“Tata Diosï kánikua jaiapanhentasïreendi Estebanini ka íntskuspti uinhapikua” Ambe engachi jorhenguarhijka enga

1-3. a) ¿Ambe nitamakuarhispi Estebani, ka ambe úspi? b) ¿Náki kurhamarhikuechanchi exeani jaua?

ESTEBANI uánikua juesiichani japarini jarhasti kʼéri kuartu ma jimbo enga templurhisï no iauani jaka. Ima 71 Kʼérati Juesiichaksï uaxakatixati ka listuksï jarhastia para Estebanini jusgariini. Íksï Kʼérati Juesiicha kánikua juramukua jatsisti ka kurhajchanhasïndiksï, ka sáno iáminduechaksï no sáni pʼamojkusïndi Estebanini. Kaifási pʼitajkuarhiasti enga jindeeka sánderu kʼéri saserdoti, i mismu jindeesti enga orhejtsïkuapka Kʼérati Juesiichani jiáni engaksï Jesúsini uánditarkuarhipka. ¿Chéni jaki Estebani?

² Nómbe, imeeri kánharhikua ísï xarharasïndi ‘enajki ánjeli máe’ (Úku. 6:15). Jo, xarhanharhixati eska no sáni chéxaka ka eska no uandanhiaxaka ísï eskaksï ánjeliicha engaksï Tata Diosï Jeobaeri ambe uandantajka. Estebani balori xarhatasïndi. Juesiicha jamberiksï exexati eska Estebani no sáni chéxaka. ¿Joperu andisï no sáni chéni jaki?

³ Uánikua ambechi jorhenguarhiaka engachi míteska andisï no sáni chéni jaki. Joperu orheta ju je exeni andisï Estebani ini ambe nitamakuarhini jaki. ¿Antesi néna xarhataspia eska ísïiska ambe enga jakajkuenga? ¿Ka nénachi uaa juchajtu májkueni úni?

“Kánikuaksï ikiataaspti iretarhu anapuechani” (Úkuecha 6:8-15)

4, 5. a) ¿Andichisï uandajki eska Estebani kánikua jarhuataxapka jimbanhi kúnguarhikuani? b) ¿Andisï tekstu uandajki eska Tata Diosï jaiapanhentasïreenga Estebanini ka uinhapikua íntskuni?

⁴ Máteru kapitulu jimbochi exeskia eska Estebani kánikua jarhuataxapka jimbanhi kúnguarhikuani. Jo, Estebani imani siete achamasïicha jingoni jarhaspti engaksï kaxumbikua jingoni jarhuataani japka apostoliichani. Ka xarharasïndi eska kánikua kaxumbitiispka jimboka ‘Tata Diosï íntskuspka uinhapikua para kʼérati milagruechani uaani’ “ka ístu uánikua máteru ambe”, ísï eskaksï na úpka máru apostoliicha. Ístu karakata uandasïndi eska ʻTata Diosï kánikua jaiapanhentasïreenga Estebanini ka íntskuspti uinhapikuaʼ (Úku. 6:8). ¿Ambe arhikuekasïni i ambe?

⁵ Uandakua griegu enga ísï tradusirikuarhijka ‘Tata Diosï jaiapanhentasïreendi’, ístu úpirindi arhikuekani “sési pʼikuastpeni”. Jiájkani exesïngachi eska Estebani jorhenaspka sési pájperani kʼuiripuecha jingoni. Sési kámpisïreendi ka janhanharpini, ka xarhatakuasïreendi imani kʼuiripuechani engaksï kurhajcheenga eska mintsita jingonisï aianguauenga ambe ma ka eska marhuakuapiringa. Ka enga tekstu uandajka eska Tata Diosï kánikua “uinhapikua” íntskuspka, arhikuekasïndi eska kaxumbikua jingoni úsïreenga ambe enga espiritu santu arhienga. Ima no méni kʼéramakuarhispti imani ambe jimbo enga jorhenapka úni, sánderu sési, méntkisï kʼéri ambe arhisïreendi Tata Diosï Jeobani ka méntkisï uandanhiasïreendi kʼuiripuechani jimbo. Jimboksïsï imeeri enemiguecha xáni ikiakuendi.

