¿Andichisï jatsi para Jesúsiri nombri jimbo kómarhini?
JESÚSI someni jorhentpisti kómarhikueri ambe, jiáni ísï judiuecheri relijioniri orhejtsïkutichaksï pʼindespti uandatsekuarhini “eskinecharhu kʼérati xanharuecha jimbo”. ¿Andiksïsï ísï úni? “Paraksï máteruecha exeani”. Uékasïrendiksï xarhatani eskaksï imeecha kʼóru kómarhisïreenga Tata Diosïni. Uánikuechaksï iórhati uandatsekuarhitechani arhiasïrenga ka méntku undasïrendiksï imani ambejku arhini, ‘ísïksï eratsesïreendi eskaksï kurhajchanhaaka jimbokaksï uánikua ambe uandasïnga’ (Mateu 6:5-8). Jesúsi jorhentpisti eska inde pʼindekuecha no ma ambe jimbo marhuasïrenga ka ísï jarhuataspti imani kʼuiripuecha engaksï ambakiti mintsita ma jatapka paraksï mítepiringa néna kómarhini. Joperu no solu uandaspti néna enga no sési jaka kómarhini.
Jesúsijtsïni jorhendasti eska juchaari kómarhikuecha jatsiska para xarhatani eskachi uékasïnga eska Tata Diosïri nombri pímbinhasïntaaka, eska juuaka imeeri Reinu ka eska úkuarhiaka eska ima na uékajka. Ístujtsïni jorhendasti eska sési jarhaska eskachi kurhakuaka Tata Diosïni imani ambe engachi uétarhinchaaka (Mateu 6:9-13; Lukasʌ 11:2-4). Ístu úraaspti ejempluechani para xarhatani eska uétarhisïnga no kuatantani, mintsikani ka kaxumbitini engachi uéjka eskajtsïni Tata Diosï Jeoba kurhajchaaka (Lukasʌ 11:5-13; 18:1-14). Ka ima uénasïrendi ísï úni eska na jorhentpienga (Mateu 14:23; Markusʌ 1:35).
I ambe enga Jesúsi arhiapka imeeri chúxapatichani meru jarhuataapti parakaksï sánderu sési kómarhipiringa. Joperu Jesúsi erokuarhispti asta últimu chúrikua ante de ima uándikunhani para sánderu ambakiti ambe jorhendani, kómarhikueri ambe.
“Kánikua mójtakurhisïndi kómarhikua”
Jesúsi erantskutaspti uinhaperantani imeeri apostolichani. Exespti eska jiáni sési jarhaspka jimbanhi ambe aianguani. “Ji jindeeska xanharu, jurhimbikua ka tsípikua —arhiaspti—. No nema úsïndi andarhierani Taatini enga no jíndeni jimboeuaka.” Tátsekua aiakuaspti: “Ambe uéjkijtsï kurhajkuarhini juchiiti nombri jimbo, jíksïni íntskuaka, paraka Taati kʼéri ambe arhinhaaka Uájpani jimbo. Engajtsï chá kurhajkuarhiaka ambe ma juchiiti nombri jimbo, jíksïni íntskuaka”. Ka enga na kʼamarani japkia uandontskuarheni imeecha jingoni arhiaspti: “Iáiasï jamberi chájtsï no ma ambe kurhajkuarhixaka juchiiti nombri jimbo. Kurhajkuarhi je ka intsïnhaakajtsï ka ísï úparini, chájtsï kánikua tsípiaka” (Juanu 14:6, 13, 14; 16:24).
¡Xáni ambakiti uandakuecha! Biblieri diksionariu ma, uandasïndi eska i ambe “kánikua mójtakurhisïnga kómarhikua”. Buenu, Jesúsi no arhikuekaxapti eska jiáni uératini, imaksï kómarhipiringuia ka nóteru Tata Diosïnia. Sánderu sési, mítaxapti jimbanhi xanharuni ma parakaksï Tata Diosï Jeobani andarhierani.
