Ambe enga kurhanguarhijka ima enga arhintajka

Enga Jesúsi na andajpenupkia Beléni, ¿andiksïsï José ka María jima pakarapia ka nóteruksï imeecho kʼuanhatsentani Nasareti?

Biblia no uandasïndi andi, joperu kʼóru uandasïndi máru ambe engajtsïni jarhuatajka kurhanguni andiksïsï nóteru uékapia Nasareti kʼuanhatsentani.

Jiáni enga ánjeli ma aiangupka Maríani eska embarasada japiringa ka eska ambakentapiringa, María ka José Nasaretiksï irekaxapti, ireta ma enga Galilea japka (Luk. 1:26-31; 2:4). Ka tátsekua, engaksï Ejiptu uératini uéakuntapka, Nasaretiksï kʼuanhatsentaspti. Ka jimboka Jesúsi imani ireta jimbo tʼarhexespka, jimbosï uandanheendi eska ima nasarenuespka (Mat. 2:19-23). Jimbochisï Nasaretini miájka méntkisï enga uandanhajka Joséeri, Maríaeri o Jesúsiiri ambe.

Ambe ma engachi jatsika para miáni, jindeesti eska María miiuspkia Judea. ¿Nénachi míteski? Jimbokaksï jima irekaxapka imeeri parienti jémbeecha máru. Jima irekaspti Elisabeti enga saserdoti Sakaríasiiri témbeepka ka enga Juanu Bautisteeri amambeepka (Luk. 1:5, 9, 13, 36). María niraspti exeni Elisabetini ka jima pakaraspti imani jingoni ma tanimu mesisï ka tátsekua kʼuanhatsentaspti Nasareti (Luk. 1:39, 40, 56).

Tátsekua, kʼuiripuechaksï arhinhaspti eskaksï jatsispka para apuntarikuarhini. Ísï jimbo, José niraspti Nasareti uératini asta Beléni, “Dabidiiri iretarhu”, nani enga uandanhapkia eska andajpenupiringa Mesíasi (Luk. 2:3, 4; 1 Sam. 17:15; 20:6; Miq. 5:2). Jima andajpenuspti Jesúsi, ka José no arhipirindi Maríani eskaksï sóntku jámapiringa kʼuanhatsentani jimboka apenasi kánguarhispka charhakuni. Belénksï pakaraspti enga Jerusaléni no iauani japka, ma 9 kilometrisï (6 miia). Ka inde ambe kánikua sési jarhaspti, jimbokaksï úpiringa templurhu nirani Jerusaléni paraksï charhakuni páni ka kéjtsïtakuani ísï eska Lei na uandeenga (Lev. 12:2, 6-8; Luk. 2:22-24).

Ístu, ju je miáni eska ánjeli arhispka Maríani eska imeeri Uájpa intsïnhapiringa ‘Dabidiiri juramukua’ ka eska reiipiringa. Ísï jimbo, jamberiksï José ka María eratsentani pakarapti enga Jesúsi Dabidiiri iretarhu andajpenupka (Luk. 1:32, 33; 2:11, 17). Jamberiksï eratsepti eska sánderu sésiipiringa Beléni pakarani ka erokuarhini astaka Tata Diosï arhiapiringa ambe úni.

Jiájkani, jamberiksï ióni pakarapti Beléni. Nóchi míteska náksï xáni ióni páxapia jima irekani jiáni engaksï astrologuecha nípka exeni Jesúsini, joperu ima nóteru charhaku máesptia sino tataka sapichu ma ka jatsikuarhesptiksïa kʼumanchikua ma (Mat. 2:11). Jimajkani, enbesi deksï Nasareti kʼuanhatsentani, Belénksï pakaraspti irekani.

Erodesi “uándikutarkuarhiaspti iámindu sapirhatiichani asta sáno tsimani uéxurhini jatiriichani jamberi engaksï Beléni [...] japka” (Mat. 2:16). Jimboka ánjeli ma tʼuini aianguspkia Joséni ambe enga úkuarhipiringa, ima ka María Ejiptuksï niraspti sïpakuarhini Jesúsi jingoni ka jimaksï pakaraspti astaka Erodesi uarhipiringa. Tátsekuaksï Nasareti niraspti. ¿Andiksïsï nóteru Beléni kʼuanhatsentapia? Jimboka jima juramuxapka Arkelau, Erodesiiri uájpa ma enga kánikua no sési kámpienga ka ánjeli ma arhispti Joséni eskaksï jini úpiringa no sési ambe úkuarhinchani. Jesúsi úpirindi sési jarhani Nasareti ka úpirindi sési tʼarhexeni para marhuakuni Tata Diosïni (Mat. 2:19-22; 13:55; Luk. 2:39, 52).

Peeka José uarhipka ante de Jesúsi íntspini imeeri tsípikuani ka úni eskaksï máru kʼuiripuecha uaaka auandarhu nirani irekani. Enga ísïika, José ixú Echerirhu tsíntaati ka uánikuechaksï uaati míteni imani ka jiánksï uaati kurhamarhini andiksïsï Beléni pakarapi enga Jesúsi na andajpenupkia.