SEMANA 38
PIREKUA 25 Jeobaeri erakukateecha
¿Chá jingontku kurhaaxaki ambe engajtsïni Jesúsi arhini jaka?
“Máechakua pánhaati ka máteru jurajkunhaati” (MAT. 24:40).
AMBE ENGACHI JORHENGUARHIAKA
Exeakachi ambe engajtsïni jorhendajka tanimu ejempluecha enga Jesúsi uandaapka para ima jurhiatikua engaksï kʼuiripuecha jusgarinhaaka jiáni enga kʼamajkunhaaka i parhakpini anapu ambe.
1. ¿Ambe uaa Jesúsi no ióni jimbo?
IMANI tiempu jimbochi irekaxaka enga no ióni jimbo parhakpinirhu mámaru ambe mójtakukuarhiaka. No ióni jimbo, Jesúsi iámindu kʼuiripuechani jusgariuauati. ¿Nénachi míteski eska janoxakaia inde tiempu? Jimboka Jesúsi profesia ma aianguaspka imeeri chúxapatiichani enga jarhuataapiringa exeni eska ima ixú japiringia ka “eska nóteru ióni kuerataxakaia para kʼamajkunhani parhakpini” (Mat. 24:3). Uaakachi arhintani ini profesiani Mateu kapitulu 24 ka 25 jimbo, Markusï kapitulu 13 ka Lukasï kapitulu 21 jimbo.
2. ¿Ambechi exea ini jorhenguarhikua jimbo?
2 Jesúsi uandaaspti tanimu ejempluechani: karichi ka chibuecheri, 10 uátsïicheeri ka talentuecheeri parajtsïni jarhuatani listu jarhani ka exerani ambechi jatsiski para úni ka ambe nómbe. Mándani ejemplujtsïni jorhendaati ambe enga exeaka Jesúsi kʼuiripuecheri jiáni enga jusgariuauaka. Ju je exeani ka ístu ambe engajtsïni jorhendajka. Ueenakachi primeru jingoni.
KARICHIICHA KA CHIBUECHA
3. ¿Káni jusgariuaua Jesúsi kʼuiripuechani?
3 Jesúsi jorhentpispti eska jiáni enga niáraakia ima tiempu para mándani kʼuiripuni jusgarini, exeati sinksï jiókuarhispi ambakiti aianhperakuani ka sinksï apoiariuaspi imeeri ermanu jémbeechani engaksï erakukateeka (Mat. 25:31-46). ¿Káni uandaa Jesúsi sini ma kʼuiripu ísïiski eska karichi o chibu ma? Imani tiempu jimbo enga ‘kánikua no sési nitamakuarhinhaaka’ sánititu ante de ueenani Armajedoni (Mat. 24:21). Ísï eska karichi eranguti ma na támu peeraajka karichiichani ka chibuechani, Jesúsijtu támu peerauati imeechani engaksï apoiariuajka erakukateechani ka támu peerauati imeechani engaksï no ísï újka.
4. Eska na arhijka Isaías 11:3, 4, ¿andichisï uaa seguru jarhani eska Jesúsi sési jusgarpiaka? (Ístu exea je imajeniichani engaksï ueenakuarhu jaka rebistarhu).
4 Jeoba, Jesúsini erakusti para jusgarpini. Ka Bibliajtsïni aiangusïndi eska Jesúsi sési jusgarpiaka (arhinta je Isaías 11:3, 4). Ima exesïndi ambe enga eratsejka kʼuiripu ma, ambe enga uandajka ka ambe enga újka ka asta na engaksï kaajka imeeri ermanu jémbeechani engaksï erakukateeka (Mat. 12:36, 37; 25:40). Exeati né apoiariuaspi erakukateechani ka ístu imani ánchikuarhitani engaksï iicha úpka.a Ka nani enga uétarhijka sánderu apoiariuani jindeesti Tata Diosïiri ambe uandantani. Imeecha engaksï apoiariuapka erakukateechani, ísïksï exekateuati komueska kʼuiripuecha engaksï sési jámajka ka uaatiksï irekani Echerirhu para méntkisï (Mat. 25:46; Apok. 7:16, 17). ¡Sési jásï kóntperataksï ma intsïnhaati imeecha engaksï méntkisï sési marhuakuka Tata Diosïni! Engaksï no méni jurajkuska jiáni enga no sési nitamakuarhinhaaka ka nijtu ísï tátsekua, imeeri nombriichaksï karakata pakaraati “nani enga karanhani jaka néksï intsïnhaa tsípikua” (Apok. 20:15).