Tata Diosï méntkisï kurhauasïndi imeeri marhuaricheri kómarhikuechani (1 Samuel 1:9-19; Salmo 65:2). Joperu desdeka Tata Diosï pakatperakua ma úka ireta Israeli jingoni, iámindu imeecha engaksï uékapiringa eska Tata Diosï kurhauapiringa imeeri kómarhikuechani, jatsisptiksï para jiókuarhini eska Tata Diosï ireta Israelinisi erakupka. Tátsekua, jiáni uératini enga Salomoni irekapka, ma jatsispti para jiókuarhini eska Tata Diosï Jeoba, templuni erakuspka para jima kéjtsïtani (Deuteronomio 9:29; 2 Crónicas 6:32, 33). Joperu i ambe no jindeepirindi para méntkisï. Ísï eska na karapka apostoli Pablu, lei enga ireta Israeli intsïnhapka ka ístu kéjtsïtakuechani engaksï templurhu úkuarhienga “kʼumandakuespti imani juramukueri enga jupiringa, no ísïsptimendu” (Ebreuechani 10:1, 2TDU). Kʼumanda jatsispti para meru niárani ísï úkuarhini (Kolosasi 2:17). Ísï jimbo desde uéxurhini 33 uératini, nóteru uétarhisïreendia kurhajchani Moisésiri leini para sési pájperakua ma jatsini Tata Diosï Jeoba jingoni, sánderu sési uétarhisïreendi Jesúsini kurhajchani imani enga lei uandaenga (Juanu 15:14-16; Galasia 3:24, 25).
“Íntskusti[ksï] sánderu kánikua juramukua eska na uéjki kʼuiripuni ma”
Jesúsi, uaxastasti ambe ma engachi jimbo uáka andarhierani Tata Diosï Jeobani, ima terukutakuarhentaspti amigu ma jingoni enga kánikua uinhapikua jatsika ka enga mítajka xanharuni ma paraka Tata Diosï kurhauaka ka mókuantani juchaari kómarhikuechani. ¿Andisï Jesúsi indeni úpi ambe juchantsïni jimbo?
Iáminduechachi pekadu jimbo andajpenusïnga, ísï jimbo, no ma ambe jarhasti engachi uáka úni jucha o kéjtsïtakua ambe íntspini enga uáka kénditani indeni pekaduni, nijtuni úni eskachi uáka ambakiti pájperakua ma jatsini Tata Diosï Jeoba jingoni enga pímbinhasïika (Roma 3:20, 24; Ebreu 1:3, 4). Joperu Jesúsi maiampisti kʼuiripuecheri pekaduecha jimbo enga íntspika imeeri tsípikuani enga perfektueka (Roma 5:12, 18, 19). Ísï jimbo, iámindu imeecha engaksï uékaka pímbinharhati jarhani para Tata Diosï Jeoba ka uékanksï “mintsikaparini uandontskuarhekuni” jatsistiksï para mintsinharhini tata Jesukristueri uarhikuani ka ístu kómarhini Tata Diosïni, tata Jesukristueri nombri jimbo (Efesu 3:11, 12).
Engachi kómarhijka Jesúsiri nombri jimbo, xarhatani jarhasïngachi eskachi mintsikasïnga, tanimu ambe jimbo enga Tata Diosï uéjka eska Jesúsi uáka: 1) Ima jindeesti “Tata Diosïri karichi sapichu” ka imeeri uarhikua jimbo úsïngachi puáminhantani pekaduechani. 2) Enga Tata Diosï Jeoba tsítantapkia, iásï ísï marhuaxatiia eska “kʼéri saserdoti” ka úraxati imeeri uarhikuani para kʼuiripuni jarhuatani. 3) Solu ima jindeesti xanharu para andarhierani Tata Diosïni Jeobani kómarhikua jimbo (Juanu 1:29; 14:6; Ebreu 4:14, 15).
