SEMANA 9
PIREKUA 51 Juchachi aiakukuarheskia Tata Diosïni
Asï iónda je itsï atakuarhini
“¿Amberi erokuarhixaki? Ní, itsï atakuarhi” (ÚKU. 22:16).
AMBE ENGACHI JORHENGUARHIAKA
Exeani jauakachi máru ejempluechani komu Samaria anapuecheeri, Saulu Tarsu anapueri, Korneliueri ka Korintu anapuecheeri, i ejempluechaksïni jarhuataati parajtsï itsï atakuarhini.
1. ¿Andisï nema itsï atakuarhijki?
¿CHÁ xénchasïni Tata Diosï Jeobani engaksïni íntskuka tsípikua ka uánikua máteru ambe parajtsï tsípikuarhini? ¿Nénajtsï uaa xarhatakuni eskajtsï xénchasïnga? Aiakukuarheni ka itsï atakuarhini. Ka engajtsï ísï uaaka, niáraakajtsï Tata Diosï Jeobaeri familiarhu jarhani ka imeeri amigueni ka imaksïni kuidariuati jimbokajtsï imeeriuakia (Sal. 73:24; Is. 43:1, 2). Ístu, engajtsï niáraaka aiakukuarheni ka itsï atakuarhini, uaakajtsï irekani para méntkisï (1 Ped. 3: 21).
2. ¿Ambechi exeni jaua ini jorhenguarhikua jimbo?
2 ¿Jarhaski ambe ma engaksïni pʼínguni jaka parajtsï itsï atakuarhini? Enga ísïika, asï uandanhia je; nójtsï chájkueska. Uánikua kʼuiripuechaksï kánikua mójtakurhistia paraksï úni itsï atakuarhini, ka iásïksï tsípikua jingoni marhuakuxatia Tata Diosï Jeobani. Ini jorhenguarhikua jimbo exenchi jauaka máru kʼuiripuecheeri ambe engaksï primeru siglurhu itsï atakuarhipka. Ístu exeakachi náki tsʼéjkukuechanksï jatsiaspi ka ambe jarhuataaspi paraksï úni orhepani uérani. Ísï jimbo, nájkirukajtsï sapichku jaka o kʼériinia, jánguarhinta je exeni ambejtsï uaa jorhenguarhini imeecheeri ambe.
SAMARIA ANAPUECHAKSÏ ITSÏ ATAKUARHISPTI
3. ¿Ambe ka ambeksï jatsispi para mójtakuni máru Samaria anapuecha paraksï úni itsï atakuarhini?
3 Jiánisï enga Jesúsi Echerirhu jámani japka, relijioni ma jarhaspti engaksï arhinheenga samaritanuecha, i grupu jimeesïsï irekaspti enga Sikemi ka Samaria japka, Judea norteisï. Paraksï íicha úni itsï atakuarhini, jatsisptiksï para sési míteni Tata Diosïiri Karakatani enga imani jurhiatikuecha jimbo japka, jimbokaksï imeecha eratsesïreenga eska Tata Diosï solu Génesis a Deuteronomio jamberijkusï kararkuarhiapka ka jamberi Josuéri libruni. Joperu, imeechaksï sési mítespti Tata Diosïiri aiatsperakuani enga Deuteronomio 18:18, 19 jimbo jaka. Imeechaksï erokuarhixapti eska jupiringa Mesíasi (Juanu 4:25). Ísï jimbo, paraksï úni itsï atakuarhini, jatsisptiksï para jakajkuni eska Jesúsi jindeespka Mesíasi engaksï aiaminhapka, ‘ka uánikua Samaria anapuechaksï’ jakajkuspti eska inde ambe ísïispka (Juanu 4:39). Ka ístu, máruksï jatsipti para jorhenguarhini sési pájperani judiuecha jingoni (Luk. 9:52-54).
