Tsípitiksï uérasïndi kʼéri janikuarhu uératini

ENGA na uánipani japka kʼuiripu parhakpinirhu, uénaspti etsakuarhini pekadu ka no sési jarhati úkuecha. Enoki, Tata Diosïri ánchikuarhiri ma enga irekapka imani jurhiatikuechani jimbo, uénaspti aianguani kʼuiripuechani eska Jeoba kʼamajkuapiringa iámindu no sési úrichani. Joperu no nema jakajkuspti ambe enga ima uandaenga, ka sánderu kánipaxaptiksï no sési jarhati úkuecha. Joperu no xántku ambespti, ístu máru ánjilicha nóteruksï uékasptia kurhajchani Jeobani, jurajkusptiksï imecheri ánchikuarhitani, kʼuiripuksï úkuarhintaspti ka tembuchasptiksï uánikua iurhitskirichani jingoni. Engaksï uénapka kánguarhiani uájpechani, íksï sapicha kánikuaksï kʼésïrendi ka sánderuksï uinhapispti eska máteru kʼuiripuecha, ini iójtarechani arhiasïrendiksï nefilimi, ka íksï uénaspti sánderu no sési jántskani Echerini imeri úkuechani jimbo. ¿Úsïnchi jánhaskani, na enga xáni no sési pʼikuarheraenga Tata Diosï, enga exeni japka na enga imeri kuerakata xáni no sési japkia?

Enga Enoki uarhipkia, jarhaspti máteru achamasï enga ambakiti kʼuiripuepka: Noe. Xáni ima ka imeri familia jánguarhintasïrendiksï para sési jarhani Tata Diosïni japarini. Ma jurhiatikua, Tata Diosï eratsispti kʼéri janikua ma juani para no sési úrichani kʼamajkuani. Joperu Tata Diosï no uékasïrendi eska ima ambakiti kʼuiripu Noe ka ni animalichaksï uarhipiringa. Isï jimbosï Tata Diosï arhipti Noeni eska úpiringa arka ma, ima arka isïpirindi komueska kaja iósti ma. Noe ka imeri familia jatsisptiksï para jima inchani ka ístu jima incharaani mámaru jarhati animalichani. Noe kurhajchaspti Tata Diosïni, ka sáno kuarenta o sinkuenta uéxurhini ánchikuarhispti para úni arkani. Ístu imani jurhiatikuechani jimbo, úspti máteru ánchikuarhita, enga “jurhimbiti uandajtsïkpiamka” (2 Pedru 2:5). Noe aianguaspti kʼuiripuechani eska no ióni jimbo jupiringa Kʼéri Janikua ma, joperu no nema jakajkuspti. Niáraspti jurhiatikua enga Noe ka imeri familia ka animalicha inchapkaksï arkarhu. Jiájkani, Tata Diosï míkaspti puertani ka uénaspti janini.

Kʼéri janikua iámu Echerini ójchakuraspti, jimboka kuarenta jurhiatikua ka kuarenta chúrikua janispka. No sési úrichaksï uarhispti. Enga nitamapkia máru kutsïcha uénaspti sánhani arhini itsï kétsini, ka arka juata ma jimbo anhaxurhispti. Ma uéxurhini nitamaspti paraka Noe ka imeri familiemba úpiringaksï uéntani arkarhu. Jeiapanhintskua jimbo, Noe kéjtsïtakua ma úkuspti Jeobani. Tata Diosï aiakuspti Noeni eska nóteru méni kʼamajkupiringa kʼuiripuni kʼéri janikua ma jimbo. Ka parakaksï jakajkuni, Jeoba xupakata ma xarhataspti. Na engaksï jatini kʼuiripuecha exepiringa xupakatani, míantapirindiksï ambe enga Jeoba uandapka.

Enga na nitamapkia inde Kʼéri Janikua, Tata Diosï arhiaspti kʼuiripuechani ambe engaksï jatsipka para úni. Sésikua íntsaspti paraksï arhani animaliri kʼuiripeta, joperu juramukuaspti eskaksï no jámapiringa iurhiri arhani. Ístu juramukuaspti eskaksï iápuri isï etsakuarhipiringa. Joperu uánikuecha, nóksï kurhajchaspti ini juramukuani ka tánguarhisptiksï kʼéri ireta ma jimbo, ka uénasptiksï kʼéri kʼumanchikua ma úni, jimboka isï juramukuaspka achamasï ma enga Nemrodi arhinhaenga. Joperu Tata Diosï anhaxustaspti ánchikuarhitani. ¿Néna? Úparini eska kʼuiripu kʼéri iretarhu anapuecha —enga arhinhaenga Babeli ka tátsekua Babilonia— uénapiringaksï mámaru jásï idiomechani uandaani. Ka jimbokaksï nóteru úsïrengia kurhangutsperani, nóteruksï úsïrendia ánchikuarhini ka jiájkani kʼóru uénasptiksï etsakuarhini.

(Pʼitakata jarhasti Génesis kapituluecha 6 a 11 ka Judasʌ 14, 15.)