No ióni jimbo, Jesúsi jusgariuati mándani kʼuiripuni para exeni sini ísï jámasïni komueska karichi ma o komueska chibu ma. (Exe je párrafu 4).
5. ¿Ambejtsïni jorhendasïni karichiicheeri ka chibuecheri ejemplu ka neechaksï jatsiski para sánderumindu jingontku kurhaani?
5 Xarhata je eskajtsï kurhandirasïnga ka eskajtsï mintsinharhikueska. Ejemplu enga karichiicheeri ka chibuecheri uandajka sánderumindu jindeesti para imeecha engaksï erokuarhini jaka Echerirhu irekani para méntkisï. Iichaksï xarhatasïndi eskaksï kurhandirasïnga ka eskaksï mintsinharhikueska engaksï apoiariuajka Kristueri ermanuechani aianhpikuarhu, joperu ístu engaksï újka eskaksï na arhiauaka ima namunitu erachiicha enga Jesúsi erakuaka (Mat. 24:45). Joperu ístu imeecha engaksï auandarhu niuaka irekani jatsistiksï para jingontku exeni ini ejempluni. ¿Andi? Jimboka Jesúsi imeechantu exeaxaka ambe engaksï újka, ambe engaksï eratsejka ka ambe engaksï uandajka. Imeechajtuksï jatsisti para xarhatani eskaksï kurhandirasïnga. Jiájkani ju je exeani máteru tsimani ejempluechani engachi ístu uaaka arhiantani Mateu kapitulu 25 jimbo, ini kapitulu jimbo jarhastiksï ambarhati konsejuecha para erakukateecha. Jiáni ju je exeni 10 uátsïicheeri ejempluni.
DIESI UÁTSÏICHA
6. ¿Nénaksï xarhataspti sinko uátsïicha eskaksï jánhaskatiispka? (Mateu 25:6-10).
6 Ini ejempluni jimbo Jesúsi uandaspti eskaksï 10 uátsïicha niraspka nobiuni erokani (Mat. 25:1-4). Iámindu imeechaksï uékasïreendi inchani nobiu jingoni tembuchakuarhu. Jesúsi uandaspti eskaksï sinko “jánhaskatiispka” ka máteru sinko nómbe. Uátsïicha engaksï jánhaskatiipka preparadaksï jarhaspti ka jingontku, eratsetixaptiksï erokani nobiuni na uéjki xáni chúrikua janoni. Ísï jimbo, paasptiksï lámparechani aseiti jingoni paraksï erajkutarani. Joperu ístuksï paaspti sánderu aseiti jatakuecha jimbo jimbokaksï eratsespka eska jamberi nobiu ióndapiringa janoni. Ka indeni ambe úparini nóksï jurajkuspti eskaksï lámparecha patakuarhipiringa (arhinta je Mateu 25:6-10). Enga nobiu na janopkia, sinko uátsï jánhaskatiichaksï imani jingoni inchaspti tembuchakuarhu. Májkueniuati kristianu erakukateecha jingoni engaksï xarhataska eskaksï kurhandiraska ka jingontkuksï jarhani astaka juuaka nobiu enga jindeeka Jesúsi, ka inchaatiksï Jesúsi jingoni auandarhu anapu Reinurhu (Apok. 7:1-3).b ¿Ka ambeksï úkuarhinchaa máteru sinko uátsïicha engaksï no jánhaskatiika?
7. ¿Ambeksï úkuarhinchaspi ima uátsïicha engaksï no jánhaskatiipka?
7 Íksï máteru sinko uátsïicha engaksï no jánhaskatiipka, nóksï listu jarhaspti enga nobiu janopka. I ejemplu uandasïndi eskaksï uátsïicha kurhaaspka eska nobiu janoxamengia ka exesptiksï eskaksï lámparecha patakuarhixapkia, joperu nóksï kámaxapti sánderu aseiti jimboksïsï nípti piántani para uiniraantani. Enga nobiu na janopkia, imeechaksï nótki junguaxapti. Jiájkani “uátsïicha engaksï listu japka, imani jingonksï inchaspti tembuchakuarhu ka puerta míkuarhespti” (Mat. 25:10). Tátsekua ima uátsïicha engaksï no jánhaskatiipka, junguasptiksï ka uékasïreendiksï inchani joperu nobiu arhiaspti: “Jíksïni sési jimbo arhisïnga eskaksïni no míteska” (Mat. 25:11, 12). Jo, inde uátsïichaksï no listu jarhaspti paraksï erokani nobiuni na uéjki jandora janoni. ¿Ambeksï uaa jorhenguarhini ini ejemplu jingoni imeecha engaksï erakukateeka?
