Ambechi uaa úni parachi niárani ambakiti amigu máeni
¿CHÁ nénisï niáraski jatsini uandanhiata ma ka ísïjtsï pʼikuarherani enajki no nema jaki paraksïni jarhuatani? Nájkirukachi úpiringa komu pʼikuarherani ka jandiajku jimbokachi “últimu jurhiatikuechani jimbo” irekaxaka, enga kánikua no sési jánhaskuarhini jaka ka enga kánikua úkua jukaka, no arhikuekasïndi eskajtsïni no nema uaaka jarhuatani (2 Tim. 3:1). Bibliajtsïni jorhendasïndi eskaksï jarhaska ambarhati amiguecha engajtsïni jarhuataaka “jiáni enga uandanhiata ambe jauaka” (Prov. 17:17).
NÉNAKSÏ JARHUAJPENI AMBAKITI AMIGUECHA
Nájkiruka apostoli Pablu kʼumanchikua ma jimbo onhakata japka, úspti seguiriini aianhpini jimbokaksï imeeri amiguecha jarhuataspka.
Apostoli Pablu ambarhati amiguechani jatsiaspti, imeechaksï niraspti pámbetani enga iauanisï nípka aianhpini ka ístuksï mámaru ambe jimbo jarhuataspti (Kol. 4:7-11). Ka jiáni enga onhakata japka Roma, imeeri amigu jémbeechaksï ánchperata ambe úkusïreendi. Pori ejemplu, Epafroditu íntskuntaspti Pabluni ambe engaksï Filipusï anapu erachiicha axakupka ka enga Pablu uétarhinchani japka (Filip. 4:18). Ka ístu, Tíkikuni arhispti paraka etsakuantapiringa kartechani iámu kúnguarhikuecharhu (Kol. 4:7).a Imeeri amiguecheeri jarhuajperata jimbo, Apostoli Pablu úspti úni imeeri ánchikuarhitani nájkiruka onhakata japka kʼumanchikua ma jimbo ka tátsekua kárselirhu. ¿Ka juchaia? ¿Nénachi uaa ambakiti amigu máeni?
Ini jurhiatikuecha jimbo, uánikua erachiichaksï uandantasïndi na engaksï xáni jukaparhakueka ambarhati amiguecha. Ju je exeni ambe enga nitamakuarhipka Elisabeti, prekursora regulari ma España anapu. Enga mítepka eska amamba kánseri pʼamenchaxapka ka eska nóteru úpiringuia ambakentani, pirenchi ma xarhatakuspti eska ambakiti amiga máespka, jimboka Elisabetini someni axakuasïreenga mensajichani ka Bibliarhu anapu tekstuechani. Ima uandantasïndi: “Mensajiichajtsïni kánikua jarhuataspti parani no jandiajku pʼikuarherani ka ístujtsïni uinhaperantaspti parani úni tekaantani pauani pauani” (Prov. 18:24).
Sánderuchi sési pájperaaka erachiicha jingoni, engachi jarhuajperaaka májku marhuakuni Tata Diosïni. Pori ejemplu, ¿úpirinchi paani tánguarhikuarhu o aianhpikuarhu imani erachini enga jatiriika? Indeni ambe úni, jarhuatatijtsïni parachi uinhaperperantani (Rom. 1:12). Joperuksï jarhasti máru erachiicha engaksï nóteru újkia uerani. ¿Ambechi úpirini úni parachi xarhatakuani eskachi ambakiti amigueska?
JU JE XARHATAKUANI IMEECHANI ENGAKSÏ NÓTERU ÚJKIA UERANI ESKACHI AMBAKITI AMIGUESKA
Jarhastiksï máru erachiicha engaksï no újka nirani tánguarhikuecharhu, pʼamenchakua ambe jimbo o máteru ambe jimbo. Komueska Dabidi enga kánseri pʼipka, imaksï jukari seisi mesi kimioterapia úkuspti. Ka imani tiempu jimbo, ima ka imeeri témba Lidia kʼumanchikuarhu uératinksï konektarikuarhisïreendi tánguarhikuecharhu.
¿Nénaksï jarhuataspi kúnguarhikuarhu anapu erachiicha? Enga na kʼamarhuenguia tánguarhikua, máru erachiichaksï uandontskuarhisïreendi Dabidi ka Lidia jingoni engaksï konektadu jarheenga. Ka engaksï komentariuenga, erachiichaksï mensajichani axakuasïreendi. ¿Néna jarhuataaspi i ambe? Dabidi ka Lidia pʼikuarherastiksï eskaksï erachiicha kánikua xénchasïreenga.
