Májkueni ú je eska ánjeliicha

1, 2. a) ¿Ambe jimbochi no májkueniiski eska ánjeliicha? b) ¿Ambe ka ambe jimbochi májkueniiski?

JIMBOKACHI Tata Diosï Jeobaeri iretarhu jarhaska, ísïiskachi komueska familia ma engachi xénchperajka ka kʼéri ambechi arhisïnga Tata Diosïni. Tata Diosïiri iretarhu no soluchi kʼuiripuecha jarhaska sino ístu uánikua ánjeliicha (Dan. 7:​9, 10). Ka engachi eratsejka ánjeliicheeri ambe, exesïngachi eskachi méntku ménderueniiska eska imeecha. Pori ejemplu imeechaksï orhetku kueraanhaspti (Job 38:​4, 7). Sánderuksï uinhapitiisti, pímbinhasïini ka jurhimbitku jámani jimbokaksï imeecha kʼóru perfektueska (Luk. 9:26).

² Nájkirukachi no májkueniika eska ánjeliicha, jarhasti uánikua ambe engachi újka májkueni úni. Pori ejemplu, juchajtuchi úsïnga xarhataani Tata Diosï Jeobaeri kualidadiichani, jatsikuarheskachi nombri ma, juchajtuchi mámaru jásïiska ka mámaru ambechi úsïnga para Tata Diosïni marhuakuni. Ka ístuchi jatsiska sésikua parachi jucha erakukuarhini ambe úni. Ka ísï eskaksï ánjeliicha juchajtuchi uétarhinchasïnga kómarhini juchaari Tata Kuerajpirini (1 Ped. 1:12).

3. ¿Ambechi uaa jorhenguarhini ánjeliicheeri ambe?

³ Jimbokachi uánikua ambe jimbo májkueniiska eska ánjeliicha, imeecheeri ejemplujtsïni uinhaperantasïndi ka jorhendasïndijtsïni ambakiti ambe. Ini artikulu jimbochi exeni jauaka nénachi uaa májkueni kaxumbitiini eska imeecha, xénchaani kʼuiripuechani, tekaantani ka uinhamu ánchikuarhini paraka kúnguarhikua pímbinhasï jauaka.

ÁNJELIICHAKSÏ KAXUMBITIISTI

4. a) ¿Nénaksï xarhatasïni ánjeliicha eskaksï kaxumbitiiska? b) ¿Andiksïsï ánjeliicha xáni kaxumbitii? (Salmo 89:7).

⁴ Ánjeliicha engaksï sési marhuakujka Tata Diosï Jeobani kaxumbitiistiksï. Nájkirukaksï uánikua ambe míteka, kánikuaksï uinhapitiini ka jánhaskatiinksï, méntkisïksï kurhajchasïndi Tata Diosï Jeobani (Sal. 103:20). Ka úsïndiksï ambe Tata Diosï Jeoba arhiauaka joperuksï no kʼéramakuarhisïndi níjtuksï úrajki uinhapikuani paraksï máteruecha kʼéri ambe exeani. Kánikuaksï sési pʼikuarherasïndi úni ambe enga Tata Diosï Jeoba arhiauaka, asipueri no nema míteni na engaksï arhinhajka (Gén. 32:​24, 29; 2 Rey. 19:35).a Imeechaksï sési mítesti eska Tata Diosï Jeobajkusï jatsika para kʼéri ambe arhinhani. ¿Andiksïsï ánjeliicha xáni kaxumbitii? Jimbokaksï kánikua xénchasïnga Tata Diosï Jeobani ka kánikuaksï janhanharhini (arhinta je Salmo 89:7).

5. Jiáni enga ánjeli jurhimberantapka Juanuni, ¿néna xarhataspi ánjeli eska kaxumbitiispka? (Ístu exe je imajenini).

⁵ Ju je exeni ejemplu ma enga xarhatajka eskaksï ánjeliicha kaxumbitiiska. Uéxurhini 96 jimboisï, ánjeli ma engachi no míteka na enga arhinhajka jánhastaspti apostoli Juanuni (Apok. 1:1). Enga apostoli imani ambe exepka, tinguikuatsespti para kómarhini ánjelini. Joperu ánjeli arhispti: “¡Erokuarhi! ¡Asï jáma indeni ambe úni! Jíjtuni jántspentkusïni jámajka ísï eska tʼu ka chiiti erachiicha […]. ¡Tata Diosïni kómarhi!” (Apok. 19:10). I ánjeli kánikua kaxumbikua xarhataspti ka no uékaspti eska Juanu kʼéri ambe arhipiringa. Níjtu sánderu kʼéri pʼikuarherapi eska Juanu. Jirejiresï arhispti apostolini eska Tata Diosï Jeobanisï kʼéri ambe arhipiringa. Ka nájkiruka ánjeli sánderu ióni marhuakupkia Tata Diosï Jeobani ka sánderu uinhapitiini eska Juanu, kaxumbikua xarhataspti ka arhispti: “Jíjtuni jántspentkusïni jámajka ísï eska tʼu”. Ka ánjeli jurhimberantaspti apostoli Juanuni, joperu no uinhamarhikuspti, sino uékperakua jingoni uandontskuarhekuspti. Jamberi kuenta íntskukuarhepti eska Juanu ísï jámaspka jimboka jukari kʼéri ambe exespka.

