Ju je jarhuataani erachichani paraksï úni orhepani uérakuani uandanhiatechani

1. ¿Nénachi uá májkueni úni eska juchari Táti xénchpiti, Jeoba?

JUCHARI Táti xénchpiti, Jeoba, kánikuajtsïni uékasïndi (Juanu 3:16). Jimbokachi uékasïnga májkueni jámani eska ima, jánguarhintasïngachi máteruecheri lugari jimbo niárani, xénchpini ka pʼamojkuani iáminduechani, peru sánderu “imechani engaksï Diosïri kʼumanchikuarhu anapueka”, engaksï jindeka erachicha (Gal. 6:10; 1 Ped. 3:8). Uékasïngachi jarhuataani juchari erachichani engaksï no sési ambe nitamakuarhini jarhajka.

2. ¿Ambechi exea ini artikulu jimbo?

² Iáminduecha engaksï uéjka Jeobaeri ireta jingoni jarhani, niáraatiksï kʼérati uandanhiatechani jatsiani (Mar. 10:29, 30). Jamberichi niáraaka sánderu uandanhiatechani jatsiani enga nóteru xáni ióni kueratani jauakia para kʼamajkunhani i parhakpini. ¿Nénachi uá jarhuajperani iáminduecha? Ju je orheta exeni ambe enga uandajka Biblia Lotiri, Jobueri, ka Noemiri ambe. Tátsekuachi exeaka máru ambe engaksï nitamakuarhijka juchari erachicha ka nénachi jarhuataua orhepani uérani.

JU JE NO SÓNTKU KUATANTANI

3. Eska na arhijka 2 Pedru 2:7, 8, ¿ambe no sési ambe erakuspi úni Loti ka ambe niáraspi úkuarhinchani?

³ Loti kánikua no sési ambe úspti enga Sodoma nípka irekani, ireta ma enga kánikua ísku jándikua ambe japka (arhinta je 1 Pedru 2:7, 8). Ísïsti eska imani lugari jimbo Loti no ma ambe kuératanchasïrenga, peru kánikua no sési ambe nitamakuarhispti enga ísï jima mótsipka irekani (Gén. 13:8-13; 14:12). Peeka Lotiri témba xáni tsitienga imani iretani o xáni pʼinderhiani máru kʼuiripuechani engaksï jima irekapka enga niárapka no kurhajchani Jeobani. Uarhispti enga Tata Diosï chpiri ka asufri uekopapka imani lugari jimbo. Ka ju je eratsiantani Lotiri tsimani uájpechani engaksï kurhajkuarhikata japka paraksï uambuchani tatakecha jingoni engaksï Sodoma uarhipka. Loti nóteru jatsisptia kʼumanchikua, jatsikuarhikua ambe, ka sánderu no sési ambe, ni imeri témbani (Gén. 19:12-14, 17, 26). Peru Jeoba no méni kuatantaspti Loti jingoni jiáni enga xáni úkua jukapka.

4. ¿Néna xarhataspi Jeoba eska no kuatantaspka Loti jingoni? (Exe je dibujuni enga uénakuarhu jaka).

⁴ Nájkiruka Loti, Sodoma erakupka irekani, Jeoba pʼamojkuspti ka axaaspti máru ánjelichani paraksï pʼímutantani Lotini ka imeri familiani. Peru, enbesi de jirejiresï uéakuntani imani ireta jimbo ísï eska na arhinhapka, ióndaxapti. Ánjelichaksï jatsispti para jupijtani Lotini, témbani ka imeri tsimani uájpechani ka jarhuatasptiksï paraksï sïpakuarhini imani lugariri (Gén. 19:15, 16). Jimajkani, ánjelichaksï arhiaspti eskaksï juátarhisï nipiringa sïpakuarhini. Peru enbesi deksï ísï úni, Loti arhisti Tata Diosïni eska jurajkuapiringa paraksï ireta ma jimbo nirani enga jima no iauani japka (Gén. 19:17-20). Jeoba tekantskua jingoni kurhajchaspti ka jurajkuspti para ísï úni. Tátsekua, Loti chéspti imani ireta jimbo pakarani ka niraspti juátecharhisï, meru jima enga Jeoba uénani jámani arhipka eska nipiringa (Gén. 19:30). Ísïsti, Jeoba kánikua tekantskua xarhataspti. Ju je exeni nénachi uá májkueni úni.

