Néna mintsitarhu niárakuani familiarichani engaksï no jakajkutika

“NÍ chiiti parienticha jingoni ka aiangua ambe enga xáni úka Tata Diosï Jeoba tʼungini jimbo ka na engakeni xáni pʼamojkuka”, Jesúsi ini ambe arhispti acheetini ma enga uékeenga imeeri chúxapatini. Jamberi jima no iauani japti ireta Gadara uératini enga surirhu ísï japka mar de Galilea. I uandakuechaksï xarhatasïndi eska Jesúsi ma ambe kʼuiripuechani: eskaksï tsitisïnga aianguani imeeri parientichani imani ambe enga jukaparhakua ambeeka (Mar. 5:​19).

Ini jurhiatikuecha jimbo uánikuechaksï seguirisïndi ini ambe, najkirukaksï máru lugaricha jimbo sánderu ísï xarhatajka. Ísï jimbo enga nema nirajkia Tata Diosïri Jeobaeri marhuari máeni, sáno méntkisï niárasïndiksï aianguani imeeri parientichani ambe engaksï jakajkujkia. Joperu, ¿nénaksï uaa ísï úni? ¿néna uaa mintsitarhu niárakuani familiarichani engaksï máteru relijioni jatsika o engaksï no jakajkujka Tata Diosïni? Biblia ambakiti konsejuechani íntspiasïndi.

“EXENTASKACHIA MESIASINI”

Primeru siglurhu, Andresi jindeespti máteru kʼuiripu enga uénapka míteni eska Jesúsi jindeespka Mesíasi. ¿Néni aianguspi jirejiresï? “Orheta imeeri ermanu jémbani Simonini exentaspti ka arhispti: ‘Exentaskachia Mesíasini’ (enga arhikuekajka Kristu)”. Tátsekua jima páspti nani enga Jesúsi japka ka ísï úspti eska imajtu niárapiringa Jesúsiri chúxapati máeni (Juanu 1:​35-​42).

Ma seisi uéxurhini ísï tátsekua, Pedru —enga Jope japka— pʼímarhinhaspti para nirani norterhu ísï jini Cesarea ofisialiri kʼumanchikuarhu ma enga arhinhajka Korneliu. Enga ima niárapka ¿nénaksï jima jarhaspi? Relatu arhisïndi: “Korneliu tʼuini erokaaxaptia ka ístu tʼuini tánaantasptia parienti jémbeechani ka amigu jémbeechani”. Ísï úparini Korneliu úspti eska imeeri familiaricha úpiringa kurhajchani Pedruni ka ima mismuks}í erakukuarhini ambeksï úpirini (Uk. 10:22-​33).

¿Ambechi jorhenguarhisïni na engaksï Andres ka Korneliu kaapka imeeri familiarichani?

Nóksï ísku exeaspti. Andresi úspti eska imeeri ermanu jémba niárapiringa míteni Jesúsini ka Korneliu tanantaspti imeeri familiani paraksï kurhajchapiringa Pedruni. Joperu no ma afuersa úspti eskaksï niárapiringa kristianu úkuarhini. ¿Ambejtsïni jorhendasïni? ¿Nénachi uaa terukukuantani? Jamberichi uaa aianguani ambakiti ambe engachi jorhenguarhika o imeeri ambe uandontskuarhekuani engachi uaa Biblieri ambe jorhendani o eskaksï míteauaka máteru testiguechani. Joperuchi jatsiska para jurajkuani eskaksï erakukuarhiaka ambe úni ka no no sési pʼikuastaani nijtu fuersa úni eskaksï ísï uaaka. Parachi míteni néna engachi uaa jarhuatani, ju je exeni ambe engaksï úpka Jürgen ka Petra Alemania anapu temungurhiri ma.

Petra Jeobaeri testiguecha jingoni jorhenguarhispti Biblieri ambe ka itsï atakuarhispti. Uámba ofisiali maéspti ka enga mítepka no tsitispti ambe enga erakupka úni Petra. Peru tátsekua, exespti eskaksï Jeobaeri testiguecha jurhimbitku ambe jorhentpisïnga Biblieri ambe. Ísï jimbo imajtu niárapti aiakukuarheni Jeobani ka iásï kúnguarhikuarhu anapu orhejtsïkuti máesptia. ¿Ambe uandasïni eskachi uaa úni parachi mintsitarhu niárakuni familiarini ma enga máteru relijionirhu jauaka?