4. Eska na uandajka Úkuecha 8:5, 6, 14, ¿ambeksï úspi máru Samaria anapuecha enga Felipe Kristueri ambe aianguapka?
4 ¿Ambe jarhuataaspti Samaria anapuechani paraksï itsï atakuarhini? Jiáni enga Felipe nípka “Kristueri ambe aianguani”, uánikua Samaria anapuechaksï jiókuarhispti “Tata Diosïiri uandakuani” (arhinta je Úkuecha 8: 5, 6, 14). Ka nájkiruka Felipe judiuepka, Samaria anapuechaksï kurhajchaspti jamberi jimbokaksï miántaaspka máru bersikuluechani engaksï uandajka eska Tata Diosï iáminduechani májkueni kaasïnga (Deut. 10:17-19). Ambe uéjka jimboeni, iámindu kʼuiripuechaksï jingontku kurhajchaspti Felipeni. Jingontkuksï kurhaasïreendi “ambe enga Felipe uandeenga” Kristueri ambe ka jiókuarhisptiksï eska Tata Diosï axaspka, jimboka Felipe uánikua milagruechani uaaspka, pori ejemplu, tsinaaspti pʼamenchatiichani ka kʼuiripuechani petarhitantaspti demoniuechani (Úku. 8:7).
5. ¿Ambejtsï jorhenguarhisïni Samaria anapuecheeri?
5 Samaria anapuechaksï úpirindi no jiókuarhini ambe enga Felipe jorhentpini japka jimboka judiuespka o jimbokaksï no méni kurhaaxapka ambe enga Felipe jorhentpini japka. Joperu engaksï na sési jimbo jakajkupkia eska ísïispka ambe enga Felipe jorhentpini japka, imeechaksï jirejiresï itsï atakuarhispti. Biblia uandasïndi: “Enga Felipe aianguapka ambakiti aianhperakua Tata Diosïiri Reinueri ambe ka tata Jesukristueri nombriiri ambe, jakajkukusptiksï ka niárasptiksï itsï atakuarhini acheetiicha ka uarhiitiicha” (Úku. 8:12). ¿Ka chaia? ¿Exesïntsï eska Tata Diosïiri Karakata jurhimbikua ambe uandasïnga? ¿Ka segurujtsï jarhaski eska Jeobaeri testiguecha jánguarhintasïnga xénchaani iáminduechani ísï eska Jesúsi na uandapka eskaksï úpiringa imeeri chúxapatiicha? (Juanu 13:35). Jiájkani, asï iónda je itsï atakuarhini ka uaakajtsï seguru jarhani eskaksïni Tata Diosï Jeoba újchakuraaka.
6. ¿Ambejtsïni jorhendasïni Rubéniiri ejemplu?
6 Rubéni enga Alemania anapueka, ísï tʼarhexespti komueska Jeobaeri testigu ma, joperu enga tumbiipka no seguru jarhaspti eska jarhaspka Tata Diosï. Ju je exeni ambe jarhuataspti. Ima kuenta íntskukuarhispti eska uánikua ambe no mítespka, jimbosï ueenapti inbestigarini. Ima uandantasïndi: “Jánguarhintaspka jandiajkuni jorhenguarhini Biblieri ambe parani míteni ambe ísïispi ka ambe nómbe. Ka uánikua xanhari estudiariispka ebolusioniiri ambe”. Ístu arhintaspti libruni ¿Existe un Creador que se interese por nosotros? enga kánikua jarhuatapka. Ima uandantasïndi: “Miásïnga eskani uandaspka: ‘Iásï kʼóruni míteskia eska Tata Diosï Jeoba meru jarhaska’”. Ístu, Rubéni niraspti sentrali mundiali, lugari ma nani engaksï Jeobaeri testiguecha exejka interu parhakpini anapu ánchikuarhitani. Rubéni ísku pakaraspti enga exepka na engaksï iápuru parhakpini anapu Tata Diosïiri marhuariicha sési pájperajka. Enga na kʼuanhatsentapkia Alemania, itsï atakuarhispti enga 17 jatiriipka. Enga chá no seguru jaka ambe engajtsï jorhenguarhikia Bibliarhu, arhianta je publikasioniichani. Enga chá jánguarhintaaka ʻiámindu ambe míteni’, indeni ambeksïni jarhuataati seguru jarhani eska ísïiska ambe enga Biblia jorhentpijka (Éfes. 4:13, 14). Engajtsï kurhauaka na engaksï Jeobaeri testiguecha xénchperajka ka májku kʼéri ánchikuarhini interu parhakpinirhu ka ístu engajtsï chá mismu exekuarhiaka indeni ambe kúnguarhikuarhu, chájtsï sánderu uékaaka Tata Diosïiri iretarhu jarhani.
