Ambakiti pʼímarperakua ma

1. ¿Kánchi uénaa pʼímarpini para kʼéri tánguarhikua rejioniri?

¹ Engachi ambakiti tʼirekua ma úpiringa para juchari amiguecha o parienticha ka engachi kánikua jánguarhintapiringa ka tumina úrani para úmantani, kánikua tsípikua jingonchi pʼímarhiapiringa. Sáno májkueni, kánikua ánchikuarhita uétarhisti para prepararini ambe engachi jorhenguarhiaka Jeobaeri ambe juchari kʼéri tánguarhikuarhu rejioniri. Tanimu semana antesi de juchari kʼéri tánguarhikua, jatsiakachi kʼéri kóntperatani de pʼímarhiani máteruechani paraksï nirani kʼéri tánguarhikuarhu. ¿Ambejtsïni jarhuataa tsípikua jingoni ísï úni?

2. ¿Ambejtsïni jarhuataa uékani sánderu pʼímarpini?

² Ambe engajtsïni jarhuataaka parachi uékani sánderu pʼímarpini, jindesti eratsintani na engajtsïni xáni marhuachijka mándani juchantsïni informasioni engajtsïni Jeoba íntskujka kʼéri tánguarhikuecharhu (Is. 65:13, 14). Ístuchi jatsiska para miáni na engajtsïni sési nichejka mándani uéxurhini engachi pʼímarpijka (exe je rekuadruni “Na engajtsïni sési nichejka”). Máru kʼuiripu engachi pʼímarhiaka niuati kʼéri tánguarhikuarhu. Nájkirukaksï máru niuaka o nómbe, ambe enga kʼéri ambe arhiaka Jeobani ka xarhatani na enga xáni tsitijka intsïmpini jindesti eskachi jánguarhintaaka pʼímarpini (Sal. 145:3, 7; Jaŋ. 22:17).

3. ¿Nénachi etsakuaua pʼímarperakuechani?

³ Iámindu orhejtsïkuticha mándani kúnguarhikueri, jatsistiksï para exeni kúnguarhikua néna uá sánderu etsakuani pʼímarperakuechani ka sinksï jurajkuaua kʼumanchikuecharhu enga no janhaaka o sinksï íntspiaua engaksï xanharu jimbo eianhpini jauaka. Sábadu ka domingu íntspinhani jauatiksï rebistecha pʼímarperakua jingoni enga sési jauaka. Engachi na kʼamaraakia etsakuni pʼímarperakua, sésichi pʼikuarheraaka engachi tsípikua jingoni pʼímarpika ka engachi pʼímarhika xáni uáni kʼuiripuni eskachi xáni úka, paraksï tánguarhini juchantsïni jingoni para jorhenguarhini ambe enga Jeoba prepararika.

Na engajtsïni sési nichejka

Uánikua uéxurhinistia enga pirenchi ma íntspini jámani japka pʼímarperakua, ka kurhamarhikuarhispti sini marhuapirini iámu ambe enga xáni jánguarhintani japka úni. Ima eratsispti: “¿Niua kʼuiripu kʼéri tánguarhikuarhu pʼímarperakuani ma jimbo?”. Sábadu tsípa kʼéri tánguarhikuarhu, exespti achatini ma enga relijionirhu sij jámaenga ka enga jima no iauani uaxakatini japka, ka andarheraspti para uandontskuarhikuni. Ima achati jima jarhaspti jimboka intsïnhaspka pʼímarperakua ma. Uánikua kurhamarhikuechani jatsiaspti ka pirenchi úspti mókukuantaani. Ima arhispti pirenchini eska kánikua tsitixapka programani ka eska ísku pakataspka exeni na engaksï sési xukuparhaega ka sési jámani iámindu engaksï jima japka. Sánderu tátsekua imani mísmu jurhiatikua, pirenchi uandontskuarhispti temungurhiri ma jingoni enga jima ma ladu japka. Imajtuksï intsïnhaspti pʼímarperakua ma ka autobusi jimboksï niraspti. Xánksï tsitispti programani engaksï eratsipka nirani domingu jimbojtu. Pirenchi jimajkani exespti eska íntspiani pʼímarperakuechani mándani uéxurhini ambakiti ambe juásïnga.
Kʼéri tánguarhikuarhu ma enga iásï sáni úkuarhika, temungurhiri ma enga prekursori regularika saludarispti temungurhirini ma enga jatiripkia ka enga primeru xanhari nípka: “¿Néksïni pʼímarhiski?”, kurhamarhiasptiksï prekursoricha. Imaksï uandaspti: “Engachi ma jurhiani niántapka kʼumanchikuarhu, exentaspkachi pʼímarperakua ma puertarhu kétsekua”. Imaksï arhintaspti pʼímarperakuani ka ístuksï uininharhitaspti kuponini enga tátsepani jaka. Ka máteruecha engaksï kʼéri tánguarhikuarhu japka intsïmbiasptiksï tʼirekua. Xánksï tsitispti programani engaksï eratsipka pauandikua ménderu nirani. Únhasptiksï arregluecha para pʼorhembiani ka jarhuataani paraksï seguirini jorhenguarhini.