Arhuta je tiempu parajtsï aianhpini imani erachiicha jingoni engaksï nóteru újkia uérani kʼumanchikuarhu.
Engachi arhutaaka tiempu parachi imeechani jingoni aianhpini engaksï nóteru újkia uerani, xarhatakuanchi jauaka eska xénchaasïnga (Prov. 3:27). Úpiringachi imeecha jingoni karta jimbo ainhpini o telefonu jimbo. Ístu, orhejtsïkutiichaksï uaati úni eskaksï erachiicha konektarikuarhiaka para ima tánguarhikuecha engaksï jindeeka para uérani aianhpini. Dabidi ka Lidia kánikuaksï agradesidu pʼikuarheraspti indeni jimbo. Dabidi uandantasïndi: “Solu konektadu jarhani grupuni jingoni, ka kurhaani ambe enga jima uandanhapiringa ka ístu kómarhikuani, kánikuajtsïni uinhaperantasïreendi”. Ka engachi jorhendani jaka nemani Biblieri ambe, úpiringachi ima erachi o pirenchini jingoni páni enga no újka uerani aianhpini. Joperu jatsiskachi para orheta kurhamarhini erachi o pirenchi sini sési jauaka ísï úni.
Engachi imani erachiicha jingoni jarhajka engaksï no újka uerani aianhpini, niárasïngachi exeni na engaksï sési járhati kualidadiichani jatsiajka ka sánderuchi sési pájperasïnga imeecha jingoni. Pori ejemplu, engachi exeajka na engaksï úrajka Tata Diosïiri Karakatani paraksï mintsitarhu niárakuni nemani, sánderuchi jukaparharasïnga. Ka engachi jarhuataajka erachiichani niárasïngachi sánderu uánikua amiguechani jatsiani (2 Kor. 6:13).
Pablu kánikua sési pʼikuarheraspti enga Titu imani jingoni japka (2 Kor. 7:5-7). Inde ambejtsïni miátantasïndi eskachi juchajtu uaaka sési pʼikuastaantani juchaari amiguechani, no solu juchaari uandakuecha jingoni sino ístu engachi imeecha jingoni jauaka ka úni ambe ma imeecha jimbo (1 Juanu 3:18).
JU JE AMBAKITI AMIGUECHEENI JIÁNI ENGAKSÏ NO SÉSI KÁNHANI JAUAKA
Rusia anapu erachiicha ka pirenchiichaksï ambakiti ejemplu jimbokaksï jarhuajperasïnga. Ju je exeni ambe engaksï nitamakuarhipka Serguéi ka imeeri témba Tatiana. Polisia inchaakuspti imeecheeri kʼumanchikuarhu, paraksï exeni ambe engaksï jatsipka ka tátsekuaksï paaspti paraksï kurhamarhiani ambe. Tatiana orheta jurajkunhaspti ka níntaspti imeeri kʼumanchikuarhu. Serguéi uandantasïndi ambe enga úkuarhipka enga Tatiana niántapkia: “Jimajkisï niárasti pirenchi ma enga no sáni cheenga. Tátsekua, niárasptiksï máteru erachiicha ka jarhuatasptijtsïni sési peentani ambe”.
Serguéi ístu uandasïndi: “Kánikua tsitisïnga ambe enga uandajka Proverbios 17:17: ʻAmbakiti amigu ma méntkisï uékpisïndi, ka ermanu máesti enga andajpenuka para jiáni enga uandanhiata jauakaʼ. Ji sánderu sési kurhanguaskia ini uandakuechani iásï engani no sési kánhani jaka, ka míteska eskani no úpiringa jandiajku orhepani uérakuni ini uandanhiatani. Tata Diosï Jeobareni íntsaasti imani amiguechani engaksï no sáni chéjka ka engajtsïni no méni jandiajku jurajkuka”.b
Ini tiempu jimbo enga sánderu no sési jánhaskuarhini jaka, meruchi uétarhinchasïnga jatsiani amiguechani engajtsïni jarhuataaka. Ka sánderia ima jurhiatikua engaksï kʼuiripuecha kánikua no sési nitamakuarhiaka. Ísï jimbo, ju je jánguarhintani desde iásï ueenani ambakiti amigu máeni para máteruecha (1 Ped. 4:7, 8).
a Exe je rebista Aianhpiri 15 de juliu de 1998, pájina 8, útusï jimbo.
b Exe je pájinarhu jw.org jimbo artikuluni “Jehová me ha dado amigos valientes que no me han abandonado”.