Néna sánderu sési jorhenguarhini ka tsípikua jingoni estudiarini Bibliani

Josue arhintaxati roiuni enga Tata Diosïri Lei karakata jaka; Jeriko anapu bardechaksï xerekuarhintaxati ka Raabiri kʼumanchikua no xerekuarhintasïndi; Josue tarhataasïndi jájkichani enga kómarhini jaka

JOSUE kʼéri ánchikuarhita ma jatsisti para úni: orhekupani ireta Israelini Echerirhu engaksï Aiaminhapka. Para inde ambe úni, jatsisti para orhepani uérakuani kʼérati ójkutakuechani. Peru Jeoba asegurarikusïndi eska uáka ísï úni ka arhisïndi eska no chéaka ka eska uinhapikuarhintaaka. Jeoba kurhakusïndi eska kurhajchaaka imeri Leini ka eska arhintaaka jurhiakua ka chúrikua paraka uáka ísï úni eskamindu jima na karakata jaka. Ka ménderu arhisïndi eska, enga ísï úska, sési nikuaka ka mímixekua jingoni jámani (Jos. 1:7, 8).

Ini “últimu jurhiatikuechani jimbo” enga xáni “peligru” jaka, juchajtuchi jatsiauaka kʼérati problemechani (2 Tim. 3:1). Juchantsïntujtsïni sési nicheati engachi úska ambe enga Jeoba arhipka Josueni. Pauani pauani arhintani Bibliani, jarhuataatijtsïni úraani imeri prinsipiuechani jiáni engachi tsʼéjkukuechani jatsiauaka.

Peru ísïsti, ju je jiókuarhini eska uánikua juchachi no mítiska sési estudiarini ka máruchi ni sikiera tsitijki. Peru jimboka Bibliani estudiarini kánikua jukaparhakueska, sési jauati eskachi exeaka informasionini enga arini partirhu jaka “Úraa je ini konsejuechani”. Jimintsï exentaaka máru konsejuechani parajtsï sánderu sési jorhenguarhini ka tsípikua jingoni estudiarini Bibliani.

Salmista ma pirespti: “Ú eskani imani xanharu jimbo jámaaka nani engaksï chíti mandamientuecha jaka, jimbokani jima kánikua tsípikua jingoni jámasïnga” (Sal. 119:35). Chájtujtsï uáka kánikua tsípikua jingoni estudiarini Bibliani. Jukaparhakua ambejtsï exentaaka Tata Diosïri ambe engajtsï sánhani arhiaka sési estudiarini.

Nájkirukajtsï cha no jatsika para nasionini ma orhekupani, ísï eska Josue, ambe engajtsï kʼóru uáka, jindesti orhepani uérakuani chári problemechani. Ísï jimbo, májkueni eska Josue, estudiari je ambe enga karanhaka parajtsï chájkumindu sési uéranchani ka úra je imani ambe. Engajtsï ísï úska, sésiksïni nicheati ka mímixekua jingontsï jámaaka.

ÚRAA JE INI KONSEJUECHANI

Kómarhikua ma ú je ante dejtsï estudiarini. Bibliarhu arhisïndi ambe enga eratsijka Tata Diosï enga iámindu ambe újka úni ka ima mismu enkargarikuarhisti eskaksï karanhapiringa para juchachi sési uéranchani. Ísï jimbo, engajtsï arhintaaka Bibliani, kurhaku je Tata Diosïni eskaksïni jarhuataaka kurhanguni, miántani ka ísï úni ambe engajtsï arhintaaka (Esd. 7:10).
Úkuarhia je kurhamarhikuechani. Engajtsï arhintani jauaka Bibliani o publikasionichani, kurhamarhikuarhi je: “¿Amberini jorhendasïni Jeobaeri ambe, ambe engani kʼamaraka arhintani? ¿Néna terokuntasïni imani ambe jingoni enga Biblia sánderu uandajka? ¿Néna uá úraani ini textuechani parani máteruechani jarhuataani?”.
Eratsinta je ambe engajtsï estudiarini jauaka. Engajtsï arhintani jauaka, anhaxurhi je ka eratsini: “¿Nénarini pʼikuastasïni i informasioni? ¿Andirinisï ísï pʼikuastajki? ¿Néna terokuntasïni imani ambe jingoni engani nitamakurhikia, ambe engani nitamakuarhini jaka iásï ka ambe enga uáka úkuarhini sánderu orhepani? ¿Néna uá úraani i konsejuechani ka prinsipiuechani juchiti irekuarhu?” (Job 23:5; Sal. 49:3). Eratsi je sintsï úpirini explikarini andisï Jeoba arhijki imeri iretani eska no jatsiska para no sési jásï jángua ma jatsini ka ambe niárapirini úkuarhini engachi no kumpliriuapiringa imeri konsejuechani (Deut. 32:28, 29).
Eranhaska je engajtsï Bibliaeri anapu istoriechani arhiantaani jauaka. Por ejemplu, ¿eranhaskaasïntsï Joseri ermanu jembechani engaksï atarantapka Joseni máru ismaelitecha jingoni? (Gén. 37:18-28). ¿Ambejtsï exesïni? ¿Ambejtsï kurhaasïni? ¿Ambejtsï sïpirusïni? Jánguarhi je kʼuiripuecheri lugari jimbo jarhani. Ka kurhamarhikuarhi je: “¿Ambeksï eratsixaki? ¿Ambeksï pʼikuarherasïni?”. Ini ambe eratsintani, uáti eskaksï istoriecha ísï xarharaaka enajkiksï iáiasï ísï úkuarhini jaki ka chájtsï uáka sánderu sési estudiarini.
Úraa je jarhuajperatechani para estudiarini engaksï úkata jaka para sánderu inbestigarini. Jánguarhi je úraani imani engaksï chári idioma jimbo jaka, imechani engaksï xáni Internetirhu jaka ka sïranda jimbo. Kurhajkuarhi je jarhuajperata parajtsï jorhenguarhini sánderu sési úraani. Por ejemplu, BIBLIOTEKA INTERNETIRHU Watchtower ka Jarhuajperata paraksï Jeobaeri testiguecha estudiarini, exentakajtsï mámaru jásï informasioni uánikua temecheri ka ístu explikasioni uánikua Bibliaeri bersikuluecheri. Ístu foieturhu, Guía para el estudio de la Palabra de Dios, jarhastiksï datuecha engaksï kánikua marhuajka para exeani lugarichani, tiempu, na enga xáni jukaparhapka tumina ka na enga tsʼéritanhenga ambe ma ka uánikua máteru ambe.
Resumeni ma ú je imani amberi enga sánderu jukaparhakueka. Inde ambeksïni marhuachiati parajtsï miáni jarhani ambe engajtsï kʼamaraka estudiarini. Ka ístu uandontskuarhi je máteruecha jingoni ambe engajtsï jorhenguarhika. Eratsi je: “¿Uá úrani ini informasionini eianhpikuarhu?”. I konsejuechaksïni jarhuataati miántani imani ambe enga sánderu jukaparhakueka ka uákajtsï úrani ambe engajtsï jorhenguarhika parajtsï máteruechani jarhuataani.