Tata Diosï Jeobaeri uinhapikuarinisï jarhuatajti úni ambe engani ji jandiajku no újka úni

FINLANDIA JIÁNI ENGANI TUMBIIPKA

Andajpenuspka 1955 jimbo, ka ji sánderu sapichueska juchiiti ermanuechani jingoni. Finlandia tʼarhexepka surisï marirhu uanamukuteni, imani lugari jimbo enga ísï mítekateeka komueska Vantaa.

Máru uéxurhiniichani ante de ji andajpenuni, juchiiti naandi itsï atakuarhispti komu Jeobaeri testigu. Joperu, juchiiti taati no uékasïreendi míteni jurhimbikueri ambe ka no jiárhitaspti juchiiti naandini parajtsïni jorhendani Biblieri ambe ni parajtsïni paani tánguarhikuecharhu. Ísï jimbo, enga taati no jarheenga, juchiiti naandijtsïni jorhendasïreendi Tata Diosï Jeobaeri ambe.

Desde engani sapiipka uandaspka eskani marhuakupiringa Tata Diosï Jeobani. Pori ejemplu, engani siete uéxurhini jatiriipka, juchiiti maestra kánikua ikiaspti jimbokani no uékaspka arhani verilättyjä (Finlandia anapu kurhinda sapichu ma enga iurhiri jukeenga). Máechakua jájki jimborini jupimukuspti parani arhatani ka máteru jájki jimbo tenedorini jupikaspti parareni afuersa íntskuni. Uájkuspka ka ima uéjkuspti tenedorini.

Engani 12 uéxurhini jatiripka, juchiiti taati uarhispti, tátsekua, úspka nirani tánguarhikuecharhu. Erachiichaksï kánikua uandanhiaspti jíndeni jimbo, inde amberini jarhuataspti parakani jánguarhintapiringa marhuakuni Tata Diosï Jeobani. Uénaspka pauani pauani arhintani Bibliani ka sánderu sési jorhenguarhiani juchaari publikasionichani. Engani ísï jorhenguarhienga jarhuatastirini parakani niárapiringa itsï atakuarhini jiáni engani 14 jatiripkia, 8 de agostuni de 1969 jimbo.

Engani nóteru nireengia eskuela, prekursori regulari úkuarhispka. Máru semanecha tátsekua Pielavesi mótsipka, ireta sapichu ma jimbo enga Finlandia terujkanisï japka, parani jarhuajpeni ainhpini.

Engani Pielavesi japkia, jima mítespka Sirkkani, enga juchiiti uarhiitipiringa. Ambe engani tsitipka Sirkkaeri ambe jindeespti eska ima kánikua kaxumbitiispka ka eska jánguarhintasïreenga para sési marhuakuni Tata Diosï Jeobani. Ka no uékasïreendi uánikua ambe jatsikuarheni o sési irekuarhini. Tsimarhanchi uékasïreengachi sánderu sési marhuakuni Tata Diosï Jeobani ka uandaspkachi eskachi úpiringa ambe uéjki engachi arhinhapiringa. Tembuperaspkachi 23 de marsu de 1974 jimbo. Nóchi niraspka luna de miel, sánderu sési, Karttulachi niraspka marhuani, nani engaksï uétarhini japka Jeobaeri testiguecha para aianhpini.

TATA DIOSÏ JEOBAJTSÏNI KUÁJCHAKUSPTI

Desde engachi tembuperapka, Tata Diosï Jeobajtsïni xarhatachesti eskajtsïni íntskupiringa ambe engachi xáni uétarhincheenga, joperu engachi orheta peerapiringa imeeri Reinueri ambe (Mat. 6:33). Pori ejemplu, engachi Karttula japka, nóchi kámasïreenga karruni. Ueenani jámani bisikleta jimbochi jámasïreenga. Joperu jiáni enga xáni tsʼirakuarhienga nóteruchi úsïreengia bisikleta jimbo jámani. Ístu, parachi aianhpini iámindu imani lugarichani jimbo enga kúnguarhikua aianhpienga uétarhinchasïreengachi karruni ma, joperuchi no jatsispka sentabu para piáni.

