Ambe engaksï uánikuecha eratsejka kómarhikueri ambe
“Engani kómarhikua újka, ísï pʼikuarherasïnga eska Tata Diosï jíndeni jingoni jarhaska, eskarini jupijtasïnga ka orhechipandini engani tsïnchitini pʼikuarherajka” (MARÍA).
“Juchiti uarhiiti uarhisti enga na 13 uéxurhini páni japkia kánseri pʼamenchani. Miásïnga eskani pauani pauani kómarhisïrenga Tata Diosïni ka pʼikuarherasïrenga eskarini meru kurhanguchisïrenga na engani xáni no sési pʼikuarherenga. Sési pʼikuarherantasïrenga” (RAÚL).
“Kómarhikua sési jásï ma intsïmperatesti engajtsïni Tata Diosï íntskuka” (ARNE).
Para María, Raúl, Arne ka ístu para uánikuecha, no jarhasti máteru intsïmperata enga ísïika eska kómarhikua. Engaksï kómarhijka, ísïksï pʼikuarherasïndi enajkiksï újki uandontskuarheni Tata Diosï jingoni, maiamukua íntskuntani ka arhinksï eska jarhuatauaka. Iámu mintsita jingonksï jakajkusïndi ambe enga Biblia arhijka kómarhikueri ambe. “Ka i jindeesti konfiansa engachi jucha jatsika imani jingoni: eska engachi kurhajkuarhiaka ma ambe eska ima na uékajka, imajtsïni kurhajchaaka” (1 Juanu 5:14).
Joperu uánikua kʼuiripu úkua jukanchasïndi jakajkuni ambe enga Biblia arhijka kómarhikueri ambe. Steve aiangusïndijtsïni ambe enga eratsejka: “Engani 17 jatiripka, tanimu juchiti amiguechaksï uarhispti: ma karru jingoni chokarispti ka máteru tsimanksï marirhu uarhimispti”. ¿Ambe úspi Steve? “Kómarhikua jimbo kurhamarhispka Tata Diosïni andisï inde ambe úkuarhipi, joperurini no mókuchintaspti. Ísï jimbo, kurhamarhikuarhispka: ‘¿Para ambe marhuasïni kómarhini?’”. Uánikuechaksï niárasti májkueni pʼikuarherani ka ístuksï kurhamarhikuarhini sini marhuajki kómarhini Tata Diosïni.
Joperu jarhasti máteru ambe engaksï jimbo kʼuiripuecha eratsejka eska no ma ambe marhuasïnga kómarhini Tata Diosïni. Máruksï uandasïndi eska Tata Diosï míteskia ambe engachi uétarhinchajka ka juchari uandanhiatechani ka eskaksï nóteru jatsiskia para aiangukuarhini ambe ma.
Máteruechaksï uandasïndi eska Tata Diosï no uékasïnga kurhaauani imecheri kómarhikuechani imani ambe jimbo engaksï ióntki no sési úpka. Jenny uandasïndi: “Ísï pʼikuarherasïnga eskani no ma ambe jukaparhakueska. Uánikua ambe úska engani jimbo iásï pʼamondakuarhijkia, ísï jimbosïni segura jaka eskani no jukanchaska parareni Tata Diosï kurhajchani”.
¿Ka chá na eratsesïni kómarhikueri ambe? Engajtsï ménisï niáraka ísï no seguru jarhani ka kurhamarhikuechantsï úkuarhiani kómarhikueri ambe, jiájkantsï sési pʼikuarheraaka míteni eskaksïni Biblia mókuchiantauaka indeni kurhamarhikuechani. Uákajtsï mintsikani ambe enga Biblia uandajka kómarhikueri ambe.a Ka jarhuatatiksïni mókuantani arini kurhamarhikuechani:
¿Tata Diosï meru kurhauasïni kómarhikuechani?
¿Andisï no mókuantajki máru kómarhikuechani?
¿Nénachi jatsiski para kómarhini parajtsïni kurhajchani?
¿Nénaksïni uá jarhuatani kómarhikua?
a Bibliarhuksï jarhasti kómarhikuecha engaksï uánikua Tata Diosïri marhuaricha uápka ka máru enga Jesusi uápka. Karakatecha engaksï Ebreu jimbo karakuarhipka, engaksï ísï mítekateka komu Antiguo Testamentu, jukariksï 150 kómarhikuecha jarhasti.