Josiasi sési erakuaspti imeri amiguechani

¿Exesïniri eska fásiliska úni ambe enga Jeoba uékajka?... Sáno iámindu kʼuiripu eratsisïndi eska kánikua úkua jukaska. Peru Biblia jorhentpesïndi eska no ísïska. Eiangusïndijtsïni Josiasiri ambe, tumbi ma enga kánikua jánguarhintapka marhuakuni Jeobani. Ma ambe enga jarhuatapka para ísï úni, jindespti eska sési erakuaspka imeri amiguechani. Ju sánderu jorhenguarhini Josiasiri ambe ka imeri amiguecheri.

Josiasiri táti, Amoni arhinhasïrendi, ka Juda anapu reispti. Amoni kánikua no sési úrispti ka kómarhisïrendi diosï úkatechani, diosï no jurhimbitichani. Enga Amoni uarhipkia, Josiasi niáraspti reini Juda. ¿Mítiskiri na xáni jatirispi Josiasi enga rei únhapka? ¡Ochu uéxurhintku! ¿No sési úrispi ísï eska tátemba?... Nómbe, no ísïspti.

Desdeka sapichuepka, Josiasi uékasïrendi marhuakuni Jeobani. Jimbosï ambarhati amiguechani jirinhaapti. Imechani erakuaspti engaksï uékaenga Tata Diosïni, ka imaksï jarhuataspti kurhajchani Jeobani. ¿Néksï jindespi Josiasiri amiguecha?

Ma profeta Sofoniasispti. Ima i ambe jatsipti para arhiani Juda anapuechani: “Engajtsï seguiriska diosï úkatechani kómarhiani, kánikuaksïni no sési nicheati”. ¿Ambe úspi Josiasi? ¿Kurhajchaspi profetani? Jo. Jimbosï Josiasi méntkisï kómarhiendi Jeobani, ka no diosï úkatechani, diosï no jurhimbitichani.

Jeremiasijtu máteru Josiasiri amiguespti. Tsimaranksï sáno májkueni jatirispti, ka engaksï tumbipka, nóksï iauanichani irekaspti. Jeremiasi ka Josiasi jarhuajperasptiksï Jeobani marhuakuni. Ambakiti amiguesptiksï, jimbosï Jeremiasi pirekua ma úkuntapti Josiasini enga i uarhipka, para xarhatani na enga no sési pʼikuarherani japka.

¿A no eskachi uánikua ambe uáka jorhenguarhini Josiasiri ejempluni jimbo?... Ima desde sapichku uékasïrendi kurhajchani Tata Diosïni. Ka para ísï úni, imani amiguechani erakuaspti engaksï uékaenga Jeobani. ¿A no eskari tʼujtu uékasïnga marhuakuni Jeobani? Jimbosï kánikua jukaparhakueti eskari imani amiguechani erakuauaka engaksï uékajka Jeobani.