Ju je mintsikani ambe engajtsïni Tata Diosï Jeoba aiachijka
“Mintsikakua jindeesti [...] mintsikani eska meru ísïiska ambe enga ma jakajkujka nájkiruka no exeni jauaka” (EBR. 11:1).
1. ¿Nénachi jatsiski para exeni mintsikakuani?
KRISTIANUECHERI mintsikakua kánikua jukaparhakuesti, joperuksï no iámindu kʼuiripuecha jatsisti (2 Tes. 3:2). Joperu Jeoba iámindu imeeri marhuariichani íntsaasti sésikua paraksï imani mintsikani (Rom. 12:3; Gal. 5:22). Iáminduecha engaksï mintsikajka Tata Diosïni jatsistiksï para kánikua agradesidu jarhani.
2, 3. a) ¿Náki kóntperatechani jatsiaua ima enga mintsikajka Tata Diosïni? b) ¿Náki kurhamarhikuechanchi mókuantani jaua?
2 Tata Jesukristu uandaspti eska imeeri Taati auandarhu anapu úsïndi eskaksï kʼuiripuecha andarhieraka imeeri Uájpani jimbo (Juanu 6:44, 65). Niárani mintsikani Jesúsini úsïndi eska ma uaaka puáminhantani pekaduechani, ka inde ambe úsïndi eska ma uaaka sési pájperakua ma jatsini Jeobani jingoni para méntkisï (Rom. 6:23). ¿Ambechi úski jucha parachi jatsini indeni kóntperatani? Jimbokachi iáminduecha solu mereserinchasïnga uarhikua, jimbokachi pekadoriiska (Sal. 103:10). Peru Jeoba exesti eskachi uaaka ambakiti ambe úni ka inde ambakiti uékperakua jimbo, mítachestijtsïni juchaari mintsitani parakachi jiókuarhipiringa ambakiti aianhperakuani. Ka tátsekuachi úspka mintsikani Jesúsini erokaparini eskachi intsïnhaaka tsípikua para méntkisï (arhinta je 1 Juanu 4:9, 10).
3 ¿Ambe meru jindeeski mintsikani? ¿Solu jindeeski míteani kóntperatechani enga Jeoba jatsiaka para jucha? Ka sánderu jukaparhakua ambe, ¿nénachi jatsiski para xarhatani eskachi meru mintsikasïnga?
MINTSITA JINGONI MINTSIKANI
4. ¿Eratsekua jingontkuchi uaa xarhatani eskachi mintsikasïnga Tata Diosïni? Uandanta je.
4 Mintsikani no solu jindeesti kurhanguni ambe enga Tata Diosï uéjka úni. Uinhapikua máesti enga jarhuatajka kʼuiripuechani parakaksï ísï uaaka eska ima na uékajka. Mintsikani Jesúsini, enga Tata Diosï erakuka parajtsïni pʼímutantani, jarhuatasïndi Tata Diosïiri marhuarini paraka aianguauaka máteru kʼuiripuechani ambakiti aianhperakueri ambe. Apostoli Pablu uandaspti: “Jimboka engari ‘penchumikua jingoni’ uandantaka eska Jesúsi jindeeska chiiti Tata ka engari mintsita jingoni mintsikaska eska Tata Diosï tsítantaska, pʼímutantskatari uéraaka. Jimbokari tʼu mintsita jingoni xarhatasïnga eskari mintsikasïnga parari úni ísï exenhani komueska kʼuiripu ma enga sési jámajka, joperu parari úni pʼímutantskata uérani jatsiskari para penchumikua jingoni uandantani ambe engari mintsikajka” (Rom. 10:9, 10; 2 Kor. 4:13).
5. a) ¿Andisï xáni jukaparhakue mintsikani Tata Diosïni? b) ¿Nénachi uaa seguirini kánikua mintsikani? Úra je ejempluni ma.