Jürgen uandasïndi: “Asï afuersa u je eskaksï imeechajtu imani ambe jakajkuaka enga chá jorhendani jaka, nijtu jukari uandontskuarhekuani inde ambe. Jimbokajtsï masi uaa úni eska ima nóteru uékaakia jorhenguarhini. Nájkiruka ióndaaka sánderu sésisti sánhanitu uandontskuarhekuani. Máteru ambe enga jarhuatauaka, jindeesti eskaksï míteauaka erachichani engaksï májkueni jatiriika eska imeecha o engaksï imani ambe tsitiaka engaksï imeecha tsitijka. I ambe uáti eskaksï uékaka jorhenguarhini”.

Nájkiruka apostoli Pedru ka Korneliueri familia jirejiresï uénapka jorhenguarhini Biblieri ambe. Jarhastiksï máteru kʼuiripuecha primeru siglurhu engaksï sánderu sáni ióndapka.

JESÚSIRI ERMANU JÉMBEECHA

Uánikua Jesúsiri parientichaksï jakajkusti imani enga aianhpini jámeenga. Pori ejemplu, apostoli Santiagu ka Juanu imeeri primu jémbetiksï ka imeecheri amamba Salomé, tia jémba. Jamberi ima kuenta úkuarhipti ‘uánikua máteru uarhiiticha’eskachi na arhintaaka “jarhuataasïreendi[ksï] (Jesúsini ka imeeri apostolichani) imeecheri jatsikuarhekua ambe jingoni”(Lukasʌ 8:​1-3).

Joperu máteru Jesúsiri familiaricha no jirejiresï jakajkusptiksï imani. Ma xanhari, ma uéxurhini tátsekua enga na itsï atakuarhipkia uánikua kʼuiripuechaksï tánguarhintaspti kʼumanchikua ma jimbo paraksï kurhajchani. “Enga imeeri familia mítepka ambe enga úkuarhini japka arhisïndi relatu—, nirasptiksï jirinhantani paraksï pántani, jimbokaksï uandasïreenga: ‘Loku úkuarhistia’”. Tátsekua engaksï imeeri mediu ermanu jémbeecha uandontskuarhepka imani jingoni ka kurhamarhini nani nipirinia, ima no aianguaspti. ¿Andi no nómbe? Jimboka “imeeri ermanu jémbeechaksï no jakajkusïreendi Jesúsini” (Mar 3:​21; Juanu 7:5).

¿Ambechi jorhenguarhisïni néna enga kaapka Jesúsi imeeri parientichani? No no sési pʼikuarheraspti engaksï máteruecha uandapka eska loku úkuarhispkia. Asta ísï tátsekua engaksï na uándikupkia ka enga tsíntapkia uinhaperaantaspti imeeri familiani, jimboka xarhakuaspka imeeri mediu ermanu jémba Santiaguni. Péringa i ambe jarhuatapka paraka Santiagu ka máteru imeeri ermanu jémbeecha seguru japiringa eska ima jindeespka Mesíasi. Ísï jimbo, imeechaksï tánguarhintatixapti apostolicha jingoni ka imeecha jingoni engaksï sési marhuakuni japka Tata Diosïni kuarturhu karhakua ma jimbo jini Jerusaléni ka engaksï imeechajtu meru intsïnhapka espiritu santu. Ísï tátsekua, Santiagu ka Jesúsiri máteru mediu ermanu jémba Judasï, ánchikuarhitaksï ma intsïnhaspti enga kánikua jukaparhakuepka (Uk. 1:12-14; 2:1-4; 1 Kor. 15:7).

MÁRUKSÏ SÁNDERU TIEMPU UÉTARHINCHASÏNDI

Májkueni eska primeru siglurhu, iásïjtuksï máru familiaricha sánderu tiempu uétarhinchasïni paraksï imani xanharu jimbo nirani enga tsípikua pájpijka. Pori ejemplu Roswitha enga meru katolikepka, enga imeeri uámba Jeobaeri testigu úkuarhipka 1978 jimbo. Ima seguru jarhaspti ambe enga jakajkuenga, jimbosï no jiókuarhipka imani ambe enga uámba erakupka úni. Joperu ísï tátsekua, uénaspti ménderueni exeni ambe ma. Kuenta íntskukuarhepaspti eskaksï Jeobaeri testiguecha jurhimbikua ambe jorhentpisïnga. Ísï jimbo 2003 jimbo itsï atakuarhispti. ¿Ambe jarhuataspi paraka mójtakukuarhipirhinga? Jimboka ima exesïrendi eska uámba no ikiasïrenga eska ima no sési kámenga, inde ambe jarhuataspti paraka sánhani arhipiringa ménderueni exeni ambe ma. Roswitha arhini konsejuni íntspisïndi: “Kánikua jarhuajpesïndi enga néna kánikua tekaantskua jingoni újka ambe ma”.