6. ¿Nénachi uaa májkueni kaxumbitiini eska ánjeliicha?

⁶ ¿Nénachi uaa májkueni kaxumbitiini eska ánjeliicha? Nóchi jatsiska para kʼéramakuarhini jiáni engachi asignasioni ma uaaka, nijtu uékani xarhatani eskachi sési mítekuska úni ambe ma (1 Kor. 4:7). Ka no sánderu kʼéri pʼikuarherani eska máteruecha nomasi jimbokachi sánderu ióni paxakaia marhuakuni Tata Diosï Jeobani o jimbokachi sánderu uánikua responsabilidadiichani jatsiaska. Sánderu sési, engachi sánderu responsabilidadiichani intsïnhauaka jatsiskachi para ísï exekuarhini eska sánderu sapichu ambe (Luk. 9:48). Ísï eskaksï ánjeliicha, juchajtuchi uékasïnga marhuakuani máteruechani ka no ísï pʼikuastaani eskachi jucha sánderu kʼéri ambeeska eska imeecha.

7. ¿Nénachi uaa kaxumbikua xarhatani engachi konseju ma íntskuaka nemani?

⁷ Ístuchi jatsiska para kaxumbikua xarhatani engachi uékani jauaka konseju ma íntskuni nemani, ia sea erachini ma o juchaari sapiichani. Ka ménisïchi jatsika para jurhimbitku arhiani ambe engaksï no sési úni jaka. Joperu ísï eska ánjeli na uékperakua jingoni jurhimberantapka Juanuni, juchajtuchi jatsiska para jurhimbitku arhiani ka xénchperakua jingoni parachi no no sési pʼikuastaani. Engachi no sánderu kʼéri pʼikuarheraska eska máteruecha, uaakachi konseju ma íntspini Biblia jingoni, janhanharhikua jingoni ka xénchperakua jingoni (Kol. 4:6).

ÁNJELIICHAKSÏ KÁNIKUA XÉNCHAASÏNDI KʼUIRIPUECHANI

8. a) Eska na uandajka Lukasï 15:​10, ¿nénaksï xarhatasïni ánjeliicha eskaksï xénchaasïnga kʼuiripuechani? b) ¿Nénaksï jarhuajpesïni ánjeliicha aianhpikuarhu? (Ístu exe je imajenini).

⁸ Ánjeliichaksï no ísku exeani jarhasïndi kʼuiripuechani, sino uandanhiasïndiksï imeecha jimbo ka xénchaani. Sésiksï pʼikuarherasïndi enga erachi o pirenchi ma móantajka ka kʼuanhatsentani Tata Diosï Jeobani jingoni o enga kʼuiripu ma mítejka jurhimbikueri ambe ka mójtakurhini para úni marhuakuni Tata Diosïni (arhinta je Lukasï 15:10). Ánjeliichajtuksï ístu kánikua jarhuajpesïndi aianhpikuarhu (Apok. 14:6). Nájkirukaksï imeecha no uandontskuarhejka kʼuiripuecha jingoni, jarhuatasïndijtsïni parachi exeantani imeechani engaksï uéjka jorhenguarhini Tata Diosï Jeobaeri ambe. Joperu nóchi uaaka uandani eskajtsïni meru ánjeliicha pásïnga kʼuiripu ma jingoni, jimboka Tata Diosï Jeoba mámaru ambe úrasïnga, komu imeeri espiritu santuni para jarhuatani kʼuiripuni ma imeeri ambe míteni o parajtsïni kʼuiripuecha jingoni páni (Úku. 16:​6, 7). Joperu Tata Diosï Jeoba kánikua úraasïndi imeeri ánjeliichani. Jimbochisï uaaka seguru jarhani eskaksï ánjeliicha juchantsïni jauaka parajtsïni jarhuatani aianhpikuarhu. (Exe je rekuadruni “Imeeri kómarhikuechaksï mókunhantaspti”).b

9. ¿Nénachi uaa májkueni xénchaani kʼuiripuecha eska ánjeliicha?

