Eska sési kurhangukuarhiaka

Ambe enga úpka Jesúsi

BIDEU: Jesúsi ejemplu ma jingoni jorhentpisïndi eskajtsïni Tata Diosï Jeoba kuidarisïnga

1. Exe je BIDEUNI o arhinta je Mateu 6:25-27. Tátsekua exea je arini kurhamarhikuechani:

1. ¿Náki ejempluni úrasïni Jesúsi para jorhentpini eskajtsïni Tata Diosï kuidarisïnga?

2. Nájkiruka Jesúsi uánikua ambe mítepka pájaruecheeri ambe, ¿andisï imani ambejku úrapi enga kʼuiripu sési kurhangupiringa? ¿Andisï sési japi enga indeni ejempluni úrapka?

¿Ambejtsïni jorhendasïni Jesúsiiri ejemplu?

2. Engachi imani uandakuechani úraaska engaksï sési kurhangukuarhiaka, kʼuiripuechaksï no méni mirikurhiati ambe engachi jorhendauaka ka mintsitarhu niárakuauati.

Májkueni ú je eska Jesúsi

3. Asï jukari uanda je. Asï aiangu je estudiantini ambe engajtsï xáni míteka, sánderu sési, imani informasionijku exe je enga publikasionirhu jaka engajtsï úrani jaka para jorhentpini. Engajtsï kurhamarhiska ambe ma, tekaantskua jingoni erokuarhi je paraka chaari estudianti mókuntaaka. Enga no míteaka ambe mókuntani o imani ambe uandani enga Biblia no uandajka, úkua je máteru kurhamarhikuechani paraka niáraaka sési kurhanguni. Enga estudianti kurhangukia puntuni, iásï máteruni exe jeia.

4. Úra je imani ambe enga estudianti mítekia para jarhuatani kurhanguni jimbanhi ambe. Pori ejemplu, engajtsï tsíntskueri ambe jorhenguarhiaka, jarhuata je estudiantini miántani ambe enga úkuarhijka engachi uarhijka.

5. Sési eraku je ejempluni engajtsï úraaka. Ante dejtsï úrani ejemplu ma, kurhamarhikuarhi je:

1. “¿Fásiliiski i ejemplu?”.

2. “¿Estudianti sési kurhangua ini ejemplu jingoni?”.

3. “¿Uaa miáni ambe enga jorhenguarhini jaka ka no solu ejempluni?”.