6-8. a) ¿Ambeksï xáni kʼamanharhitantaxapi Estebanini, ka andi? b) ¿Andijtsïnisï kánikua jarhuataa Estebaniiri ejemplu?

⁶ Uánikuechaksï niáraspti arhirperani Estebani jingoni “joperuksï no úsïreendi andani jimboka Estebani kánikua jánhaskatiispka ka jimboka espiritu santu jimbo uandasïreenga”.a Engaksï exepka eskaksï no ma ambe úsïreenga úni, “sïpatikuarkuksï arhiaspti máru acheetiichani” eskaksï chkuanderakua ambe uandapiringa imeeri ambe. Ístu, “kánikuaksï ikiataaspti iretarhu anapuechani, orhejtsïkutiichani ka karariichani”, ka inde ambe úspti eskaksï afuersa pápiringa Estebanini Kʼérati Juesiicha jingoni (Úku. 6:9-12). Ka jimaksï uandaspti eska Estebani no sési ambe uandaspka Tata Diosïiri ambe ka Moisésiiri. ¿Andiksïsï ísï uandapi?

⁷ Orheta, uandasptiksï eskanha Estebani no sési ambe uandaspka Tata Diosïiri ambe, jimbokanha no sési uandaspka Jerusaléni anapu templueri ambe (Úku. 6:13). Ka tátsekua, uandasptiksï eskanha no sési ambe uandaspka Moisésiiri ambe, jimbokanha no sési ambe uandaspka Leiiri ambe enga Moisési íntsaantapka israeliteechani ka eska uékasïreenga mójtakuani imani pʼindekuechani enga Moisési jorhendaapka. Kʼéri ambeksï kʼamanharhitantaxapti jimbokaksï jiáni anapu judiuecha kánikua jukaparharasïreenga templuni ka ambe enga Lei uandeenga ka ístuksï kánikua jukaparharaasïreendi imani pʼindekuechani engaksï kuturhutaapka. Ini ambe jingoni, uandasïreendiksï eska Estebani kánikua no sési úriispka ka eska jatsispka para uarhini.

⁸ Nójtsïni ísku pakatasïndi engaksï máru relijionirhu anapuecha májkueni ambe uaaka paraksï no sési kaani Tata Diosïiri marhuariichani. Asta iásï jamberi, uánikua relijionichaksï arhiasïndi juramutiichani paraksï no sési kaani Jeobaeri testiguechani. ¿Ambechi jatsiski para úni engaksï chkuanderakua ambe uandaaka juchaari ambe? Ju je exeni Estebaniiri ejempluni.

Balori jingoni uandantasïndi Tata Diosïiri ambe “enga xáni kʼéri ambeeka” (Úkuecha 7:1-53)

9, 10. ¿Andiksïsï máru uandajki eska no sési jarhaspka ambe enga uandapka Estebani Kʼérati Juesiichani japarini, ka ambechi jatsiski para miántani?

⁹ Párrafu 2 jimbochi exeska na enga Estebani no sáni chéni japka ka eska ísï xarhanharhixapka enajki ánjeli máepi jiáni enga kurhaani japka na engaksï no sési uandani japka imeeri ambe. Ka tátsekua, Kaifási kurhamarhisïndi: “¿Ísïiski i ambe?” (Úku. 7:1). Jiájkani iásï Estebani uandaatia, ka kánikua sési uandasïndi.

¹⁰ Máru kʼuiripuechaksï uandasïndi eska Estebani jukari ióni uandaspka ka eska no úspka kuájpikuarhini. ¿Joperu ísïiski i ambe? Nómbe. Sánderu sési, ambakiti ambejtsïni exerasti na engachi jatsika para mókukuantani imeechani engaksï no sési ambe uandani jauaka ambakiti aianhperakueri (1 Ped. 3:15). Ju je miáni eskaksï uandaxapka eska Estebani no sési uandaspka Tata Diosïiri ambe ka Moisésiiri ambe jimbokanha no sési uandaspka templueri ka Leiiri ambe. Ísï jimbo, paraka Estebani úpiringa kuájpikuarhini, israeliteecheeri ambe uandantasïndi ka imani ambejkusï uandantajti enga sánderu jukaparhakuepka. Ju je exeni ambe ka ambe uandantaspi.

