¿Karrera ma jatsini ka sentabu uaa eskajtsï sési irekaaka sánderu orhepani?

Uánikua kʼuiripuechaksï eratsesïndi eska karrera ma jatsini ka sentabu uaaka eskaksï sési irekaaka sánderu orhepani. Eratsesïndiksï eska engaksï kʼuiripuecha niuaka unibersidadirhu, sánderuksï sési ánchikuarhiaka, ambakiti kʼuiripuenksï familiarhu ka iretarhu. Ístuksï uandasïndi eska engaksï sánderu niuaka eskuelarhu, uaakaksï jatsini ánchikuarhita ma engaksï sési maiamunhaaka ka eska enga sánderu sentabu andaaka kʼuiripu ma, sánderu tsípikua jingoni irekaaka.

AMBE ENGAKSÏ UÁNIKUECHA ÚJKA

China anapu acheeti ma uandantasïndi: “Eratsesïreenga eska engani no nipiringa unibersidadirhu, méntkisï pobripiringa ka engani jatsipiringa ánchikuarhita ma engani sési maiamunhapiringa, úpiringa jatsini ambe engani uékapiringa ka eskani tsípikua jingoni irekapiringa”.

Paraksï úni ambakiti irekua ma jatsini, uánikuechaksï uékasïndi nirani unibersidadirhu ma enga kánikua mítekateuaka no arhiparini enga máteru paisi jimbo jauaka. Uánikuechaksï ísï úsïreendi astaka pʼamenchakua COVID-19 jimbo, nóteru xáni fásilikia biajarini. Diesi uéxurhinisïstia enga organisasioni ma exeka eska jukari terujkani engaksï máteru paisi jimbo nika eskuela, Asia anapueskaksï.

Uánikua taatichaksï uánikua ambe úsïndi parakaksï uájpeecha unibersidadirhu ma niuaka máteru paisi jimbo. Taiwán anapu ma achamasï miásïndi: “Juchiiti taatichaksï no kánikua sentabu jatsispti. Peru útasï ísï, axasptijtsïni jíndeni ka máteru tanimu juchiiti ermanuechani Estados Unidos parachi estudiarini”. Paraksï úni maiampini eskuela, ísï eskaksï na újka uánikuecha, imeeri familia kánikua sentabu kuánpespti.

¿MARHUASÏNI I AMBE?

Chúrikua, máechakua nanaka komputadorarhu jarhasti. Kuatarastia ka no sési pʼikuarheraxati. — Uánikua kʼuiripuecha engaksï jánguarhintajka karrera ma kʼamarani ka sentabu jatsini, niárasïndiksï no sési pʼikuarherani.

Ísïisti eska eskuela marhuasïnga para mámaru ambe jimbo, peru imeecha engaksï eskuela kʼamarajka, kuentaksï íntskukuarhestia eska no méntkisï ísïisïnga eskaksï na erokuarhini jarhapka. Nájkirukaksï kánikua jánguarhintajka paraksï kʼamarani eskuela ka astaksï kantspini pakarani, uánikuekaksï no imani ambe ánchikuarhisïndi engaksï estudiarika. Informi ma enga periodista Rachel Muiri úpka para Business Times Singapur anapu, uandasïndi: “Sánhani arhixati sánderu úkua jukani para imeecha engaksï kʼamaraka unibersidadini ánchikuarhita ma exentani”. Ístu achamasï ma enga kánikua estudiarika ka enga Taiwán irekaka, uandasïndi: “Uánikuechaksï no exentasïndi ánchikuarhita ma enga ima amberiuaka engaksï estudiarika ka jimboksïsï máteru ambe ánchikuarhijti”.

Máruksï úsïndi ánchikuarhini ima amberi engaksï estudiarika, joperu jamberi no ísï úkuarhijti eskaksï na eratseenga. Achamasï ma enga Tailandia anapueka Reino Unido niraspti unibersidadirhu. Enga na kʼuanhatsentapkia imeeri paisirhu, exentaspti ánchikuarhita ma, ima amberi enga estudiaripka. Ima uandantasïndi: “Ísï eskani na erokuarhini japka, juchiiti estudiuechani jimbo, úspka exentani ánchikuarhita ma engani sési maiamunhenga. Peru parani úni xáni kánikua sentabu andani, jatsipka parani kánikua jánguarhintani ka sánderu ióni pakarani ánchikuarhini. Tátsekua empresa uánikua ánchikuarhirichani chútantaaspti ka ístu jíndeni. Kuenta íntskukuarheska eska no ma ánchikuarhita jarhaska enga segurueka”.