5, 6. ¿Nénajtsïni jarhuatasïni ambe enga 1 Tesalonika 5:14 arhijka parachi májkueni úni eska Tata Diosï?

⁵ Májkueni eska Loti, jamberi kúnguarhikuarhu anapu erachi ma imani ambe erakuati úni enga no sési jaka ka niárani kʼérati problemechani jatsiani imani ambe jimbo. ¿Ambechi uá enga inde ambe úkuarhiska? Jamberichi uékani jauaka arhini eska jimbosï no sési nitamakuarhini jaka imani ambe jimbo enga úka, ka ísïsti (Gal. 6:7). Peruchi uáka úni ambe ma enga sánderu sési jaka: ju je ísï úni eska Jeoba na jarhuatapka Lotini. ¿Néna?

⁶ Jeoba no solu ánjelichani axaaspti paraksï aianguni Lotini eska Sodoma kʼamajkunhapiringa, sino ístu paraksï jarhuataani sïpakuarhini. Sáno májkueni, engachi mítika eska erachi ma úxaka ambe ma enga jimbo niáraaka problema ambe jatsini, jamberichi jatsiaka para arhini ambe ma. Peru ístuchi jamberi uáka jarhuatani. Nájkiruka erachi ióndaaka ísï úni eskaksï Bibliaeri konsejuecha na arhijka, ju je no kuatantani. Ju je ísïni eska ima tsimani ánjelicha. Enbesi dechi kuatantani ka jarhareni erachini, ju je exeni nénachi úpirini jarhuatani (1 Juanu 3:18). Jamberichi jatsiaka para úni ambe ma imani jimbo, enga ísïuaka komueska jupijtani, ka jarhuatani paraka uáka ísï úni eskaksï Bibliaeri konsejuecha na arhijka (arhinta je 1 Tesalonika 5:14).

7. Májkueni eska Jeoba na úpka Loti jingoni, ¿juchajtuchi ambe jatsiski para úni?

⁷ Jeoba solu úpirindi exeni ambe enga no sési uénga Loti, peru no ísï úspti. Ísï ióni jimbo, Jeoba úspti eska apostuli Pedru karapiringa eska Loti achamasï máespka enga jurhimbitku jámenga. Kánikuachi sési pʼikuarherasïnga engajtsïni Jeoba puáchintajka engachi no sési ambe újka (Sal. 130:3). Ju je májkueni úni eska Tata Diosï ka sánderu ambakiti ambe exeni juchari erachicheri. Engachi ísï úska, nóchi sóntku kuatantaaka imecha jingoni ka jamberiksï imecha sánderu uékaati eskachi jarhuatauaka.

JU JE PʼAMOJPENI

8. ¿Ambechi uá engachi pʼamojpiska?

⁸ Ístu, Jobu no sési ambe nitamakuarhispti, peru no jimboka no sési ambe erakupiringa úni, ísï eska Loti. Eskachi na mítikia, nóteru ambe ma jatsikuarhisptia, iretarhu nóteru májkueni exenhasïrendia ka uinhamu pʼamenchaspti. Ka sánderu no sési ambe, iámindu uájpechaksï uarhispti. Ístu, tanimu engaksï uandenga eskaksï imeri amiguespka, no sésiksï arhispti enbesi deksï sési pʼikuastantani. ¿Andiksïsï no pʼamojkupi? Ma ambe jimbo jindespti eskaksï no jánguarhintaspka kurhanguni ambe enga Jobu nitamakuarhini japka. Niárasptiksï imani ambe eratsini enga no ísïpka ka nóksï sáni pʼamojperakua jingoni arhispti ambe ma. ¿Ambejtsïni jarhuataa parachi no májkueni úni? Orheta, jatsiskachi para miáni eska solu Jeobajkusï mítijka iámindu ambe enga kʼuiripu ma nitamakuarhini jarhajka. Ístu, ju je jingontku kurhajchani ambe engajtsïni aiangukuarhini jauaka erachi ma enga no sési nitamakuarhini jaka. Ju je no solu kurhaani ambe enga ima uandaaka. Jatsiskachi para májkueni pʼikuarherani eska ima. Solu ísïchi uáka imeri lugari jimbo niárani.

