhiateri andajpenukua” ka i, seguni Enciclopedia de la Religión Católica, 25 de disiembrini úkuarhesïrendi, i jurhiatikua míndakata jarhaspti imechani jimbo engaksï kómarhienga diosï jurhiaterini enga Mitra arhinhaenga. I mísmu libru uandasïndi eska “Iglesia (Katolika) úndaska kʼuínchini [Kristueri] andajpenukuani” ini fechani jimbo “para tánaani kʼuiripuechani ini kʼuínchikuani jimbo enga míndakata japka para kʼuínchini Jurhiateri andajpenukuani (Mitra), engaksï uénga imecha engaksï no jakajkuenga Tata Diosïni”. Ka uétarhisïndi eskachi mítiaka eska i ambe úndaska úkuarhini tresientu uéxurhini ísï tátsekua enga Jesusi uarhipkia.
Kristianu jurhimbiti uékperakua jimbo íntspeasïndi regaluechani
7 Ini kʼuínchikuechani jimbo, ima engaksï no jakajkuenga tata Jesukristuni, pʼindesïrendiksï kʼérati tʼirekuechani uáni ka regalu ambeksï intsimperasïrendi, pʼindekuecha engaksï iásï útasï Nabidadi jimbo únhajka. Peru ambe engaksï jimbo íntsperanhajka regaluecha iásï Nabidadi jimbo, no terokuntasïndi indeni ambe jingoni enga 2 Korintu 9:7 uandajka: “Íntspi je mándani arhini eskajtsï na eratsikata jatsikia chári mintsitecharhu, no pʼamondakuarhiparini ka níjtu komosiekaksïni nema uinhamarhichipiringa, jimboka Diosï imanisï tsípijka exeni enga tsípikua jingoni íntspijka”. Kristianu jurhimbitichachi íntspiasïnga regaluechani mintsitarhu uératini, ka no erokuarhiparini eskajtsïni íntskuntaaka ambe ma, ka nójtu jimboka afuerseuaka íntspini ma fecha jimbo (Lukasʌ 14:12-14; arhinta je Ukuecha 20:35). Ka iásï sánderuchi agustu jarhasïnga jimbokachi nóteru uandanhiani jarhasïnga o kántspini jarhani ísï eskaksï na jarhajka uánikuechani indeni kʼuínchikuechani jimbo (Mateu 11:28-30; Juanu 8:32).
8. ¿Pákuspiksï regaluechani Jesusini, jóskuecheri jorhenaticha enga Jesusi andajpenupka? Uandanta je.
8 Peru nema úpirindi uandani: “¿Andi maguechaksï no íntskuspi regaluechani Jesusini para kʼuínchini imeri andajpenukuani?”. Nómbe. Imaksï achaticha jóskueri jorhenatichesptiksï, ka íntskusptiksï regaluechani para xarhatakuni eskaksï jakajkusïrenga eska Jesusi kʼéri ambespka, ísï eska na pʼindenhaenga Bibliaeri tiempuni jimbo (1 Reyes 10:1, 2, 10, 13; Mateu 2:2, 11). Peruksï no niraspti pesebrirhu exeni o nani engaksï ueecha tʼirenga, sino imeri kʼumanchikuarhu, uánikua kutsï tátsekua.
AMBE ENGA BIBLIA UANDAJKA KUMPLEANIUECHERI
9. ¿Ambe úkuarhispi kumpleaniuecharhu engaksï Bibliarhu jataka?
9 Ióntki májkueni eska iásï, kánikua tsípinhasïrendi enga sapi ma andajpenuenga. Peru Biblia no nani uandasïndi eska Tata Diosïri marhuari ma, uántasïrenga kumpleaniuechani (Salmo 127:3). Bibliaeri karantsti, ¿mirikurhispi jatsikuni eska únhantasïrenga Tata Diosïri Uájperi kumpleaniuni? Nómbe, jimboka uandasïnga tsimani kumpleaniuecheri: ma faraoniri ka máteru Erodesi Antipasiri (arhinta je Génesis 40:20-22; Markusʌ 6:21-29). Ka no sési ambe xarhatasïndi ini tsimani kumpleaniuecha jimbo, sánderu últimurhu, jimboka ini jimbo Juanu Bautistanksï kachujchakuspka.