Monika 1974 jimbo itsï atakuarhisti ka imeeri tsimani uájpeechaksï diesi uéxurhini tátsekua niáraspti Jeobaeri testigu úkuarhini. Imeeri uámba Hans no niáraspti itsï atakuarhini sino asta 2006 jimbo, joperu no méni arhiaspti ambe ma imeecheri relijioni jimbo. Indeni ambe miántaparini ¿ambeksï uandasïni imeecha eskachi uáka úni? “Asï jurajku je Jeobani ka asï jurajkutakuarhi je enga tsʼéjkukua ambe jauaka. Ma ambe enga jarhuatapka Hansini jindeespti eska imeeri familia méntku xarhatakuni jarhasïrenga eskaksï xénchasïreenga. Erokuarhiparini eska ménisï jiókuarhipiringa jurhimbikuani.

SÉSI PʼIKUASPISÏNDI JURHIMBIKUA ENGA ÍSÏIKA ESKA ITSÏ

Ma xanhari, Jesúsi terukutantaspti jurhimbikuani itsï jingoni enga tsípikua íntspijka para méntkisï (Juanu 4:​13, 14). Jucha uékasïnga eskaksï juchaari parienticha indeni jásï itsï itsïmaaka enga pimbinhanharika ka enga sési pʼikuastpejka. Peru no sési japirindi engachi mátirku aianguapiringa uánikua ambe. Parakaksï no no sési pʼikuarheraaka jatsiakachi para exeni néna engachi aianguauaka ambe engachi jakajkujka. Bibliarhu arhisïndi: “Imeeri mintsita enga jurhimbitku jámajka eratsentasïndi ante de uandani ka eska ima enga jánhaskatiika sési eratsentasïndi ambe enga uandaaka ka úsïndi eskaksï máteruecha jakajkukuaka”. ¿Nénachi uaa ísï úni eska ixú na arhijka? (Prov. 15:28; 16:23).

Ima témba enga uéjka eska imeeri uámba jorhenguarhiaka ambe ima jakajkujka “eratsentasïndi ante de uandani”, i ambe arhikuekasïndi eska jingontku eratsentasïnga ambe enga uandaaka ka no sóntku ísï úsïndi. Ka no méni xarhatakuati eska ima sánderu jorhenaska o eska sánderu jurhimbikua jingoni úsïnga ambe ma. Enga ísï uáka imeeri uandakuechaksï sési pʼikuastaati ka uáti eskaksï sési pájperaaka. Ka paraka sési ‘eratsentaaka ambe enga uandaaka’, témba úpirindi kurhamarhikuarhini: “¿Na jatini sánderu sési japirini parani uandontskuarheni juchiiti acheeti jingoni? ¿Amberi tsitisïni uandontskuarheni ka arhintani juchiiti acheeti, siensieri, politikeri o chʼanakueri ambe? ¿Ambe úpirini úni paraka uékaka jorhenguarhini Biblieri ambe, joperu respetariparini imeeri pʼikuarhinhikuechani ka ambe enga eratsejka?

Parachi úni mintsitarhu niárakuani juchaari familiarichani, nóchi solu jatsiska para saninhanitu jorhendaani. Sino ístu juchaari úkuecha jingoni.

JUCHAARI AMBAKITI JÁNGUA

Jürgen engachi antesi uandaaka, uandasïndi: “Jánguarhi je pauani pauani ísï úni eskaksï Biblieri karakatecha na uandajka. Ísïksï, chaari familiaricha engaksï nótki jakajkujka exeati eskajtsï sési úxaka nájkirukajtsï no ma ambe uandaaka”. Hans enga treinta uéxurhinisï tátsekua itsï atakuarhika eska imeeri témba, májkueni uandasïndi: “Jatsiskachi para ambakiti ejemplu ma íntspini. Inde ambe uáti eska parienti ma enga no testigueka, exeaka eskajtsïni jurhimbikua marhuachexaka”. Juchaari familia jatsisti para exeni eskajtsïni juchaari jakajkukua jarhuatasïngajtsïni parachi ménderueni jámani, joperu no parachi no sési ambe úni sino parachi ambakiti ambe úni.

