¿Kʼéri ambe arhinhasïni Tata Diosï juchiiti xukuparhakua jimbo?
“Ú je iámindu ambe paraka Tata Diosï kʼéri ambe arhinhaaka” (1 KOR. 10:31).
1, 2. ¿Andichisï Jeobaeri testiguecha jatsia juramukuechani engaksï xukuparhakueri ambe uandajka? (Exe dibujuni enga ueenakuarhu jaka).
“UÁNIKUA kʼuiripu no ísï xukuparhatini jámaxapti eska na uétarhijka para tánguarhikuarhu ma nirani, ka sánderia jimboka aparhikuarhixapka”. Ísï uandaspti Holanda anapu periodiku ma jiáni engaksï relijioniiri orhejtsïkutiicha tánguarhintapka. Ima enga periodikuni karapka, ístu uandaspti eskaksï Jeobaeri testiguecha méntku ménderueni xukuparhatixapka imeecheri kʼéri tánguarhikuarhu: “Achamasïicha, tumbiicha ka jatiriicha, traji ka korbataksï jukarixapti; nanakecheri ka iurhitskiricheri faldechaksï sésku iórhaspti, nóksï [. . .] xárhatispti eska ióntki anapuecheeri ka kánikuaksï sési jarhaspti”. Uánikua ueltaksï felisitariastia Jeobaeri testiguechani jimboka xukuparhakua jingonksï xarhatasïnga “eskaksï janhanharhiasïnga máteruechani ka eskaksï sési eratsesïnga”, ísï eskaksï na jatsika para úni imeecha “engaksï uandajka eskaksï sési marhuakuxaka Tata Diosïni” (1 Tim. 2:9, 10). Nájkiruka ini bersikuluecha jimbo apostoli Pablu nanakechani arhikuekani japka, ístu jindeesti para tatakeecha.
2 Para jucha engachi Tata Diosï Jeobaeri ireteeka, Tata Diosïiri juramukuecha engaksï xukuparhakueri ambe uandajka ka néna engachi arreglarikuarhiaka májkuenksï jukaparhakuesti eska para juchaari Tata Diosï (Gén. 3:21). Ambe enga Biblia uandajka iiri ambe, sési xarhatasïndi eska ima enga Juramutiika iámindu amberi sésikua jatsiska para uaxastani juramukuechani engaksï uandajka néna engaksï jatsika para xukuparhani imeeri marhuariicha. I ambe arhikuekasïndi eska engachi erakuni jámaaka néna engachi xukuparhaaka ka arreglarikuarhini, no soluchi imantkusï exeaka ambe engachi jucha tsitiaka, sino ístu ambe enga juchaari Kʼéri Juramuti Tata Diosï Jeoba jaiapanhentajka.
3. ¿Ambejtsïni jorhendasïni xukuparhakueri ambe ima Lei enga Tata Diosï Jeoba Israeliteechani íntsaapka?
3 Lei enga Tata Diosï Jeoba íntsaapka Israeliteechani, juramukuechani jataspti enga kuájchakuauenga ísku jándikueri ambe engaksï jima uanondani ísï anapu nasionicha ueenga. I ambe xarhatasïndi eska Tata Diosï kurhunhisïnga imani jásï xukuparhakuani enga jimbo no újka mítentskuarhini sini nanaka o tatakasï ma jukarini jaki (arhinta je Deuteronomio 22:5). I juramukuecha engaksï xukuparhakueri ambe uandajka sésiksï xarhatasïndi eska Tata Diosï Jeoba no tsitisïnga imani jásï xukuparhakuani enga újka eska tataka ma nanakeni xarharaaka, o eska nanaka ma tatakeeni xarharaaka o enga úkua jukaaka mítentani sini ma tatakeski o nanakeski.
4. ¿Ambejtsïni jarhuataa kristianuechani parachi úni sési erakuni ambe engachi xukuparhaaka?
4 Bibliarhu, juramukuechaksï máru jarhasti engaksï prinsipiuecha arhinhajka ka engajtsïni jarhuatajka sési erakuni juchaari xukuparhakuani nani uéjki engachi irekaaka, náki uéjki pʼindekua ka klimachi jatsini. Ísï jimbo, nóchi uétarhinchasïnga lista ma enga uandaaka náki xukuparhakua sési jarhaski eska kristianu ma jukaaka ka nákichaksï no sési jarhaski. Sánderu sési, Bibliarhu anapu prinsipiuechajtsïni jarhuatasïndi parakachi jucha uaaka erakuni ambe engachi tsitiaka. Ju je exeani máru Bibliarhu anapu prinsipiuechani engajtsïni jarhuataaka “sési míteni ambe enga Tata Diosï uéjka, imani ambe enga sési jaka, ambe enga ima jaiapanhentajka ka ambe enga ambakiti ambeeka” parachi jucha xukuparhani (Rom. 12:1, 2).