10, 11. ¿Nénaksï exeasïreni kumpleaniuechani primeru kristianuecha, ka andi?
10 Seguni libru Las cosas nuestras de cada día, primeru kristianuechaksï ísï “exesïrendi ini kʼuínchikuechani [...] komueska ambe ma engaksï kánikua jukaparharaenga imecha engaksï no jakajkuenga Tata Diosïni”. Grieguecha ka romanuechaksï jakajkusïrendi eska mándani kʼuiripu jatsikuarhisïrenga espiritu ma, enga kuájchakuenga o “nemani enga ísïka eska diosï ma, ka engajtsïni kuájchakujka engachi andajpenujka ka juchari irekuarhu” ka enga “mándani, kʼuínchinhajka ima jurhiatikua enga andajpenujka”, o kumpleaniu jimbo (Gran Enciclopedia Rialp). Ístu, uánikua uéxurhinistia enga mítinhaka eskaksï kumpleaniuecha jeuetakata jarhaska astrolojia ka oroskopuecha jingoni.
11 Mítiskachia jiájkani eskaksï kumpleaniuecha jeuetakata jarhaska no jurhimbiti jakajkukuechani jingoni ka sïkuamikua ambe jingoni, peru Tata Diosïri marhuarichaksï ístu no jeiapanhiantendi kumpleaniuechani máteru ambe jimbo. ¿Ambe jimbo? Jimbokaksï kaxumbitispka. Eratsisïrendiksï eskaksï no kánikua jukaparhakuespka komu paraksï kʼuínchikua ma úntani jimbokaksï andajpenuspka (Miqueas 6:8; Lukasʌ 9:48).c Sánderu sési, Jeobanksï kʼéri ambe exesïrendi ka imanksï diosmeiamukua arhisïrendi, jimboka imasï tsípikua íntskuapka (Salmo 8:3, 4; 36:9; Jaŋaskuecha 4:11).d
12. ¿Néna uá sánderu sésiini jurhiatikua enga ma uarhijka ka eska enga ma andajpenujka?
12 Enga Tata Diosïri marhuari ma marhuakujka asta uarhikuarhu jamberi, Tata Diosïni no méni mirikurhisïndi imani, i ambe arhikuekasïndi eska segurueska eska tsíntaaka (Job 14:14, 15). Jimbosï Eclesiastés 7:1 uandajti: “Sánderu sésiisti ambakiti arhinhakua ma ka eska ambakiti aseiti, ka sánderu sésiisti ima jurhiatikua enga ma uarhijka ka eska ima enga ma andajpenujka”. Ini textuni jimbo, “ambakiti arhinhakua” jindesti sési mítikateni, jo, sési mítikateni Tata Diosïni jimbo, jimbokachi kurhajchasïnga. Ka kánikua jukaparhakuesti eska ambe engajkuchi juramuminhaka eskachi jatsiska para kristianuecha miántani, no jindeska andajpenukua ma, sino uarhikuani ma, jo, Jesusiri, ima enga imeri “arhinhakua” kʼéri ambeeka, ka ini jimbochisï uáka pʼímutantskateni (Ebreu 1:3, 4; Lucas 22:17-20, TNM).
PASKUA KA SEMANA SANTA
13, 14. ¿Naniksï uéraski uánikua pʼindekuecha engaksï Paskua jimbo ka Semana Santa jimbo únhajka?
13 Nájkiruka uandanhajka eska Semana Santa ka Paskua jindeska para Jesusiri uarhikuani ka imeri tsíntskuani miántani, uánikua pʼindekuechani jataasti engaksï no jurhimbiti relijionirhu anapueka ka engaksï imecha uénga engaksï no jakajkuenga tata Jesukristuni. Ma ejemplu jindesti uanopikuecha. Libru Las Grandes Religiones Ilustradas, uandasïndi eska uánikua uéxurhini ante de tata Jesukristu jurhani, babiloniuechaksï “imecheri diosï úkatechanksï kʼéri exeasïrendi [...]. Sésiksï xukutantaasïrendi ka uekajchakuechanksï jatsikuasïrendi ka pulsera ka aniiu ambe; ambakiti jatakuechanksï jimbo jatsiasïrendi ka uanopetaasïrendiksï”.
