SEMANA 17
Ju je orhepani uérakuani demoniuechani Jeobaeri jarhuajperata jingoni
“Jucha [...] uarhiperaxaka [...] Noambakitiri espirituechani jingoni engaksï auandarhisï jámajka” (EFES. 6:12).
PIREKUA 55 ¡Asï jáma chérhiani!
AMBE ENGACHI EXEAKAa
1. Eska na arhijka Efesu 6:10-13, ¿nákiski ma ambe enga sánderu jukaparhakueka enga Jeoba újka parajtsïni xarhatachini eskajtsïni xénchasïnga ka eska pendienti pásïnga juchantsïni jimbo?
MA AMBE enga sánderu jukaparhakueka enga Jeoba újka parajtsïni xarhatachini eskajtsïni xénchasïnga ka eska pendienti pásïnga juchantsïni jimbo, jindesti eskajtsïni jarhuatasïnga no jiókuarhini juchari enemiguecheri ambe. Engajtsïni sánderu ikiachijka, jindestiksï Noambakiti ka demoniuecha. Jeobajtsïni aiangusïndi na engaksï xáni no sési útspijka ka íntskusïndijtsïni ambe engachi uétarhinchajka parajtsïni no támisï jánhastani (arhinta je Efesu 6:10-13). Engachi jurajkuska eskajtsïni jarhuataaka ka iámu mintsita jingonchi mintsikani, uákachi uinhamu anhaxurhikuni Noambakitini. Uákachi májkueni seguru pʼikuarherani eska apostuli Pablu enga karapka: “Enga Diosï juchantsïni jingonika, jimajkani ¿néjtsïni uá no sési úchini?” (Rom. 8:31).
2. ¿Ambechi exea ini artikulu jimbo?
2 Kristianu jurhimbitichachi no méntku uékani jarhasïnga Noambakitiri ambe mítini ni demoniuecheri ambe. Sánderu sési, sánderuchi uékasïnga Jeobaeri ambe jorhenguarhini ka marhuakuni (Sal. 25:5). Peru jatsiskachi para mítini ambe enga újka Noambakiti parachi no jurajkuni eskajtsïni támisï jánhastaaka (2 Kor. 2:11). Ixúchi exeaka ambe engaksï Noambakiti ka demoniuecha sánderu úrajka paraksï támisï jánhastani kʼuiripuni. Ístuchi exeaka ambechi jatsiski para úni parajtsïni no andani.
NÉNAKSÏ TÁMISÏ JÁNHASTASÏNI DEMONIUECHA KʼUIRIPUNI
3, 4. a) ¿Ambeski sïkuamikua? b) ¿Na xáni etsakuarhiskia sïkuamikueri ambe?
3 Ma ambe enga Noambakiti ka demoniuechaksï sánderu úrajka para kʼuiripuni támisï páni, jindesti sïkuamikueri ambe. Imecha engaksï ini ambe úrajka, uandasïndiksï eskaksï mítiska ka únksï kámani imani ambe engaksï máteru kʼuiripuecha no újka mítini ni kámani. Por ejemplu, máruksï uandasïndi eskaksï meru úsïnga exeni ambe enga úkuarhiaka sánderu orhepani, jimbokaksï úraasïnga oroskopuechani o adibinasioni. Máteruksï jamberi ísï újti enajkiksï uarhiricha jingoni uandontskuarhijki. Ka jarhastiksï máteruecha engaksï sïkuamikua o majia ambe úrajka ka jamberiksï úni ka uandani ambe ma para sïkuani máteruechani.b
4 Uápurisï parhakpinirhu, úranhasïndi sïkuamikua ambe. Enkuesta ma únhaspti 18 paisicha jimbo engaksï America Latina jaka ka Caribe, nani enga tanimu kʼuiripuecheri, ma kʼuiripu jakajkujka majiaeri ambe ka sïkuamikueri ambe ka sáno iáminduechaksï jakajkusïrendi eska nema úsïnga uandontskuarhini espirituecha jingoni. Máteru enkuesta jimbo engaksï 18 paisicha jimbo úpka jini África, jukari terujkani engaksï kurhamarhinhapka, jakajkusïrendiksï sïkuamikueri ambe. Ísïsti, no arhiparini nani uéjkichi irekani, jatsiskachi para kuájchakukuarhini, jimboka Noambakiti jánguarhintaxaka támisï paani “iámindu parhakpini anapuechani” (Jaŋ. 12:9).
5. ¿Néna exesïni Jeoba sïkuamikua ambe?
