¿Nénajtsï uá mítintani religioni jurhimbitini?

1. ¿Májku religioni jarhaski enga jurhimbitika?

Jesusi ka imeri chúxapaticha, religioni jurhimbitirhuksï jámasti. Ka Jesusi uandasti eska i religioni ísïska eska xanharu ma enga tsípikuarhu pájpijka ka eskaksï no uánikueska engaksï exentajka (Mateu 7:14). Tata Diosï imechantkusï jaiapanhiantajti engaksï kómarhijka eska na uandajka Biblia. Ka imecha engaksï ísï úni jaka, májku religioni jimboksï jarhasti. Arhinta je Juanu 4:23, 24; 14:6, ka Efesu 4:4, 5.

Exe je bideuni ¿Jaiapanhiantasïni Tata Diosï iámindu relijionichani?

2. ¿Ambe uandaspi Jesusi no jurhimbiti kristianuecheri ambe?

Jesusi uandaspti eskaksï japiringa máru engaksï ísï xarharapiringa enajkiksï ambakiti kristianue, peruksï no jurhimbiti jorhentpepirindi. Jatsikuarhiastiksï templuechani paraksï xarhatani eskaksï kristianueska. Perujtsï cha uáka mítini eska no ísïska, jimboka religioni jurhimbitijkusï újka úni eskaksï kʼuiripuecha ambakiti jángua ma jatsiaka. Arhinta je Mateu 7:13-23.

3. ¿Nénajtsï uá mítiantaani imechani engaksï jurhimbiti religionirhu jaka?

Exe je i iúmu ambe:

• Exesïndiksï Bibliani komueska Tata Diosïri Uandakua. Jánguarhintasïndiksï ísï irekani eska Biblia na uandajka ka nóksï ísïsti komueska imecha engaksï sánderu jukaparharajka kʼuiripuecheri eratsikuechani (Mateu 15:7-9). Nóksï aianhpisïndi ma ambe, ka máteruksï ambe úni. Arhinta je Juanu 17:17 ka 2 Timoteo 3:16, 17.

• 

  Jukaparharasïndiksï Tata Diosïri arhinhakuani, Jeoba. Jesusi jukaparharasïrendi Tata Diosïri arhinhakuani, jimbosï jánguarhintapti mítitarpini. Jesusi jarhuataspti kʼuiripuni parakaksï mítipiringa Tata Diosïni ka jorhendaaspti nénaksï kómarhikua úni paraka Tata Diosïri arhinhakua pímbinhajkunhantapiringa (Mateu 6:9). Jima engajtsï irekaka, ¿náki religioni jorhentpisïni Tata Diosïri arhinhakuani? Arhinta je Juanu 17:26 ka Romanos 10:13, 14, NM.

• Eianhpisïndiksï Tata Diosïri Reinueri ambe. Jeoba axaspti Jesusini paraka aianhpipiringa inde ambakiti ambe enga Tata Diosïri Reinu uáka. Tata Diosïri Reinujkusï uáti sési pentani iámindu ambe. Jesusi eianhpisti i Reinueri ambe asta jiáni jamberi enga uándikunhapka (Lukasʌ 4:43; 8:1; 23:42, 43). Jesusi uandaspti eskaksï imeri chúxapaticha eianhpipiringa i Reinueri ambe. Engaksïni nema uandontskuarhichipiringa Tata Diosïri Reinueri ambe, ¿náki religionipirini? Arhinta je Mateu 24:14.

• Nóksï úsïndi ambe enga ixú parhakpinirhu únhajka. Jesusiri chúxapatichaksï no inchamukusïndi politikarhu ka ni kʼuiripuecheri arhijperakuecharhu (Juanu 17:16; 18:36). Ístuksï no úsïndi inde no sési jarhati ambe engaksï kʼuiripuecha újka. Arhinta je Santiagu 4:4.

• Kánikuaksï uékperasïndi. Tata Diosïri Karakata jorhendaasïndi paraksï no sánderu kʼéri exekuarhini máteruechani jingoni. Religioni no jurhimbiti kánikua inchaakurasïndi guerrecharisï, peru religioni jurhimbiti nómbe (Miqueas 4:1-3). Ambakiti kristianuechaksï úrasïndi imecheri tiempuni ka ambe engaksï jatsikuarhika para máteruechani jarhuataani. Arhinta je Juanu 13:34, 35 ka 1 Juanu 4:20.

4. ¿Uájtsï mítintani religioni jurhimbitini?

¿Náki religioniski enga Bibliarhu pʼitajka ambe enga jorhentpijka, enga jukaparharajka Tata Diosïri arhinhakuani, ka enga uandajka eska Tata Diosïri Reinujkusï uáka sési pentani iámindu ambe? ¿Náki religionintsï exesïni eskaksï uékperasïnga ka eskaksï no nirasïnga guerrecharhu? ¿Náki jindee? Arhinta je 1 Juanu 3:10-12.