Apostoli Pedru arhini ambakiti konsejuechani íntsaaspti imani kristianuechani engaksï uámbeecha no jakajkutika: “Janhanharhia je chaari acheetichani, paraka acheeticha engaksï no jakajkujka [Tata] Diosïri uandakuani, jakajkuakaksï chaari sési jángua jimbo nájkirukajtsï no ma ambe aianguauaka, jimbokaksï exeaka na engajtsï xáni sési jámajka janhanharhiaparini. Ka parajtsï kasïpeni, no uétarhisïndi xáni tantiarhini para chaari kuerpuechani sési jájkuantani, komueska para jukari chinijtsïni o komueska para tirhindikua tiripitiri jukaani o para xáni sési jásï xukuparhakua jukani, sino uétarhisïndi eskajtsï sési jájkuntaaka mintsitani enga no exenhajka, kaxumbikua jingoni ka pínandikua jingoni enga no méni kʼamaraaka, jimboka inde ambe jindeeska enga sánderu sési jáxeka [Tata] Diosïni japarini” (1 Ped. 3:​1-4).

Pedru uandaspti eskaksï témbecha engaksï kristianueka uaaka mintsitarhu niárakuani imeecheri uámbeechani ambakiti jánguecha jingoni. Pirenchi ma enga arhinhajka Christa meru ísï úspti eska Bibliarhu na arhijka, jánguarhintaxati para mintsitarhu niárakuni uámbani desde jiáni uératini enga itsï atakuarhika 1972 jimbo. Imeeri uámba niraspti jorhenguarhini Jeobaeri testiguecha jingoni, joperu nótki aiakukuarhesïndi Jeobani. Nirastia máru kúnguarhikuarhu anapu tánguarhikuecharhu ka sési pájperasïndi erachicha jingoni ka imeechajtuksï respetarisïndi ambe enga ima erakuka úni. ¿Néna jánguarhintasïni Christa mintsitarhu niárakuni?

Ima uandasïndi: “ Eratsetixaka seguirini imani xanharu jimbo engareni ima arhijka. Joperuni ístuni jánguarhintaxaka paraka juchiiti acheeti niáraka jakajkuni juchiiti ambakiti jánguani jimbo no ma ambe aiangupareni. Jánguarhintasïndi iámindu imani ambe úni enga ima uéjka joperu enga terukuntajka Bibliarhu anapu prinsipiuecha jingoni. Ka ístuni respetarinisïnga ambe enga ima erakujka úni ka Jeobani jurajkukusïnga iámindu ambe”.

Christeri ejemplu xarhatasïndi eska no jatsiska para meru ísï úkuarhini eskachi na uandaaka. Nájkiruka no jurajkujka para úni Tata Diosïri ambe komu, nirani aianhpini ka tánguarhikuecharhu ima kurhangukusïndi uámbani ka mítesti eskachi jatsiska para xarhatakuni eska xénchasïnga ka para imani jingoni jarhani ka májku kʼériksï úni ambe ma. Iáminduechachi jatsiska para mójtakuni ambe ma enga uétarhiaka ka kurhangukuani juchaari familiarichani engaksï no testigueka. Biblia uandasïndi: “ Para iámindu ambe tiempu ma jarhasti”, asta parachi juchaari familia jingoni jarhani engaksï no májkueni ambe jakajkujka eska jucha ka sánderia enga juchaari acheetiuaka o uarhiti. Engachi májku kʼéri jarhajka i ambe úsïndi eskachi uáka tsimarhani uandontskuarheni ka xarharastia eska enga ma ísï úska, jarhuajpesïnga paraka no nema jandiajku pʼikuarherani ni selosi ambe (Ecl. 3:1).

JU JE SEGUIRINI EROKUARHINI

Holgeriri taati jémba enga beinti uéxurhini ísï tátsekua itsï atakuarhika, eska máteru imeeri familiarhu anapuecha uandantasïndi: “Kánikua jukaparhakuesti eskaksï familiaricha míteaka eskachi xénchasïnga ka eskachi kómarhijpikuasïnga”. Ka Christa uandantasïndi: “ No méni kuatantaaka eska ma jurhiani juchiiti acheeti jiókuarhiaka jurhimbikuani ka Jeoba jingoni úkuarhini”. Jatsiskachi para seguirini erokuarhini eska ma jurhiani juchaari familiaricha engaksï no testigueka niáraka mójtakurhini . Jatsiskachi para seguirini jánguarhintani.

Ambe engachi uéjka úni jindeesti, sési pájperani juchaari parientichani jingoni ka jarhuatani parakaksï niáraka míteni jurhimbikuani ka mintsitarhu niárakuani Tata Diosïri uandakua jingoni. Para úni ísï úni ju je méntkisï “kaxumbikua jingoni ka janhanharhikua jingoni” úni ambe ma (1 Ped. 3:​15).