Astrolojia ka exerkuarhini jámani: ¿uaajtsïni arhini ambe enga úkuarhiaka sánderu orhepatini?

ASTROLOJIA

Imeecha engaksï astrolojiani jakajkujka, uandasïndiksï eska jóskuecha, Luna ka planeteecha úsïngaksï jarhuataani kʼuiripuechani o no sési úkuani. Astrologuechaksï uandasïndi eska seguni na enga jauaka Luna ka planeteecha jiáni enga sapi ma andajpenujka, xarhatasïnga na enga jásï kʼuiripueuaka ka ambe enga úkuarhinchaaka sánderu orhepatini.

Nájkiruka ióntki, Babilonia ueenapka úrakuarheni astrolojia, útasïksï iásï uánikua kʼuiripuecha jarhasti engaksï jakajkujka ambe engaksï astrologuecha uandajka. Peruchi, ¿uaa jakajkuni ambe engaksï uandajka eska úkuarhiaka sánderu orhepatini? Nómbe. Ju je exeni andi.

• Jóskuecha ka planeteechaksï no úsïndi jarhuataani o no sési úkuani kʼuiripuechani ísï eskaksï na uandajka astrologuecha.

• Sáno méntkisï ambe engaksï uandajka astrologuecha eska úkuarhinchaaka kʼuiripu ma, úpirindi né uéjki ísï úkuarhinchani.

• Ambe engaksï astrologuecha uandajka eska úkuarhiaka, jupindaskuarhisïndiksï ióntki anapu jakajkukuani ma jimbo enga uandajka eskaksï planeteecha uantsïparhakusïnga Echerini, peru no ísïisti, jimbokaksï planeteecha Jurhiatanisï uantsïparhakujka.

• Nóksï iámindu astrologuecha imani mismu ambe uandasïndi eska úkuarhinchaaka kʼuiripu ma.

• Astrolojia 12 grupuechani jimbo peeraasïndi kʼuiripuechani seguni na engaksï jatini andajpenuka ka íksï grupuecha ísï mítekateesti komueska Sodiakueri signuecha. Peru jimboka Echeri manakuarhipasïnga espasiurhu, Sodiakueri signuechaksï nóteru terukuntasïndia imani grupu jóskueecheri jingoni engaksï úranhapka para nombri jatsikuani Sodiakueri signuechani.

Uandanhasïndi eskaksï Sodiakueri signuecha xarhatasïnga na enga jásïiuaka kʼuiripu ma. Peru jarhastiksï kʼuiripuecha engaksï mismu jurhiatikua jimbo andajpenuka ka nóksï májkueni jásïini. Na enga jatini andajpenujka kʼuiripu ma, no xarhatasïndi na enga jásï kʼuiripu máeuaka. Enbesi deksï ísï exeni kʼuiripuni ma eska námindu meru jindeeka, astrologuechaksï uandasïndi na enga jásïika kʼuiripu ma imani ambe jimbo engaksï eratsejka kʼuiripueri. Peru i ambe ísïipirindi komu tʼuini uandani jarhani ambe ma kʼuiripueri ma ante de míteni.

EXERKUARHINI JÁMANI

Desde iónisïa, kʼuiripuechaksï sïkuamiicha jingoni nirasïreendi paraksï exerkuarhini. Máru sïkuamiichaksï, úraasïreendi kʼuiripuecheeri ka animalicheeri sïturhiichani engaksï uarhirini jarheengia oksï exesïreendi na enga tʼireenga tʼarhechu ma paraksï míteni ambe úkuarhipirini sánderu orhepatini. Máteru sïkuamiichaksï uandasïreendi ambe enga úkuarhipiringa exeparini dibujuni enga kafeeri o teeri tasarhu pakanharhienga engaksï na kʼamachaeengia. Iásïksï máteru ambe úranhasïndia, komu tarotiiri kartechani, bola de kristalini o daduechani. Peru, ¿exerkuarhini jámani marhuasïni parachi úni míteni ambe enga úkuarhiaka sánderu orhepatini? Nómbe. Ju je exeni andi.

Sáno méntkisï ima ambe engaksï uandajka sïkuamiicha eska úkuarhiaka, no terukuntasïndi nájkirukaksï imani mismu ambe úraaka o táchani jásï ambe paraksï míteni. Pori ejemplu, enga kʼuiripu ma kurhamarhiapiringa tsimani sïkuamichani ambe úkuarhinchaa sánderu orhepatini ka iichaksï imani mismu kartechani úraani, ima ambe engaksï arhipiringa jatsipirindi para terukuntani, peru sáno méntkisï no ísï úkuarhisïndi.

Ambe engaksï sïkuamiicha úrajka ka ambe engaksï jimbo újka paraksï uandani ambe enga úkuarhiaka, uandanhasïndi eska no mintsinharhikueska inde ambe. Máruksï uandasïndi eskaksï sïkuamiicha arhiasïnga kʼuiripuechani ambe engaksï úkuarhinchaaka imani ambe jimbo engaksï kʼuiripuecha uandajka ka no jimbokaksï úrauaka kartechani ka bola de kristali. Pori ejemplu, máru sïkuamiichaksï mámaru ambeksï kurhamarpisïndi ka jingontkuksï jarhasïndi paraksï exeni ambe enga kʼuiripu arhiauaka ka ambe enga uaaka. Tátsekuaksï sïkuamiicha úrasïndi ambe enga kʼuiripu arhiajka ka ambe enga újka paraksï ísï xarhatani enajkiksï imeecha tʼuini mítepia ambe enga kʼuiripu no kuenta íntskukuarheparini aianguapka. Ka máru sïkuamiichaksï ústia kánikua sentabu andani jimbokaksï kʼuiripuecha mintsinharhiasïnga.

¿AMBE UANDASÏNI BIBLIA?

Ambe engaksï uandajka astrologuecha ka sïkuamiicha, jupindaskuarhisïndi imani jakajkukuani enga uandajka eska karakata jarhasïngia ambe engachi úkuarhinchaaka. ¿Peru ísïiski i ambe? Biblia uandasïndi eskachi uaaka erakuni ambe jakajkuni o ambe úni ka eska ambe engachi erakujka úni, úsïnga eskajtsïni sési nicheaka o nómbe (Josué 24:15).

Imeecha engaksï uéjka jaiapanherantani Tata Diosïni, jatsistiksï máteru rasoni ma engaksï jimbo no jiókuarhijka astrolojiani ka sïkuamikua ambe, jindeesti jimboka Tata Diosï no jaiapanhentasïnga indeni ambe. Biblia ísï uandasïndi indeeri ambe: “No jatsisti para jarhani nema tʼungini jingoni enga [...] exerkuarhini jámaaka, ni nema enga majia újka, ni nema enga uékaaka míteni ambe úkuarhia sánderu orhepatini, ni sïkuami ma, ni nema enga no sési úkuauaka máteruechani sïkuamikua jingoni, ni nema enga sïkuamini ma úraaka para uarhiriichani jingoni uandontskuarheni o nema enga uandantajka ambe enga úkuarhiaka sánderu orhepatini, ni nema enga uarhiriichani jingoni uandontskuarheaka. Jimboka iámindu imeecha engaksï ini ambe újka ikichakueni jásï ambeeska para Tata Diosï Jeoba”a (Deuteronomio 18:10-12).