Adani ka Eba nóksï kurhajchaspti Tata Diosïni

Ma jurhiani enga Eba jandiajku japka, akuitsi ma uandajpaspti ka kurhamarhini: “¿Ísïski eskaksïni Tata Diosï no ma anhatapueri frutani jiámukusïnga?”. Eba arhispti: “Uákachi náki uéjki ma fruta arhani, menosi ma anhatapueri. Engachi arhaska, uarhiakachi”. Akuitsi arhispti: “Nójtsï uarhiaka. Engajtsï arhaska, ísïuakajtsï eska Tata Diosï”. ¿Ísïspi inde ambe? Nómbe. Chkuanderakua máespti. Peru Eba jakajkukuspti. Enga sánderu exenga frutani, sánderu anhenchasïrendi. Jimbosï ápti ka íntskuni Adanintu. Nájkiruka Adani mítitini japka eskaksï uarhipiringa engaksï no kurhajchapiringa Tata Diosïni, arhaspti.

Ima mísmu jurhiatikua, Jeoba uandajpaspti Adani ka Ebani ka kurhamarhiaspti andiksïsï no kurhajchapi. Eba akuitsini kulparispti, ka Adani, Ebani. Jeoba petantaspti Adani ka Ebani jardinirhu jimbokaksï no kurhandiraspka. Ístu, péraaspti ánjilichani ka espada ma chpiriri enga no jurajkuauenga paraksï ménderu inchantani.

Jeoba uandaspti eska ístu kastigaripiringa imani enga chkuanderakupka Ebani. Peru no akuitsisï uandaxekupti Ebani. Jeoba no uásti akuitsichani engaksï uandajka. Ánjili no ambakiti masï úpti eska akuitsi uandapiringa. Uékasïrendi enganiarini Ebani. I ánjili arhinhasïndi Noambakiti ka Satanasi. Sánderu orhepani, Jeoba kʼamajkuati Satanasini ka ima nóteru uátia enganiarini kʼuiripuni paraksï no sési ambe úni.