SEMANA 18
PIREKUA 65 Jánguarhinta sési jarhani Jeobani jingoni
Tumbi, jánguarhinta ísïini eska Markusï ka Timoteu
“Juájta Markusïni jimbokarini ima kánikua jarhuataaka parachi Tata Diosïni ánchikuarhikuni” (2 TIM. 4:11).
AMBE ENGACHI JORHENGUARHIAKA
Exeakachi na enga Markusïiri ka Timoteueri ejemplu jarhuatauaka tumbiichani paraksï imani kualidadiichani jatsiani enga jarhuatauaka paraksï sánderu marhuakuni Tata Diosï Jeobani ka erachiichani.
1, 2. ¿Andiksïsï Markusï ka Timoteu úpirini úkua jukanchani para sánderu marhuakuni Tata Diosï Jeobani?
ENGARI tumbiika, jamberiri uéjka sánderu marhuakuni Tata Diosï Jeobani ka kúnguarhikuani. Ka tsípisïngachi exeani xáni uáni tumbiichani engaksï uéjka sánderu ambe úni para Tata Diosï Jeoba ka para erachiicha (Sal. 110:3). Joperu ménichani úkua jukasïndi. Jamberiri no tekaajka imani ambe úni engari no méni úni japka ori no jiókuarhika ambe ma jimbokari eratsesïnga eskari no uaaka ísï úni. Joperu asï uandanhia nóri tʼujkueska engari ísï pʼikuarherajka.
2 Markusï ka Timoteu sánoksï májkueni ambe nitamakuarhispti. Nájkirukaksï no méni úni japka ambe ma ka nóksï míteni uánikua ambe, nóksï jurajkuspti paraka inde ambe pʼíngupiringa paraksï marhuakuani máteruechani. Jiáni enga Pablu ka Bernabé arhipka Markusïni eska nipiringa pámbetaani iauanisï aianhpini, jamberi Markusï amamba jingoni irekani japti sési jásï kʼumanchikuarhu ma (Úku. 12:12, 13, 25). Joperu Markusï jurajkuspti imeeri kʼumanchikuani para sánderu marhuakuni Tata Diosï Jeobani. Orheta niraspti Antiokía ka tátsekua máteru ireteecharhisï Pablu ka Bernabé jingoni (Úku. 13:1-5). Ka Timoteu sáno májkueni ambe nitamakuarhispti. Jamberi taati jémbeecha jingoni irekani japti enga Pablu pʼímarhipka para nirani aianhpini imani jingoni. Timoteu úpirindi eratseni: “Ji sapichku jarhaska ka no ma ambe míteska parani indeni jingoni nirani aianhpini” (terukutani je 1 Korintu 16:10, 11 ka 1 Timoteu 4:12 jingoni). Timoteu niraspti Pablu jingoni ka niáraspti uánikua kóntperateechani jatsiani (Úku. 16:3-5).
3. a) ¿Nénachi míteski eska Pablu kánikua xénchaasïreenga Markusïni ka Timoteuni? (2 Timoteu 4:6, 9, 11; ístu exea imajeniichani). b) ¿Náki kurhamarhikuechanchi exeani jaua ini jorhenguarhikua jimbo?
3 Nájkirukaksï Markusï ka Timoteu tumbiipka, uánikua ambeksï úspti kúnguarhikuarhu. Pablu niáraspti kánikua xénchaani ka jimbosï pʼitajkuarhiapti ante de uarhini paraksï imani jingoni jarhani (arhinta 2 Timoteu 4:6, 9, 11). ¿Pablu náki kualidadiichani exekuaspi Markusïni ka Timoteuni enga jimbo niárapka xáni xénchaani? ¿Nénaksï uaa tumbiicha májkueni úni eska Markusï ka Timoteu? Ka ¿náki konsejuecha uaa jarhuatani?
Markusï ka Timoteu kánikuaksï sési úsïreendi imeecheeri ánchikuarhitani nájkirukaksï sapichku japka jimbosï Pablu niárapti kánikua xénchaani. (Exe párrafu 3).c
ÍSÏI ESKA MARKUSÏ KA JARHUATAA MÁTERUECHANI
4, 5. ¿Néna xarhataspi Markusï eska uékasïreenga marhuakuani máteruechani?