Ma jurhiani, juchiiti ermanujtsïni pʼorhembispti ka arhisptijtsïni eskachi úpiringa pakatakuarhini imeeri karruni. Nóchi ambe ma maiampispka, ni sikiera segurueri. Nomasichi gasolinajkusï jatsirantani jarheenga.

Tata Diosï Jeobajtsïni sési xarhatachesptia eskajtsïni íntskupiringa ambe engachi xáni uétarhincheenga. Ambe engachi solu jatsipiringa para úni jindeespti orheta peerani Tata Diosïiri Reinuni.

GALAADIIRI JORHENTPERAKUA

Engachi Jorhentperakuarhu para Prekursoriicha jimbo japka, 1978 jimbo, erachi Raimo Kuokkanen,a enga jorhentpini japka, arhisptijtsïni eskachi uininharhitapiringa solisitudini para Galaadiiri Jorhentperakueri nirani. Ísï jimbo uéraspkachi jorhenguarhini inglesi, ambe enga uétarhijka para úni nirani. Joperuchi no uininharhitaspka solisitudini jimbokajtsïni 1980 jimbo pʼímarhispka parachi Finlandia anapu Betelirhu nirani marhuani. Joperuksï betelitecha no úsïreendi uininharhitani solisitudini para Galaadi nirani. Ísïisti, juchachi uékasïreenga marhuakuni Tata Diosï Jeobani nani engajtsïni ima arhipiringa, no nani enga jucha uékapiringa. Ísï jimbo, niraspkachi Beteli. Joperuchi seguirispka jorhenguarhini inglesi para jiáni engachi ma repentku úpiringa uininharhitantani solisitudi para Galaadi nirani.

Máru uéxurhini ísï tátsekua, Grupu enga Orhejtsïkuajka iámindu kúnguarhikuechani uandaspti eskaksï Betelitecha úpiringuia Galaadiiri Jorhentperakuarhu nirani. Ísï jimbo, jirejiresïchi uininharhitaspka juchaari solisitudini ka axaspkachi. Nájkirukachi sési marhuani japka Beteli, uékasïreengachi nirani marhuani jima enga sánderu uétarhipiringa ka engachi juchajtu úpiringa ísï úni. Pʼímarhinhaspkachi nirani klase 79 Galaadiiri Jorhentperakuarhu ka septiembrini 1985 jimbochi uéntaspka. Ka Colombiachi axanhaspka, ¿nájtsï exesïni?

NANI ENGACHI ORHETA AXANHAPKA KOMU MISIONERUECHA

Engachi niárapkia Colombia, Betelichi axanhaspka. Jánguarhintaspka kánikua sési úni juchiiti ánchikuarhitani, joperu ma uéxurhini jimbo eratsepka eskachi uétarhinchasïreenga mójtakuni ambe ma. Jiánkusïni kurhajkuarhipka eskajtsïni móskupiringa. Ísï jimbo axanhaspkachi Neiva enga Huila jaka parachi marhuani komu misioneruecha.

Méntkisï kánikua tsípispka aianhpini. Engani tumbiipka ka Finlandia jarhani, prekursoriispka, ménichani xarhentkuni uékasïreenga aianhpini ka asta chúrikua jamberi. Ka engachi apenasi tembuchapka, Sirkka ka ji chúskutasïreengachi aianhpini. Jiáni engachi iauanisï nireenga aianhpini, ménichanchi karrurhu kʼuísïreenga parachi no tiempu tsïtani ka ísïchi úsïreenga pauandikua xarhentku ueenani aianhpini.

Ménderu kʼumanchikuecharhu jámani aianhpini úspti eskachi kánikua sési p’ikuarherapiringa ísï eska antesi. Imani kúnguarhikuarhu engachi marhuani japka, sánderuksï uániixaptia. Colombia anapu erachiichaksï kánikua uékpitiisti, kánikuaksï janhanharpisïndi ka kánikuaksï sési kámpisïndi.