5 Jeoba jindesti Tata Diosï jurhimbikueri (Sal. 31:5). Ísï jimbo, kurhunhisïndi demoniuecheri ambe ka iámindu máteru jásï sïkuamikueri ambe. Jeoba arhiaspti israelitechani: “No jatsipirindi para jarhani tʼungini jingoni nema enga chpiri jimbo kurhiraaka imeri tatakani o nanakani, ni nema enga adibinarijka, ni nema enga majia niátajka, ni nema enga uéjka mítini ambe úkuarhia sánderu orhepatini, ni sïkuami ma, ni nema enga no sési úkuauaka máteruechani, ni nema enga sïkuamini ma úraaka para uarhirichani jingoni uandontskuarhini o nemani enga uandantajka ambe enga úkuarhiaka sánderu orhepatini, ni nema enga uarhirichani jingoni uandontskuarhiaka. Jimboka iámindu imecha engaksï ini ambe újka ikichakueni jásï ambeska para Jeoba” (Deut. 18:10-12). Kristianuechachi nóteru jatsiskia para kurhajchani Leini enga Jeoba israelitechani íntsaapka. Peru mítiskachi eska seguirixaka májkueni exeni sïkuamikua ambe (Mal. 3:6).
6. a) ¿Néna úrasïni Noambakiti sïkuamikueri ambe para no sési úkuni kʼuiripuni? b) Eska na arhijka Eclesiastés 9:5, ¿nénaksï jarhaski uarhiricha?
6 Jeobajtsïni arhisïndi eskachi no jiókuarhiaka sïkuamikueri ambe, jimboka Noambakiti indeni ambe úrasïnga para no sési úkuni kʼuiripuni. Por ejemplu, úrasïndi sïkuamikuani para sánderu jakajkunhani chkuanderakua ambe, komu eskaksï uarhiricha seguirini jarhasïnga irekani máteru nanisï (arhinta je Eclesiastés 9:5). Ístu, úrasïndi para kʼuiripuni chérani ka eskaksï jarhariaka Tata Diosïni. Noambakitiri eratsikua jindesti eska kʼuiripu demoniuechani mintsinharhiauaka ka no Jeobani.
NÉNACHI UÁ ORHEPANI UÉRAKUANI DEMONIUECHANI
7. ¿Ambejtsïni aiangusïni Jeoba?
7 Eskachi na uandakia, Jeobajtsïni aiangusïndi ambe engachi jatsika para mítini parajtsïni Noambakiti ka demoniuecha no támisï jánhastani. Ju je exeni máru ambe engachi uáka úni parajtsïni Noambakiti ka demoniuecha no andani.
8. a) ¿Náki jindeski ma ambe enga sánderu jukaparhakueka engajtsïni jarhuataaka no jiókuarhini no sési jarhati demoniuecheri ambe? b) ¿Ambe arhisïni Salmo 146:4 uarhiricheri ambe?
8 Ju je arhintani Tata Diosïri Karakatani ka eratsintani ambe enga arhijka. I ambe, ma ambesti enga sánderu jukaparhakueka engajtsïni jarhuataaka no jiókuarhiani chkuanderakuechani no sési jarhati demoniuecheri. Tata Diosïri Karakata ísïsti komu espada uarhomukukata ma enga újka iauani jamberi inchaani parachi mítiani Noambakitiri chkuanderakuechani (Efes. 6:17). Por ejemplu, Biblia arhisïndi eskaksï uarhiricha no úsïnga kʼuiripuecha jingoni uandontskuarhini (arhinta je Salmo 146:4). Ístujtsïni miátantasïndi eska Jeobajkusï újka uandani ambe enga meru úkuarhiaka sánderu orhepani (Is. 45:21; 46:10). Engachi pauani pauani arhintaska ka eratsintani ambe enga arhijka, jingontkuchi jauaka para no jiókuarhini ka kurhunhini demoniuecheri chkuanderakua ambe.
9. ¿Ambechi no úsïni enga sïkuamikueri ambeka?
9 Ju je no ma ambe úni enga sïkuamikueri ambeka. Ambakiti kristianuechachi no nirasïnga sïkuamicha jingoni, nichi jámajki uarhiricha jingoni uandontskuarhini. Eskachi na exekia máteru artikulurhu, nochi uásïnga imani pʼindekuechani enga xáni únhajka jiáni enga nema uarhijka, komu ima ambe engaksï jakajkujka eskaksï uarhiricha seguirini jarhasïnga tsípiti jarhani máteru nanisï. Nijtuchi uéjki mítini ambe enga úkuarhiaka sánderu arhepani úrapariani oroskopuechani o exerkuarhiparini (Is. 8:19). Nochi jatsiska para ini ambe kámani ni máteru ambe enga sáno májkueni jáxeaka. Mítiskachi eska i ambe kánikua no sési útspesïnga ka eska ini ambe jingonchi uáka Noambakiti ka demoniuecha jingoni jarhani.
