Orhejtsïkutichaksï jarhuajpesïndi parakachi jucha sési jauaka

1. ¿Pablu ambe kurhaaspi Korintu anapu kristianuecheri enga úpka eska ima tsípini p’ikuarherapiringa?

JINDEESTI uéxurhini 55 despuesi de Jesúsi. Apostoli Pablu puerturhu jarhasti jini ireta Troasi, joperu no úsïndi nóteru eratseania erachicha Korintu anapuechani. Uandanhiaxapti jimboka no xáni ióni kurhaaspka eskaksï arhijperaxapka. Ísï jimbo, májkueni eska taati ma enga uandanhiajka uájpeecha jimbo, karakuaspti karakata ma para konseju íntsaani (1 Kor. 1:​11; 4:​15). Ístu, kurhakuspti imeeri amigu Tituni eska p’orhembiapiringa ka eska tátsekua exentapiringa jini Troasi. Ísï ima úpirindi míteni ambe enga úkuarhini japka Korintu. Iásï Pablu erokuarhixati eska niáraaka Titu jimboka kánikua uékaxaka kurhaani ambe enga ima arhiaka. ¡Joperu xáni no sési! Titu no méni niárasïndi. ¿Ambe uaa Pablu? Barku ma jimbo nirasïndi jini Masedonia. Jini iásï kʼóru úsïndia exejperantani Titu jingoni enga aiangujka ambakiti ambe. Korintu anapu erachichaksï tsípikua jingoni jiókuarhispti Pablueri konsejuechani ka uékapirindiksï ménderu exeni. Enga Pablu ini ambe kurhaajka sánderu tsípini pʼikuarherasïndi (2 Kor. 2:​12, 13; 7:​5-9).

2. a) ¿Ambe karakuaspi Pablu Korintu anapuechani jakajkukueri ka tsípikueri ambe? b) ¿Náki kurhamarhikuechanchi mókuantani jaua?

² Sánderu tátsekua Pablu karasïndi imeeri segundu karakata para Korintu anapuecha, nani enga arhiajka: “Jíksïni ísï arhisïnga no jimbokaksïni uékasïnga juramuchini na engajtsï jatsika para jakajkuni, jimbokachi jucha jindeeska chaari jarhuajpiricha parakajtsï kánikua tsípiaka, jimboka chá sési uinhapixakaia jakajkuparini” (2 Kor. 1:​24). ¿Pablu ambe arhikuekaxapi? ¿Ambeksï uaa jorhenguarhini i uandakuecheri iásï anapu orhejtsïkuticha?

JUCHAARI MINTSIKAKUA KA TSÍPIKUA

3. a) ¿Ambe arhikuekaxapi Pablu enga karapka: “Jimboka chá sési uinhapixakaia jakajkuparini”? b) ¿Nénaksï májkueni úsïni eska Pablu iásï anapu orhejtsïkuticha?

³ Apostoli Pablu tsimani ambe uandaspti enga uétarhijka parachi sési marhuani: mintsikakua ka tsípikua. Mintsikakueri ambe karaspti: “Jíksïni ísï arhisïnga no jimbokaksïni uékasïnga juramuchini na engajtsï jatsika para jakajkuni, [...] jimboka chá sési uinhapixakaia jakajkuparini”. Ima exespti eska Korintu anapu erachichaksï no jurajkusïreenga Tata Diosïni jimbokaksï mintsikasïrenga imani, ka no Pabluni o máteru k’uiripuechani. Uandasïreendi eska no jatsispka para uandani ambe engaksï jatsipka para jakajkuni imeeri erachicha ka ístu no uékasïreendi úni. Jimboka mintsikasïrenga eskaksï imeecha uékasïreenga úni ambe enga sési japka (2 Kor. 2:3). Iásï anapu orhejtsïkutichaksï májkueni úsïndi eska Pablu, jimbokaksï mintsikasïnga imeeri erachicheri jakajkukua ka andiksïsï imeecha marhuakuni jaki Tata Diosïni (2 Tes. 3:4). Nóksï uaasïnga juramukuecha kúnguarhikuarhu sánderu sési kurhajchasïndiksï Biblieri prinsipiuechani ka ambe enga Jeobaeri kúnguarhikua uandajka. Jimbokaksï no dueniueska máteruecheri mintsikakueri (1 Ped. 5:​2, 3).

4. a) ¿Ambe uékaspi arhini Pablu enga karapka: “Jucha jindeeska chaari jarhuajpiricha parakajtsï kánikua tsípiaka”? b) ¿Májkueni eska Pablu ambeksï uékasïni úni iásï anapu orhejtsïkuticha?