SAULU TARSU ANAPU ITSÏ ATAKUARHISPTI
7. ¿Saulu ambe jatsispi para mójtakuni?
7 Ju je exeni Saulueri ejempluni enga Tarsu anapuepka. Ima ambakiti eskuelarhu ma niraspti enga judiuecheriipka ka ísï exenhasïreendi eska kʼéri ambeepiringa (Gal. 1:13, 14; Filip. 3:5). Imani jurhiatikuecha jimbo, uánikua judiuechaksï ísï exeasïreendi kristianuechani eska apostateecha ka jimbosï Saulu xáni no sési káuendi. Ima ísï exesïreendi eska indeni ambe úparini, úxapka ambe enga Tata Diosï sési exeenga (Úku. 8:3; 9:1, 2; 26:9-11). Ísï jimbo, enga ima niárapiringa jakajkuni Jesúsini ka itsï atakuarhini komu kristianu ma, jatsispti para no sési nitamakuarhini.
8. a) ¿Ambe jarhuataspti Sauluni para itsï atakuarhini? b) Eska na arhijka Úkuecha 22:12-16, ¿Ananíasi néna jarhuataspti Pabluni? (Ístu exe je imajenini).
8 ¿Ambe jarhuataspi Sauluni para itsï atakuarhini? Jiáni enga Jesúsi auandarhu uératini uandajpapka, tʼíntskua ma tsónhastaspti ka Saulu nóteru úsptia exeni (Úku. 9:3-9). Tanimu jurhiatikua no tʼirespti ka jamberi eratsentani japti ambe enga xáni úkuarhipka. Iásï kʼóru jakajkusptia eska Jesúsi jindeespka Mesíasi ka eskaksï kristianuecha jindeespka relijioni jurhimbiti. Ka ístu jamberi kánikua no sési pʼikuarherapti enga jurajkupka eskaksï uándikupiringa Estebanini (Úku. 22:20). Ka enga na nitamapkia tanimu jurhiatikua, Jesúsiiri chúxapati ma enga Ananíasi arhinheenga, niraspti exeni Sauluni, pʼamojperakua jingoni uandontskuarhekuspti, úspti eska ménderu exepiringia ka arhispti eska itsï atakuarhipiringa (arhinta je Úkuecha 22:12-16). Saulu xarhataspti kaxumbikua, jiókuarhispti Ananíasiiri jarhuajperata ka nóteru ísï jámasïreendia eska ióntki (Úku. 9:17, 18).
Ananíasi arhispti Sauluni eska itsï atakuarhipiringa ka ima ísï úspti. ¿Chá uékasïni májkueni úni eska Saulu? (Exe je párrafu 8).
9. ¿Ambeksïni jorhendasïni Saulueri ejemplu?
9 Uánikua ambejtsïni jorhendasïni Saulueri ejemplu. Ima úpirindi kʼéramakuarhini ka chérhiani kʼuiripuechani ka no itsï atakuarhini. Joperu ima no jurajkuspti eska indeni ambe úkuarhipiringa. Sánderu sési, Saulu kaxumbitiispti ka mójtakuspti imeeri irekuani para niárani Jesúsiiri chúxapatiini (Úku. 26:14, 19). Ima erakuspti kristianu máeni nájkiruka mítepka eska no sési kánhapiringa (Úku. 9:15, 16; 20:22, 23). Ísï tátsekua enga na itsï atakuarhipkia, seguiriispti mintsikani eska Tata Diosï Jeoba jarhuatapiringa orhepani uerani ambe uéjki enga no sési nitamakuarhini japiringa (2 Kor. 4:7-10). Ísï jimbo, enga chá niáraka itsï atakuarhini, jamberijtsï tsʼéjkukuechani jatsiauaka ojtsï no sési kánhani, joperujtsï no méni jandiajku jauaka. Tata Diosï Jeoba ka Jesúsi méntkisï chánksïni jingoni jauati paraksïni jarhuatani (Filip. 4:13).
10. ¿Nénaksïni jarhuatasïni Anaeri ejemplu?