9. Engachi pʼamojpiska, ¿ambechi no uá, ka andi?

⁹ Engachi pʼamojpiska, nóchi uandantani jámani jauaka ambe enga no sési nitamakuarhini jaka erachi ma. Kʼuiripu ma enga indeni ambe újka, úsïndi eskaksï kúnguarhikuarhu anapuecha no májku kʼéri jauaka (Prov. 20:19; Rom. 14:19). Ima kʼuiripu no sési kámpesïndi, no eratsintasïndi máteruechani jimbo ka imeri uandakuechaksï uáti no sési pʼikuastani nemani enga no sési nitamakuarhini jakaia (Prov. 12:18; Efes. 4:31, 32). Ísï jimbo, sánderu sésisti eskachi ambakiti ambe exeaka kʼuiripueri ma ka eratsintani nénachi uá jarhuatani para ima úni orhepani uérakuani uandanhiatechani.

10. ¿Ambejtsïni jorhendasïni ambe enga Job 6:2, 3 arhijka?

¹⁰ (Arhinta je Job 6:2, 3). Ménisï, Jobu “no sáni eratsiparini” uandaspti. Peru tátsekua jiókuarhispti eska máru ambe enga uandapka, no sési jarhaspka (Job 42:6). Májkueni eska Jobu, nema enga kʼéri problema ma jatsika, jamberi no eratsiparini uandaati o imani ambe uandani enga tátsekua no sési pʼikuastaaka. ¿Ambechi uá? Enbesi dechi sóntku uandani ambe ma ima kʼuiripueri, ju je pʼamojkuni. Ju je miáni eska Jeoba no uékasïrenga eskaksï kʼuiripuecha jatsiapiringa problemechani ka uandanhiata ambe enga xáni jaka iásï. Jimbosï Tata Diosïri marhuari ma niárajti no eratsiparini uandani enga uandanhiata ambe jatsijka. Nájkiruka erachi uandaaka ambe ma Jeobaeri o juchari ambe enga no ísïka, nóchi jámaaka jirejiresï ikiani imani jingoni ni no sési ambe uandani imeri ambe (Prov. 19:11).

11. ¿Nénaksï uá orhejtsïkuticha májkueni úni eska Eliu engaksï konseju íntskuni jauaka erachini ma?

¹¹ Ménisï, erachi ma enga no sési nitamakuarhini jarhajka kʼéri problema ma jimbo, ístu uétarhinchasïndi eska jarhuatanhaaka konseju ma jingoni (Gal. 6:1). ¿Nénaksï uá orhejtsïkuticha jarhuatani? Eliuri ejempluni úraparini enga kurhangukupka Jobuni enga ima aiangukuarhipka ambe ma (Job 33:6, 7). Antesi de Eliu konseju ma íntskuni, orheta asegurarikuarhispti sési kurhanguni na enga Jobu eratsienga. Orhejtsïkutichaksï uáti májkueni úni eska Eliu engaksï jingontku kurhajchaska nemani enga no sési nitamakuarhini jaka ka jánguarhintani kurhangukuni ambe enga ima kʼuiripu nitamakuarhini jaka. Engaksï ísï úska, jamberiksï konsejuecha sánderu mintsitarhu niárakuati.

JU JE SÉSI PʼIKUASTPENTANI JUCHARI UANDAKUECHA JINGONI

12. ¿Néna pʼikuarheraspi Noemi enga uarhirakuarhipka uámbani ka tsimani uájpechani?

¹² Noemi ambakiti uarhiiti máespti enga xénchenga Jeobani. Peru, enga uámba uarhipka ka imeri tsimani uájpecha, uékaspti mójtakuni imeri nombrini Mará jimbo, enga arhikuekajka “kʼameri” (Rut 1:3, 5, 20, nota, 21). Ruti no méni jurajkuspti Noemini, méntkisï enga no sési nitamakuarhipka. No solu jarhuataspti úparini ambe ma, sino ístu sési pʼikuastantaspti imani ambe jingoni enga arhipka. Mintsita jingoni arhispti na enga xáni xénchenga ka uékani jarhuatani, úrapariani uandakuechani engaksï no úkua jukapka para kurhanguni (Rut 1:16, 17).