⁴ Pablu ístu uandaspti: “Jucha jindeeska chaari jarhuajpiricha parakajtsï kánikua tsípiaka”. Ini uandakuecha jingoni arhikuekaxapti imani ka imeeri pámpiricha engaksï imani jingoni jámeenga. ¿Nénachi míteski? Ima mismu karakatarhu tsimani imeecheri ambe uandaspti, ima karaspti: ‘Jimboka ji ka Silbanu ka Timoteo aianguska Jesukristueri ambe’ (2 Kor. 1:​19). Ístu méntkisï enga apostoli uandaenga uandakuani jarhuajpiricha, arhikuekaxapti imeecheri engaksï sánderu xéncheenga komu Apolosi, Ákila, Priska, Timoteo, Titu ka máteruecha (Rom. 16:​3, 21; 1 Kor. 3:​6-9; 2 Kor. 8:​23). Enga uandapka eskaksï ‘jarhuajpirichespka parakaksï kánikua tsípipiringa’, arhiaxapti Korintu anapuechani eskaksï ima ka imeeri pámpiricha uékasïreenga iámu ambe úni kúnguarhikuarhu anapuecha jimbo parakaksï ima kánikua tsípikua jingoni marhuapiringa. Ka i ambeksï uékasïndi úni iásï anapu orhejtsïkuticha: úni iámindu ambe engaksï imeecha uaaka úni para jarhuatani imeeri erachichani parakaksï uaaka “tsípikua jingoni” marhuakuni Tata Diosï Jeobani (Sal. 100:2; Fil. 1:​25).

5. ¿Ambechi exea ini artikulu jimbo ka ambechi jatsiski para eratsentani?

⁵ Nóksï xáni ióni kurhamarhinhaspti máru erachicha engaksï kánikua tsípikua jingoni aianhpijka iápurisï. Kurhamarhiasptiksï: “¿Ambeksïni arhiski o úni orhejtsïkuti ma parakajtsï sánderu tsípikua jingoni marhuapiringa?”. Ka engachi exeni jauaka ambe engaksï i erachicha mókuntapka, ju je eratseni ambe engachi mókuntapiringa ka ambe engachi uaaka úni parakachi juchaari kúnguarhikuarhu anapuecha sánderu tsípikua jingoni marhuauaka.a

“DIOSPATSEE [...] PÉRSIDANI ENGANI JI XÁNI UÉKAJKA”

6, 7. a) ¿Nénaksï uaa májkueni úni orhejtsïkuticha ísï eska Jesúsi, Pablu ka máteru Tata Diosïri marhuaricha? b) ¿Andiksïsï sési pʼikuarherajki erachicha engachi miántajka imeecheri nombrichani?

⁶ Uánikua erachichaksï uandaspti eskaksï kánikua sési pʼikuarherasïnga engaksï orhejtsïkuticha interesi pájka imeechani jimbo. Ma ambe engaksï jimbo uaaka xarhatani orhejtsïkuticha eskaksï interesi pásïnga máteruecha jimbo, jindeesti májkueni úparini eska Dabidi, Eliú ka ístu eska tata Jesukristu (arhinta je 2 Samuel 9:6; Job 33:1 ka Lukasʌ 19:5). Taniperanksï uandajpaspti máteruechani imeecheri nombri jimbo. Ka ístu para Pablu kánikua jukaparhakuespti miántani ka uandajpani erachichani imeecheri nombri jimbo. Enga na kʼamarapka imeeri karakatani para Roma anapuecha uandajperata axakuasïndi jukari 25 erachicha ka pirenchichani enga imeeri nombricha jimbo uandajpajka. Pori ejemplu karaspti: “Diospatsee [...] Pérsidani engani ji xáni uékajka” (Rom. 16:​3-​15).

⁷ Máru orhejtsïkutichaksï úku jukanchasïndi miántani kúnguarhikuarhu anapu erachicheri nombrini. Peru engaksï jánguarhintaska ísïisti enajkiksï arhini japiringa mándani erachini: “T’uri kánikua jukaparhakueska para ji” (Éx. 33:17). Orhejtsïkutichaksï úsïndi eskaksï erachicha kánikua tsípini p’ikuarheraaka engaksï miántajka imeeri nombrichani engaksï íntsaani jauaka mókuntskuani para Aianhpiri jorhenguarhikuarhu o náki uéjki máteru tánguarhikuarhu (terukutanta je Juanu 10:3 jingoni).

