Jeoba tekantskua xarhatakusïndi Jonasini

Iretarhu ma Asiria anapu enga Nínibe arhinhaenga, kʼuiripu kánikua no sési úrispti. Jeoba imeri profeta Jonasini axaspti para nirani Nínibe ka arhini kʼuiripuni eska jatsispka para mójtakuni jánguani. Peru Jonasi no niraspti Nínibe, sánderu sési, máteru ladu ísï niraspti sïpakuarhini, barkuni ma jataspti enga Tarsisi nirani japka.

Enga barku marirhu japka, tormenta ma úkuarhispti ka marineruechaksï chéspti. Kómarhiasptiksï imecheri diosïchani ka uandanksï: “¿Andichisï ini ambe nitamanchani jaki?”. Tátsekua, Jonasi arhiaspti: “Juchiti kulpaesti. Sïpakuarhixaka parani no úni ambe engarini Jeoba juramuchika. Kʼuanimajtsïni je paraka tormenta anhaxurhiaka”. Marineruechaksï no uékasïrendi kʼuanimani, peru ima kurhakuaspti eskaksï ísï úpiringa. Jimboksïsï kʼuanimapti ka tormenta anhaxurhispti.

Jonasi eratsispti eska uarhipiringia. Enga sánderu inchamini japkia marirhu, kómarhispti Jeobani. Ka Jeoba kʼéri kuruchani ma axaspti enga kunajkapka Jonasini, peru no uándikuspti. Kurucharhu jatini, kómarhispti Jeobani: “Aiachesïngakini eskakini méntkisï kurhajchaaka”. Jeoba úspti eska Jonasi tanimu jurhiatikua tsípiti pakarapiringa kurucharhu ka tátsekua úspti eska kurucha echerirhu uéchantapiringa.

Jeoba salbarispti Jonasini, peru ¿arhikuekasïreni i ambe eska nóteru jatsispkia para nirani Nínibe? Nómbe. Jeoba axaspti ménderu ka Jonasi iásï kʼóru kurhajchasptia. Niraspti ka arhispti kʼuiripu no sési úrini: “Jeoba kʼamajkuati iretani, ixú 40 jurhiatikua jimbo”. Jimajkani úkuarhispti ma ambe enga Jonasi no erokuarhienga. Ninibitechaksï kasu úkuspti Jonasini ka mójtakurhisptiksï. Nínibe anapu rei arhispti imeri iretani: “Kómarhi je Tata Diosïni ka moanta je, jamberijtsïni no kʼamajkuati engachi ísï úska”. Enga Jeoba exepka eska kʼuiripu moantaspka, no kʼamajkuaspti.

Jonasi kánikua ikiaspti jimboka Jeoba no kʼamajkuspka iretani. Eratsinta ini ambe: Jeoba tekantskua xarhatakuspti Jonasini ka pʼamojkuspti. Peru Jonasi no pʼamojkuaspti Nínibe anapuechani. Sánderu sési, Jonasi no sési nínharhiparini iretarhu uéakumani uaxakaspti, jima enga purhueri planta ma kʼumantskani japka. Tátsekua, planta kʼarhispti ka Jonasi kánikua ikiaspti. Jimbosï Jeoba arhipti: “Sánderuri jukaparharasïnga indeni plantani eska ninibitechani. Ji pʼamojkuaska jimbosïni no uándikuaka”. ¿Tata Diosï ambe uékasïreni jorhendani Jonasini? Eskaksï ninibitecha sánderu jukaparhaspka eska na uéjki planta ma.