⁹ ¿Nénachi uaa májkueni xénchaani kʼuiripuechani eska ánjeliicha? Enga kúnguarhikuarhu uandanhantaaka eska nema ménderu Jeobaeri testigueskia, ju je kánikua tsípini ísï eska ánjeliicha ka sési arhini erachini ka xarhatakuni eskachi xénchasïnga (Luk. 15:​4-7; 2 Kor. 2:​6-8). Ka ístu ju je jánguarhintani aianhpini (Ecl. 11:6). Ka ísï eskajtsïni ánjeliicha na jarhuatajka aianhpikuarhu, juchajtuchi uaaka jarhuataani erachiichani. Pori ejemplu, úpiringachi aianhpini imani jingoni enga apenasi ueenani jaka aianhpini o erachi ma jingoni enga jatiriikia o pʼamenchani jarhani.

10. ¿Ambejtsïni jorhendasïni Sareeri eksperiensia?

¹⁰ Ka nájkirukachi nóteru úpiringuia uérani aianhpini, uaakachi seguru jarhani eskajtsïni ánjeliicha seguiriini jauaka jarhuatani aianhpini. Ju je pirenchiiri eksperiensia ma exeni enga India anapueka ka enga Sara arhinhajka.c Enga na 20 uéxurhini páni japkia komu prekursora, pʼamenchaspti ka nóteru úsptia jauarani kamarhu. Jimbosï kánikua kómu pʼikuarhereendi. Joperu tátsekua sési pʼikuarherantaspti jimbokaksï erachiicha jarhuataspka ka imajtu seguirixati Bibliani arhintani. Sara iásï ménderueni aianhpisïndia. Ima iásï telefonu jimbo aianhpisïndia jimboka no úsïnga uaxakani para kartechani uaani. Uandajpasïreendi imeechani enga antesi pʼorhembiauenga ka imeechaksï arhisïreendi eskaksï jarhaspka máteruecha engaksï ístu uékeenga jorhenguarhini Biblieri ambe. Ka máru mesiicha jimbojku, jukari 70 kʼuiripuechani jorhendaaxaptia Biblieri ambe. Sara nóteru andajkuarhisïreendia xáni uánikuechani jorhendaani. Ísï jimbo, arhiasti máru erachiichani eskaksï jarhuatapiringa. Uánikua inde kʼuiripuechaksï niraxatiia tánguarhikuecharhu. Seguruchi jarhaska eskaksï ánjeliicha kánikua sési pʼikuarherasïnga jarhuataani erachiichani engaksï ísïika komueska Sara, engaksï kánikua jánguarhintajka aianhpini.

ÁNJELIICHAKSÏ TEKAANTASÏNDI

11. ¿Andiksïsï ánjeliicha ambakiti ejemplu máe para jucha?

¹¹ Ambakiti ejemplujtsïni ma íntskusïndi ánjeliicha engaksï sési marhuakuni jaka Tata Diosï Jeobani jimbokaksï kánikua tekaantaxaka. Imeechaksï exespti na enga Satanási ka uánikua ánjeliicha nóteru uékapkia kurhajchani Tata Diosï Jeobani (Gén. 3:1; 6:​1, 2; Judasï 6). Biblia uandasïndi ánjeliiri ma enga uarhipepka demoniu ma jingoni enga kánikua uinhapipka (Dan. 10:13). Ístuksï no sési pʼikuarherasïndi jimbokaksï exesïnga eska desde iónisïa kʼuiripuechaksï kánikua no sési nitamakuarhiskia. Desde iónisïa, ánjeliichaksï exestia eskaksï namunitku kʼuiripueska engaksï erakujka marhuakuni Tata Diosï Jeobani. Joperu nóksï jurajkuxati Tata Diosï Jeobani ka seguirixatiksï kánikua tsípikua jingoni marhuakuni. Mítestiksï eska niáraaka ima jurhiatikua enga Tata Diosï kʼamajkuaka iámindu no sési jásï ambe.

12. ¿Ambejtsïni jarhuataa tekaantani?

¹² ¿Nénachi uaa ísï tekaantani eska ánjeliicha? Nájkirukachi exeni jaka eska no sési jánhaskuarhixaka ka nóchi jurajkunhani parachi marhuakuni Tata Diosïni, uaakachi juchajtu seguru jarhani eska Tata Diosï kʼamajkuaka no sési jásï ambe. Ísï jimbo, ísï eskaksï ánjeliicha engaksï no méni jurajkujka Tata Diosï Jeobani, ju je juchajtu “seguiriini jarhani sési ambe úni” (Gal. 6:9). Ka jimbokajtsïni Tata Diosï Jeoba aiachiska eskajtsïni íntskuaka uinhapikua parachi no kuatantani, ju je kurhakuni espiritu santu parachi úni tekaantani ka tsípikua jingoni irekani (1 Kor. 10:13; Gal. 5:22; Kol. 1:11). Ka engaksïni nema no jurajkuni jaka parajtsï marhuakuni Tata Diosï Jeobani, mintsika je imani ka asï ché je. Ima méntkisï chánksïni jingoni jauati ka íntskuatiksïni uinhapikua (Ebr. 13:6).