NA ENGA XÁNI JUKAPARHAKUEKA KÓMARHIKUA

Neiva no iauani, jarhasptiksï máru ireta sapirhatiicha nani enga no ma Testigu irekapka. Joperu no seguruespti jimeesïsï jámani ka sánderia para imeecha engaksï no jimeesïsï anapuepka, jimboka kánikua uarhiperata ambe jarhaspka. Méntkisï eratseni jarhasïreenga, nénaksï uaa míteni ambakiti aianhperakuani jimeesïsï anapuecha. Ueenaspka kurhakuni Tata Diosï Jeobani eska Jeobaeri testigu úkuarhipiringa nema enga imani ireteecharhu anapuepiringa, joperu Neiva irekani jarhani. Ístuni kurhakuspka eska, enga na itsï atakuarhipiringia, ima erachi jánhaskatiipiringa para sési marhuakuni ka eska níntapiringa nani enga anapuepka paraka jámapiringa aianhpini. Eratsesïreenga eska inde ambesï uétarhini japka, joperu Tata Diosï Jeoba sánderu ambakiti ambe eratsetixapti úni.

Sánisï tátsekua, ueenaspka Biblieri ambe jorhendani acheetini ma enga Fernando González arhinheenga, ima Algeciras anapuespti, imani ireta ma jimbo enga no ma Testigu irekapka. Ima mándani semana Neiva nirasïreendi ánchikuarhini enga ma 50 kilometrisï (30 miia) iauani japka imeo uératini. T’uini arhintasïreendia ambe engachi jorhenguarhipiringa ka desde enga ueenapka jorhenguarhini jirejiresï ueenaspti nirani tánguarhikuecharhu. Ka ístu desde primeru semana enga ueenapka jorhenguarhini, taantaspti máru kʼuiripuechani engaksï imeeri iretarhu anapuepka para aianguani ambe enga jorhenguarhini japka.

Enga apenasi seisi mesi páni japkia jorhenguarhini Biblieri ambe, Fernandu itsï atakuarhispti 1990 jimbo, ka jirejiresï prekursori regulari úkuarhispti. Iásï koru Algecirasi Jeobaeri testigu ma jarhasptia, ka sukursali úspti axaani prekursori espesialiichani imani lugari jimbo. Ka febreruni 1992 jimbo, jarhasptia kúnguarhikua ma.

Joperu Fernandu no Algecirasi pakaraspti para aianhpini. Enga na tembuchapkia, imeeri témba, Olga jingonksï mótsispti San Vicente del Caguán, ireta ma jimbo enga no ma Testigu japka. Jimajtuksï jarhuajpespti paraka kúnguarhikua ma japiringa. Ka 2002 jimbo, Fernandu sirkuitueri orhejtsïkuti únhaspti ka ísï marhuaxati asta iásï jamberi.

Engani ísï kómarhipka Tata Diosï Jeobani, jorhendastireni na enga xáni jukaparhakueka meru imani ambe kurhakuni Tata Diosïni ambe engachi uétarhinchajka parachi sési úni imeeri ánchikuarhitani. Jimboka ima uaati úni ambe engachi jucha no újka úni. Jimboka ima jindeeska pʼikuntskueri Dueniu (Mat. 9:38).

TATA DIOSÏ JEOBAJTSÏNISÏ JARHUATAJTI “PARACHI UÉKANI ÚNI AMBE MA KA ÍNTSKUSÏNDIJTSÏNI UINHAPIKUA PARACHI ÍSÏ ÚNI”

Uéxurhini 1990 jimbo, sirkuitueri orhejtsïkuti únhaspka, ka nani engachi orheta nípka pʼorhembini jindeespti k’éri ireta Bogotá. Sirkka ka ji ísïispkachi eska na uéjki kʼuiripu ma, nóchi k’éri ambe jorhendaspka úni. Ístuchi no pʼindespka k’éri ireta ma jimbo irekani. Jimbochisï chéenga. Joperu Tata Diosï Jeoba úspti ambe enga Filipusï 2:13: arhijka: “Jimboka Tata Diosïksïnisï uinhaperantajti parajtsï chá úni jaiapanherantani, jimbokaksïni imasï jarhuatajti parajtsï chá uékani úni ambe ma ka ístuksïni íntskusïndi uinhapikua parajtsï ísï úni.”