Májkueni eska primeru siglu anapu kristianuecha, ju je kʼuanikuni iámindu ambe enga xáni sïkuamikueri ambeka ka no tsípikuarhini sïkuamikueri ambe jingoni. (Exe je párrafu 10 a 12).
10, 11. a) ¿Ambeksï úspi primeru siglurhu máru Efesu anapuecha engaksï jorhenguarhipka jurhimbikueri ambe? b) Eska na arhijka 1 Korintu 10:21, ¿andichisï jatsi para májkueni úni eska imecha ka nénachi uá ísï úni?
10 Ju je kénditani iámindu ambe enga sïkuamikueri ambeka. Primeru siglurhu, máru Efesu anapuechaksï sïkuamikua ambe úrasïrendi. Peru engaksï jorhenguarhipka jurhimbikueri ambe, matirkuksï úspti ambe ma. Biblia arhisïndi eskaksï “uánikua engaksï ikichakueni jásï ambe uénga sïkuamikueri ambe”, juáspkaksï “imecheri libruechani ka kurhiraanksï iámindu kʼuiripuechani japarini” (Uku. 19:19). Eskachi na exeka, úsptiksï ambe engaksï jatsipka para úni paraksï úni orhepani uérakuani demoniuechani. Nájkirukaksï kánikua jukaparhapka ima libruecha engaksï majiaeri ambepka, kurhiraasptiksï enbesi deksï intsïkuarpiani o ataraantani. Sánderuksï jukaparharaspti Jeobani jeiapanherantani ka eska na engaksï xáni jukaparhapka ima libruecha.
11 ¿Nénachi uá májkueni úni eska imecha? Engachi jatsika ambe ma enga sïkuamikueri ambeka komu amuletuechani, talismanichani o máteru ambe enga jindeka para kuájchakukuarhini no sési amberi o demoniuecheri ambe, mejoristi eskachi kʼuanikuaka indeni ambe (arhinta je 1 Korintu 10:21).
12. ¿Ambechi jatsiski para kurhamarhikuarhini?
12 Ju je jingontku exeni ambe engachi jingoni tsípikuarhijka. Ju je kurhamarhikuarhini: “¿Arhiantasïni libruechani, rebistechani, o ambe enga Internetirhu jaka enga sïkuamikueri ambeka? ¿Na jásï músika kurhaasïni ka na jásï pelikulechani ka programechani exeasïni telerhu ka na jásï bideujueguechani chʼanaasïni? ¿Ambe engani jingoni tsípikuarhijka jukaraski sïkuamikueri ambe? ¿Bampiruecheri ambe uandasïni, sombiecheri o demoniuecheri ambe? ¿Xarhatasïni eska majia o sïkuamikua ambe no no sési jarhaska?”. Ísïsti, nóksï iámindu istoriecha o kuentuecha engaksï újtsïkurhinhaka, sïkuamikueri ambe uandasïnga. Engachi ini ambe kurhamarhikurhiaka, ju je seguru jarhani eska iámindu ima ambe engachi erakuaka úni, no ima ambeuaka enga Tata Diosï kurhunhijka. Jánguarhintasïngachi xáni eskachi xáni uáka para juchari konsiensia no no sési jarhani Jeobani japarini (Uku. 24:16).c
13. ¿Ambechi no uékasïni úni?
13 Ju je no uandaantani istoriechani engaksï demoniuecheri ambeka. Ini ambe jimbo, jatsiskachi para ísï úni eska Jesusi (1 Ped. 2:21). Enga auandarhu japka, uánikua ambe exespti Noambakitiri ka demoniuecheri ambe. Peru enga Echerirhu jupka, no jámaspti imecheri ambe uandantani. Jesusi Jeobaeri ambe uékasïrendi aianhpini ka no eska Noambakiti sánderu mítinhapiringa. Májkueni eska Jesusi, juchachi no uékasïnga uandantani jarhani demoniuecheri ambe. Enbesi de indeni ambechi úni, juchari uandakuecha jingonchi xarhatasïnga eska juchari mintsita kánikua sési pʼikuarherasïnga ambakiti ambe jimbo, enga jindeka jurhimbikua (Sal. 45:1).