11, 12. a) ¿Andisï Estebani Abraániiri ambe uandapi? b) ¿Ka andisï Joséeri ambe uandapi imeeri arhijtsïkperatarhu?

¹¹ Ima tiempuni engaksï tribuecheeri taati jémbeecha irekapka (Úku. 7:1-16). Estebani Abraániiri ambe ueenaspti uandantani. Ísï eska Estebani, iámindu judiuechaksï kánikua janhanharhisïreendi Abraánini. Ísï jimbosï Estebani indeeri ambe ueenapti uandani para xarhatani eska Tata Diosï Jeoba “enga xáni kʼéri ambeeka”, xarhakuspka Abraánini jiáni enga Mesopotamia japka (Úku. 7:2). Ka Abraáni niáraspti ísï irekani komueska uérakua anapu ma imani Echeri jimbo enga Aiaminhapka ka ístu no méni jatsispti templu ma nijtu Moisésiiri Leini. Ísï jimbo, ¿né úpirini uandani eska meru uétarhisïreenga inde ambe para Tata Diosï Jeobani marhuakuni?

¹² Tátsekua, Estebani Joséeri ambe ueenasïndi aianguani, imeeri engaksï ístu kánikua janhanharhienga. José ambakiti achamasï máespti enga Abraániiri desendientiipka. Ixú, Estebani miátaantaxati eskaksï Joséeri mismu ermanu jémbeespka, Israeli anapu tribuecheeri taati jémbeecha, engaksï no sési kámapka Joséni ka ísïksï atarantani komueska jántspiri ma. Joperu Tata Diosï Joséni úraspti parakaksï Israeli anapuecha no uarhipiringa kʼarhingua jimbo. Estebani sési mítespti eska José ka tata Jesukristu sáno májkueni ambeksï nitamakuarhispka, joperu no uandaspti indeeri ambe parakaksï seguiriini japiringa kurhajchani.

13. ¿Andisï Estebani Moisésiiri ambe uandapi para xarhatani eska chkuanderakuespka ambe engaksï kʼamanharitantani japka, ka ambe sánhani arhispi kurhangutaraani?

¹³ Ima tiempuni enga Moisési irekapka (Úku. 7:17-43). Estebani uánikua ambe uandaspti Moisésiiri ambe. Ka sési úspti jimboka uánikua Juesiicha engaksï jima japka saduseuesptiksï ka indeechaksï imantku Biblieri anapu libruechani jakajkuasïreendi enga Moisési karaapka. Ístu, ju je miáni eskaksï uandaspka eska Estebani no sési uandaspka Moisésiiri ambe. Joperu imani ambe jimbo enga uandapka xarhatakuaspti eska kánikua janhanharhisïreenga Moisésini ka Leini, ka ístu eska ima ambe engaksï ima uandapka chkuanderakua ambeespka (Úku. 7:38). Ka ístu uandaspti eskaksï máru israeliteecha no uékaspka eska Moisési kuájpiapiringa. Ísïksï kámaspti jiáni enga ima 40 uéxurhini jatiriipka. Ka 40 uéxurhini sánderu tátsekua, uánikua ueltaksï nóteru uékasptia kurhajchani.b Estebani sánhani arhispti arini ambe kurhangutaraani: eskaksï israeliteecha uánikua uelta no jiókuarhiaspka imani achamasïichani enga Tata Diosï Jeoba erakuapka para orhejtsïkuani.

14. ¿Ambe jukaparhakua ambe uandaspi Estebani enga Moisésiiri ejempluni úrapka?

