Andisï jukaparhakue para cha jardini de Edéni

Máru kʼuiripuecha engaksï mítekuka Biblieri ambe, uandasïndiksï eska Biblia nóteru seguirisïnguia uandani ambe enga úkuarhipka jardini de Edénirhu ka inde ambejtsïni ísku pakatasïndi imeechaksï uandasïndi eska Biblia no uandasïnga inderi ambe. Kʼuiripu ma enga jorhentpijka relijioniri ambe enga arhinhajka Paul Morris karaspti: “Bibliarhu nóteru nani uandasïndi ambe enga úkuarhika jardini de Edénirhu”. Jamberiksï, ístu uánikua kʼuiripuecha engaksï míteka Biblieri ambe apoiarijti indeni eratsekuani, joperu úkuechaksï máteru ambe xarhatasïndi.

Biblia uápuru ísï uandasïndi Adárini, Eberi, akuitsiri ka jardini de Edéniri ambe.a Joperu ambe engaksï imeecha uandajka no ma ambeesti engachi terukutantajka máteru ambe jingoni enga sánderu no sési jaka ka sánderu peligrosueni: máru relijioniri orhejtsïkuticha ka imeecha engaksï Biblieri ambe míteka uandasïndiksï eska Paraisueri uandantskua ísku kuentusi ambejkueska ka i ambe kánikua no sési jarhasti. ¿Andi? Jimbokaksï ísï úparini uandani jarhasïnga eska Biblia no mintsinharhikueska.

Engachi meru no mítepiringa ambe enga úkuarhipka jardini de Edénirhu nóchi úpiringa kurhanguni Tata Diosïri uandakuani. Eskachi na exeni jauaka, Biblia mókuantasïndi imani kurhamarhikuechani engaksï sánderu jukaparhakueka juchaari tsípikuarhu ka para úni ísï úni, jatsisïndi para uandantani ambe enga úkuarhika Paraisurhu.

● ¿Andichisï jatirijki ka uarhini? Engaksï Adáni ka Eba kurhajchapiringa Jeobani, méntkisïksï irekapirindi. Joperu, jiáni engaksï nóteru kurhajchapkia nóteruksï perfektuesptia ka uénasptiksï uarhini (Génesis 2:​16, 17; 3:​19). Imeechajtsïni kéritaaspti pekaduni, ísï jimbochisï nóteru perfektueptia. Jimbosï Biblia uandajti: “Ísï jimbo, ma achamasï jimbojkusï niárati jarhani pekadu parhakpinirhu ka pekadu jimbo niárasti jarhani uarhikua, ka ísï, iámindu kʼuiripuechaksï niárasïndi uarhini, jimbokaksï iáminduecha pekadoriska”(Roma 5:​12)

● ¿Andisï jurajkuni jaki Tata Diosï eska no sési jásï ambe jauaka? Jardini de Edénirhu, Satanasi uandaspti eska Jeoba chkuanderari máeska ka eska no jurajkusïnga eska imeeri kueraakatecha sési ambe jatsiaka (Génesis 3:​3-5). Arhikuekaxapti eska Tata Diosï no úsïnga sési juramuni. Adáni ka Eba no ambakiti jingontsï úkuarhintaspti ka nóteruksï uékaspti kurhajchani Jeobani, ísï úparini arhikuekaxaptiksï eskaksï kʼuiripuecha uáka míteni ambe enga sési jaka ka ambe enga no sési jaka. ¿Ambe úspi Jeoba? Imeeri jánhaskakua ka jurhimbikua jingoni exespti eska sánderu sési jarhaspka eska jurajkuapiringa parakaksï kʼuiripuecha juramukuarhipiringa ma tiempu, para xarhatani abersienga ísïipka. Iásï kánikua no sési jánhaskuarhixati parhakpinirhu —ma parti jimbo, jimboka no ambakiti juramuxaka⁠— joperu xarharastia eska kʼuiripu no uáka sési juramukuarhini enga no Tata Diosïri jarhuajperata jimboeuaka (Jeremías 10:23).

● ¿Andisï Tata Diosï kueraa echerini? Jardini de Edéni xarhatasïndi eska Tata Diosï uékasïreenga eska iápuru parhakpinirhu kánikua sési jándepiringa. Ima arhiaspti Adáni ka Ebani eskaksï kaapiringa sapiichani ka eskaksï iápuru ísï irekapiringa parhakpinirhu ka sési jántskani (Génesis 1:​28). Ísï jimbo, Tata Diosï uékasïndi eska Echeri, paraisu máeuaka ka eskaksï Adáni ka Eba uájpeecha niáraka perfektueni ka tsípikua jingoni irekani ka ístu eskaksï májku kʼéri jauaka. Sáno iámu Biblia uandasïndi néna uaa Tata Diosï sési jántskantani.