IMA “ENGA XÁNI KÁNIKUA MARHUAKUKA JUCHAARI TATANI”

8. ¿Pablu néna májkueni úspi eska Tata Diosï Jeoba ka Jesúsi?

⁸ Máteru ambe engaksï jimbo juchaari erachicha uaaka tsípikua jingoni marhuakuni Tata Diosïni, jindeesti ambakiti ambe uandaparini imeecheri ambe ísï eska na úpka Pablu. Inde ambe xarharasïndi enga segundu karakatani karakuapka Korintu anapuechani, enga uandapka: “Mámaru ambe jimbo tsípikuarhisïnga chánksïni jimbo” (2 Kor. 7:4). Inde sési járhati uandakuecha kánikua sési pʼikuastapti Korintu anapu erachichani. Ístu Pablu májku járhati uandakuecha úraspti para máteru kúnguarhikuarhu anapuecheri (Rom. 1:8; Fil. 1:​3-5; 1 Tes. 1:8). Eska na uandantapka Pérsideri ambe imeeri karakatarhu enga Roma anapuechani karakuapka uandaspti: Ima “enga xáni kánikua marhuakuka juchaari Tatani” (Rom. 16:​12). Seguru eska juchaari pirenchi kánikua tsípini pʼikuarherapka enga Pablu ambakiti ambe uandapka máteruecheri, májkueni úspti eska Tata Diosï Jeoba ka Jesúsi (arhinta je Markusʌ 1:​9-​11 ka Juanu 1:​47; Jaŋ. 2:​2, 13, 19).

9. ¿Andiksïsï kúnguarhikuarhu anapuecha sánderu tsípini pʼikuarherajki engachi uinhaperantajka ka engajtsïni uinhaperantajka?

⁹ Ístu iásï anapu orhejtsïkuticha kánikua jukaparharasïndi uandani ambe engaksï pʼikuarherajka imeecheri erachicha jimbo (Prov. 3:​27; 15:23). Engaksï ísï újka, ísïipirindi enajkiksï arhiani japirini: “Exeska ambe engari újka, jimbokani interesi pásïnga t’unguini jimbo”. Ísïisti, juchaari erachicha uétarhinchasïndi eskaksï orhejtsïkuticha uinhaperantauaka uandakuecha jimbo. I ambe enga uandapka pirenchi ma enga 55 uéxurhinisï jatirikia, xarhatasïndi na engaksï pʼikuarherajka uánikuecha: “Ánchikuarhitarhu kasikini no nema arhisïndi eskari sési úxaka ambe ma. No nemakini uandajpasïndi ka iáminduechaksï uékasïndi sánderu k’éri pʼikuarherani. Ísï jimbosïni sési pʼikuarherajka engareni orhejtsïkuti ma arhijka eska jukaparharasïnga ambe engani újka kúnguarhikuarhu. ¡Kánikuarini uinhaperantasïndi! Para ji jindeesti na engareni juchiiti Taati auandarhu anapu xarhatachejka eskarini xénchasïnga”. Nótki xáni ióni orhejtsïkuti ma, ambakiti uandakuecha arhiaspti taati ma enga jandiajku kʼuiriperani jaka imeeri tsimani sapiichani. ¿Néna jarhuataspi erachini? Ima uandantasïndi: “Imeeri uandakuechajtsïni kánikua uinhaperantaspti”. Ísïisti, orhejtsïkuticheri sési járhati uandakuechaksï kánikua jarhuajpesïndi ka úsïndi eskaksï erachicha sánderu tsípikua jingoni marhuauaka ka i ambe úsïndi eskaksï erachicha sánderu uinhapikua jingoni jámaaka tsípikueri xanharurhu ka no kuatantani (Is. 40:31).

“DIOSÏRI TÁNGUARHIKUANI ERANGUNI JARHANI”

10, 11. a) ¿Nénaksï uaa májkueni úni orhejtsïkuticha ísï eska Neemiasi? b) ¿Ambe jarhuataua orhejtsïkutichani paraksï úni uinhaperantani erachichani engaksï niuaka pʼorhembiani?