5 Jiájkani para ma úni tsípikua para méntkisï jatsini Tata Diosïiri jimbanhi parhakpinirhu, jatsiskachi para mintsikani ka seguirini kánikua mintsikani Tata Diosïni. Májkueni eska planta ma na uétarhinchajka itsï, juchaari mintsikakuajtu uétarhinchasïndi eskachi kuidariuaka paraka sési jauaka. Plantecha engaksï tsípiti jaka méntkuksï kʼérati jarhasïndi engachi itsï jatsikuajka, nóksï ísïisti eskaksï plastikuericha. Seguirisïndiksï kʼuiripeni ka engachi no ísï újka patsïsïndiksï ka niárasïndiksï uarhini. Májkueni úkuarhinchasïndi juchaari mintsikakua, engachi no kuidariska nóteru uinhapiti jauatia ka uarhiati (Luk. 22:32; Ebr. 3:12). Peru engachi kuidariska, seguiriuati tsípiti jarhani ka seguiriuati sánderueni, ístuchi jatsiska para kánikua mintsikani (2 Tes. 1:3; Titu 2:2).
AMBE UANDASÏNI BIBLIA ESKA JINDEESKA MINTSIKANI
6. Eska na uandajka Ebreu 11:1, ¿ambe tsimani ambe jindeeski mintsikani?
6 Ebreu 11:1 jimbo (arhinta je), exentasïngachi ambe enga Biblia uandajka eska jindeeska mintsikani Jima uandasïndi eska mintsikani tsimani ambeesti engachi no exejka. 1) “Jakajkuni eska úkuarhiaka ambe enga ma erokuarhini jaka”, komu ambe ma enga niáraaka ísï úkuarhini, peru enga nótki ísï úkuarhini jaka; pori ejemplu, enga nóteru jauakia no sési jásï ambe ka enga juuaka jimbanhi parhakpini. 2) Eska meru ísïiska ambe enga ma jakajkujka nájkiruka no exeni jauaka. Ixú uandakua enga griegu jimbo tradusirikuarhijka “eska meru ísïiska”, arhikuekasïndi eska jarhaska ambe ma enga xarhatajka eska ambe ma enga no xarharajka meru jarhaska, komu eska jarhaska Tata Diosï Jeoba, Tata Jesukristu, ánjelicha ka ambe enga auandarhu anapu Reinu úni jaka (Ebr. 11:3). Enga juchaari erokuarhikua tsípiti jaka ka jakajkunchi imani ambe enga no xarharajka ka enga Biblia uandajka, xarhatani jauakachi juchaari uandakuecha ka úkuecha jimbo eskachi jakajkusïnga ka engachi no ísï úpiringa jiáni juchaari mintsikakua no kompletu japirindi.
7. ¿Nénajtsïni jarhuatasïni Noéri ejemplu parachi kurhanguni ambe enga arhikuekajka mintsikani? (Exe dibujuni enga uénakuarhu jaka).
7 Ebreu 11:7 xarhatasïndi Noéri mintsikakuani. Uandasïndi: “Jimboka mintsikasïreenga, Noé chénharhispti Tata Diosïni ka arka ma úspti para imeeri kʼumanchikuarhu anapuechani pʼímutantaani ka ísï tátsekuasï úpti enga Tata Diosï na aiangupkia eska úkuarhipiringa ambe enga nótki exenhani japka”. Noé xarhataspti eska mintsinharhisïreenga ka kʼéri arkani ma úspti. Besinuechaksï jamberi kurhamarhipti andisï xáni kʼéri ambe úni japi. ¿Ísku pakaraspi o arhiaspi eskaksï nipiringa imeecheeri ambe úni? Nómbe, sánderu sési imeeri mintsikakua jarhuataspti paraka aianguapiringa balori jingoni eska janoxamkia Tata Diosïiri kastigu, meru ísï arhiaspti eska Jeoba na arhipka: “Uandaskia eskani kʼamajkuauaka iáminduechani engaksï xáni tsípiti jaka, jimboka echerirhu uinintaska atajperakua ambe kʼuiripuecheri kulpa jimbo. [...] Ji k’éri janikua ma juaaka enga iámu echerini ójchakuraaka ka enga kʼamajkuaka iámu ambeni enga tsípiti jaka echerirhu ka enga jirejtajka. Iámu ambe enga echerirhu jaka, uarhiati”. Ístu Noé meru arhiaspti eska Tata Diosï juramukuspka eska inchapiringa arkarhu parakaksï imeecha exepiringa eska solu ísïksï úpiringa tsípiti pakarani. Noé ístu jindeespti nema “enga uandantani jámeenga ambe enga sési jaka”, ka ísï úparini xarhataspti eska mintsikasïreenga (Gén. 6:13, 17, 18; 2 Ped. 2:5).