14 ¿Jiókuarhipirini Jeoba eska kʼuínchinhapiringa imeri Uájperi tsíntskuani, kʼuínchikua ma jingoni enga no jurhimbiti relijionirhu uéraka? Méntku nómbe (2 Korintu 6:17, 18). Biblia no nani uandasïndi eskachi jatsiska para miántani Jesusiri tsíntskuani. Ísï jimbo, miántani Jesusiri tsíntskuani ka útasï Paskua arhirani, jindesti tsimani uelta sánderu no sési úni Tata Diosïni japarini.
NANI ENGA UÉRAKA NOCHE DE BRUJAS
15. ¿Nani uéraski Noche de Brujas, ka ambechi uá uandani inde fecheri ambe enga únhantajka?
15 ¿Nani uéraski inde pʼindekua enga arhinhajka Noche de Brujas (o enga inglesi jimbo jindeka Halloween enga arhikuekajka “víspera del día de Todos los Santos”)? Ini kʼuínchikua jimbo, meru pʼindenhasti sïkuamiri xukuparhanhani, duenderi ka máteru no sési jásï xukuparhakuechani, ka 31 de oktubrini jimbo úkuarhisïndi. I kʼuínchikua seltecheri tiempu jimbo uérasti engaksï Gran Bretaña ka Irlanda irekapka. Mándani uéxurhini, enga luna uinintaengia ante de 1 de nobiembri niárani, kʼuínchikuaksï ma úntasïrendi, enga arhinhaenga “Emenderi Kʼamarhukua” (Samhain). Íksï eratsisïrendi eska ima chúrikua, espirituechaksï úsïrenga jurhani tsípiticheri parhakpinirhu, ka eska espiritu ambarhaticha ka no ambarhaticha, echerirhuksï jámasïrenga. Ka jimbokaksï eratsisïrenga eska uarhiricheri alma kʼuanhatsintasïrenga imecheri kʼumanchikuarhu, tʼirekua ka itsïmakua ambeksï kéjtsïtakuasïrendi paraksï ima no ma ambe úkuani. Ísï jimbo, engaksï iásï sapiicha sïkuamiri ambeksï xukuparhajka o fantasmeri ka engaksï kʼumanchikuecharhu ísï nirajka uandaparini eskaksï no sési niátaaka engaksï no intsïnhaska ambe ma, ambe engaksï úni jarhajka no mítiparini, jindesti úni jarhani eska no kʼamakurhiaka kʼuínchikua ma engaksï no jakajkuticha újka.
PÍMBINHASÏ TEMBUCHAKUECHA TATA DIOSÏRI ORHEPATINI
16, 17. a) ¿Andisï jukaparhakue eskaksï nobiuecha Bibliani jingoni exeauaka pʼindekuechani engaksï tembuchakuecharhu únhajka jima engaksï ima irekaka? b) ¿Ambechi jatsiska para exeni kristianuecha engachi exeaka imani pʼindekuani enga jindeka arrosi o inde jásï ambe kʼuanikukuani nobiuechani?
16 No ióni jimbo nóteru “méni kurhandi[nhaatia] tembuchakua únhani” Kʼéri Babiloniarhu, jimboka kʼamajkunhaakia (Jaŋaskuecha 18:23). ¿Andi? Uánikua ambe jimbo, peru ístu jimboka úsïnga ambe engaksï demoniuecha tsitijka. Ka máruksï i járhati pʼindekuecha, tembuchakuecharhuksï úrakuarhisïndi, ka íksï uáti no sési jájkuni temungurhirikuani desde uénakuarhutki (Markusʌ 10:6-9).