Imeecha engaksï jatsikuarherika o engaksï seguni “ambakiti irekua ma jatsika” ístuksï jatsiasïndi problemechani familiarhu ka pʼamenchasïndiksï, o jukariksï uandanhiani sentabu jimbo. Japón anapu achamasï ma uandasïndi: “Nájkirukani kánikua sentabu jatsipka, no tsípikua jingoni irekaspka, jimbokaksï máteruecha andaperasïreenga jíndeni jingoni, enbidiarisïrendijtsïni ka no sési ambejtsïni úchisïreendi”. Lam, uarhiiti ma enga Vietnam irekaka, uandasïndi: “Uánikua kʼuiripuechaksï jánguarhintasïndi ambakiti ánchikuarhita ma jatsini ka paraksï no kueratanchani sentabu. Peru sáno méntkisï sánderuksï uandanhiasïndi, pʼamenchani ka nóksï seguru pʼikuarherani”.

NO SOLU UÉTARHISÏNDI UNIBERSIDADIRHU NIRANI KA SENTABU JATSINI

Ísïisti eska uétarhisïnga sentabu ka eskuela nirani para ma úni jatsini ambe enga uétarhinchajka ka para kéndani familiani. Peru i ambe no uaati eskachi sési irekaaka sánderu orhepani. ¿Andi nómbe? Exe je ambe enga arhijka Tata Diosïri Karakata.

KʼAMARANI UNIBERSIDADINI NO MÉNTKISÏ ÚSÏNDI ESKA NEMANI SÉSI NIKUAKA

“Ima enga sánderu uiriijka, no méntkisï andasïn[di] [...], niksï jánhaskaticha jatsijki méntkisï sentabu, ka niksï méntkisï sési exenhani imeecha engaksï jorhenaka, jimboka méntkisï úkuarhisïnga o jarhasïnga ambe ma enga ma no erokuarhijka” (ECLESIASTÉS 9:11).

Sáno méntkisï, asta imeecha engaksï kánikua estudiarijka, nóksï úsïndi ambakiti irekua ma jatsini jimboka úkuarhisïnga ambe ma engaksï imeecha no erokuarhini jarhajka. Pori ejemplu, paisirhu problema ambe jarhasïndi sentabu jimbo, kʼuiripuechaksï no jurhimbitku kámpisïndi ka menusiksï uaasïndi máteruechani ka i ambe úsïndi eskaksï imeecha no jatsiaka ambe engaksï uéjka.

JATSIKUARHEKUA AMBE ÚSÏNDI KʼAMAKURHINI

“Asï jánguarhinta jatsikuarhekua ambe jatsini. Anhaxurhi ka jánhaskakua xarhata. Engari chiiti éskuecha jingoni exejka, inde ambe no ma ambeesïndi, jimboka alechani jukaasïnga ísï eska aguila ma ka auandarhisï kárasïndi” (PROVERBIOS 23:4, 5).

Sentabu úsïndi eska nema uaaka sési irekani peru ma tiempujku. Pori ejemplu, nema úpirindi ma repentku no ma sentabu jingoni pakarani. Ka kʼérati jenchekuecha jimbo, enga kurhupejka ka akuitsi janikuecha jimbo nema úpirindi tsïtani kʼumanchikua ambe ka no ma sentabu jingoni pakarani.

JATSIKUARHEKUA AMBE ÚSÏNDI ESKAKSÏ PROBLEMECHA JAUAKA

“Ima enga jatsikuarherika no úsïndi kʼuíni imani ambe jimbo enga xáni jatsikuarheka” (ECLESIASTÉS 5:12).

Inde ambesï úkuarhinchapti Franklin enga Hong Kong irekaka. Ima kʼamaraspti unibersidadini ka ánchikuarhita ma jatsispti enga sési maiamunheenga ka asta niáraspti ima orhejtsïkuni ánchikuarhitani. Peru ima uandasïndi: “Xáni uandanhiani ánchikuarhita jimbo, úxapti eskani pʼamenchapiringa. Xáni no sési pʼikuarherasïreenga engani jamberi nóteruni ueengia kʼuíni”. Franklin nóteru úspti xáni uánikua ambe jingoni. Ístu uandasïndi: “Ueenaspka kurhamarhikuarhini andisïni ísï irekani japi ka i ambe úspti eskani eratsentani pakarapiringa ambe jimbochi irekaxaki”.

“Asï jánguarhinta jatsikuarhekua ambe jatsini” (PROVERBIOS 23:4)

Ísï eska Franklin, uánikuechaksï kuenta íntskukuarhestia eska karrera ma kʼamarani ka jatsikuarherini, no sánderu jukaparhakua ambeeska tsípikuarhu. Máteru kʼuiripuechaksï jánguarhintasïndi ambakiti kʼuiripueni ka sési kámpini enbesi deksï jánguarhintani kánikua ambe jatsini. ¿Uaa i ambe eskachi ambakiti irekua ma jatsiaka sánderu orhepani? Máteru jorhenguarhikua jimbochi exeaka mókuntskua.