8. ¿Ambe uandaspi Santiagu Tata Diosïni jimbo eska meru jindeeska kristianuecheeri mintsikakua?
8 Jamberi Santiagu sanitu ísï tátsekua karapti imeeri kartani enga apostoli Pablu na uandapkia Tata Diosïni jimbo ambe enga jindeeka mintsikani. Májkueni eska Pablu, Santiagu uandaspti eska meru mintsikani jindeeska no solu jakajkuni; sino ístu úni ambe ma. Karaspti: “Asï ambe ma ú ka exerarini eskari mintsikasïnga, ka jíkeni exeraaka eskani mintsikasïnga juchiiti úkuecha jimbo” (Sant. 2:18). Para xarhatani eska no májkueniiska jakajkuni ka eska mintsikani, demoniuecheri ambe uandaspti. Nájkirukaksï jakajkujka eska jarhaska Tata Diosï, nóksï sési jimbo mintsikasïndi, jimbokaksï no úsïnga imani ambe enga Tata Diosï uékajka (Sant. 2:19, 20). Ióntki anapu achamasïiri ma uandaspti para xarhatani ambe enga meru jindeeka mintsikani ka kurhanguarhispti: “¿Andi juchaari Taati Abraáni no niáraski ísï exenhani komueska kʼuiripu ma enga sési jámajka enga na kéjtsïtapkia altarirhu imeeri uájpa Isaakini? Ka exeskaria eska ima ísï jámaspka eska na mintsikeenga ka imeeri úkuecha jimbo niáraspti sési sési mintsikani”. Tátsekua para xarhatani eska ma jatsiska para meru úkuecha jingoni xarhatani eska ma mintsikasïnga, uandaspti: “Ísï eska kuerpu na uarhijka enga nóteru jirejtajkia, ísïsï no marhuajti mintsikani ka jini méntku no ma ambe úni jarhani” (Sant. 2:21-23, 26).
9, 10. ¿Nénajtsïni jarhuatasïni apostoli Juanu kurhanguni na enga xáni jukaparhakueka mintsikani?
9 Jukari treinta uéxurhini tátsekua, apostoli Juanu karaspti imeeri Ebanjeliuni ka tanimu kartechani. ¿Kurhangusïreeni Juanu ambe enga meru arhikuekajka kristianuecheri mintsikakua, ísï eskaksï na uandapkia Tata Diosïni jimbo máteru Biblieri karariicha? Juanu jindeespti enga sánderu uánikua uelta úraka berbuni enga griegu jimbo tradusirikuarhika “mintsikani”.
10 Pori ejemplu, uandaspti: “Ima enga mintsikajka Uájpani, jatsisti tsípikua para méntkisï, joperu ima enga no kurhajchajka Uájpani, no jatsiati indeni tsípikuani, sánderu sési Tata Diosï ikiakuni jauati imani” (Juanu 3:36). Kristianuecheeri mintsikakua arhikuekasïndi eska ma kurhajchauaka Kristueri juramukuechani. Juanu uánikua uelta uandaspti Jesúsiiri uandakuechani engaksï xarhatajka eska mintsikani jindeeska ambe ma engachi méntkisï jatsiaka juchaari irekuarhu (Juanu 3:16; 6:29, 40; 11:25, 26; 14:1, 12).
11. ¿Nénachi xarhatasïni eskachi agradesidu jarhaska jimbokachi niáraska míteni jurhimbikuani?
11 Jatsiskachi para agradesidu pʼikuarherani Tata Diosï Jeobani jingoni jimboka úraska imeeri espiritu santuni parachi úni kurhanguni jurhimbikuani ka parachi mintsikani ambakiti aianhperakueri ambe, ¿no ísïiski? (Arhinta je Lukasï 10:21). Jatsipiringachi para méntkisï grasiasi íntskuntani Tata Diosïni jimbokajtsïni andarhiteraska úraparini imeeri Uájpani, enga jindeeka “Sánderu Kʼéri orhejtsïkuti ka engajtsïni jarhuatajka parachi jucha méntku sési sési mintsikani” (Ebr. 12:2). Para xarhatani eskachi jukaparharasïnga indeni ambakiti uékperakuani, jatsiskachi para seguirini uinhaperantani juchaari mintsikakuani kómarhiparini Tata Diosïni ka jorhenguarhiparini imeeri Karakateri ambe (Éfes. 6:18; 1 Ped. 2:2).