JÁNGUARHINTASÏNGACHI SÉSI JÁMANI JIMBOKACHI TATA DIOSÏNI MARHUAKUSÏNGA
5, 6. ¿Nénachi jatsipirini para pʼikuastaani juchaari xukuparhakua jimbo imeechani engajtsïni exejka?
5 Tata Diosï úspti eska apostoli Pablu karapiringa na enga xáni jukaparhakueka prinsipiu enga 2 Korintu 6:4 jimbo jaka (arhinta je). Na engachi xarharajka uánikua ambe uandasïndi juchaari ambe. Por ejemplu, kʼuiripu exesïndi na engachi járhati kʼuiripuechejka imani jimbo engaksï “éskuecha exejka” (1 Sam. 16:7). Ísï jimbo, Tata Diosïiri marhuariichachi no solu eratsesïnga xukuparhani imani ambe engachi jingoni sési pʼikuarheraaka ka engachi tsitiaka. Sánderu sési, Bibliarhu anapu prinsipiuechajtsïni jatsipirindi para jarhuatani parachi no jukani imani xukuparhakua ambe engachi jukari márhekuarhiaka, o enga uaaka eskachi ísku xararhekuariaka o seksiini, enga jindeepiringa, imani jásï takusïni enga úpiringa eska xarharani japiringa iámu nanakeri o tatakeeri particha. No nemanchi jatsipiringa para no sési pʼikuastani juchaari xukuparhakua jimbo nijtu úni eskaksï támu ísï erokuarhipiringa jimbokaksï kʼuratsesïnga.
6 Enga juchaari xukuparhakua limpiu jauaka, enga sésku jauaka ka sési exekateni, ka engachi sési arreglarikuarhiska, kʼuiripuechaksï sánderu no úkua jukanchaati exeni eskachi marhuakuxaka Kʼéri Juramuti Tata Diosï Jeobani. Ka asta jamberi úpirindi eskaksï uékapiringa sánderu míteni imeeri ambe. Ístu, uaati úni eska juchaari kúnguarhikua sési exenhaaka. Ini ambe jimbo, jamberi máru kʼuiripuechaksï uékaati míteni pʼímutantskueri ambe enga Biblia uandajka.
7, 8. ¿Káni sési japirini eskachi jánguarhintapiringa sánderu sési xukuparhani?
7 Jatsiskachi para sési xukuparhani jimbokachi Tata Diosïiri Uandakueri ambe aianhpisïnga ka paraka kʼéri ambe arhinhaaka juchaari Tata Diosï enga pímbinhasïika. Jatsiskachi para ísï úni Tata Diosïni jimbo, juchaari erachiicha jimbo ka imeechani jimbo engaksï jimeesïsï irekaka engachi aianhpijka (Rom. 13:8-10). I ambe kánikua jukaparhakuesti ka sánderia engachi Tata Diosïiri ambe újka, komu nirani tánguarhikuecharhu ka aianhpini. Jatsiskachi para ísï xukuparhani eska imeecha “engaksï uandajka eskaksï sési marhuakuxaka Tata Diosïni” (1 Tim. 2:10). Ísïisti eskaksï nani jarhaska xukuparhakuecha engaksï nani sési jaka ka nani nómbe. Ísï jimboksïsï, iámu parhakpinirhu anapu Jeobaeri testiguecha jánguarhintajti míteani ima lugarirhu anapu pʼindekuechani engaksï jimbo irekani jaka paraksï no nemani no sési pʼikuastani.
¿Úsïni eska juchaari xukuparhakua uaaka eskaksï máteru kʼuiripuecha janhanharhiaka imani Tata Diosïni engachi jucha marhuakujka? (Exe je párrafu 7 ka 8).
8 (Arhinta je 1 Korintu 10:31). Xukuparhakua engachi kʼérati tánguarhikuechani jimbo jukantaaka jatsisti para sési jarhani para jiáni ka sési exekateni, ka no ísï eska modecha engaksï xáni ménderueni jarhajka ini jurhiatikuechani jimbo. No sési japirindi eskachi jukari arisku sáni xukuparhapiringa o no kuidadu jingoni, ístu jiáni engachi otelirhu niuaka ka engachi sáni ueraaka jimeesïsï ka enga kʼamaraakia kʼéri tánguarhikua. Ísïchi, sési pʼikuarheraaka arhiani máteruechani eskachi Jeobaeri testiguecheska ka aianhpini nani enga modu jauaka.