¹⁴ Estebani miátantaaspti imeechani engaksï kurhajchani japka eska Moisési mismu uandaspka eska Tata Diosï erakupiringa profetani ma ísï eska ima. ¿Népirini ka nénaksï kámapirini? Estebani asta últimu aianguaspti indeni ambe. Joperu orheta aianguaspti na enga Tata Diosï Jeoba uandontskuarhepka Moisési jingoni anhatapu sapichurhu uératini enga kurhini japka ka na enga ima lugari niárapka pímbinhasïini. Ini ambe jingoni, xarhataspti máteru ambe enga ístu jukaparhakueka: eska náki uéjki lugari uaaka pímbinhasïini. Ini ambe kurhanguparini, ¿uékasïni Tata Diosï Jeoba eska ma lugari jimbojku kómarhinhaaka, komu Jerusaléni anapu templurhu? Ju je exeni ambe enga Estebani uandapka.

15, 16. a) ¿Andisï Estebani tabernakulueri ambe uandapi? b) ¿Estebani néna úraspi imeeri arhijtsïkperatarhu Salomóniiri templuni?

¹⁵ Ima tiempuni enga tabernakulu ka templu japka (Úku. 7:44-50). Estebani miátaantaspti Kʼérati Juesiichani eska antesi de templu únhani, Tata Diosï Jeoba arhispka Moisésini eska úpiringa tabernakulu ma, kʼumanchikua sïkuiriiri ma enga úpiringa móskunhani para jima kómarhini. Jiájkani enga Moisési jima kómarhipka Tata Diosï Jeobani, ¿úpirini nema uandani eska tabernakulu no xáni kʼéri ambeespka eska templu?

¹⁶ Tátsekua Estebani uandasïndi eska Salomónisï úpka templuni Jerusaléni ka na enga kómarhipka Tata Diosïni, ka uandaspti ambe enga kómarhipka: “Auandarhu anapu Tata Diosï no irekasïndi imani kʼumanchikuecharhu engaksï kʼuiripuecha uaajka” (Úku. 7:48; 2 Crón. 6:18). Ísïisti eska Tata Diosï Jeoba úrasïnga templu ma paraka úkuarhiaka ambe enga ima uékajka, joperu no indeni ambejkusï uaati úrani. Jiájkani, ¿andiksïsï Tata Diosïiri marhuariicha eratsepirini eska para sési kómarhini Tata Diosï Jeobani uétarhipiringa kʼumanchikua ma engaksï kʼuiripuecha úka? Ka para sánderu sési kʼamarhukuni imeeri arhijtsïkperatani, Estebani uandasïndi ambe enga Isaíasi karapka: “Auanda jindeesti juchiiti kʼéri uaxantskua ka echeri jindeesti juchiiti jatandukua. Jiájkani, ¿na jásï kʼumanchikuajtsïni ma úchiaa? Ísï uandasïndi Tata Diosï Jeoba. ¿O nani uaa ji mintsikuarhini? ¿Andi no jísïni ú iámindu i ambe juchiiti jájki jingoni?” (Úku. 7:49, 50; Is. 66:1, 2).

17. ¿Estebani néna xarhataspi eskaksï no sési úxapka imeecha engaksï kʼamanharhitantani japka? b) ¿Néna kuájpikuarhispi imeeri arhijtsïkperata jingoni?

¹⁷ Asta ixú jamberi, ¿a no eska Estebani kánikua sési uandaskia ka xarhatani na engaksï no sési úni jaka imeecha engaksï kʼamanharhitantani jaka? Xarhatasti eska Tata Diosï Jeoba mámaru ambe úrasïnga paraka úkuarhiaka ambe enga ima uéjka ka no ma ambejku úrasïndi nijtu pʼindekuechani. Kʼérati Juesiichaksï kánikua sési exesïreendi templuni ka imani pʼindekuechani engaksï kʼuiripuecha kuturhutaapka Leirhu, joperuksï no úsïreendi sési kurhanguni andisï Tata Diosï Jeoba íntskuapi Leini ka andisï úpi templuni. Enga Estebani arhijtsïkuani japka, ísïispti enajki kurhamarhiani japi: “¿Andi nóchi sánderu janhanharhini jarhasïni templuni ka Leini engachi kurhajchajka Tata Diosï Jeobani?”. Ka i ambesï sánderu jukaparhakuepti. Ambe enga Estebani uandapka xarhataspti eska ima no ma ambe no sési úxapka, jimboka jánguarhintaxapka sési kurhajchani Tata Diosï Jeobani.