Xarhata je chaari mintsikakua aianhpiparini xáni engajtsï xáni uaaka. (Exe je párrafuni 12).
12. ¿Nénachi uaa xarhatani eskachi mintsikasïnga Tata Diosïni?
12 Jatsiskachi para seguirini mintsikani Jeobaeri aiatsperakuechani úparini ambe ma engaksï jimbo máteruecha uaaka exeni eskachi mintsikasïnga. Pori ejemplu, aianhpisïngachi Reinueri ambe ka uaasïngachi Jesúsiiri chúxapatiichani. Ístuchi jarhuataasïnga “iáminduechani joperu sánderumindia juchaari erachiichani, jimbokachi juchajtu májkueni mintsikasïnga” (Gal. 6:10). Ka jánguarhintasïngachi nóteru únia ambe engachi “ióntki xáni ueenga” parachi no úni imani ambe engajtsïni chkéraaka ka nóteruchi marhuakunia Tata Diosïni (Kol. 3:5, 8-10).
MINTSIKANI TATA DIOSÏNI JINDEESTI AMBE MA ENGA KÁNIKUA JUKAPARHAKUEKA
13. a) ¿Na xáni jukaparhakueski mintsikani Tata Diosïni? b) ¿Ambe jingoni terukuntasïni mintsikakua ka andi sési jaki indeni ambe jingoni terukutantani?
13 Biblia uandasïndi: “Ístu, enga nema no mintsikajka, no úsïndi jaiapanherantani Tata Diosïni, jimboka ima enga Tata Diosïni andarhierajka, jatsisti para jakajkuni eska ima jarhaska ka eska kóndentasïnga imani enga jánguarhintajka úni ambe enga Tata Diosï uéjka” (Ebr. 11:6). Biblia uandasïndi eska mintsikani Tata Diosïni ambe máesti enga kánikua jukaparhakueka para ma úni jurhimbiti kristianueni para méntkisï (Ebr. 6:1). Kristianuechachi jatsiska para kúrutani juchaari mintsikakuani máteru kualidadichani engaksï ístu jukaparhakueka parajtsïni “Tata Diosï seguirini jarhani xénchani” (arhinta je 2 Pedru 1:5-7; Jud. 20, 21).
14, 15. ¿Na xáni jukaparhakueski mintsikakua engachi terukutantajka uékperakuani jingoni?
14 Biblieri kararichaksï uánikua uelta karaspti mintsikakueri ambe, ísïksï xarhataspti na enga xáni jukaparhakueka. No ma kualidadiri xáni uánikua uelta karanhasti. ¿Arhikuekasïni inde ambe eska no jarhaska máteru ambe enga sánderu jukaparhakueuaka para kristianu ma ka eska mintsikani?
15 Pablu terukutantaspti mintsikakuani uékperakuani jingoni ka uandaspti: “Enga xáni kánikua mintsikapiringa engani jamberini úpiringa juátechani móskuani ka jini ji no uékpini, jiájkani ískuepirindi ambe engani xáni úni japiringa” (1 Kor. 13:2). Enga Jesúsi mókukuarhipka jiáni engaksï kurhamarhipka náki jindeespi sánderu kʼéri juramukua, ima uandaspti eska xénchani Tata Diosïni jindeespka ambe enga sánderu jukaparhakuepka (Mat. 22:35-40). Uékperakua no solu jindeesti mintsikani, ístu uánikua máteru kualidadichani arhikuekasïndi engaksï meru jukaparhakueka. Biblia uandasïndi eska xénchperakua iámindu ambe jakajkusïnga, arhikuekasïndi eska mintsikasïnga ambe enga Tata Diosï uandakia imeeri Karakatarhu (1 Kor. 13:4, 7).