ÁNJELIICHAKSÏ JARHUAJPESÏNDI PARAKA KÚNGUARHIKUA PÍMBINHASÏ JAUAKA

13. ¿Náki ánchikuarhitaksï úxaki ánjeliicha ini últimu jurhiatikuecha jimbo? (Mateu 13:​47-49).

¹³ Ini últimu jurhiatikuechani jimbo, Tata Diosï Jeoba ánchikuarhita ma íntsaasti ánjeliichani (arhinta je Mateu 13:​47-49). Jimbokachi uérasïnga aianhpini, uánikua kʼuiripuechaksï niárasïndi míteni Tata Diosïiri ambe. Máruksï kánikua mójtakurhisïndi paraksï kristianu úkuarhini, joperu máru nómbe. Ísï jimbo, ánjeliichaksï támu peeraasïndi ‘no sési úriichani ka ístuksï támu peeraasïndi imeechani engaksï sési jámajka’, paraka kúnguarhikua pímbinhasï jauaka. Joperu i ambe no arhikuekasïndi eska ima enga kʼéri pekadu ma niátaka nóteru uaakia kʼuanhatsentani, nijtu arhikuekajki eska no ma uandanhiata jauaka kúnguarhikuarhu. Joperuchi uaaka seguru jarhani eskaksï ánjeliicha kánikua ánchikuarhixaka paraksï kúnguarhikuecha pímbinhasï jarhani.

14, 15. ¿Nénachi uaa májkueni úni eska ánjeliicha paraka kúnguarhikua pímbinhasï jauaka? (Ístu exe je imajenini).

¹⁴ ¿Nénachi uaa májkueni úni eska ánjeliicha paraka kúnguarhikua pímbinhasï jauaka? Engachi jánguarhintaaka sési jámani ka sési pájperani Tata Diosï jingoni. Mándani arhini, jatsiskachi para kuájchakuni mintsitani ka uaakachi ísï úni engachi sési erakuauaka amiguechani ka no kúrhiani imeechani engaksï uaaka úni eskachi nóteru sési pájperaakia Tata Diosï Jeoba jingoni. Ka ísï, pímbinhasï jauati kúnguarhikua (Sal. 101:3). Ístu, uaakachi jarhuataani juchaari erachiichani parakaksï seguiriini jauaka Tata Diosï Jeobani marhuakuni. Pori ejemplu, engachi mítepiringa eska erachi o pirenchi ma kʼéri pekadu ma úska, arhipiringachi eska uandontskuarheaka orhejtsïkutiicha jingoni jimbokachi xénchasïnga. Ka enga no ísï uaaka, juchachi jatsiska para aianguani orhejtsïkutiichani. Uékasïngachi eska sóntku jarhuatanhaaka erachi o pirenchi enga nóteru xáni sési pájperani jakaia Tata Diosï jingoni (Sant. 5:​14, 15).

¹⁵ Joperu máruksï petanhantasïndi kúnguarhikuarhu jimbokaksï kʼéri pekadu ma niátasïnga. Enga i ambe úkuarhijka, nóteruchi kúnguarhisïngia imani jingoni (1 Kor. 5:​9-13).d Joperu ístuchi xarhatakuni jarhasïnga xénchperakua jimboka inde ambe úsïnga eska eratsentaaka ka uékani kʼuanhatsentani. Ini ambe úparini, kúnguarhikua pímbinhasï jarhasïndi. Ka enga erachi o pirenchi kʼuanhatsentajka, kánikuachi tsípisïnga ísï eska Tata Diosï Jeoba ka ánjeliicha (Luk. 15:7).

16. ¿Nénajtsï uaa májkueni úni eska ánjeliicha?

¹⁶ Kʼéri kóntperata máesti engajtsïni Tata Diosï Jeoba jorhendajka ánjeliicheeri ambe ka engajtsïni jurajkujka imeecha jingoni ánchikuarhini. Ju je jánguarhintani májkueni kaxumbitiini eska ánjeliicha, xénchaani kʼuiripuechani, tekaantani, sési jámani ka pímbinhasï jatsini kúnguarhikuani. Engachi májkueni úska eska ima ánjeliicha engaksï sési marhuakuni jaka Tata Diosïni, uaakachi méntkisï imani familiarhu jarhani enga Tata Diosï Jeobani marhuakujka.