Jeoba axasïndi Jeremiasini para aianhpini

Jeoba, Jeremiasini erakuspti para profeteni Juda. Arhispti eska aianhpipiringa imani iretarhu ka ístu eska arhiapiringa eskaksï jatsispka para jurajkuni no sési jásï ambe. Peru Jeremiasi arhispti Jeobani: “Ji tumbi sapichujku máeska, no úsïnga uandani kʼuiripu japarini”. Peru Jeoba aiakuspti: “Asï ché, jíkini jarhuataaka ka arhiakakini amberisï aianhpia”.

Jeoba arhispti Jeremiasini eska tánaapiringa ireteri orhejtsïkutichani ka eska kʼepekupiringa kʼamukua ma imecheri orhepani ka arhiani: “I ambemindu nitamanchaati Jerusaleni”. Orhejtsïkutichaksï kánikua ikiaspti enga Jeremiasi ísï úpka. Saserdoti ma enga Pasjuri arhinhaenga, ataspti Jeremiasini ka sepu chkariri ma jimbo péraspti, o sea, jóndukuspti ka jójkuni tablecha máru jimbo. Jeremiasi erantskutaspti no úni manakuarhini. Pasjuri asta tsípku jurajkuspti. Jimajkani Jeremiasi uandaspti: “Nóteruni uákia. Nóteruni eianhpiakia”. Peru ¿meru ísï úpi? Nómbe. Jeremiasi sési eratsintaspti ka uandaspti: “Jeobaeri mensaji, ísïsti komu chpiri ma engani jini pʼikuarhenhejka. No uáka no aianhpini”. Ísï jimbo, Jeremiasi seguirispti aianhpini.

Ióni nitamasptia ka máteru rei uénaspti juramuni Juda. Saserdoticha ka no jurhimbiti profetecha kurhunhesïrendiksï ambe enga Jeremiasi aianhpienga. Jimboksïsï arhiapti prínsipechani: “I kʼuiripu jatsisti para uarhini”. Jeremiasi arhiaspti: “Engajtsïni uándikuska, uándikuakajtsï nemani enga no ma ambe no sési úka. Ji uandasïnga ambe engarini Jeoba arhijka ka no ambe engani ji eratsijka”. Engaksï prínsipecha kurhaapka ini ambe, uandasptiksï: “I kʼuiripu no jatsisti para uarhini”.

Jeremiasi seguirispti aianhpini, peru i uelta, prínsipechaksï xáni ikiaspti engaksï arhipka reini eska uándikupiringa. Rei arhiaspti eskaksï úkupiringa ambe engaksï uékapiringa. Jimboksïsï jupikapti ka posu jauanhetirhuksï ma kʼuaninhani enga atsïmu jatarini japka para jima uarhini. Jeremiasi sánhani arhispti atsïmurhu inchatseni.

Peru palasiurhu anapu ofisiali ma, enga Ébedi-Méleki arhinhaenga arhispti reini: “Prínsipechaksï posurhu ma kʼuaninhasti Jeremiasini. Engachi jima jurajkuska, uarhiati”. Rei arhispti Ébedi-Mélekini eska paapiringa 30 achatichani paraksï pʼínhantani Jeremiasini. No ma ambe úspti eska Jeremiasi nóteru aianhpepiringia. ¿A no eskari uékasïnga ísïini eska Jeremiasi?