Ambe enga kurhanguarhijka ima enga arhintajka
Enga Dabidi karaapka uandakuechani engaksï Salmo 61:8 jimbo jaka uandaspti eska kʼéri ambe arhipiringa Tata Diosïni “para méntkisï”, ¿arhikuekaxapi eska ima no méni uarhipiringa?
Nómbe. Ambe enga Dabidi karapka meru ísïispti ka no jukari ambe uandaxapti.
Eratsenta je ambe enga ima karapka indeni bersikulu jimbo ka máteru bersikuluechani jimbo engaksï sáno májkueni uandajka. Ima uandaspti: “Pireaka para kʼéri ambe arhini chiiti nombrini para méntkisï pauani pauani ísï uaaka eskani na aiatspeka”, “Kʼéri ambekini arhisïnga iámu juchiiti mintsita jingoni, oh, Jeoba juchiiti Tata Diosï, ka kʼéri ambe arhiaka chiiti nombrini para méntkisï”. Ka máteru salmu jimbo karaspti: “Kʼéri ambe arhiaka chiiti arhinhakuani para méntkisï” (Sal. 61:8; 86:12; 145:1, 2).
Ambe enga Dabidi uandapka no jukari ambeespti. Ima mítespti eska ma jurhiani uarhipiringa jimboka pekaduni jimbo iáminduechachi uarhisïnga. Ka Dabidi mismu uandaspti eska ima pekadoriispka (Gén. 3:3, 17-19; Sal. 51:4, 5). Mítetixapti eskaksï asta imeecha jamberi uarhispka enga Tata Diosï Jeoba jaiapanheantapka, komueska Abraáni, Isaaki ka Jakobu. Ístu mítespti eska ima niárapiringa uarhini (Sal. 37:25; 39:4). Joperu ambe enga arhijka Salmo 61:8 xarhatasïndi eska Dabidi eratsetixapka para méntkisï kʼéri ambe arhini Tata Diosïni, o asta jiáni jamberi enga ima tsípiti japiringa (2 Sam. 7:12).
Ísï eska na arhijka ueenakuarhu salmurhu 18, 51 ka 52, ménichani Dabidi karaspti ambe enga nitamakuarhini jarheenga. Salmo 23 jimbo, Dabidi uandaspti eska Tata Diosï Jeoba ísïiska eska karichi eranguti ma enga orhekupaajka, sési pʼikuastaani ka kuájchakuani imeeri karichiichani. Dabidi ísï kuidariuasïreendi imeeri karichiichani ka jimbosï uékeendi marhuakuni Tata Diosï Jeobani pauani pauani asta jiáni jamberi enga ima irekapiringa (Sal. 23:6).
Ístu ju je miántani eska ambe enga Dabidi karapka Tata Diosïni jimboespka. Máru ambe enga ima karapka jindeesptiksï profesiecha engaksï tiempu jingoni kumplirikuarhipiringa. Pori ejemplu, Salmo 110 jimbo, Dabidi uandaspti eska niárapiringa jurhiatikua enga imeeri Tata uaxakapiringa jurhijkandani ladu Tata Diosïiri jini auandarhu ka eska kánikua juramukua intsïnhapiringa. Ka eska indeni juramukua jingoni, juramukuapiringa Tata Diosïiri enemiguechani ka eska jusgariuapiringa iámindu ireteechani. Dabidiiri familiarhu anapuespti Mesíasi, enga auandarhu uératini juramupiringa ka enga jindeepiringa “saserdoti para méntkisï” (Sal. 110:1-6). Jesúsi uandaspti eska i profesia enga Salmo 110 jimbo jaka imeeri ambe uandasïreenga ka eska inde ambe sánderu orhepatini kumplirikuarhipiringa (Mat. 22:41-45).
Eskachi na exekia, Tata Diosï Jeoba jarhuataspti Dabidini paraka karapiringa máru ambe enga jiáni úkuarhipka enga Dabidi irekapka ka ístu imani ambe enga sánderu orhepatini úkuarhiaka, enga ima tsíntaaka ka enga uaaka kʼéri ambe arhini Tata Diosï Jeobani para méntkisï. Míteni ini ambe, ¿nénajtsïni jarhuatasïni kurhanguni ambe enga arhijka Salmo 37:10, 11, 29? I bersikuluechaksï uandasïndi na engaksï irekapka israeliteecha ióntki, joperu ístuksï uandasïndi imani xáni sési jásï ambeeri engachi jatsiaka jiáni enga Tata Diosï kumpliriuaka imani ambe enga aiatspeka (exe je ini rebista jimbo párrafu 8 jorhenguarhikueri “Jíndeni jingondi jauaka Paraisurhu”).
Ísï jimbo, Salmo 61:8 ka máteru bersikuluecha engaksï sáno májkueni ambe uandajka, jarhuatasïndijtsïni exeni eska Dabidi uékasïreenga kʼéri ambe arhini Tata Diosï Jeobani ióntki Israeli enga jamberi irekapiringa. Ka ístujtsïni xarhatachesïndi ambe enga ima uaaka enga Tata Diosï tsítantaaka.