4 Seguni libru ma, uandasïndi eska marhuakuani máteruechani arhikuekasïnga méntku ánchikuarhini jarhani para jarhuataani máteruechani, ka ísïsï úpti Markusï. Jiáni enga Pablu no uékapka pájtani enga ménderu nípka pʼorhembiani kúnguarhikuechani, jamberi Markusï kánikua no sési pʼikuarherapti ka kulpabli (Úku. 15:37, 38). Joperu ima no uandaspti: “Ji nóteruni uaakia marhuakuani erachiichani”.
5 Markusï máteru naniisï niraspti aianhpini imeeri primu jémbani Bernabé jingoni. Ma 11 uéxurhini tátsekua enga Pablu Roma ónhakuarhetini japka, Markusï kánikua jarhuataspti (Filem. 23, 24). Ka Pablu kánikua sési pʼikuarheraspti enga Markusï ísï jarhuataapka jimbosï uandapti eska Markusï ʻméntkisï sési pʼikuastantaspka’ (Kol. 4:10, 11).
6. ¿Néna marhuakuspi Markusïni imani kristianuecha jingoni ánchikuarhini engaksï eratsekua jukariipka? (Exe notani).
6 Markusïni kánikua jarhuataspti imani kristianuecha jingoni ánchikuarhini engaksï eratsekua jukariipka. Ísï tátsekua enga na jurajkupkia Pabluni Roma, niraspti exeni Pedruni jini Babilonia ka niárasptiksï kánikua sési pájperani jimbosï Pedru arhipti: “juchiiti sapi” (1 Ped. 5:13). Ka jamberi jiáni, Pedru iámu ambe aiangupti na enga irekapka Jesúsi ka ambe enga xáni úpka para aianhpini. Ka ísï tátsekua, Markusï iámu ambe karantaspti.a
7. ¿Tumbi ma néna májkueni úspi eska Markusï? (Ístu exe imajenini).
7 Markusï kánikua jánguarhintaspti marhuakuni Tata Diosï Jeobani ka erachiicha jingoni jarhani engaksï jánhaskatiipka. ¿Nénari uaa tʼujtu májkueni úni? Engari exekia eskari uaaka sánderu ambe úni kúnguarhikuarhu joperuri no intsïnhani jarhani responsabilidadi ma, tekaanta ka jirinhakunta nénari uaa sánderu ambe úni Tata Diosï Jeoba jimbo ka erachiicha jimbo. Ju exeni eksperiensia ma, erachiiri ma enga Sergiob arhinhajka ka enga iásï orhejtsïkutiikia. Enga sánderu sapichuepka, ima exesïreendi eskaksï máteru erachiicha intsïnhasïreenga responsabilidadi ma joperu ima nómbe nájkirukaksï májkueni jatiriuenga. Ima ísï pʼikuarherasïreendi enajkiksï orhejtsïkutiicha no kuenta ueeni imani. Joperu tátsekua niáraspti uandontskuarheni orhejtsïkutiicha jingoni ka máechakua arhispti eska jarhuataapiringa máteru erachiichani jarhuataani nájkiruka no nema exepiringa. Ísï jimbo, eratsespti jarhuataani erachiichani engaksï jatiriipkia ka paani tánguarhikuecharhu imeeri karru jingoni. Enga Sergio miántajka, uandasïndi: “Iásï kʼóruni míteskia ambe enga arhikuekajka sési jimbo marhuakuani máteruechani ka exeskia eska jarhuataani erachiichani úsïnga eska ma kánikua tsípikua jingoni irekaaka”.
¿Andisï sési jaki eskaksï tumbiicha kúnguarhiaka imani erachiicha jingoni engaksï jánhastiika? (Exe párrafu 7).
ÍSÏI ESKA TIMOTEU KA JARHUATAA MÁTERUECHANI
8. ¿Andisï Pablu Timoteuni erakupi para nirani pámbetani? (Filipusï 2:19-22).
8 Pablu uétarhinchasïreendi eskaksï pámbetapiringa ima kristianuecha engaksï no sáni cheenga jimboka ménderu nipiringa imani lugariicha jimbo aianhpini engaksï antesi no sési kámapka. Ísï jimbo, Silasini erakuspti jimboka uánikua ambe mítespka (Úku. 15:22, 40). Ka tátsekua Timoteuni jimboka mítespka eska sési ambe uandanhasïreenga i tumbiiri ambe (Úku. 16:1, 2). Ka erakuspti Timoteuni jimboka Pablu mítespka eska i tumbi kánikua uandanhiasïreenga máteruecha jimbo (arhinta Filipusï 2:19-22).
9. ¿Néna xarhataspi Timoteu eska sési jimbo uandanhiasïreenga erachiicha jimbo?