10 Ju je Anaeri ejemplu exeni enga Europa del Este anapueka. Enga amamba na itsï atakuarhipkia, Ana 9 jatiriispti enga ueenapka jorhenguarhini Biblieri ambe ka taati jémba sésikua íntskuspti. Nani enga anapuepka Ana, iámindu parientiichaksï mismu Kʼumanchikuarhu irekasïreendi (kurda). Ísï jimbo, engaksï imeecha mítepka eska Ana Biblieri ambe jorhenguarhixapka Testiguecha jingoni, kánikuaksï ikiaspti. Imeechaksï kánikua no sési exesïreendi enga néna jurajkuenga imeecheeri relijionini. Enga Ana 12 jatiripkia, uandontskuarhespti imeeri taati jémba jingoni, jimboka uékaxapkia itsï atakuarhini. Taati jémba kurhamarhispti sini Anasï uékani japi ísï úni o néna arhixapka eska ísï úpiringa. Ana arhispti: “Ji kánikua xénchasïnga Tata Diosï Jeobani”. Ísï jimbo, taati jémba jurajkuspti eska itsï atakuarhipiringa. Tátsekua, Anaeri parientichaksï teresmarhusïreendi ka nóksï sési kamani. Ka familiari ma arhispti: “Sánderukeni sési nichepirindi engari ísku jándipiringa ka itsutani ka eska Jeobaeri testigueni”. ¿Ambe jarhuataspti Anani? Ima uandantasïndi: “Tata Diosï Jeobareni íntskuspti uinhapikua. Ka ístujtsïni taatiicha kánikua jarhuataspti”. Ana karaspti na enga uánikua xanhari jarhuatakia Tata Diosï Jeoba ka ménisï arhiantasïndi para no mirikurhini. Enga chá chéjka jimbokajtsï eratsesïnga eskajtsï niáraaka no sési kánhani, miánta je eskaksïni Tata Diosï Jeoba jarhuataaka (Ebr. 13:6).
KORNELIU ITSÏ ATAKUARHISPTI
11. ¿Ambe úpirini ójkutani Korneliuni para itsï atakuarhini?
11 Máteru ejemplu jindeesti Korneliu. Ima orhejtsïkuasïreendi 100 sondaduechani (Úku. 10:1). Ísï jimbo, ima úpirindi kʼéri achamasï máeni imeeri iretarhu ka ístu soldaduecha jingoni. Biblia ístu uandasïndi eska Korneliu kánikua jarhuatasïreenga imeechani engaksï uétarhinchani jarheenga (Úku. 10:2). Tata Diosï Jeoba axaspti apostoli Pedruni paraka aiangupiringa ambakiti aianhperakuani. ¿Ambe úspi Korneliu? ¿Ióndaspti itsï atakuarhini jimboka uánikua ambe jatsikuarhespka?
12. ¿Ambe jarhuataspi Korneliuni para itsï atakuarhini?
12 ¿Ambe jarhuataspi Korneliuni para itsï atakuarhini? Biblia uandasïndi eska ima achamasï máespka “enga chénharhienga Tata Diosïni iámindu imeeri kʼumanchikuarhu anapuecha jingoni” (Úku. 10:2). Enga Pedru na aiangupkia ambakiti aianhperakuani Korneliuni, ima ka imeeri familia mintsikasptiksï tata Jesukristuni ka sóntkuksï itsï atakuarhispti (Úku. 10:47, 48). Seguruchi jarhaska eska Korneliu uékaspka uánikua ambe mójtakuni para úni Tata Diosï Jeobani kʼéri ambe arhini imeeri familia jingoni (Jos. 24:15; Úku. 10:24, 33).
13. ¿Ambeksïni jorhendasïni Korneliueri ejemplu?
13 Ísï eska Saulu, Korneliujtu kʼéri ambeespti ka inde ambe úpirindi úni eska ima no niárapiringa kristianu úkuarhini. Joperu no jurajkuspti eska inde ambe úkuarhipiringa. ¿Ka chaia? ¿Jatsiskijtsï para uánikua ambe mójtakuni parajtsï úni itsï atakuarhini? Enga ísïika, uaakajtsï seguru jarhani eskaksïni Tata Diosï Jeoba jarhuataaka ka újchakurani engajtsï jánguarhintaska ísï úni eskaksï Biblieri prinsipiuecha na uandajka.
14. ¿Nénajtsïni jarhuatasïni Tsuyoshiiri ejemplu?