Ju je no sáni chérhiani demoniuechani. Jeoba, Jesusi ka ánjelichaksï kánikua sánderu uinhapisti. (Exe je párrafu 14 ka 15).d
14, 15. a) ¿Andichisï no jatsi para kánikua chérhiani demoniuechani? b) ¿Náki pruebechanchi jatsiaski eska ini jurhiatikuecha jimbo, Jeoba kuájchakuxaka imeri iretani?
14 Ju je no kánikua chérhiani demoniuechani. Ini parhakpini jimbo, iáminduechachi uáka no sési jásï ambe nitamakuarhini. Engachi no erokuarhini jarhajka, uákachi no sési ambe úkuarhinchani, pʼamenchanchi o astachi uarhini. Peru, ¿eratsiachi eska demoniuecheri kulpeska? Biblia arhisïndi eskachi iáminduecha uáka nitamakuarhini “ambe ma enga ma no erokuarhi[ni]” jarhajka (Ecl. 9:11). Peru ístu, Jeoba xarhatasti eska kánikua sánderu uinhapiska eska demoniuecha. Por ejemplu, no jurajkuspti eska Noambakiti uandikupiringa Jobuni (Job 2:6). Ka Moisesiri jurhiatikuecha jimbo, xarhataspti eska sánderu uinhapispka eska Ejiptu anapu saserdoticha engaksï majia uénga (Éx. 8:18; 9:11). Ísï ióni jimbo, Jeoba íntskuspti Jesusini uinhapikua para Noambakitini ka demoniuechani pétaantani auandarhu uératini ka kʼuanijpaani Echerirhu. Ka no ióni jimbo, ónhauati kʼéri posurhu ma enga xáni jauanhika, nani engaksï no nemani uáka no sési úkuni (Jaŋ. 12:9; 20:2, 3).
15 Uánikua pruebechanchi jatsiaska eska ini jurhiatikuecha jimbo, Jeoba kuájchakuxaka imeri iretani. Ju je eratsini ini ambe: aianhpixakachi ka jorhentpini jurhimbikuani iámu parhakpinirhu (Mat. 28:19, 20). Ini ambe úparini, úxakachi eska xarharaaka ambe enga xáni no sési úni jaka Noambakiti. Seguru eska enga Noambakiti úpiringa, pʼíngupirindi juchari ánchikuarhitani, peru no úsïndi. Ísï jimbo, nochi jatsiska para kánikua chérhiani demoniuechani. Mítiskachi eskaksï “Jeobaeri eskuecha iapurisï exexaka echerirhu para uinhapikua xarhatakuani imechani engaksï iámu mintsita jingoni marhuakujka” (2 Crón. 16:9). Engachi no jurajkuska Jeobani, demoniuechajtsïni no uáti no sési úchini para méntkisï.
JEOBA ÚJCHAKURAASÏNDI IMECHANI ENGAKSÏ JURAJKUJKA ESKA IMA JARHUATAUAKA
16, 17. Uandanta je eksperiensia ma enga xarhatajka na enga xáni balori uétarhijka para orhepani uérakuani demoniuechani.
16 Balori uétarhisïndi para orhepani uérakuani demoniuechani, sánderia engajtsïni amiguecha o familiaricha ambakiti ambe eratsiparini afuersa uékaaka parachi imecha jingoni úntani pʼindekua ma. Peru Jeoba újchakuraasïndi imechani engaksï balori xarhatajka. Ju je exeni ambe enga nitamakuarhipka pirenchi Erica enga Ghana irekaka. Erica 21 jatirispti enga uénapka jorhenguarhini Bibliaeri ambe. Jimboka sïkuamiri ma uájpespka, iáminduechaksï erokuarhisïrendi eska imajtu seguiripiringa úni pʼindekua ma, kʼuiripita arhani enga táti jemba imeri diosï úkatechani kéjtsïtakuauenga. Enga ima no uékapka ísï úni, imeri familiarichaksï ísï exespti eska no sési arhiaspka diosï úkatechani. Eratsisptiksï eskaksï diosï úkatecha kastigariuapiringa pʼamenchakua ambe jingoni kuerpurhu ka eratsikuarhu.
