Estas palabras tienen que estar en tu corazón

Tátichaksï ísïsti komueska karichi eranguticha. Jatsistiksï para sési kuidariani uájpechani, jimbokaksï úpiringa támu ísï nirani ka no sési nikuani (Prov. 27:23). ¿Nénaksï uá táticha úni ini ánchikuarhita familiarhu? Jatsistiksï para pauani pauani arhutani tiempu para uandontskuarhini uájpecha jingoni paraksï mítini ambe jarhaski imecheri eratsikuarhu ka mintsitarhu (Prov. 20:5). Ístuksï jatsisti para uinhaperakuantani jakajkukua, úraparini ambakiti ambe para jakajkukua ísïini eska ma ambe enga chpiri no újka kurhirani (1 Kor. 3:10-15). Bideu, Estas palabras tienen que estar en tu corazón, xarhatasïndi na enga xáni jukaparhakueka méntkisï jatsini familieri jorhenguarhikua. Iámu familia exe je ka mókuntaa je arini kurhamarhikuechani.

1) ¿Ambe úspi eska familia Romani nóteru kuidaripiringa pájperakua Jeoba jingoni? 2) ¿Andisï erachi Romanini no úpi sési nikuni enga uékapka uénani familieri jorhenguarhikua? 3) ¿Náki textu sánderu ambakiti arhistakua íntspisïni para sési kʼuiriperaani uájpechani? (Deut. 6:6, 7.) 4) ¿Ambe jarhuajpia paraka familia uáka sánderu sési uandontskuarhini? 5) ¿Ambeksï jatsiski para jánguarhintani úni táticha paraksï uájpecha sési jarhani? 6) ¿Nénaksï jarhuataspi erachicha Bargasi familia Romanini? (Prov. 27:17.) 7) ¿Ambe jatsiski para úni antesi táti ma paraka familieri jorhenguarhikua sési uérakuaka? 8) ¿Ambe úspi erachi Romani paraka iámu ambe ménderuenipiringa imeri familiarhu? 9) ¿Andisï jukaparhakue eskachi méntkisï jatsiaka familiaeri jorhenguarhikua? (Efes. 6:4.) 10) ¿Nákiksï jindeski máru ambe enga kánikua marhuajka para familieri jorhenguarhikuarhu? 11) ¿Néna xarhataspi erachi Tomasi tekantskua ka eska meru uékaxapka jarhuatani Markusïni úni ambe enga jurhimbikueka? (Jer. 17:9.) 12) ¿Nénaksï jarhuataspi uátsïni Tomasi ka Mónika paraka sési eratsintapiringa ambe úni imeri pájperakua Justini jingoni? (Mar. 12:30; 2 Tim. 2:22.) 13) ¿Nénaksï xarhataspi mintsikakua Tomasi ka Mónika engaksï mójtakupka máru ambe imecheri tsípikuarhu? (Mat. 6:33.) 14) ¿Néna xarhatasïni i bideu eska kánikua jukaparhakueska eskaksï familiaeri orhejtsïkuticha jorhendaaka familiani Jeobaeri ambe? (1 Tim. 5:8.) 15) ¿Ambeksï jatsiski para eratsini úni familieri orhejtsïkuticha?

NOTA PARA FAMILIERI ORHEJTSÏKUTI: Enga i drama nitamataranhaka kʼéri tánguarhikua rejioniri 2011 jimbo, ¿exespijtsï eska chári familieri jorhenguarhikua úpiringa sánderu sési úkuarhini? Iásï engajtsï exekia ini bideuni, ¿exeskijtsï máteru ambe enga uétarhijka sánderu sési úni? Jimboetakua kómarhi je Jeobani parajtsï uáni mójtakukuechani engaksï méntkisï marhuakuauaka chári familiani (Efes. 5:15-17).