16, 17. a) ¿Néna xarhatasïni Biblia na enga xáni jukaparhakueka mintsikani ka xénchpeni? b) ¿Náki sánderu kʼériiski, ka andi?
16 Karakata Griegaecha uánikua ueltaksï májku kʼéri jarhasti uandakuecha mintsikani ka uékpini, ménichani asta mismu párrafurhu, inde ambe xarhatasïndi na engaksï xáni jukaparhakueka. Pablu pʼímarhiaspti imeeri erachichani “ju je sési jámani ka xénchpeni enga jindeeka jukantani indeni inchanhikuani enga iámu kʼénhikuani kuájchakujka” (1 Tes. 5:8). Pedru karaspti: “Nájkirukajtsï chá no méni exeka [tata Jesukristuni], xénchasïngajtsï. Nájkirukajtsï iáiasï no exeni jaka, chájtsï mintsikasïnga”(1 Ped. 1:8). Santiagu arini ambe kurhamarhiaspti imeeri erachichani engaksï erakukatepka: “¿Andi Tata Diosï no imeechani erakuaski engaksï parhakpini anapuecha ísï exeajka enajkiksï no ma ambe jatsikuarhe paraksï iásï kánikua jatsikuarhenia jimbokaksï mintsikasïnga ka ístu paraksï pʼirani imani Reinuni enga Tata Diosï imeechani aiakuaka, engaksï xénchajka?” (Sant. 2:5). Juanu karaspti: “Ka ini ambesï juramujti ima [Tata Diosï]: eskachi mintsikaaka imeeri Uájpeeri nombrini enga jindeeka tata Jesukristu, ka eskachi iáminduecha xénchperaaka ísï eskajtsïni ima na juramuchika” (1 Juanu 3:23).
17 Nájkiruka mintsikani kánikua jukaparhakueka, máru ambe enga inde ambe arhikuekajka nóteruksï jauatia jiáni enga Tata Diosï ísï uaakia eska na aiatspeka ka juchachi intsïnhani imani ambe engachi erokuarhini jaka. Joperu juchaari uékperakua Tata Diosïni jimbo ka máteruecha jimbo kʼóru méntkisï jauati. Ísï jimbosï, apostoli Pablu karapti: “Joperu i ambe kʼóru méntkisï jauati: mintsikani Tata Diosïni, erokuarhini eskajtsïni ima jarhuataaka ka uékperakua. Joperu uékperakuasï sánderu jukaparhakueti” (1 Kor. 13:13).
AMBAKITI MINTSIKAKUA MA
18, 19. ¿Néna xarharasïni iásï eska ambakiti mintsikakua ma jarhaska ka né úxaki eska ísï úkuarhiaka?
18 Iásï anapu Tata Diosï Jeobaeri ireta kánikua mintsikasïndi Reinuni enga Tata Diosï uaxastaka. Ísï jimbosï, iásï jatiia paraisu espirituali ma, engaksï jukari ochu miioni kʼuiripuecha jaka iámu parhakpinirhu, ini paraisurhu meru jarhasti Tata Diosïiri espiritu (Gal. 5:22, 23). Meru xarharasïndi eskaksï jurhimbiti kristianuecha xénchpesïnga ka mintsikani.
19 ¿Né úxaki ini ambe? No ma kʼuiripuesti sino juchaari Tata Diosï. Ísï jimbosï, ima jatsiti para kʼéri ambe arhinhani ka “mínda máeuati para méntkisï enga no méni kʼamakurhiaka” (Is. 55:13). Ístu, “chájtsï pʼímutantskata jarhaskia jimbokajtsï mintsikasïnga” ka inde ambe jindeesti ambe ma “engaksïni Tata Diosï intsïmbika” (Éfes. 2:8). Paraisu espirituali seguiriuati kʼéni ka sánderu sési jarhani astaka iámu Parhakpini uiniaka kʼuiripuecheri engaksï perfektueuaka, engaksï jurhimbikua jingoni jámaaka ka tsípikua jingoni ka engaksï kʼéri ambe arhiaka Tata Diosï Jeobaeri nombri para méntkisï. Enga jamberi niáraka indeni jurhiatikua ju je mintsikani indeni ambe engajtsïni Tata Diosï Jeoba aiachika.