9 Desde enga Timoteu ueenapka májku kʼéri marhuani Pabluni jingoni, xarhataspti eska sánderu uandanhiasïreenga erachiicha jimbo ka eska imeeri ambe jimbo. Jimbosï Pablu no sáni chépti jurajkuni Berea para uinhaperaantani imeechani engaksï apenasi ueenani japka Jesúsiiri chúxapatiini (Úku. 17:13, 14). Jiáni enga Timoteu Berea pakarapka uánikua ambe jorhenguarhipti Silasiiri ambe jimboka imajtu jima jarhaspka. Joperu ísï tátsekua, Pablu jandiajku axaspti Timoteuni Tesalónika para uinhaperaantani jima anapu erachiichani (1 Tes. 3:2). Imani 15 uéxurhini jimbo, Timoteu niáraspti kánikua xénchaani erachiichani ka asta ueraspti imeecha jingoni (Rom. 12:15; 2 Tim. 1:4). ¿Nénaksï uaa májkueni úni tumbiicha ísï eska Timoteu?
10. ¿John néna niáraspi uandanhiani máteruecha jimbo?
10 Erachi John jorhenguarhispti néna sánderu jarhuataani máteruechani. Enga tumbiipka kánikua úkua jukanchasïreendi uandontskuarheni erachiicha jingoni engaksï jatiriipkia, jimbosï arisku sáni uandajpauendi Kʼumanchikua Reinuerirhu. Joperu orhejtsïkuti ma arhispti eska para úni uandontskuarheni erachiicha jingoni, orheta jatsispka para imeeri ambe uandontskuarhekuani engaksï erachiicha tsitijka. Ístu arhispti eska eratsepiringa néna úpirini jarhuataani. John ísï úspti ka iásï orhejtsïkutiistia. Uandantasïndi: “Iásï úsïngia uandontskuarheni erachiicha jingoni na uéjkiksï xáni jatiriini. Kánikua sési pʼikuarherasïnga engani újka kurhangukuani ambe engaksï nitamakuarhini jarhajka o engaksï no sési p’ikuarherani jarhajka ka inde amberini jarhuatasïndi parani exeni néna uaa jarhuataani”.
11. ¿Nénaksï uaa tumbiicha jorhenguarhini jarhuataani erachiichani? (Ístu exe imajenini).
11 Engari tumbiika, tʼujturi uaaka jorhenguarhini jarhuatani máteruechani. Pori ejemplu tánguarhikuecharhu, jánguarhinta iáminduechani uandajpaani na uéjkiksï xáni jatiriini, kurhamarhia náksï jámaxaki ka jingontku kurhajchaa ka ísïri míteaka nénari uaa jarhuataani. Jamberiri míteka temungurhirini ma engaksï jatiriikia ka uétarhinchanksï jarhani jarhuajperata paraksï úrani aplikasionini JW Library® ori imeecha jingoni uérani ainhpini. Ísturi jamberi uaaka jarhuataani imeecheeri telefonuni jingoni o tabletani jingoni. Engari t’u ueenaska jarhuataani máteruechani ambakitiri ejemplu máeuaka.
Tumbiichaksï uaati mámaru jarhuajpeni kúnguarhikuarhu. (Exe párrafu 11).
APOSTOLI PABLUERI KONSEJUECHAKSÏNI UAATI JARHUATANI
12. ¿Néna uaa jarhuataani tumbiichani ima konseju enga Pablu Timoteuni karakupka?
12 Pablu kánikua xénchasïreendi Timoteuni ísï komueska imeeri uájpa ma. Jimbosï íntsaapi konsejuechani paraka méntkisï sési nikupiringa ka ístu paraka sési marhuakupiringa Tata Diosïni (1 Tim. 1:18; 2 Tim. 4:5). Parakeni Pablueri konsejuecha ístu marhuacheni tʼungini, arhianta tsimani karteechani enga Pablu Timoteuni karakuapka ka ísï exe enajkikini tʼungini karachi. Ístu jánguarhinta exeni nénari uaa ísï úni eskaksï inde konsejuecha na uandajka. Ju exeani máru ejempluechani.
13. ¿Ambekini jarhuataa sánderu sési marhuakuni Tata Diosïni?