13. ¿Andiksïsï uétarhinchajki eskachi jarhuatauaka imechani engaksï uarhirakuarhika acheetini o uarhiitini?

¹³ Enga erachi o pirenchi ma kúnguarhikuarhu anapu uarhirakuarhijka témbani o uámbani, uétarhinchasïndi eskachi jarhuataaka. Temungurhiri ma ísïsti kómueskaksï tsimani anhatapuecha engaksï májku jásï kʼérajka. Enga ióni nitamaakia, sïranguechaksï tepekurhini ísï nirasïndi. Enga máechakua anhatapu murutanhajka ka niárani kʼarhini, máteru anhatapuni kánikua no sési úkusïndi. Májkueni, ia sea enga acheetiri témba o uarhiitiri uámba uarhijka, acheeti o uarhiiti niárasïndi ióni jamberi kánikua no sési pʼikuarherani. Ju je exeni ambe enga nitamakuarhika Paulina,b enga uámba mátirku uarhipka. Ima uandantasïndi: “Juchiti irekua méntku mójtakurhispti ka no jánhaskasïrenga ambe úni. Nóteruni jatsispkia juchiti sánderu ambakiti amiguni. Iámindu ambeeri uandontskuarhisïrenga juchiti acheeti jingoni. Tsípisïrendi jíndeni jingoni ka jarhuatasïrendini engani uandanhiata ambe jatsipiringa. Imani jingoni uerasïrenga. Meru kánikua no sési pʼikuarheraspka”.

14, 15. ¿Nénachi uá sési pʼikuastantani nemani enga tsïndi pakaraka?

¹⁴ ¿Nénachi uá sési pʼikuastantani nemani enga tsïndi pakaraka? Ambe engachi orheta jatsika para úni, jindesti uandontskuarhini imani jingoni nájkirukachi no xáni sési pʼikuarheraaka o no jánhaskani ambe uandani. Paulina ístu uandasïndi: “Exesïnga eska uarhikueri ambe uandani, ambe máeska enga kʼuiripu no xáni tsitijka uandontskuarhini. Chésïndiksï imani ambe uandani enga no sési pʼikuastpeaka. Peru no ma ambe uandani, sánderu no sésisti eska imani ambe uandani enga no xáni sési pʼikuastpeaka”. Jamberi ima enga uarhirakuarhika nemani, no erokuarhini jauati eskachi imani ambe uandaaka enga meru mintsitarhu niárakuaka. Paulina uandasïndi: “Sési pʼikuarherasïrenga engajtsïni juchiti amiguecha arhienga eskaksï imechajtu no sési pʼikuarherasïrenga ambe engani nitamakuarhipka”.

¹⁵ Mario, enga sáni iónikia enga uarhirakuarhika témbani, uandasïndi: “Tsitisïnga engaksï máteruecha sési jásï ambe miájka juchiti uarhiitiri ka uandantanksï, í ambe xarhatasïndi eskaksï xénchasïrenga ka jukaparharani. Engaksï indeni ambe újka jíndeni jimbo, kánikuajtsïni jarhuatasïndi. Ambe engajtsïni arhijka, sésijtsïni pʼikuastantasïndi, jimbokani iámindu mintsita jingoni xénchasïrenga juchiti uarhiitini ka jukaparhakua ambespti para ji”. Blanca uandasïndi: “Kánikua sési pʼikuarherasïnga engaksï máteruecha jíndeni jingoni kómarhijka ka engajtsïni arhichintajka ma o tsimani karakatechani. Jarhuatasïndijtsïni engaksï juchiti acheetiri ambe uandajka ka engajtsïni kurhajchajka engani imeri ambe uandontskuarhikuajka”.