8, 9. ¿Ambe jorhendaasïni erakukateechani 10 uátsïicheeri ejemplu? (Ístu exea je imajeniichani).
8 Xarhata je eskajtsï preparadu jarhaska ka jingontku. Ixú, Jesúsi no uandaxapti eskaksï erakukateecha tsimani grupuepiringa: ma enga preparadu japiringa para jiáni enga kʼamajkunhaaka parhakpini anapu ambe ka máteru grupu enga no preparadu japiringa. Sánderu sési, arhiaxapti erakukateechani eskaksï no intsïnhapiringa kóntperatani engaksï no preparadu japiringa para tekaantani asta kʼamarhukuni jamberi (Juanu 14:3, 4). Jimbosï xáni jukaparhakueti jingontku jarhani. Iáminduechachi jatsiska para jingontku kurhandini indeni konsejuni engachi 10 uátsïicheeri ejemplurhu exentajka, ia sea engachi Echerirhu pakaraaka o auandarhu nirani. Jatsiskachi para méntkisï jingontku jarhani ka preparadu parachi úni tekaantani astaka kʼamajkunhaaka parhakpini anapu ambe (Mat. 24:13).
9 Eskachi na exekia, enga Jesúsi uandantapka 10 uátsïicheeri ejempluni, xarhataspti na enga xáni jukaparhakueka méntkisï preparadu jarhani ka jingontku. Ka enga na uandantapkia ini ejempluni, jimintku talentuecheeri ejempluni uandantaspti, ka ini jingoni xarhataspti eska jukaparhakueska ánchikuarhirini.
Uétarhisïndi eskachi iáminduecha exeaka ambe engachi jorhenguarhijka 10 uátsïicheeri ejemplu jingoni ka eskachi preparadu jauaka, listu ka jingontku parachi úni tekaantani astaka kʼamajkunhaaka parhakpini anapu ambe. (Exea je párrafuechani 8 ka 9).
TALENTUECHA
10. ¿Nénaksï xarhataspi tsimani jántspiriicha eskaksï mintsinharhikuespka? (Mateu 25:19-23).
10 Ini ejemplurhu, Jesúsi uandaaspti tsimani jántspiriichani engaksï kurhajchapka imeeri patronini, ka jarhaspti máteru jántspiri enga no kurhajchapka (Mat. 25:14-18). Ante de patroni iauanisï nirani, íntskuaspti imeeri jántspiriichani máru talentuechani o kánikua sentabu. Tsimani jántspiriichaksï kurhajchaspti patroni jémbani jimbokaksï jánguarhintaspka ánchitani imani sentabuni paraksï andakua jingoni íntskuntani. Ka enga patroni na junguapkia, imeechaksï dobli íntskuntaspti. Jiájkani, patroni sési arhiaspti ka mándani jántspirini arhispti: “Ju ka tsípikuarhi chiiti tata jingoni” (arhinta je Mateu 25:19-23). ¿Ka ambe úspi máteru jántspiri imani sentabu jingoni enga patroni jémba íntskupka?
11. ¿Ambe úkuarhinchaspi jántspiri enga xépitiipka ka andi?
11 Patroni íntskuspti ma talentu máteru jántspirini paraka ístu andakua jingoni íntskuntapiringa, joperu i jántspiri xépitiispti, niraspti jarhakuni ka jima jískaspti achamasïiri sentabuni. Enga patroni kʼuanhatsentapka, jántspiri nomasi íntskuntaspti sentabu ka enbesi de arhini eska no úspka ánchitani, nánderkueni jámaspti ka arhispti imeeri patronini eska ima uinhamarhitspisïreesïnga, jimbosï patroni xukapti, euantaspti talentuni ka chúntani (Mat. 25:24, 26-30).
12. ¿Neechani arhikuekaasïni inde tsimani jántspiriicha engaksï kurhandirapka?
12 Ima primeru jántspiriicha engaksï sési ánchikuarhipka, kristianu erakukateechani arhikuekaasïndi engaksï kurhandirajka. Ka Jesúsi, enga patroniika, ini ambe arhiasïndi mándani imeechani: “Ju ka tsípikuarhi chiiti tata jingoni”, ka i ambe arhikuekasïndi eskaksï imeecha intsïnhasïngia auandarhu anapu kóntperatani enga jindeeka orheta tsíntani (Mat. 25:21, 23; Apok. 20:5a). Ístu, erakukateechaksï jorhenguarhisïndi eskaksï no jatsiska para ísï jámani eska ima jántspiri xépiti. Ju je exeni andi.
13, 14. ¿Ambe jorhendaasïni erakukateechani talentuecheeri ejemplu? (Ístu exea je imajeniichani).