13 “Tʼu seguiriini ja entrenariini parari no jurajkuni Tata Diosïni” (1 Tim. 4:7b nota). Sési marhuakuni Tata Diosïni ístu arhikuekasïndi no méni jurajkuni ka uékani jaiapanherantani. Ka uétarhisïndi eskachi jánguarhintaaka jimbokachi no pʼindeska ísï úni. Jiájkani ¿ambejtsïni jarhuataa ísï úni? Pablu uandaspti: “Seguiriini ja entrenariini”. Griegu jimbo inde uandakua jindeespti para ima kʼuiripuecha engaksï jánguarhintani jarheenga prepararikuarhini para uiriini. Inde kʼuiripuechaksï pʼíngukuarhisïreendi ka imani ambeksï úsïreendi enga jarhuataapiringa andani karrerani. Ísï jimbo, juchajtuchi jatsiska para p’indeni imani ambe úni engajtsïni jarhuataaka sánderu sési marhuakuni Tata Diosï Jeobani.
14. ¿Andiresï uéjki arhintani Bibliani ka uanda nénari uaa ísï úni?
14 Tumbi, uaakari pauani pauani arhintani Bibliani eratseparini eskari uékasïnga sánderu andarhierani Tata Diosïni. Pori ejemplu, eranhaska eskari arhintaxaka ambe enga Jesúsi arhipka imani juramutini enga sapichku japka ka enga jatsikuarheriipka (Mar. 10:17-22). I juramuti jakajkusïreendi eska Jesúsi jindeespka Mesíasi joperu kueratasïreendi sánderu mintsikani para úni Jesúsini chúxapani. Ka nájkiruka nótki xáni mintsikani japka, Jesúsi niáraspti xénchani. Jamberiri kurhamarhikuarhijka: “¿Andisï Jesúsi xáni sési uandontskuarhekupi?”. Jesúsi ísï úspti jimboka uékasïreenga eska inde juramuti ambakiti ambe erakupiringa úni. Joperu ¿amberi jorhenguarhisïni Tata Diosï Jeobaeri ambe? Eska Tata Diosï Jeoba niáraspka xénchani imani juramutini jimboka Jesúsi xarhataspka na enga jásïika imeeri Taati jémba (Juanu 14:9). Ístu engari eratsentaska inde juramutiiri ambe ka na engari irekuarhini jaka t’u, uaakari kurhamarhikuarhini: “¿Ambe jatsiski parani úni parani sánderu andarhierani Tata Diosï Jeobani? ka ¿ambe uaa úni parani jarhuataani erachiichani?”.
15. ¿Andisï jukaparhakue eskaksï tumbiicha jánguarhintaaka ambakiti ejemplu máeni? (1 Timoteu 4:12, 13).
15 “Jánguarhinta parakaksï májkueni uaaka imeecha engaksï mintsikajka Tata Diosïni” (arhinta 1 Timoteu 4:12, 13). Pablu arhispti Timoteuni eska jukaparhakuespka sési arhintani, sési arhistatspini, xénchpeni, mintsikani ka pímbinhasï jarhani. ¿Andi? Jimboka sánderu jukaparhakueska ima ambe engachi újka ka eska ambe engachi uandajka. Pori ejemplu eranhaska eskari arhijtsïkperata ma nitamataraaka enga uandajka eska jukaparhakueska aianhpini. Sánderuri sési pʼikuarheraaka indeeri ambe arhijtsïkpini engari jánguarhintani jaka uérani aianhpini ka ísïksï erachiicha sánderu jakajkucheati jimbokari ísï úxaka eskari na uandani jaka (1 Tim. 3:13).
16. a) ¿Náki sinko ambe jarhuataa tumbini ma para ambakiti ejemplu máeni? b) ¿Néna uaa tumbi ma ambakiti ejemplu máeni imani ambe jimbo enga uandajka?
16 Ixú 1 Timoteu 4:12 jimbo, Pablu sinko ambe uandaspti enga uaaka jarhuatani tumbini ma para ambakiti ejemplu máeni. Jiáni engari jandiajku jorhenguarhini jauaka Bibliani, ¿andiresï no exeajki mándani arhini? Ju eranhaskani eskari uékasïnga sánderu sési uandani, ísï jimbo, uaakari eratsentani amberi uaa uandani parari uinhaperaantani máteruechani. Ka engari chiiti taatiicha jingoni irekani jaka, uaakari someni diosmaiamukua arhiani jimbokaksï ima mámaru ambe úxaka tʼungini jimbo. Ka tánguarhikuecharhu uaakari komentarini ambe engari kurhanguaka, ka enga na kʼamakurhiakia, uaakari arhini erachini ma andisï sési nitamatara imeeri asignasionini. Engari jánguarhintaska sési uandani ambakiti ejempluri máeuaka ka máteruechaksï exeati eskari jánguarhintaxaka sési marhuakuni Tata Diosïni (1 Tim. 4:15).