● ¿Andisï juki tata Jesukristu parhakpinirhu? Engaksï Adáni ka Eba, nóteru kurhajchapkia Tata Diosïni jardini de Edénirhu, imeecha ka imeeri uájpeechaksï niárapirindi uarhini. Joperu Tata Diosï, imeeri uékperakua jimbo axaspti imeeri uájpani parhakpinirhu parajtsïni “pʼímutantaani” (Mateu 20:28). ¿Ambeeski inde euajpintskua? Ju je miáni eska tata Jesukristu —enga Biblia uandajka eska jindeeska “Adáni enga últimu juka” ⁠—méntkisï kurhajchaspka Tata Diosï Jeobani no ísï eska primeru achamasï. Ísï jimbosï seguiripti perfektueni. Ima íntspispti imeeri tsípikuani para pʼímutantani kʼuiripuechani pekadurhu uératini. Ísï úparini ima kʼuiripuecha engaksï sési marhuakujka Tata Diosïni, uaatiksï puáminhantani pekaduechani ka intsïnhani imani tsípikuani engaksï Adáni ka Eva jatsipka Edénirhu antedeksï pekarini (1 Korintu 15:22, 45; Juanu 3:​16). Ísï jimbo, Jesúsi jurhaspti echerirhu para xarhatani eska ima ambe enga Tata Diosï uéjka meru ísï úkuarhiaka.b

Eskachi na exekia, ambe enga Tata Diosï uéjka úni no jindeesti ambe ma enga no mítekuarhika o enga úkua jukaka para ma míteni. Meru ísïisti ka no úkua jukasti para kurhanguni. Májkueni eskaksï na meru japka Edénirhu, —jardini, kʼuiripuecha ka animalicha⁠— Tata Diosïri aiatsperakuechajtuksï meru ísïisti ka nóteru ióndani niáraatiksï ísï úkuarhi. ¿Nénachi jáma parachi jima jarhani? Buenu, jatsiskachi para jánguarhintani. Tata Diosï uékasïndi eskaksï iámindu ima kʼuiripuecha engaksï uékaaka jima jauaka asta imeecha engaksï ménisï no sési úpka (1 Timoteo 2:​3, 4). ¿Néni jimbochi míteski indeni ambe?

Meru ante de uarhini, Jesúsi no sési úri ma jingoni uandontskuarhespti enga jima ma kándu japka. Ima achamasï mítespti eska sési jarhaspka eskaksï uándikupiringa, joperu uandontskuarhespti Jesúsi jingoni paraka sési pʼikuastantapiringa ka erokuarhikua ma íntskuni. Tata Jesukristu mókukuspti: “Jindeeni jingoniri jauaka paraisurhu” (Lukasʌ 23:43). Enga Jesúsi uékajka eska achamasï ma enga no sési úripka jatsiaka oportunidadi para méntkisï irekani Paraisurhu ma jimbo ixú Parhakpinirhu, ¿no uékajki eskachi juchajtu jatsiaka indeni oportunidadini? Meru jo. Ka juchaari Taatijtu indeni ambesï uékajti. Enga chá uékajka pʼiuani indeni kóntperatechani enga Tata Diosï aiatspeni jaka, seguiri je jorhenguarhini eskajtsï xáni uaa Tata Jeobaeri ambe enga Kueraaka jardinini enga Edénirhu japka.

[Notecha]

[Rekuadruecha/Imajeni]

PRIMERU PROFESIA ENGA UAXASTAJKA BIBLIARHU ANAPU TEMA

“Ka uaaka eskajtsï ikiatsperaaka tʼu [akuitsi], uarhiitini jingoni, ka chiiti desendensia uarhiitiri desendensia jingoni. Imakeni éjpurhu chʼatajtsïkuati ka tʼuri irhandurhakuarhu ataaka (Génesis 3:​15).

I primeru profesiani enga Bibliarhu jaka, Tata Diosï Edénirhu uandaspti. Joperu, ¿neeski uarhiti, akuitsi ka imeeri desendensia? ¿Andiksïsï ikiatsperani?

AKUITSÏ

Satanasi (Jaŋaskuecha 12:9).

UARHITI

Jeobaeri kúnguarhikua auandarhu anapu engaksï espiritueka (Galasia 4:​26, 27). Isaíasi uandaspti eska i “uarhiiti” kámapiringa Tata Diosïri iretani ma (Isaías 54:1; 66:8).

AKUITSIRI DESENTENSIA

Imeecha engaksï imani ambe újka enga Noambakiti uéjka (Juanu 8:​44).

UARHITIRI DESENDENSIA

Tata Jesukristu, enga Jeobaeri kúnguarhikuarhu uératini juka enga auandarhu jaka. Tátsekua, Kristueri erachicha engaksï erakunhaka paraksï imani jingoni juramuni jini auandarhu ka niáranksï ireta máeni “Tata Diosïri Israeli” (Galasia 3:​16, 29; 6:⁠16; Génesis 22:18).

IRHANDURHAKUARHUKSÏ ATASÏNDI

Enga Tata Diosïri uájpa Echerirhu japka, Satanasi úspti eskaksï uándikupiringa. I ambe kánikua no sési úkuspti, joperu para no jindeespti para méntkisï, jimboka Jesúsi tsítanhantaspka.

ÉJPURHU CHʼATAJTSÏKUATI

Jesúsi éjpurhu chʼatajtsïkuati Satanasini para mátirku kʼamajkuni. Ante de ísï úni, sési peentaati iámindu ambe enga Noambakiti no sési úka Edénirhu (1 Juanu 3:8; Jaŋaskuecha 20:10).

Parajtsï exeni sánderu ambe, i temeri enga sánderu uandajka Biblia, exe je foietuni Biblia ka ambe engajtsïni aiangujka engaksï Jeobaeri testiguecha pétaka.

[Imajeni]

Adáni ka Eba kánikuaksï kómu nitamakuarhispti pekaduni jimbo