16. a) ¿Ambechi jatsiski para seguirini jarhani úni imechani jimbo engaksï tsïndi pakaraka? b) Eska na arhijka Santiagu 1:27, ¿náki ánchikuarhitachi intsïnhaski?

¹⁶ Ísï eska Ruti, enga no jurajkupka Noemini, jatsiskachi para seguirini jarhani jarhuataani imechani engaksï tsïndi pakaraka. Paulina, engachi antesi uandaka, uandasïndi: “Ísï tátsekua enga juchiti acheeti uarhipka, kánikuajtsïni jarhuataspti. Tiempu jingoni, kʼuiripuechaksï seguirispti májkueni irekani eska antesi. Peru juchiti irekua méntku mójtakurhispti. Kʼéri jarhuajpeta máesïndi engaksï máteruecha kurhangujka eska ima enga nemani uarhirakuarhika, uetarhinchasïnga jarhuajperata mesicha jimbo, o asta uéxurhinicha jimbo”. Ísïsti eska mándani kʼuiripu ménderueniska ka nóksï iáminduecha májkueni xáni no sési pʼikuarherasïndi eskaksï máteruecha. Máruksï ísï xarharasïndi enajkiksï újki sóntku pʼindeni ménderueni irekania. Peruksï máteruecha no sési pʼikuarherasïndi méni engaksï imani ambe újka engaksï antesi tsimarhani uénga. Ju je no mirikurhini eskajtsïni Jeoba ambakiti ánchikuarhita ma íntskuska parachi kuidariuani imechani engaksï tsïndi pakaraka (arhinta je Santiagu 1:27).

17. ¿Andiksïsï uétarhinchajki jarhuajperata imecha enga uámba o témba jurajkujka?

¹⁷ Máteru ambe enga kánikua no sési pʼikuastajka ka uandanhiatani nemani enga tembuchatika o uambuchatini, jindesti eska ia sea acheeti o uarhiiti jurajkuaka. Por ejemplu, Jasminiri uámba máteru uarhiiti jingoni nirasti irekani. Jasmini uandantasïndi: “Engachi diborsiarikuarika, sánderuni no sési pʼikuarheraska ka eska enga uarhipiringa. Enga aksidenti ma jimbo uarhipiringa o pʼamenchakua ma jimbo, no jindepirindi ambe ma enga ima uékapiringa ísï úni. Peru, ambe enga úka, imarinisï uékati jurajkuni. Kánikua kʼuratsespka”.

18. ¿Ambechi uá úni parachi jarhuataani imechani engaksï nóteru jatsikia témbani o uámbani?

¹⁸ Imecha engaksï nóteru jatsikia témbani o uámbani, sánderuksï uétarhinchaasïndi ambakiti amiguechani (Prov. 17:17). ¿Nénachi uá xarhatakuani eskachi imecheri amigueska? Sápichitu ambe úparini imecha jimbo, xarhatakuauakachi eskachi xénchaasïnga. Jamberichi uáka pʼímarhiani para tʼireni, ma ratu imani jingoni jarhani o májku kʼéri uérani aianhpini. Ístuchi úpiringa ménisï pʼímarhiani familieri jorhenguarhikuarhu. Engachi ísï úska, sésichi pʼikuastaaka Jeobani, jimboka ima no iauani jarhaska imecha jingoni engaksï no sési pʼikuarherajka ka kuájchakuasïndi tsïndichani (Sal. 34:18; 68:5).

19. Eska na arhijka 1 Pedru 3:8, ¿ambechi sési eratsitixaki úni?

¹⁹ No ióni jimbo, enga Tata Diosïri Reinu juramuni jauakia ixú Echerirhu, mirikurhiauakachi iámindu ióntki anapu uandanhiatechani. Kánikuachi uékaxakaia eska niáraka ima tiempu enga “nóteru miánhantaa[kia] no sési jásï ambe enga ióntki japka ka i ambe nóteru no sési pʼikuastaatia mintsitani” (Is. 65:16, 17). Astaka niáraaka ísï úkuarhini, ju je jarhuajperani iáminduecha ka uandakuecha ka úkuecha jingoni xarhatani eskachi uékaasïnga iámindu erachichani ka pirenchichani (arhinta je 1 Pedru 3:8).