17 Íksï pʼindekuecha, engaksï mámaru járhati jaka paisicharhu, úpirindiksï ísï xarharani enajkiksï no no sésii, peru ju je no mirikurhini eskaksï no jurhimbiti relijionirhu uéraska. Máruksï i járhati pʼindekuecha, imaestiksï engaksï úkuarhijka seguni paraka sési nikuauaka nobiuechani ka ístu inbitaduechani (Isaías 65:11). Exe je ejemplu ma: pʼindekua para arrosi kʼuanikukuani nobiuechani, konfeti o inde jásï ambe. Enga uénaka i ambe únhani, úpirindi jindeeni para tʼirekua íntskuani no sési járhati espirituechani paraksï i no no sési úkuani nobiuechani engaksï apenasi tembuchajka. Ístu, iónisï mítikuarhistia eska arrosi seguni úrakuarhesïnga para úni kánguarhinhani sapiichani, para sési irekanhani ka paranha ióni jamberi irekanhani. Jimbochisï jatsika para méntku no jámani indeni no sési járhati pʼindekuechani uáni, engachi uékaaka Tata Diosïri uékperakuarhu jarhani (arhinta je 2 Korintu 6:14-18).
18. ¿Náki Bibliarhu anapu prinsipiuechaksï jarhuataua imechani engaksï eratsini jaka tembuchani ka engaksï niuaka tembuchakuarhu?
18 Jeobaeri jántspirichajtuksï no jeiapanhiantaasïndi pʼindekuechani engaksï uáka úni eska tembuchakua ma o tʼirekua tembuchakuarhu ma no jukaparharanhaaka o enga uáka máru no sési pʼikuastakuani konsiensiani. Nóksï jukari arhasïndi alkoli oksï kauini, jimbokaksï miásïnga eska Biblia uandasïnga: “Jaue jurhimbitku jámani eska na terokuntajka [...], ka nóteru kʼuínchikuecharhisï jámani ka níjtu kauini” (Roma 13:13). Ístuksï no uásïndi tembuchakuechani engaksï kánikua kʼératiuaka o engaksï kánikua jukaparhaaka, engaksï nomasi jindeeka para ‘teparakuarhinhani’ imani ambe jimbo engaksï jatsikuarhika (1 Juanu 2:16). Ambe enga Jeoba uékajka jindesti eskaksï temungurhiricha tsípikua jingoni miántaaka imani jurhiatikuani engaksï tembuchaka ka nóksï kómu pʼikuarherani engaksï miántaaka.e
BRINDARINI, ¿RELIJIONIRHU UÉRASKI I PʼINDEKUA?
19, 20. ¿Ambe uandasïni libru ma enga meru mítikuka enga nema brindarijka, ka andiksïsï kristianuecha no újki ini pʼindekuani?
19 Tembuchakuecharhu ka méni engaksï kʼuiripuecha tánguarhijka, meru pʼindenhasti brindarini. Uéxurhini 1995 jimbo, libru ma enga meru mítika íri ambe, uandaspti eska brindarini “pʼindekua máeska engaksï kʼuiripuecha újka ka enga perika jima uéraka pʼindekua ma jimbo enga libasionicha arhinhaenga, nani engaksï kʼuiripuecha kéjtsïtakua úkuauenga diosïchani aiakuaparini itsïini jásï [...] paraksï ima diosïcha íntskuani ambe engaksï ima kurhakupiringa, ka i ambeksï úsïrendi kómarhikua ma úparini, engachi máru uandakuecha jimbo úpiringa uandani eskaksï i ambe uandasïrenga ‘¡eska ióni jamberiuaka!’ o ‘¡saludi!’” (International Handbook on Alcohol and Culture).
20 Peru ísïsti, uánikuaksï no ísï exesïndi eska brindarini jindeska ambe ma enga relijionirhu anapueka o jakajkukuecharhu engaksï no jurhimbitika. Peru, inde pʼindekua para kopani tarhatani, úpirindi ísï exekuarhini eska jindeska kómarhikua ma para “auandarhu”, para fabori ma kurhakuni uinhapikuani ma enga no ixú echerirhu anapueka. Tata Diosïri Karakata no jeiapanhintasïndi eskachi ísï jásï kurhajkuarhiaka eskachi újchakuranhaaka (Juanu 14:6; 16:23).f
“CHA ENGAJTSÏ UÉKAJKA JEOBANI, KURHUNHI JE INDENI AMBE ENGA NO SÉSIIKA”
21. ¿Náki kʼuínchikuechani no uáua kristianu ma, sea relijionirhu anapueni o nómbe, ka andi?