14 Tsuyoshi enga Japoni anapueka, jatsispti para uánikua ambe mójtakuni imeeri ánchikuarhitarhu para úni itsï atakuarhini. Ima jarhuatasïreendi kʼuiripuni ma enga direktoriipka eskuelarhu ma enga jorhentpienga tsïtsïkiiri aregluecha uaani. Direktori someni nirasïreendi tsïtsïki ambe páni jima enga kʼuiripu ma uarhienga ka imani ambe úsïreendi engaksï budisteecha újka. Joperu enga direktori no ueenga nirani, Tsuyoshi nirasïreendi ka imajtu májkueni ambe úsïreendi eska direktori. Joperu enga na jorhenguarhipkia Bibliarhu uarhiriicheeri ambe, exespti eska no úpiringa itsï atakuarhini enga seguiriini japiringa imani ambe úni. Ísï jimbo, nóteru uékasptia imani ambe úni (2 Kor. 6:15, 16). Ka uandontskuarhespti direktori jingoni ka ima jurajkuspti seguiriini jima ánchikuarhini joperu nóteru únia ambe enga ueenga antesi. Ma uéxurhinisï tátsekua enga na ueenapkia jorhenguarhini Biblieri ambe, Tsuyoshi itsï atakuarhispti.a Enga chá jatsika para mójtakuni máru ambe chaari ánchikuarhitarhu para úni Tata Diosï Jeobani marhuakuni, uaakajtsï seguru jarhani eskaksïni Tata Diosï Jeoba íntskuaka ambe enga chá ka chaari familiani uétarhinchaaka (Sal. 127:2; Mat. 6:33).
KORINTU ANAPUECHAKSÏ ITSÏ ATAKUARHISPTI
15. ¿Ambe ka ambe úpirini ójkutaani Korintu anapuechani paraksï itsï atakuarhini?
15 Korintu anapu kʼuiripuechaksï kánikua tsitisïreendi jatsikuarhekua ambe ka ísku jándikua ambe niátani. Uánikua kʼuiripuechaksï imani ambe úsïreendi enga Tata Diosï no jaiapanhenteenga. Kánikua úkua jukapirindi para nema jiókuarhini jurhimbikuani. Joperu enga apostoli Pablu niárapka imani iretarhu ka aianguani ambakiti aianhperakuani Kristueri ambe, “uánikua Korintu anapuecha kurhaasptiksï ambakiti aianhperakuani ka ueenasptiksï jakajkuni ka itsï atakuarhisptiksï” (Úku. 18:7-11). Ka tata Jesukristu xarhakuspti Pabluni jánhaskua ma jimbo ka arhispti: “Ini ireta jimbo, uánikua kʼuiripuechaksï jarhasti engajtsïni niáraaka jakajkuni”. Ísï jimbo, apostoli Pablu jima pakaraspti aianhpini ma uéxurhini ka terujkani.
16. ¿Ambe jarhuataaspi Korintu anapuechani paraksï úni itsï atakuarhini? (2 Korintu 10:4, 5).
16 ¿Ambe jarhuataaspi Korintu anapuechani paraksï itsï atakuarhini? (Arhinta je 2 Korintu 10:4, 5). Tata Diosï úraspti imeeri Karakatani ka imeeri espiritu santuni para jarhuataani mójtakurhini (Ebr. 4:12). Engaksï Korintu anapuecha jiókuarhipka ambakiti aianhperakuani, nóteruksï kauisïreendia, ni sïpani ka niteruksï tatakeecha ísku jándikua ambe niáteenia máteru tatakeecha jingoni o omoseksualidadi ambe niátani (1 Kor. 6:9-11).b
17. ¿Ambeksïni jorhendasïni Korintu anapuecha?
17 Korintu anapuechaksï jatsispti para uánikua ambe mójtakuni paraksï úni itsï atakuarhini, joperu imeechaksï no ísï eratsespti eskaksï no úpiringa ísï úni. Sánderu sési, jánguarhintasptiksï imani xanharu jimbo nirani enga tsípikuarhu pájpejka (Mat. 7:13, 14). ¿Ka chaia? ¿Jánguarhintaxakijtsï nóteru imani ambe únia enga no sési jaka? ¡Asï kuatanta je! Jurajku je eskaksïni Tata Diosï Jeoba jarhuataaka imeeri espiritu santu jingoni parajtsï imani ambe úni enga ima jaiapanhentajka.