9, 10. ¿Andichisï jatsi para exeni ambe enga uandajka Filipusï 2:4 engachi erakuni jámaaka juchaari xukuparhakuani?
9 (Arhinta je Filipusï 2:4). ¿Andiksïsï kristianuecha jatsi para eratseni néna enga pʼikuastauaka imeecheri xukuparhakua máteru erachiichani? Jimbokaksï Tata Diosïiri marhuariicha kánikua jánguarhintasïnga para ísï úni eska Biblia na uandajka: “Uándiku je chaari kuerpurhu anapu ambe enga parhakpinirhu jaka ka enga tsitijka ísku jándikua ambe niátani, ikichakueni jásï ambe úni, relasioni seksuali únchani” (Kol. 3:2, 5). Nóchi uékapiringa eskaksï máteruecha sánderu úkua jukanchapiringa juchaari kulpa jimbo. Jarhastiksï máru erachiicha engaksï kánikua no sési jásï ma irekuarhikuani jurajkuka ka engaksï seguiriini jaka jánguarhintani paraksï nóteru no sési jásï ambe eratsenia (1 Kor. 6:9-11). ¿A no eskachi no uékapiringa sánderu úkua jatsikukuani?
10 Na engachi xukuparhajka jatsisti para jarhuajpeni parakaksï kúnguarhikuarhu anapu erachiicha ka pirenchicha kuájchakukata jauaka ísku jándikueri ambe enga parhakpinirhu úkuarhijka, ia sea engachi Kʼumanchikua Reinuerirhu jauaka o engachi májku kʼéri jauaka juchaari erachiicha ka pirenchicha jingoni. Ísïisti eskachi libriska para jukantani imani xukuparhakuani engachi jucha uékaaka, joperu ístuchi jatsiska para erakuni imani xukuparhakuani enga jarhuatauaka máteruechani parakaksï seguiriuaka pímbinhasï jarhani ka kurhajchaani Tata Diosïiri juramukuechani engaksï uandajka néna pímbinhasï eratsekua ma jatsini, uandakuani ka jánguani (1 Ped. 1:15, 16). Uékperakua enga sési jimboeka “no no sési pʼikuastpesïndi, no úsïndi ambe ma para imajkumindu sési uéranchani” (1 Kor. 13:4, 5).
JU JE ÍSÏ XUKUPARHANI ESKA NA UÉTARHIAKA PARA MÁNDANI LUGARI
11, 12. ¿Ambechi jatsiski para exeni engachi erakuni jámaaka ambe xukuparhani?
11 Engachi erakuni jarhajka ambe xukuparhani Tata Diosïiri marhuariichachi no mirikurhisïnga eska “para iámindu ambe tiempu ma jarhas[ka]; tiempu ma para mándani ánchikuarhita” (Ecl. 3:1, 17). Ísïisti eskachi erakusïnga juchaari xukuparhakuani seguni eska na jauaka klima ka tiempu engachi jimbo irekani jarhajka. Ka ístu nani engachi irekani jarhajka. Nájkiruka tiempu mójtakukuarhijka, Tata Diosï Jeobaeri juramukuechaksï no mójtakukuarhisïndi (Mal. 3:6).
12 Jimeesïsï enga aparhikuarhijka, jamberi úkua jukajti ísï xukuparhani eska na sési exekateuaka, enga sési pʼikuastpeaka ka enga xarharaaka eska ma eratsekua jingoni úni jarhasïnga ambe ma. Ísï jimbo, erachiichaksï kánikua jukaparharasïndi engachi no jukaajka imani xukuparhakuechani engachi jukari márhekuarhiajka o engaksï jukari kʼérajka o engaksï újka eska jukari xarharaaka juchaari kuerpurhu anapu particha (Job 31:1). Ka engachi plaiarhu niuaka o alberkarhu ísï, ju je no mirikurhini eska ambe engachi jukantaaka no no sési exekateuaka (Prov. 11:2, 20). Nájkiruka uánikua kʼuiripuecheri traje de baniu sántku orhitajka, Tata Diosï Jeobaeri marhuariichachi uékasïnga eska sési ambe uandanhaaka juchaari Tata Diosïiri enga pímbinhasïtiika ka engachi xáni xénchajka.
13. ¿Andichisï jatsi para miántani ambe enga uandajka 1 Korintu 10:32, 33 engachi erakuni jámaaka ambe xukuparhani?