18. ¿Nénachi uaa májkueni úni eska Estebani?

¹⁸ ¿Ambechi jorhenguarhisïni imeeri ambe enga Estebani uandapka? Orheta, eska sési míteaspka Karakateechani. Ísï jimbo, juchajtuchi jatsisti para ambakiti jorhenguarhiri máeni parachi ‘sési úrani Tata Diosïiri uandakuani’ (2 Tim. 2:15). Ístujtsïni Estebani jorhendasïndi eskachi jatsiska para sési uandontskuarhekuni kʼuiripuni ka iatsitakuarhu. Nájkiruka sáni úkua jukapka imani kʼuiripuechani uandontskuarhekuani, Estebani úspti sáni ióni uandontskuarhekuani imeeri ambe engaksï imeechajtu jakajkuenga ka engaksï kánikua janhanharhienga. Ístu, kánikua janhanharhikua jingoni uandajpaaspti kʼéri achamasïichani jimboka arhiaspka “taatiicha” (Úku. 7:2). Juchajtuchi jatsiska para ‘iatsitakuarhu ka kánikua janhanharhikua jingoni aianhpini’ jurhimbikua ambe Tata Diosïiri (1 Ped. 3:15).

19. No sáni chéparini, ¿ambe arhiaspi Estebani Kʼérati Juesiichani?

¹⁹ ¿Joperu nóchi uandantaa jurhimbikueri ambe nomasi parachi no no sési pʼikuastani nemani? ¿Ochi ménderueni aianguaua kʼuiripuechani Tata Diosï Jeobaeri juisiueri ambe nomasi paraksï no no sési pʼikuarherani? Nómbe. Ju je ménderu exeni ambe enga úpka Estebani. Nájkiruka ambakiti arhijtsïkperata ma íntsaapka, Estebani exespti eska no úspka mintsitarhu niárakuani Juesiichani. Ísï jimbo, espiritu santu jarhuataspti paraka últimu no sáni chépiringa ka arhiani imani Juesiichani eskaksï sési sési májkueniispka eska imeecheeri ióntki anapu parientiicha engaksï no jiókuarhipka Joséni, Moisésini ka iámu profeteechani (Úku. 7:51-53). Ísïisti, ima Kʼérati Juesiicha engaksï jima japka uándikusptiksï Mesíasini enga Moisési ka profeteecha uandapka eska jupiringa. ¡Imeechaksïsï méntku no sáni kurhajchani japti Leini!

“Jesúsi, juchiiti Tata, jíkeni íntskuntaxaka juchiiti tsípikuani” (Úkuecha 7:54–8:3)

20, 21. Enga Estebani kʼamarapkia arhijtsïkpini, ¿ambeksï úspi juesiicha ka néna uinhaperantaspi Tata Diosï Jeoba Estebanini para no chéni?

²⁰ Jimbokaksï méntku no ma ambe úspka mókukuntani Estebanini, nóteruksï úsptia pʼíngukuarhini ka úndasptiksï kirisïmiantani sïniichani jimbokaksï kánikua ikiaxapka. Iásï kʼóru Estebani sési mítesptia ambe engaksï úkupiringa, májkuenksï no sési kámapirindi eska tata Jesukristuni.

²¹ Estebani niáraspti uinhapikuarhintani ka no chéni jimboka Tata Diosï Jeoba jánhaskua ma exeraspka jimboka xénchasïreenga. Jima Exespti na enga xáni kʼéri ambeeka Tata Diosï ka imani jingoni jarhaspti Jesúsi, imeeri jurhijkandani jimbo. Jimajkani ueenaspti uandantani ambe enga exeni japka, joperuksï juesiicha óndikuarhispti. ¿Andi? Jimboka Jesúsi imani mismu juesiichanisï arhiapka eska ima Mesíasiispka ka eska no ióni jimbo imeeri Taatiiri jurhijkandani jimbo japiringa (Mar. 14:62). Ísï jimbo, ima jánhaskakua xarhataspti eska Jesúsi no chkuanderaxapka. ¡Xáni no sési ambe, ima Kʼérati Juesiichaksï traisionariispti ka uándikuni Mesíasini! Últimu, iáminduechaksï pásïndi Estebanini paraksï tsakapuechani kʼuaniraani ka uándikunksï.c

22, 23. ¿Néna sáno májkueni uarhiski Estebani eska tata Jesukristu, ka andichisï jatsi para májkueni mintsikani eska ima?