21 Ini parhakpini jimbo kánikua no sési jánhaxati, ka ma enga kulpa jatsika, jindesti Kʼéri Babilonia sea jimboka inchamukusïnga o nómbe. Máru paisichaksï mándani uéxurhini uásïndi kʼuínchikuechani, komueska karnabalicha, engaksï jimbo no sési járhati uarhakuecha jarhajka, o engaksï jimbo kʼéri ambe exejka na engaksï irekajka omosexualicha. ¿Sési japirini eska imecha engaksï uékajka Jeobani exepiringa indeni ambe o eskaksï nipiringa indeni kʼuínchikuechani jimbo? ¿Xarhatapirinksï eskaksï meru ikimchasïnga no sési jásï ambeni? (Salmo 1:1, 2; 97:10.) Kánikua sési jarhasti eskachi májkueni eratsiaka úni eska salmista enga kurhakupka Tata Diosïni: “Ú eskaksï juchiti éskuecha no exeaka indeni ambe enga ísku ambeeka” (Salmo 119:37).
22. ¿Ambe kʼuínchikuechani jimbo kristianu ma uá eratsikuarhini sini imeri konsiensia jurajkusïni para nirani o nómbe?
22 Jiáni enga úkuarhini jauaka kʼuínchikua ma enga jimbo kristianu ma no jatsika para jámani, jatsiskachi para jingontku jámani parachi no ísï xarharani enajkichi jeiapanhintani jaki imani kʼuínchikuani. Sésimindu uandasti Pablu: “Engajtsï tʼireaka o itsïmani o máteru ambe, ú je iámindu ambe para eska [Tata] Diosï kʼéri ambe arhinhaaka” (1 Korintu 10:31; exe je rekuadruni “Jarhuajperata para ambakiti ambe úni”). Peru ¿ambechi úpirini uandani ima pʼindekuecheri ka kʼuínchikuecheri engaksï no relijionirhu uéraka, ni politikarhu ka niksï paisirhu anapueni ka engaksï no uanajchakujka Bibliarhu anapu prinsipiuechani? Íichani jimbo, mándani kristianu jatsisti para eratsikuarhini niua o nómbe. Peru, ístu uétarhisïndi exeni náksï eratsisïni máteruecha, parachi no pekadu úraani.
JU JE ÚNI ESKA KʼÉRI AMBE EXENHAAKA TATA DIOSÏ, JUCHARI UANDAKUECHA KA ÚKUECHA JIMBO
23, 24. ¿Nénachi uá sési jorhentpini ambarhati juramukuechani engaksï Jeobaerika?
23 Iásï, uánikuechaksï úraasïndi ini kʼuínchikuechani engaksï meru pʼindenhaka únhani paraksï úni tánguarhini familia o amiguecha jingoni. Ísï jimbo, úpirindiksï eratsini eskachi Jeobaeri testiguecha jukari jatsikusïnga ka eskachi no uékaasïnga máteruechani. Enga ísïpiringa, uákachi iatsitakuarhu eianguani eskachi tsitisïnga tánguarhini familia ka amiguecha jingoni náki uéjki jurhiatikua ma interu uéxurhini jimbo (Proverbios 11:25; Eclesiastés 3:12, 13; 2 Korintu 9:7). Peru, uékasïngachi eskaksï kurhanguaka eskachi no agustu pʼikuarheraaka engachi tsïjpaaska ini tánguarhikuechani pʼindekuechani jingoni engaksï uáka ikiatani juchari Tata Diosïni engachi xáni uékajka, ka engaksï uanajchakujka imeri ambakiti juramukuechani (exe je rekuadruni “No ma ambejtsïni sánderu sési pʼikuastasïndi eska relijioni jurhimbiti”).