13 Xarhata je eskajtsï ánchikuarhiriiska. Jiáni enga Jesúsi talentuecheeri ejempluni uandantapka, no arhikuekaxapti eskaksï erakukateecha xépiti úkuarhipiringa, sánderu sési, konseju ma íntspixapti ísï eska na úpka 10 uátsïicheeri ejemplu jingoni. Jo, arhiaxapti ambe engaksï úkuarhinchapiringa engaksï nóteru mintsita jingoni marhuakupiringia Tata Diosïni, jo nóteruksï úpirindia imeecha jingoni jarhani engaksï ióarhinhaka ka engaksï erakunhaka ka nóteruksï úpirindia inchani auandarhu anapu Reinurhu (2 Ped. 1:10).
14 Diesi uátsïicheeri ka talentuecheeri ejemplu jingoni, Jesúsi sési xarhataxapti eskaksï iámindu erakukateecha jatsiska para preparadu jarhani, jingontku jarhani ka ánchikuarhiriini. Joperu Jesúsi no indeni ambejkusï arhiapti erakukateechani, útasteru imani ambe arhiaspti enga Mateu 24:40, 41 jimbo jaka. Ju je exeani indeni bersikuluechani.
Jesúsi uékasïndi eskaksï erakukateecha ánchikuarhiriuaka. (Exea je párrafuechani 13 ka 14).d
NÉ PÁNHAA
15, 16. Eska na arhijka Mateu 24:40, 41 ¿andisï jukaparhakue eskaksï erakukateecha jingontku jauaka?
15 Ante de Jesúsi uandaantani ini tanimu ejempluechani, uandaspti eskaksï erakukateecha mátirku jusgarinhapiringa, ka xarhatapirindi Tata Diosï neechani jaiapanheantasïni. Jesúsi tsimani achamasïichani uandaaspti engaksï juátarhisï ánchikuarhini japka, ka tsimani uarhiitiichani engaksï molinarhu urhuni japka. I acheetiichaksï májkueni ambe úni jarhasïndi ka ístu uarhiitiicha, joperu Jesúsi uandaspti: “Máechakua pánhaati ka máteru jurajkunhaati” (arhinta je Mateu 24:40, 41). Ka máteru bersikulu jimbo Jesúsi arhiaspti imeeri chúxapatiichani: “Méntkisï jingontku ja je, jimbokajtsï no míteska na jatini juua chaari Tata” (Mat. 24:42). Jiáni enga Jesúsi 10 uátsïicheeri ejempluni uandantapka, últimu sáno májkueni jásï ambe uandaspti (Mat. 25:13). Jo, ambe engaksï i tsimani bersikuluecha uandajka, terukuntasïndiksï. Ima enga sési jimbo erakukateeka ka enga méntkisï kurhandiraaka, pánhaati ka Jesúsi auandarhu anapu Reinurhu erokaati (Juanu 14:3).
16 Xarhata je eskajtsï jingontku jarhaska. Enga erakukata ma no jingontku jauaka para sési jarhani Tata Diosï Jeoba jingoni, no uaati erakukateechani jingoni jarhani (Mat. 24:31). Joperu ístu imeecha engaksï erokuarhini jaka irekani para méntkisï ixú Echerirhu, ístuksï jatsisti para jingontku kurhaani ambe enga Jesúsi uandapka, kurhandirani ka jingontku jarhani.
17. ¿Andichisï no jatsi para uandanhiani enga Tata Diosï Jeoba niáraska erakuani máru erachiichani paraksï auandarhu nirani?
17 Juchachi sési míteska Tata Diosï Jeobani, jimbochisï újka mintsikani eska méntkisï sési jarhasïnga ambe enga ima újka. Ísï jimbo, enga Tata Diosï Jeoba ini últimu jurhiatikuecha jimbo erakuaska máru erachiichani paraksï auandarhu nirani, nóchi jatsiska para uandanhiani.c Miántaakachi imani ejempluni enga Jesúsi uandapka achamasïiri enga ubasï jatsikupka. Ima, últimu ora arhiaspti máru kʼuiripuechani paraksï nirani imeeri echeri jimbo ánchikuarhini (Mat. 20:1-16). Imeecha engaksï sáni ióndakuarhu ueenapka ánchikuarhini májkuenksï maiamunhaspti eska imeecha engaksï orheta ueenapka. Ísï jimbo, no arhiparini na engaksï jatini erakunhaaka, iámindu ambakiti erakukateechaksï jatsiati indeni kóntperatani paraksï auandarhu nirani juramuni.