Ísï tátsekuajtsïni Medellín móskuspti, kʼéri ireta engani ueenakuarhu uandaka. Jini, kʼuiripuechaksï pʼindesptia exeni na engaksï xáni no sési kámberanheenga ka nóteruksï chésïreendia. Pori ejemplu, ma xanhari engani Biblieri ambe jorhendani japka kʼuiripuni ma, ueenaspti kurhakuarhini na engaksï pistoleechani chararaani japka, kʼuiripuechaksï uarhiperaxapti xanharu jimbo. Ji uékaxapkia kétsekua kʼuanikuarhini, joperu ima kʼuiripu enga Biblieri ambe jorhenguarhini japka seguirispti arhintani, ísï enajki no ma ambe úkuarhini japka. Enga na kʼamarapkia arhintani, arhisptirini: “Erontarini sáni”. Ísï ma ratu jimbo, junguaspti tsimani sapiicha jingoni ka arhisptirini no sáni chéparini: “Tekaachintarini sáni, juchiiti sapiichani niraspka pʼiuantani”.

Joperu no jiántkuchisï ísï nitamakuarhipka. Maxanhari engachi kʼumanchikuecharhu aianhpini jámani japka, juchiiti uarhiiti uiriipasptirini andarhierani, xáni chéxapti enga iámu tsïpambepkia. Ka arhisptirini eska nema pistola jingoni kʼuaniraxapka ka kánikua chéspka engareni aiangupka. Joperu tátsekuachi kuenta íntskukuarhespka eska no juchiiti uarhiitinisï uékeenga atani, sino acheetini ma enga jimeesïsï nitamani japka.

Tiempu jingoni, pʼindespkachia indeni jásï ambe exeni. Ískuchi pakarasïreenga exeni na engaksï erachiicha xáni tekaanteenga ka nóksï sáni chéni engaksï indeni ambe nitamakuarhienga o sánderu no sési jásï ambe. Eratsentaspkachi enga Tata Diosï Jeoba jarhuatajka, juchantsïntujtsïni jarhuataati. Méntkisïchi úsïreenga ambe engajtsïni kúnguarhikuarhu anapu orhejtsïkutiicha arhienga, jingontkuchi jámasïreenga, joperu máteru ambechi Tata Diosï Jeobani jurajkukusïreengia.

Ka ménisï no xáni no sési ambe úkuarhisïreendi eskachi jucha na eratseenga. Pori ejemplu, ma xanhari engani nípka jorhendani uarhiitini ma imeeri kʼumanchikuarhu, xanharu ísï kurhaakuarhixapti enajkiksï tsimani uarhiitiicha kánikua no sési arhijperani japi. Ji no uékasïreenga exeni, joperu kʼumanchikuarhu anapu uarhiitirini arhispti eskani exepiringa. Ka tsimani perikuesptiksï engaksï meru ísï uandani japka eskaksï besinu jémbeecha na uandani japka.

JIMBANHI ÁNCHIKUARHITA KA AMBE ENGACHI ÚKUA JUKANCHAPKA

Uéxurhini 1997 jimbo, arhisptijtsïni eskani jorhentpepiringa Jorhentperakuarhu de Entrenamiento Ministerial.b Méntkisïsï tsitispka nirani eskuelecharhu parani sánderu ambe jorhenguarhini Biblieri ambe. Joperu no méni eratsespka eskani ménisï ji jorhentpepiringa jima.