²² Estebani sáno májkueni uarhispti eska imeeri Tata, pínandikua jingoni imeeri mintsitarhu, mintsikaparini Tata Diosï Jeobani ka eskaksï puáminhantapiringa imeecha engaksï atani japka. Imeeri últimu uandakuechaksï jindeespti: “Jesúsi, juchiiti Tata, jíkeni íntskuntaxaka juchiiti tsípikuani”. Jamberi jimbosï ísï uandapti jimboka útasï exexapka Achamasïiri Uájpani imeeri Taati jingoni jarhani. Ka ístu xarharasïndi eska kánikua mintsikasïreenga ambe enga uandapka tata Jesukristu: “Ji jindeeska tsíntskua ka tsípikua” (Juanu 11:25). Tátsekua uinhachaparini kómarhispti: “Tata Diosï Jeoba, asï miá ambe engaksï no sési úni jaka iicha”. Ka enga na ísï uandapkia, uarhispti (Úku. 7:59, 60).

²³ Peeka Estebani jindeepka primeru Jesúsiiri chúxapati enga ísï uándikunhapka (exe je rekuadruni “Estebani, orheta testigu enga uándikunhaka”). Joperu no inde últimuepirindi. Desde iónisïa, máru relijioniiri anapuecha, politikuecha ka máteru kʼuiripuecha niárastiksï uándikuani Tata Diosï Jeobaeri marhuariichani. Joperu na uéjkijtsïni ísï kámani, jatsiskachi para májkueni mintsikani eska Estebani. Ka jimboka Jesúsi Reiiskia ka Tata Diosï Jeoba kánikua uinhapikua íntskuni, no ma ambe uaati pʼínguni para tsítaantani imeechani engaksï no méni jurajkuka (Juanu 5:28, 29).

24. ¿Néna apoiariispi Saulu engaksï Estebanini uándikupka, ka Estebaniiri uarhikua néna jarhuataaspi máteruechani?

²⁴ Jiáni engaksï Estebanini tsakapuecha jingoni atani japka, jima jarhaspti tumbi ma enga Saulu arhinheenga. I sési exexapti ambe enga úkuarhini japka. Ka asta kuidarixapti imeecheeri xukuparhakuani engaksï tsakapu jimbo atani japka Estebanini. Ka no ióni jimbo, Saulu mismu ueenaspti no sési kaani kristianuechani. Joperu sánderu orhepatini, Estebaniiri uarhikua jarhuataapirindi kristianuechani paraksï méntkisï tekaantani asta uarhikuarhu jamberi. Ka asta jarhuataspti Sauluni jamberi, enga sánderu orhepatini ísï mítekateepkia komu Pablu, jimboka niáraspka mintsita jingoni móantani imani ambe jimbo enga úpka (Úku. 22:20). Ima mismu uandaspti eska ‘no sési ambe uandasïreenga Tata Diosïiri ambe’, ‘no sési kaani imeeri iretarhu anapuechani’ ka kʼéramakuarhini (1 Tim. 1:13). I ambe xarhatasïndi eska Pablu no méni mirikurhispka Estebanini ka nijtu ambe enga uandapka. Jimbosï uánikua imeeri arhijtsïkperateecharhu ka karteecharhu imani ambe úrapti enga Estebani uandapka (Úku. 7:48; 17:24; Ebr. 9:24). Ka tátsekua Pablu niáraspti májkueni mintsikani ka balori jukani ísï eska Estebani, ima achamasï enga ‘Tata Diosï kánikua jaiapanhenteenga ka íntskuni uinhapikua’. Iásï ju je kurhamarhikuarhini: “¿Jíjtuni májkueni uaa?”.