Engachi kómarhijka imeeri nombri jimbo, kʼéri ambechi arhini jarhasïnga Jesúsini. Ka i kánikua sési jarhasti jimboka Tata Diosï Jeoba uékasïnga “paraka Jesúsiri nombri jimbo, iáminduechaksï tinguixurhiaka [...] ka iámindu kʼuiripuechaksï uandantani eska Jesukristu jindeeska Tata, para kʼéri ambe arhinhani Tata Diosï, ima enga jindeeka Taati” (Filipusʌ 2:10, 11). Ka sánderu jukaparhakua ambe, engachi kómarhijka Jesúsiri nombrini úraparini kʼéri ambechi arhini jarhasïnga Tata Diosï Jeobani enga íntspika imeeri uájpani juchantsïni jimbo (Juanu 3:16).
Jatsiskachi para “iámu juchaari mintsita jingoni” kómarhini ka no méntkisï májku ambe uandani
Parakachi uáka exeni na enga xáni jukaparhakua ambe úni jaka Jesúsi, Biblia uánikua tituluechani ka nombrichani úraasïndi. Inde ambejtsïni jarhuatasïndi exeni imani kóntperatechani engachi intsïnhani jaka ka engachi intsïnhaka imani ambe jimbo enga tata Jesukristu úka juchantsïni jimbo. (Exe je rekuadruni). Jesúsinksï “íntskusti sánderu kánikua juramukua eska na uéjki kʼuiripuni ma” i ambe arhikuekasïndi iámu juramukuani auandarhu ka echerirhu (Filipusʌ 2:9; Mateo 28:18).a
No solu pʼindekua ma
Eskachi na exekia jatsiskachi para kómarhini Jesúsiri nombri jimbo parakajtsïni Tata Diosï kurhajchaaka (Juanu 14:13, 14). Peruchi no uékapiringa eska inde uandakua “tata Jesukristueri nombri jimbo” niáraka pʼindekuajku máeni enga no ma ambe arhikuekajka. ¿Andi nómbe?
Eratsi je arini ejempluni, engaksïni komersianti ma karta ma axachejka, jamberi ísï kʼamarhujti “uandajperataksïni ma axachexaka”. Peru, ¿chá eratsesïni eska komersianti ma meru ísï pʼikuarhinhexaka oksï solu sési járhati uandakuecheski enga pʼindenhaka úranhani? Ísï jimbo, engachi Jesúsiri nombri jimbo kómarhini jauaka, jatsiskachi para meru pʼíkuarhinheni ka no solu ísï pʼikuarherani eskaksï sési járhati uandakuecheska engaksï komersiantiri karta ma jimbo jaka. Nájkirukachi jatsika para ‘méntku úndani kómarhini Tata Diosïni’, uétarhisïndi eskachi “iámu juchaari mintsita jingoni” kómarhiaka, ka no méntkisï májku ambe uandani (1 Tesalonika 5:17; Salmo 119:145).
Engachi “Jesúsiri nombri jimbo” kómarhiska, ¿ambechi uaa paraka no pʼindekua máeuaka enga no ma ambe arhikuekajka? ¿Andichisï no eratsentajki na enga jásïika tata Jesukristu? Ju je eratseni iámindu imani ambe enga Jesúsi úka ka enga uéjka úni juchantsïni jimbo. Juchaari kómarhikuecharhu, ju je kʼéri ambe arhini ka diosmaiamukua íntskuntani juchaari Tata Diosï Jeobani, jimboka kánikua sési úraska imeeri uájpani. Engachi ísï úska, sánderuchi mintsikaaka Jesúsiri aiatsperakuechani enga arhijka: “Eska ambe uéjki engajtsï kurhakuaka Taatini juchiiti nombri jimbo, imaksïni íntskuati” (Juanu 16:23).
a Seguni eska na uandajka Diccionario expositivo de palabras del Antiguo y del Nuevo Testamento exhaustivo de W. E. Vine, uandakua enga griegu jimbo tradusirikuarhika “nombri” uáti arhikuekani “iámindu imani ambe enga nombri ma arhikuekajka”, komu “juramukua, na enga jásïika, ambe enkenga, na enga xáni kʼériika, uinhapitiini ka na enga xáni jukaparhakueka ka máteru ambe”.