13 Jarhasti máteru Bibliarhu anapu prinsipiu enga kánikua jukaparhakueka ka engajtsïni jarhuatajka sési erakuni juchaari xukuparhakuani: jindeesti janhanharhiani máteru kʼuiripuecheri konsiensiani, ia sea engaksï juchaari erachicheuaka o nómbe (arhinta je 1 Korintu 10:32, 33). Nóchi jatsiska para jukani imani xukuparhakuani enga no sési pʼikuastauaka máteru kʼuiripuechani. Pablu karaspti: “Eska mándani arhini jánguarhintaaka imani ambe úni enga sési pʼikuastaaka máteru kʼuiripuni para jarhuatani ka uinhaperantani”. Ka tátsekua uandaspti andi: “Jimboka Kristujtu no úska ambe enga imajkumindu tsitienga” (Rom. 15:2, 3). Ísï jimbo, para tata Jesukristu jarhaspti ambe ma enga sánderu jukaparhakuepka ka eska imani ambe úni enga imajkumindu tsitienga: jindeespti jarhuataani máteruechani. Inde ambe kánikua jukaparhakuespti para úni úni imani ambe enga Tata Diosï jaiapanhintajka. Juchajtuchi uaaka májkueni úni, engachi no imani ambe xukuparhaska enga juchajkumindu tsitiaka ka enga úpiringa úni eskaksï no jiókuarhiaka Tata Diosïiri ambe aianhperakuarhu.
14. ¿Nénaksï uaa taatiicha jorhendaani uájpeechani paraksï sési xukuparhani ka indeni ambe jimbo kʼéri ambe arhinhani Tata Diosï?
14 Kristianuecha engaksï taatiika jatsisïndiksï para jorhendani imeecheri familiani parakaksï kurhajchauaka Bibliarhu anapu prinsipiuechani. Ísï jimboksïsï jánguarhintajti paraka iámindu familia sési arreglarikuarhiaka ka sési xukuparhaaka paraksï tsíperani Tata Diosï Jeobaeri mintsitani (Prov. 22:6; 27:11). Taatiicheeri ejemplu jingoni ka engaksï uékperakua jingoni jorhendajka, jarhuataasïndiksï uájpeechani parakaksï janhanharhiaka Tata Diosï Jeobani, imani enga pímbinhasïtiika. Uétarhisïndi felisitariuani taatiichani engaksï jorhendaajka uájpeechani nani ka nénaksï uaa exentani xukuparhakuani enga sési jauaka, imani, engaksï tsitiaka ka enga jarhuatauaka paraksï xarhatani eskaksï Tata Diosï Jeobaeri marhuaricheska.
JU JE SÉSI ERAKUNI ÚNI AMBE MA
15. ¿Ambe úsïni eskachi sési o no sési xukuparhaaka?
15 Bibliajtsïni ambakiti konsejuechani íntsaasïndi engajtsïni jarhuatajka sési erakuni ambe ma para úni kʼéri arhinhani Tata Diosï. Ísïisti, eska ma parti jimbo, imani ambechi xukuparhasïnga engachi jucha tsitijka ka engachi újka maiampini. Joperu néna uéjkiini méntkisï jatsisti para limpiu jarhani, sésku jarhani, no no sési exekateni ka eska terukuaka imani ambe jingoni engachi uaaka ka enga sési exekateuaka jima engachi irekani jaka.
16. ¿Andisï sési jaki jánguarhintani sési xukuparhani?
16 Uétarhisïndi eskachi méntkisï miáuaka eska no fásiliiska erakuni úni ambe ma enga xarhataaka eskachi eratsekua jingoni úni jarhasïnga ambe ma ka eskachi kuenta úni jarhasïnga iámindu imani ambe engachi antesi uandakia. Tiempu uétarhisïndi ka eska ma jánguarhintaaka para úni exeantani faldechani, bestiduechani ka blusechani engaksï sési exekateuaka o trajichani ka pantalonichani enga ma no jukari márhekuarhiaka. Uánikua tiendecharhu imani ambejkuksïsï atarantajti enga moderiuaka. Joperu ju je miáni eskaksï juchaari erachiicha exeaka eskachi jánguarhintaska parachi sési xukuparhani imani ambe jingoni enga sési exekateuaka ka agradeseriuatiksï. Ístuchi, kánikua sési pʼikuarheraka kʼéri ambe arhini juchaari Taati uékpiti auandarhu anapuni ka inde ambe sánderu ambeuati ka eska ambe engachi jatsika para úni para jirinhani imani xukuparhakuani engachi jimbo kʼéri ambe arhinhaaka Tata Diosïni.
17. ¿Ambe jatsiski para úni kristianu ma enga erakuni jámaaka sini jurajkuni tixinharhikua o nómbe?