JINGONTKU EXEA JE KONSEJUECHANI
18, 19. ¿Náki konsejuechanchi exeaski ka ambechi jorhenguarhisïni?
18 Ini jorhenguarhikua jimbochi exeska karichiicheeri ka chibuecheri ejempluni; ka imeecha engaksï erokuarhini jaka irekani para méntkisï ixú Echerirhu, jorhenguarhistiksï eskaksï méntkisï kurhajchaaka ka no méni jurajkuni Tata Diosïni ni iásï ka nijtu jiáni enga kánikua no sési nitamakuarhinhaaka. Enga niáraakia inde jurhiatikua, Jesúsi exeati néksï kurhandiraski ka intsïnhaatiksï tsípikua para méntkisï (Mat. 25:46).
19 Ka ístuchi exeaska tsimani ejempluechani enga ambakiti ambe jorhendaajka erakukateechani. Diesi uátsïicheeri ejemplurhu exeskachi eskaksï sinko preparada jarhaspka ka jingontku. Xarhatasptiksï eskaksï jánhaskatiispka, ka erokuarhisptiksï astaka nobiu janopiringa na uéjki xáni ióndani. Ka jimbokaksï máteruecha no jánhaskatiispka ka nóksï lista jarhani, nobiu no jurajkuaspti paraksï tembuchakuarhu jarhani. ¿Ambechi jorhenguarhisïni? Eskachi jatsiska para listu jarhani ka erokuarhini na enga xáni uétarhiaka astaka Jesúsi kʼamajkuaka parhakpini anapu ambe. Ka talentuecheeri ejemplu jingoni, exeskachi eskaksï tsimani jántspiriicha ánchikuarhiriispka. Ka jimbokaksï kurhandiraspka ka jánguarhintanksï ánchitani imani sentabuni enga patroni jémba íntskuapka, ima jaiapanhiantaspti. Joperu imani jántspirini enga xépitiipka, chúntaspti. ¿Ambechi jorhenguarhisïni? Eskachi jatsiska para seguiriini marhuakuni Tata Diosï Jeobani astaka kʼamajkunhaaka parhakpini anapu ambe. Ka últimuchi exeska eska Jesúsi jorhentpiska eskaksï erakukateecha jatsiska para jingontku erokuarhini jarhani paraksï úni pánhani auandarhu anapu Reinurhu. Imeechaksï mintsita jingoni erokuarhixati eska niáraaka ima jurhiatikua engaksï auandarhu jauakia Jesúsi jingoni. Enga na nitamaakia inde guerra enga Armajedoni arhinhajka, erakukateechaksï niáraati jindeeni ima nobia enga Jesúsi jingoni uambuchaaka “Karichi sapichueri tembuchakuarhu” (2 Tes. 2:1; Apok. 19:9).
20. ¿Ambe uaa Tata Diosï Jeoba engachi kurhajchaska ambe engajtsïni ima arhiaka para úni?
20 Nóteru ióni kuerataxatiia enga Jesúsi jusgariuauaka kʼuiripuechani, joperuchi no jatsiska para chéni. Engachi jucha kurhandiraska, juchaari Taati auandarhu anapujtsïni íntskuati indeni “uinhapikuani enga no ma kʼuiripu újka jatsini” parakachi uaaka anhandetini jarhani “Achamasïiri Uájpani japarini” (2 Kor. 4:7; Luk. 21:36). Ísï jimbo, ia seachi erokuarhini jarhani para auandarhu nirani o Echerirhu irekani para méntkisï, ju je jingontku exeni ambe engajtsïni jorhendajka ima ejempluecha enga Jesúsi uandaapka, ka engachi ísï úska, juchaari Taatijtsïni jaiapanhintaati. Ka jimbokajtsïni ima xáni xénchasïnga, juchaari nombriichaksï karanhaati jima engaksï karanhani jaka néksï intsïnhaa tsípikua para méntkisï (Dan. 12:1; Apok. 3:5).
PIREKUA 26 “Jíndeni jimbori úska”
a Exe je artikuluni “¿Míteskichi néna jusgarpia Tata Diosï Jeoba?”, Aianhpiri maiu de 2024.
b Engajtsï uéjka sánderu ambe míteni, exe je artikuluni “¿Logrará usted mantenerse alerta?”, Aianhpiri 15 de marsu de 2015, utusï jimbo.
c Exe je rebistani Aianhpiri eneru de 2020 pájina 29 ka 30, párrafuecha 11 a 14.
d AMBE ENGAKSÏ XARHATAJKA IMAJENIICHA: Pirenchi ma enga erakukateeka, Biblieri ambe jorhendaxati uátsïni ma enga jiáni exentapka enga aianhpini jámani japka.