¹⁰ ¿Ambeksï máteru ambe uaa úni orhejtsïkuticha enga xarhatajka eskaksï uandanhiasïnga erachicha jimbo ka úni eskaksï sánderu tsípikua jingoni marhuauaka? Uénaparini uandontskuarhekuani imeechani engaksï uétarhinchajka (arhinta je Úkuecha 20:28, Táta Diósïri Uandakua Tata Jesukristueri Aiatsperakua). Engaksï ísï úni jarhajka, májkuenksï úsïndi eska ióntki anapu orhejtsïkuticha. Pori ejemplu exe je ambe enga úpka orhejtsïkuti Neemiasi enga exepka eska máru imeeri erachicheri mintsikakua chkétakuarhixapka. Biblia arhisïndi eska ima jauaraspka ka niraspti uinhaperantaani (Neh. 4:​14). Iásï anapu orhejtsïkutichaksï májkueni úsïndi: jauarasïndiksï enga arhikuekajka, eskaksï jirejiresï nirasïnga para erachicheri mintsikakuani uinhaperantani. Ísï jimbosïksï nirajti pʼorhembiani imeeri kʼumanchikuecharhu, engaksï uaaka úni paraksï úni uinhaperantaani (Rom. 1:​11). ¿Ambe uaa jarhuataani orhejtsïkutichani engaksï niuaka pʼorhembiani erachichani paraksï úni uinhaperantaani?

¹¹ Ante deksï nirani pʼorhembiani, orhejtsïkutichaksï jatsisti para arhutani tiempu paraksï eratseni ambeksï uandontskuarhia imani jingoni engaksï pʼorhembiaka. Úpirindiksï kurhamarhikuarhini: “¿Ambe uandanhiatechani jatsiaski i erachi? ¿Ambechi úpirini arhini para uinhaperantani? ¿Náki Biblieri karakata uaa jarhuatani? ¿Jarhaski nema enga Biblia uandajka ka enga májkueni ambe nitamakuarhika?”. Ini járhati kurhamarhikuechaksï uaati eska uandontskuarhita uinhaperantauaka erachichani. Engaksï orhejtsïkuticha pʼorhembiajka, jurajkuasïndi erachichani eskaksï uandontskuarheaka ka jingontkuksï kurhajchasïndi (Sant. 1:​19). Pirenchi ma uandasïndi: “¡Najtsïni xáni uinhaperantajki enga orhejtsïkuti ma jingontku kurhaajka!” (Luk. 8:​18).

12. ¿Néksï uétarhinchasïni eskaksï uinhaperantauaka kúnguarhikuarhu, ka andi?

¹² ¿Néksï uaa pʼorhembiani orhejtsïkuticha? Pablu arhiaspti orhejtsïkutichani: “Kuájpia je iámindu Diosïri karichichani”. Ísïisti, iámindu kúnguarhikuarhu anapuechaksï uétarhinchasïndi eskaksï uinhaperantauaka, asta aianhpiricha ka prekursoricha engaksï uánikua uéxurhini páni jakaia aianhpini. ¿Andiksïsï uétarhinchajki i erachicha engaksï no méni jurajkujka Tata Diosïni eskaksï orhejtsïkuticha uinhaperantauaka? Jimbokaksï imeechajtu úpiringa ísï pʼikuarherani enajkiksï no uaa tekaantani tsʼéjkukuechani enga i xáni no sési jándu parhakpinirhu jaka. Ambe ma enga úkuarhinchapka rei Dabidi, jorhendasïndijtsïni andisï eska asta ima jamberi enga no méni jurajkujka Tata Diosïni ménichani uétarhinchasïndi eska nema uinhaperantaaka.

“ABISAI [. . .] JURASTI PARA JARHUATANI IMANI”

13. a) ¿Ambe exespi Isbí-benob para úni uándikuni Dabidini? b) ¿Andisï úpi Abisai kuájpini Dabidini meru jiáni enga ima uétarhinchani japka?

¹³ Sánisï tátsekua enga Dabidi erakunhapka para juramutiini Israeli, uarhipespti Goliatini jingoni, enga refaimicheri parientipka ka engaksï kánikua iójtarhapka. Dabidi xarhataspti eska no chésïreenga ka uándikuspti (1 Sam. 17:​4, 48-​51; 1 Crón. 20:​5, 8). Máru uéxurhini tátsekua, engaksï ménderu uarhipeni japka filisteuecha jingoni, Dabidi uarhipespti acheeti ma jingoni enga kánikua iójtarhapka ka enga refaimicheri parientipka. I acheeti arhinhasïreendi Isbí-benob (2 Sam. 21:16; nota). Ka i achamasï sáno uándikuspti Dabidini. ¿Andi? No jimboka Dabidi chésïreenga, sino jimboka kuataratixapka. Karakata uandasïndi eska Dabidi kuataratixapka. Ka enga Isbí-benob kuenta íntskukuarhepka exespti néna úni andani. Peru ante de eska Isbí-benob uándikupiringa Dabidini, “Abiasai Serúieri uájpa jurhaspti para jarhuatani imani ka kuáskuspti filisteuni ka uándikuni” (2 Sam. 21:15-​17). ¡Sánoksï uándikuspti! Seguru eska Dabidi kánikua agradesidu pʼikuarheraspka enga Abisai exeni japka ambe enga Dabidi nitamakuarhinchani japka ka eska peligrurhu jarhaspka ka sóntku jurhani jarhuatani. ¿Ambechi jorhenguarhisïni i uandantskueri ambe?