24 Enga nema kurhamarhiajka ambe ma Jeobaeri testiguechani, jimboka meru uékasïnga mítini ambe ma, imaksï sési mókukuantasïndi exeraapariani máru temaechani kapitulu 16 librueri ¿Ambemindusï jorhentpejki Biblia?g Peru uétarhisïndi miáni eska juchari ánchikuarhita no jindeska uarhiperata ma andani sino mintsitarhu niárakuani. Ísï jimbochisï jatsika para méntkisï respetu jingoni uandani, no uinhamarhitspini, ka eska “sési eratsikateuaka” ísï “komueska ma tʼirekua enga sési ásperakata jarhajka itukua jimbo” (Kolosasi 4:6).
25, 26. ¿Nénachi uá uinhaperakuantani jakajkukuani juchari sapiichani ka jarhuataani paraksï sánderu uékani Jeobani?
25 Jeobaeri testiguechachi sési mítiska ambe ma. Mítiskachi andichisï uájki o jámani kʼuínchikua ma jimbo o nómbe (Ebreu 5:14). Peru ístu uétarhisïndi eskaksï juchari sapiicha ístu mítiaka ini ambe. Engachi jánguarhintajka parakaksï ima kurhanguauaka Bibliarhu anapu prinsipiuechani, engajtsïni jarhuatajka parachi erakuni ambe ma úni, uinhaperantasïngachi imecheri jakajkukuani, ka jorhendaasïngachi paraksï úni Bibliani jingoni mókukuantani imechani engaksï arhiajka andiksïsï jakajkujki ambe ma. Ka ístuchi jarhuataasïnga paraksï Jeobaeri uékperakuarhu jarhani (Isaías 48:17, 18; 1 Pedru 3:15).
26 Peru ísïsti, parachi kómarhini Tata Diosïni “mintsita jingoni ka sési jimbo”, no solu uétarhisïndi no uáni o jámani imani kʼuínchikuechani jimbo enga Biblia no jeiapanhintajka (Juanu 4:23). Máteru kapitulurhu, jorhenguarhinchi jauaka imani juramukuani enga arhijka eskachi jatsiska para jurhimbitiini iámu juchari irekuarhu. Exeakachi eska no ma ambe jarhaska enga sánderu sésiika ka eska kurhajchani Tata Diosïni, nájkirukaksï máru uandajka eska no káni sésiiska indeni ambe úni.
a Exe je rekuadruni “¿Sési jaki jámani ini kʼuínchikuarhu?”.
b Seguni tiempuecha engaksï Bibliarhu jaka, ka istoria, jamberi Jesusi uéxurhini 2 jimbo andajpenupti ante de juchari tiempu, kutsï jimbo enga arhinhaenga etanim, enga juchari tiempurhu jindeka entre septiembrini ka oktubrini (exe je libru Perspicacia para comprender las Escrituras, vol. 2, pájinecha 84, 85, engaksï Jeobaeri testiguecha úka).
c Exe je rekuadruni “Jurhiatikuecha engaksï ‘míndaajka’ imecha engaksï kómarhijka Noambakitini”.
d Moisesiri Lei uandasïrendi eska uarhiiti ma jatsispka para kéjtsïtakua ma úni méntkisï enga kánguarhienga sapini ma, ka i ambe miátpentasïrendi eskaksï táticha kéritasïnga uájpechani pekadu (Levítico 12:1-8). I ambe jarhuataaspti israelitechani paraksï no kʼéri ambe exeni enga nema andajpenuaenga, ka paraksï no jámani imani pʼindekuechani jatsiani andajpenukueri, májkueni jásï eskaksï ima engaksï no jakajkuenga Tata Diosïni (Salmo 51:5).
e Exea je imani tanimu artikuluechani engaksï tembuchakueri ambe uandajka ka reunioni sosialicheri La Atalaya 15 de oktubrini 2006, pájinecharhu 18-31.
f Exe je La Atalaya 15 de febreru 2007, pájinecha 30, 31.
g Engaksï Jeobaeri testiguecha úka.
h Parachi sántku úntani, pirenchichantkuchisï arhini juáka, peru prinsipiuechaksï ístu jindesti para erachicha.