Ístu niáraspka jindeeni Distritueri orhejtsïkuti, joperu engaksï niárapka nóteru jarhania Distritueri orhejtsïkutiicha, ménderu sirkuitueri orhejtsïkutiispkia. Jukari 30 uéxurhini paxakaia, jorhentpini eskuelecharhu ka komu sirkuitueri orhejtsïkuti. Ini ambe úparini, niáraspka uánikua kóntperateechani jatsiani. Joperu no méntkisï fásiliispti. ¿Andisïni ísï uandajki?

Ji úkua jukanchasïnga ménisï pʼíngukuarhini ka no sáni chéni, ka inde amberini jarhuataspti orhepani uérani máru ambe jingoni. Joperu ístu ménisï uinhamarhitspesïreenga engani uékeenga eska sési úkuarhipiringa ambe ma kúnguarhikuarhu. Pori ejemplu, ménichani kʼérkuni arhiasïreenga erachiichani eskaksï jatsiska para uékpini ka kurhangutspini. Joperu engani ísï arhiani jarheenga, jiánisïni exekuarhienga eskani jísïni jatsipka para indeni kualidadiichani xarhataani (Rom. 7:​21-23).

Ménichani no sési pʼikuarherasïreenga imani ambe jimbo engani no újka sési úni (Rom. 7:24). Ma xanhari xáni no sési pʼikuarheraxapka engani kómarhikua ma jimbo arhipka Tata Diosï Jeobani eska sánderu sési japiringa engani nóteru misioneruepiringia ka kʼuanhatsentani Finlandia. Joperu ima jurhiatikua tánguarhikuarhu kurhaaspka ambe ma engari jarhuatapka jima jarhani ka sési úni juchiiti ánchikuarhita ka seguiriini mójtakurhini. No mirikurhiaka na engareni Tata Diosï Jeoba mókuchintapka juchiiti kómarhikua. Ístu kánikua agradesidu jarhaska jimbokarini uékperakua jingoni jarhuataska sánderu ambakiti kʼuiripueni.

NOCHI CHESÏNGA IMANI AMBE JIMBO ENGA SÁNDERU ORHEPATINI UKUARHIAKA

Sirkka ka ji kánikuachi agradeserikusïnga Tata Diosï Jeobani engajtsïni sésikua íntskuka parachi tiempu kompletueri marhuani, ka jimbokarini juchiiti uarhiti kánikua xénchasïnga ka jarhuatani ini uéxurhiniichani jimbo.

Nóteru ióndani, 70 uéxurhini jatiriuakia. Ísï jimbo, nóteruni jorhentpiakia eskuelecharhu ka nóteru jindeuakia sirkuitueri orhejtsïkuti. Joperuni no kómu pʼikuarherasïnga. ¿Andi? Jimbokani seguru jarhaska eska no uétarhisïnga kʼéri ánchikuarhita ma jatsini Jeobaeri kúnguarhikuarhu ka ni jukari mítekateeni para kʼéri ambe arhini Tata Diosï Jeobani. Ambe enga sánderu jukaparhakueka, jindeesti kaxumbikua jingoni marhuakuani ka mintsita jingoni kʼéri ambe arhini Tata Diosïni ka kánikua agradesidueni (Miq. 6:8; Mar. 12:​32-34).

Kánikua sési pʼikuarherasïnga, jimbokani tsitiaska imani asignasioniichani engani niáraka jatsiani. Ka exeska eskarini Tata Diosï no íntskuspka indeni ambe jimbokani ji sési úsïnga ambe ma o jimbokani sánderu ambakiti kʼuiripueska eska máteruecha. Sánderu sési, jindeesti jimbokarini Tata Diosï Jeobasï kóndentaka nájkirukani no perfektueka. Engareni ima no jarhuatapiringa, ji no méni úpiringa úni indeni asignasioniichani. Jo, Tata Diosï Jeobaeri uinhapikuarinisï jarhuatajti úni ambe engani ji jandiajku no újka úni (2 Kor. 12:9).