Ístujtsï uáka tsípikua jingoni irekani iásï
ERANHASKA JE sánderu orhepani enga nóteru jauakia pʼamenchakua ambe, nóteru nema tʼarhepini ni uarhini. Chajtsï uáka ísï irekani. Peru iásï solu uandanhiata ambejkusï jati. ¿Nénajtsï uá tsípikua jingoni irekani iásï? Bibliarhuksï jarhasti konsejuecha engaksïni uáka jarhuatani parajtsï sési ka tsípikua jingoni irekani. Ju je exeni nénajtsïni uá jarhuatani Tata Diosïri Karakata parachi orhepani uérakuani máru uandanhiatechani.
TSÍPIKUA JINGONI IREKANI IMANI AMBE JINGONTKU ENGACHI JATSIKUARHIKA
Bibliaeri konseju: “Asï jáma je jatsikuarhikuekani, sino tsípi je indeni ambe jingoni engajtsï jatsika” (Ebreu 13:5).
Iásï, kʼuiripu uandasïndi eskachi jatsiska para uánikua ambe piáni engachi seguni uétarhinchajka. Peru Biblia arhisïndi eska ma úsïnga tsípikua jingoni irekani imani ambe jingontku engachi jatsikuarhika. ¿Nénachi uá ísï úni?
No uékani jukari jatsikuarhikuekani. “Tsitini jatsikuarhikuekani”, úsïndi eskaksï uánikua kʼuiripuecha no jukaparharaaka imecheri kuerpuni, familiani, amiguechani, ambakiti jángua ma xarhatani ka eskaksï no janhanharhinhaaka (1 Timoteo 6:10). ¡Kánikua jukaparhakua ambeksï tsïtasïndi! Ístu, ima enga tsitijka jatsikuarhikuekani no méni konformi jarhasïndi (Eclesiastés 5:10).
Miáni eskaksï kʼuiripuecha sánderu jukaparhaska eska ambe ma. Ísïsti eska máru ambe meru uétarhisïnga, peru ima ambejtsïni no uáti uékani ni xarhatachini xénchperakua; inde ambe soluksï kʼuiripuecha úsïndi xarhatani. Sésijtsïni pʼikuastasïndi ambakiti amiguni ma jatsini (Proverbios 17:17).
ENGACHI ÍSÏ ÚSKA ESKAJTSÏNI BIBLIAERI KONSEJUECHA NA ARHIJKA SÉSICHI IREKAAKA
ORHEPANI UÉRANI PʼAMENCHAKUA AMBE JIMBO
Bibliaeri konseju: “Mintsita ma enga tsípini pʼikuarherani jarhajka ísïsti eska ambakiti medisina” (Proverbios 17:22).
Tsípini, ísïsti eska ambakiti medisina para úni orhepani uérani pʼamenchakua ambe jimbo. Peru engachi indeni ambe nitamakuarhini jauaka, ¿nénachi uá tsípini pʼikuarherani?
Jukaparharani ambakiti ambe. Engachi méntku úndaska lastima úkuarhini juchari pʼamenchakua ambe jimbo, méntkisïchi kómu pʼikuarherani jauaka (Proverbios 15:15). Bibliajtsïni máteru ambe arhisïndi: “Méntku jauena je diosmeiamukua arhini” (Kolosasi 3:15). Jatsiskachi para jorhenguarhini jukaparharani ambakiti ambe engachi jatsika, nájkiruka sapichitu ambeuaka. Komu enga jurhiata inchajtsïkuni jarhajka, enga sési tarhiajka o engachi exejka na enga tsípijka ima engachi xénchajka, inde ambe úsïndi eskachi sánderu sési pʼikuarheraaka.
Úni ambe ma máteruechani jimbo. “Sánderu sésisti intsïmpini, ka eska intsïmbinhani” (Ukuecha 20:35). Engajtsïni máteruecha diosmaiamukua arhijka imani ambe jimbo engachi imecha jimbo újka, kánikuachi tsípisïnga ka nóteruchi xáni eratsini jarhasïnguia juchari uandanhiatecha jimbo. Máteruechani jarhuatani, uáti eskachi sánderu sési pʼikuarheraaka.
SÁNDERU JUKAPARHARANI TEMUNGURHIRIKUANI
Bibliaeri konseju: Imani ambe eraku je úni enga sánderu jukaparhakueka (Filipusʌ 1:10).
Temungurhiricha engaksï no xáni márku jarhajka, uátiksï jarharperani. Jimbosï jukaparhakueti eskaksï tsimarhani kánikua jukaparharaaka imecheri temungurhirikuani.
Májku kʼéri ú je ambe ma. Biblia uandasïndi eska sánderu sésiska tsimani ka eska máechakuajku (Eclesiastés 4:9). Enbesi dejtsï táchanisï úni ambe engajtsï uéjka, exe je ambe ma engajtsï tsimarhani uáka úni. Por ejemplu, uákajtsï tsimarhani úmantani, nirani sáni nani, mintsikuarhini sáni o tsípikuarhini ambe ma jingoni.
Xarhata je eskajtsï uékperasïnga. Biblia uandasïndi eskaksï acheeti ka uarhiiti jatsiska para uékperani ka janhanharperani (Efesu 5:28, 33). Xéncheperakua jingoni tsípikuni, uékperakua jingoni kamanharhini o sapichitu ambe intsïkuarperani, uáti eska chári temungurhirikua sánderu sési jauaka. Ka miá je eskajtsï solu chári acheeti o uarhiiti jingontkusï jatsika para apondini (Ebreu 13:4).