17. Enga tumbi ma meteechani jatsikukuarhiauaka, ¿ambe jarhuataa ísï úni? (2 Timoteu 2:22).
17 “Sïpakuarhiku indeni ambe engaksï xáni tsitijka tumbiicha ka jánguarhinta sési jámani” (arhinta 2 Timoteu 2:22). Pablu arhispti Timoteuni eska no jámapiringa imani ambe úni enga ójkutapiringa para sánderu sési marhuakuni Tata Diosï Jeobani ka jarharitani. Jamberi no no sési jati ambe engari újka, joperukeni kánikua tiempu euajti parari sánderu sési marhuakuni Tata Diosï Jeobani. Pori ejemplu, eratsenta nári xáni tiempu úrasïni deportirhu, internetirhu, bideu jueguecharhu. ¿Tʼu úpirini úrani indeni tiempuni parari sánderu marhuakuni Tata Diosï Jeobani ka ístu erachiichani? Jamberiri úpiringa jarhuajpeni kúnguarhikuarhu parari sési jájkuntani Kʼumanchikua Reinuerini o parari sánderu aianhpini karrituecha jingoni. Inde ambekini jarhuataati ambakiti amiguechani jatsiani engaksïni jarhuataaka meteechani jatsikukurhiani ka ísïri úni.
JATSIASÏNGACHI KÓNTPERATEECHANI ENGACHI JARHUATAAJKA MÁTERUECHANI
18. ¿Andichisï uaantajki eska Markusï ka Timoteu tsípikua jingoni irekaspka?
18 Markusï ka Timoteu uánikua ambeksï úspti para jarhuataani máteruechani ka inde ambe úspti eskaksï tsípikua jingoni irekapiringa ka mámaru ambeksï nitamakuarhini (Úku. 20:35). Markusï iauanisï niraspti aianhpini ka karaspti ambe enga xáni úpka Jesúsi enga Echerirhu jámani japka. Ka Timoteu jarhuataspti Pabluni para kúnguarhikuechani uaxastaani ka erachiichani uinhaperaantani. Seguruchi jarhaska eska Tata Diosï Jeoba kánikua tsípipka imani ambe jimbo enga Markusï ka Timoteu úpka paraksï sánderu marhuakuni.
19. ¿Andisï jukaparhakue eskaksï tumbiicha ísï uaaka eska Pablu na arhiajka ka néna nikuaua engaksï ísï uaaka?
19 ¿Ambejtsïni jorhendasïni ima karteecha enga Pablu Timoteuni karakuapka espiritu santu jimbo? Eska apostoli Pablu kánikua xénchaasïreenga Timoteuni, imeri amigu jémbani enga sapichku japka. Ka ístuchi jorhenguarhisïnga eskakeni Tata Diosï Jeoba kánikua xénchasïnga tʼungini. Ima uékasïndi eskari tsípikua jingoni irekaaka ka eskakeni méntkisï sési nicheaka. Jimbosï xáni jukaparhakueti eskari ísï uaaka eska apostoli Pablu na uandapka ka eskari jánguarhintaaka sánderu marhuakuani erachiichani. Engari ísï úska uaakari tsípikua jingoni irekani iásï ka sánderu orhepatini jatsini imani tsípikuani enga sési jimbo tsípikueka (1 Tim. 6:18, 19).
PIREKUA 80 Exe je na enga xáni sési kámpijka Jeoba
a Pedru xarhatasïreendi ambe enga pʼikuarhereenga, jimbosï úpti sési sési aianguni Markusïni ambe enga xáni úpka Jesúsi, na enga pʼikuarhereenga ka ambe enga uandapka. Jimbosï Markusï imeeri Ebanjeliu jimbo someni karapti na enga pʼikuarhereenga Jesúsi ka no solu ambe enga úpka (Mar. 3:5; 7:34; 8:12).
b Máru nombriichaksï mójtakurhisti.
c AMBE ENGAKSÏ XARHATAJKA IMAJENIICHA: Jiáni enga Pablu ka Bernabé aianhpini nirajka, Markusï jarhuataasïndi paraksï iámindu ambe jatsini. Timoteu nirasïndi kúnguarhikuani ma pʼorhembiani para uinhaperaantani erachiichani.