14. a) ¿Nénachi uaa orhepani uérakuani ójkutakuechani engaksï xáni kʼérati komueska Goliati? b) ¿Nénajtsïni uaa jarhuatani orhejtsïkuticha parachi ménderu tsípini pʼikuarherani ka jatsini uinhapikua? Uanda je ejemplu ma.

¹⁴ Nájkirukajtsïni Satanasi ka engaksï imani jingonika ójkutakuechani pérachiaka, Jeobaeri testiguechachi seguirixaka aianhpini iápuru parhakpinirhu. Máruchi kʼérati uandanhiatechani orhepani uérakuaskia engaksï ísïika komueska Goliati, peru jimbokachi mintsikasïnga Tata Jeobani úskachi ísï úni. Ka jimbokachi jánguarhintaxaka úni orhepani uérakuani uandanhiatechani i ambejtsïni kuatajkusïndi. Engachi ísï pʼikuarherani jauaka sánderu úkua jukanchakachi orhepani uérakuani náki uéjki uandanhiata. Imani tiempu jimbo, ma orhejtsïkutiri jarhuajperata uaati úni eskachi ménderu tsípini pʼikuarheraaka ka uinhapitini. Prekursora ma enga ma 65 uéxurhinisï jatiriijka, uandantasïndi: “No káni iónisti engani no sési pʼikuarherenga ka engani aianhpini nireenga kuatarasïreenga. Orhejtsïkuti ma kuenta íntskukuarhespti ka kurhamarhisptireni ambe nitamakuarhixapi. Sésichi uandontskuarhespka ka úraspti Bibliarhu anapu karakata ma. Ísï úspka eskarini na arhistachipka ka sésirini nichespti. ¡Kánikua agradeserikusïnga enga jingontku japka ka jarhuatandireni!”. Kʼéri kóntperata máesti jatsiani orhejtsïkuticha engaksï xáni uékpitiika, engaksï uandanhiajka juchantsïni jimbo ka ísï eska Abisai, engaksï listu jarhajka parajtsïni jarhuatani.

“PARA ESKAJTSÏ CHÁ MÍTIPIRINGA NA ENGAKSÏNI JI . . . UÉKAJKA”

15, 16. a) ¿Andiksïsï xáni xéncheni Pabluni erachicha? (b) ¿Andichisï xénchajki juchaari orhejtsïkutichani engaksï xáni uékpitiika?

¹⁵ Kúnguarhikuani kuidarini kánikua ánchikuarhitesti. Ménichanisï, orhejtsïkutichaksï erantskutasïndi kómarhini jimbokaksï uandanhiasïnga Tata Diosïri kúnguarhikuani jimbo (2 Kor. 11:27, 28). Peruksï kánikua sési úsïndi imeecheri ánchikuarhita kúnguarhikuarhu ka tsípikua jingoni, ísïksï úsïndi eska Pablu enga karakuapka Korintu anapuechani: ‘Kánikua tsípikua jingoni íntspiaka asta juchiiti tsípikuani jamberi chaari almechani jimbo’ (2 Kor. 12:15). Xáni xénchasïreendi erachichani, jimbosï xáni jánguarhintendi uinhaperantani (arhinta je 2 Korintu 2:4; Fil. 2:​17; 1 Tes. 2:8). ¡Jimboksïsï imeecha xáni xénchendi! (Uku. 20:31-​38).

¹⁶ Iásïjtuchi kánikua xénchasïnga orhejtsïkutichani engaksï xáni uékpitika ka juchaari kómarhikuecharhu diosmaiamukuachi arhisïnga Tata Jeobani jimbokachi jatsiaska ini erachichani. Na engaksï interesi pájka, úsïndi eskachi tsípini pʼikuarheraaka ka uinhaperantasïndijtsïni engajtsïni pʼorhembijka ka ístuchi kánikua jukaparharasïnga engaksï jingontku jarhajka parajtsïni jarhuatani engachi no sési pʼikuarherani jarhajka uandanhiatecha jimbo engachi jatsiajka. Ísïisti, jindeestiksï jarhuajpiricha parachi jucha kánikua tsípini pʼikuarherani.