18. ¿Nénaksïni jarhuatasïni Monikeeri ejemplu?
18 Monika enga Georgia anapueka, kánikua jánguarhintaspti enga sapichku japka para nóteru imani ambe jingoni tsípikuarhinia enga no sési jaka ka ístu para nóteru no sési jásï ambe uandania, ka ísï, únia itsï atakuarhini. Ima uandantasïndi: “Kómarhisïreenga Tata Diosïni parareni jarhuatani mójtakurhini. Tata Diosï Jeoba mítespti eskani uékasïreenga imani ambe úni enga sési jaka ka ima méntkisï jima jarhaspti parareni jarhuatani ka arhistachini”. Monika 16 jatiriispti enga itsï atakuarhipka. ¿Chájtu uétarhinchasïni jurajkuni máru ambe parajtsï úni jaiapanherantani Tata Diosï Jeobani ka marhuakuni? Seguirii je kurhakuni Tata Diosïni eskaksïni íntskuaka espiritu santu parajtsï úni mójtakurhini ka imaksïni kánikua espiritu santu íntskuati (Juanu 3:34).
ENGAJTSÏ CHÁ MINTSIKASKA, UAAKAJTSÏ MÓSKUNI JUÁTANI MA
19. ¿Ambeksïni jarhuataa orhepani uérakuani tsʼéjkukuechani engaksï ísï xarharajka komueska juáteecha? (Ístu exe je imajenini).
19 Náki uéjki tsʼéjkukua engajtsï jatsiaka, uaakajtsï orhepani uérakuni parajtsï úni itsï atakuarhini. Asï mirikurhi je eskaksïni Tata Diosï Jeoba xénchasïnga ka uékasïndi eskajtsï imeeri familiarhu jauaka. Jesúsi someni arhiaspti imeeri chúxapatiichani: “Engajtsï ísï mintsikaska eska na xáni sapinharhika ma semiia mostaseeri, uaakajtsï arhini ini juátani ‘Jiniani ní’ ka juáta mótsiati; iámindu ambejtsï uaaka úni” (Mat. 17:20). Jesúsiiri chúxapatiichaksï no ióni jarhaspti Jesúsi jingoni, ísï jimbo, jatsisptiksï para seguiriini jarhani sánderu mintsikani. Jesúsi arhiaspti eskaksï jatsispka para sánderu mintsikani Tata Diosï Jeobani ka eska ima jarhuataapiringa orhepani uérakuani tsʼéjkukuechani engaksï ísï xarharapiringa komueska juáteecha. ¡Ka ístuksïni jarhuataati chánksïni!
Asï méni mirikurhi je eskaksïni Tata Diosï Jeoba xénchasïnga ka eska uékasïnga eskajtsï imeeri familiarhu jauaka. (Exe je párrafu 19).c
20. ¿Ambechi uaa jorhenguarhini i ejempluecheeri engachi ini jorhenguarhikua jimbo exeaka?
20 Jiájkani, ¿jarhaski ambe ma engaksïni ójkutani jaka parajtsï itsï atakuarhini? Jánguarhinta je sóntku úni ambe ma engaksïni jarhuataaka. Exeskachia eskaksï uánikua ejempluecha jarhaska primeru siglurhu anapuecheeri ka ístu iásï anapuecheeri engaksïni sési pʼikuastantaaka ka uinhaperantani. Eratseantani indeni ejempluechani, jarhuataatiksïni para chá úni aiakukuarheni Tata Diosï Jeobani ka itsï atakuarhini. ¡I ambe sánderu ambakiti ambeesti engajtsï uaaka úni!
PIREKUA 38 Jeobakini xénchasïndi
a Tsuyoshi Fujiiri Eksperiensia, uérasti rebistarhu ¡Tsínharhi! 8 de agostu de 2005, pájina 20-23 utusï jimbo.
b Ístu exe je bideuni pájinarhu jw.org ¿Ambeksïni ójkutaxaki parajtsï itsï atakuarhini?
c AMBE ENGA XARHATAJKA IMAJENI: Erachiicha ka pirenchiichaksï kánikua tsípixati engaksï máru aianhpiriicha itsï atakuarhikia ka pasajkukuaxatiksï.