17 Afuersaksï uékasïrendi eska Erica imani ambe úpiringa, peru ima no jurajkutakuarhispti, nájkiruka indeni ambe jimbo jatsipka para uéakuni imeo. Uánikua Testiguechaksï jurajkuspti eska imecha jingoni pakarapiringa. Ini ambe jingoni, Jeoba újchakuraspti familia ma jingoni engaksï jindepka imeri erachicha (Mar. 10:29, 30). Nájkirukaksï imeri parienticha nóteru xénchapkia ka astaksï kurhirakuni imeri ambe, Erica no jurajkuspti Jeobani, itsï atakuarhispti ka iásï prekursora regularistia. No jukari chérhiasïndi demoniuechani. Ka arini ambe uandasïndi imeri familiaricheri ambe: “Pauani pauani kurhakusïnga juchari Tata Diosï uékpitini eska juchiti familia niáraaka jatsini kóntperatani para mítini Jeobani ka sésiksï pʼikuarherani engaksï uáka imani marhuakuni”.
18. ¿Náki kóntperatechanchi intsïnhaua engachi mintsikaska Jeobani?
18 Nochi iáminduecha jatsiaka para orhepani uérakuni inde jásï ma tsʼéjkukuani enga xáni úkua jukaka. Peru iáminduechachi jatsiska para orhepani uérakuani demoniuechani ka mintsikani Jeobani. Engachi ísï úska, uánikua kóntperatechanchi jatsiauaka. Por ejemplu, Noambakitijtsïni no uáti chkuanderachini. Ístu, nochi méni jurajkuaka Jeobani marhuakuni solu jimbokachi chérhiasïnga demoniuechani. Ka ambe enga sánderu jukaparhakueka, jindesti eskachi sánderu ambakiti pájperakua ma jatsiaka Jeoba jingoni. Disipulu Santiagu karasti: “Kaxumbinta je Diosïni japarini, ka asï jiókuarhi je Noambakitini, ka ísïksïni ima késtakuchiati. Andarhiera je Diosïni, ka imajtuksïni andarhieraati” (Sant. 4:7, 8).
PIREKUA 150 ¡Jeobakini uáti kuájchakuni!
a Juchari Tata Diosï uékpiti Jeoba, aiangustijtsïni na engaksï xáni no ambarhaka demoniuecha ka na engaksï xáni újka no sési útspini. ¿Ambeksï úrasïni para támisï jánhastani kʼuiripuni? ¿Ambechi uá úni parachi orhepani uérakuani? Ixúchi exeaka nénajtsïni jarhuatasïni Jeoba parachi no jurajkuni eskajtsïni támisï jánhastaaka.
b JUKAPARHAKUA AMBE: Úrasïngachi uandakuani sïkuamikua parachi arhikuekani mámaru jásï jakajkukua ka enga únhajka demoniuecheri uinhapikua jingoni. Ma ambe engaksï jakajkujka jindesti eska kʼuiripu ánima ma jatsiska enga tsípiti pakarajka jiáni enga kʼuiripu uarhijka ka eska úsïnga uandontskuarheni kʼuiripuecha jingoni, sánderia jiáni engaksï sïkuamini ma úrajka. Adibinasioni ístu jindesti sïkuamikueri ambe. Engachi ístu ini artikulu jimbo úrajka uandakua majia, nochi imani ambe arhikuekasïnga para sóntku úni ambe ma jájkicha jingoni para kʼuiripuni tsíperani, sino iámindu imani ambechisï arhikuekajka enga demoniuecheri uinhapikua jimbo únhajka, komu peratspeni ambe ma ka sïkuajpini o kénditani sïkuamikueri ambe.
c Orhejtsïkutichaksï no jatsisti para uandani ambe jingonchi uá tsípikuarhini. Sánderu sési, mándani kristianu jatsisti para úrani imeri konsiensiani enga Biblia jimbo jorhendakata jaka para erakuni ambe arhintaa, ambe exea o ambe jingoni tsípikuarhia. Familieri orhejtsïkuti jatsisti para asegurarikuarhini eskaksï Bibliaeri prinsipiuecha jarhuataaka familiani erakuni ambe engaksï jingoni tsípikuarhiaka (exe je artikuluni “¿Tienen los testigos de Jehová una lista de películas, canciones o libros prohibidos?” pájinarhu jw.org®, partirhu SOBRE NOSOTROS > PREGUNTAS FRECUENTES).
d AMBE ENGA XARHATAJKA IMAJENI. Jesusi, komu auandarhu anapu Rei uinhapiti enga orhekupaani jaka uánikua ánjelichani ka imecheri karhakua jimbo, Jeoba imeri uaxantskuarhu.