17 ¿Ka ambechi uaa uandani tixinharhikueri ambe? ¿Sési jarhaski eska kristianu ma jurajkuaka tixinharhikua? Moisésiiri Lei uandasïreendi eskaksï tatakeecha jatsipiringa para jurajkuni tixinharhikuani. Joperu ini jurhiatikuechani jimbo nóchi obligadu jarhaska para ísï úni eska na uandajka i Lei (Lev. 19:27; 21:5; Gal. 3:24, 25). Máru lugaricha jimbo, jurajkuni tixinharhikua ka sési arregladu, sési exekatesti ka respetu jingoni, ísï jimbo no no sési xarharasïndi enga ma aianhpini jámajka Reinueri ambe. Asta, jarhastiksï máru orhejtsïkutiicha engaksï jurajkujka tixinharhikua ka máteruecha engaksï erakukuarhijka no ísï úni (1 Kor. 8:9, 13; 10:32). Máteru lugarichani jimbo, tatakeechaksï no pʼindesïndi jurajkuni tixinharhikua ka no sési xarharasïndi eska Jeobaeri testigu ma jurajkuaka tixinharhikua. Asta, jamberi indeni lugaricha jimbo, jurajkuni tixinharhikua úpirindi úni eska no kʼéri ambe arhinhapiringa Tata Diosï ka úpirindi uandanhani ima erachiiri ambe enga tixinharhiaka (Rom. 15:1-3; 1 Tim. 3:2, 7).
18, 19. ¿Nénajtsïni jarhuatasïni Miqueas 6:8 parachi jaiapanherantani Tata Diosïni juchaari xukuparhakua jingoni?
18 Kánikuachi agradeserikusïnga Tata Diosï Jeobani engajtsïni íntskujka listani ma juramukuecha jingoni engaksï uandaaka néna engachi xukuparhaaka ka arreglarikuarhini. Sánderu sési, jurajkustijtsïni eskachi jucha uaaka erakukuarhini, joperu, jupindaskuarhiparini Bibliarhu anapu prinsipiuecharhu. Ísïchi, úsïnga xarhatani eskachi uékasïnga séskueni úni ambe ma Tata Diosïni jingoni jámaparini, asta indeni ambe jingoni enga jindeeka para jucha arreglarikuarhini (Miq. 6:8).
19 Xarhatasïngachi eskachi míteska asta nani jamberichi úpirini úni ambe ma ka eskachi kaxumbitiiska engachi exekuarhijka sinchi kurhajchaani jarhasïni juramukuechani pímbinhasïkueri ka Tata Diosï Jeobaeri pímbinhasïkueri ambe, jimbokachi míteska eska sánderu sésiiska ambe engajtsïni ima arhijka ka eskachi meru uétarhinchasïnga. Míteni asta nani jamberichi úpirini úni ambe ma, ístu arhikuekasïndi eskachi janhanharhiauaka máteru kʼuiripuecheri pʼikuarhenhikuechani ka eratsekuechani. Ísï jimbo, xarhatasïngachi eskachi mítesïnga asta nani jamberichi úsïni úni ambe ma Tata Diosïni jingoni jámapirini engachi ísï irekajka eskaksï imeeri ambarhati juramukuecha na uandajka ka engachi jánguarhintajka para no no sési pʼikuastaani máteruechani.
20. ¿Néna jatsipirini para pʼikuastaani imeechani engajtsïni exejka juchaari xukuparhakua ka néna engachi arreglarikuarhijka?
20 Néna engachi xukuparhajka jatsipirindi para úni eskajtsïni máteru ísï mítentaaka eskachi Tata Diosï Jeobani marhuakusïnga. Erachiicha ka máteru kuerpuecha jatsipirindiksï paraksï exeni eskachi sési jimbo marhuakuxaka juchaari Tata Diosï jurhimbitiini. Tata Diosï juramukuechani jatsiasti, ka juchachi tsípikua jingoni jánguarhintasïnga kurhajchaani. Felisitariuasïngachi erachiichani ka pirenchichani engaksï sési arreglarikuarhijka ka engaksï sési jámajka parakaksï ísï uaaka úni eska imeecha engaksï ambakiti mintsita ma jataka uékaaka míteni ambe enga Biblia jorhentpijka ka engaksï kʼéri ambe arhijka Tata Diosï Jeobani ka tsíperani imeeri mintsitani. Ju je méntkisï jánguarhintani parachi sési xarharani. Ísïchi seguiriini jauaka kʼéri ambe arhini Tata Diosïni enga xukuparhajka respetu ka tʼíntskua jingoni (Sal. 104:1, 2).