Kʼéri pʼamenchakua ma kámani

“Engani kanseri exeminhantapka pulmonirhu ka sïturhirhu (colon), ísïspti enajkijtsïni arhipi eskani uarhipiringia. Peru engani niántapka juchiniu, eratsispka: ‘Buenu, no indeni ambesïni erokuarhini japka, peru jatsiska parani exeni néna orhepani uérani’” (Linda, 71 jatiri).

“Kanharhikuarhu ma ladu jimbo, pʼamenchakua ma kámasïnga enga kánikua no sési pʼirajka. Ménichani kánikua no sési pʼirasïndi enga újka eskani kánikua kómu pʼikuarheraaka. Uánikua xanhari jandiajkuni pʼikuarherasïnga ka astani eratsini uándikukuarhini” (Elisa, 49 jatiri).

Acheeti pʼamenchati ma enga siia de ruedarhu jaka imecha jingoni jarhasti engaksï xénchajka

ENGA cha o máteru nema engajtsï xénchajka kʼéri pʼamenchakua ma exeminhantaka, mítiskajtsïa na enga xáni no sési pʼikuarherakuarhejka. Problema no solu jindesïndi pʼamenchakua, sino na enga xáni kuatajpejka. Ka méntku nirani jarhani doktori jingoni, konseguirini medisina ambe ka ambe enga niárajka úkuarhini para xáni uáni pastiia ambe arhani, úsïndi eska ma sánderu chéaka ka uandanhiani. Méntku eratsini jarhani pʼamenchakua ambe jimbo, úsïndi eska ma sánderu kuataraaka.

¿Ambejtsïni uá jarhuatani ini ambe jimbo? Kómarhikua ka arhiantani Bibliaeri karakatechani engaksï uinhaperpintajka, jarhuatasti uánikua kʼuiripuni. Máteru ambe enga sési pʼikuastpejka, jindesti uékperakua, familieri jarhuajperata ka amiguecheri.

AMBE JARHUATAASKI MÁRU KʼUIRIPUECHANI

Robert, acheeti ma enga 58 jatirika, arini konseju íntspisïndi: “Parajtsï úni orhepani uérakuni pʼamenchakuani, mintsika je Tata Diosïni ka imaksïni jarhuataati orhepani uérani. Kómarhi je Jeobani ka aiangu je na engajtsï pʼikuarherajka. Kurhaku je imeri espiritu santu ka eskaksïni jarhuataaka uinhapiti jarhani chári familia jimbo ka eskajtsï uáka iatsitakuarhu orhepani uérani chári pʼamenchakua jingoni”.

Robert seguirisïndi uandani: “Kánikua jukaparhakuesti eskakini chíti familia uinhaperantaaka, eska tʼunguini jingoni jauaka. Pauani pauani, familiari marini uandajpasïndi pararini kurhamarhini na jarhaski. Ístujtsïni uinhaperantasïndi amiguecha engaksï máteru nanisï anapueka. Inde ambe úsïndi eskani sáni sési pʼikuarheraaka ka jarhuatasïndirini no kuatantani”.

¿Jatsiskijtsï amiguni ma enga pʼamenchani jaka ka eratsixakijtsï pʼorhembini? Exe je ambe enga uandajka Linda: “Ima enga pʼamenchakua ma kámajka ísï uékasïndi irekani eskaksï máteruecha ka jamberi no méntkisï uékaati imeri pʼamenchakueri ambe uandani. Ísï jimbo, máteru amberi uandontskuarhi je”.

Tata Diosïri uinhapikua, ambe enga Biblia uandajka ka familieri uékperakua ka amiguecheri, uátiksïni jarhuatani parajtsï exeni eska jukaparhakueska irekani nájkirukajtsï kʼéri pʼamenchakua ma kámaaka.

Bibliaeri karakatecha engaksïni uáka jarhuatani

Kurhaku je Tata Diosïni eskaksïni jarhuataaka

“Kómarhispka Jeobani, ka imarini mókuchintaspti. Imarini kuájchakuspti engani xáni chéni japka. I kaxumbiti uandajpaspti, ka Jeoba kurhaaspti” (Salmo 34:4, 6).

Linda uandasïndi: “No kurhakusïnga Tata Diosïni eskarini ambakerantaaka. Kurhakusïnga eskarini uinhapikua íntskuaaka ka jarhuatandirini orhepani uérani pʼamenchakua jingoni”.

Uinhapikuarhinta je Bibliani arhintaparini

“No nema enga jima irekaaka uandaati: ʻPʼamenchaxakaʼ” (Isaías 33:24).

Eratsinta je ambe enga Tata Diosï aiatspika úni sánderu orhepani. I ambe uáti eskajtsï sánderu mintsikaaka ambe enga úkuarhiaka ka jarhuatatiksïni tekaantani.

Jirinha je jarhuajperata chári familiaricheri ka amiguecheri

“Ambakiti amigu ma méntkisï uékpisïndi, ka ermanu máesti enga andajpenuka para jiáni enga uandanhiata jauaka” (Proverbios 17:17).

Elisa arini konseju íntspisïndi: “Asï jandiajku ja je. Jurajku je eskaksïni chári amiguecha jarhuataaka. Ménisïjtsï jandiajku pʼikuarheraaka ka eratsintsï eskaksïni Tata Diosï no kurhaaxaka, peru asï jarharia je máteruechani”.