Eska uandajpauaka orhejtsïkutiichani

1. ¿Néna xarhataski Tata Diosï Jeoba eska xénchasïnga iámindu imeeri karichiichani?

TATA Diosï Jeoba kánikua xénchaasïndi imeeri karichiichani enga ima piáka Jesúsiiri iurhiri jingoni ka arhiaspti kúnguarhikuarhu anapu orhejtsïkutiichani eskaksï kuidariuauaka (Úku. 20:28). Tata Diosï Jeoba uékasïndi eskaksï orhejtsïkutiicha sési káuaka ka eskaksï uinhaperantauaka ka kuájchakuani paraksï no jurajkuni Tata Diosïni. Orhejtsïkutiichaksï ísï úsïndi eska Jesúsi na juramukuaka ima enga jindeeka kúnguarhikuarhu anapu orhejtsïkuti (Is. 32:​1, 2).

2. ¿Tata Diosï Jeoba neechani sánderu pendienti paasïni? (Ezequiel 34:​15, 16).

² Tata Diosï Jeoba kánikua uandanhiasïndi imeeri karichiichani jimbo ka sánderia imeechani jimbo engaksï no sési nitamakuarhijka. Ka orhejtsïkutiichani úraasïndi para jarhuataani imeechani engaksï no sési ambe újka (arhinta Ezequiel 34:​15, 16). Jiájkani, engachi uéjka eskajtsïni nema jarhuataaka, ju je kómarhini Tata Diosïni jimbokajtsïni ima uékasïnga jarhuatani. Joperu ístu Tata Diosï uékasïndi eskachi niuaka imeecha jingoni engaksï kúnguarhikuarhu anapuechani exeani jarhajka ka jorhendaani parajtsïni jarhuatani (Éfes. 4:​11, 12).

3. ¿Andijtsïnisï iáminduechani marhuachea i jorhenguarhikua?

³ Ini artikulu jimbochi exeni jauaka na enga Tata Diosï Jeoba úraajka orhejtsïkutiichani parajtsïni jarhuatani sési jarhani Tata Diosï Jeoba jingoni. Ka arini ambechi mókuantani jauaka: “¿Kánchi jatsiski para nirani uandontskuarheni orhejtsïkutiicha jingoni? ¿Andichisï jatsi para ísï úni? ¿Ka nénajtsïni jarhuataa imeecha?”. I artikulu ístu marhuakuauati imeechani engaksï sési marhuakuni jaka Tata Diosïni, jarhuataatijtsïni eskachi sánderu jukaparharaaka na enga Tata Diosï úraajka orhejtsïkutiichani parajtsïni jarhuatani ka jorhendaatijtsïni ambe engachi jatsika para úni jiáni engachi uétarhinchaaka imeecheeri jarhuajperatani.

¿KÁNCHI JATSISKI PARA UANDONTSKUARHENI ORHEJTSÏKUTIICHA JINGONI?

4. ¿Nénachi míteski eska Santiagu 5:​14-16, 19, 20 ima kʼuiripueri uandaxaka enga no sési jaka Tata Diosïni jingoni? (Ístu exea imajeniichani).

⁴ Santiagu, Jesúsiiri chúxapati uandaspti na enga Tata Diosï Jeoba úraajka orhejtsïkutiichani parajtsïni jarhuatani. Ima karaspti: “¿Jarhaski nema chánksïni jingoni enga pʼamenchani jaka? Jiájkani eska kúnguarhikuarhu anapu orhejtsïkutiichani uandajpauaka” (arhinta Santiagu 5:​14-16, 19, 20). Ixú Santiagu ima kʼuiripueri uandaxati enga no sési jaka Tata Diosïni jingoni, jimboka uandasïnga eska orhejtsïkutiicha jingoni nirasïnga ka no doktori ma jingoni. Ka ístu, eska sési pʼikuarherantasïnga enga puáminhantaajka pekaduechani. Ísï eskachi na nirajka doktori ma jingoni engachi pʼamenchajka ka aianguni na engachi p’ikuarherajka ka imajtsïni arhini ambe engachi jatsika para úni, májkuenchi nirasïnga orhejtsïkutiicha jingoni engachi no sési jarhajka Tata Diosïni jingoni. Aianguasïngachi na engachi p’ikuarherajka ka imajtsïni Biblia jingoni jarhuatasïndi.

5. ¿Nénachi uaa míteni sinchi útasï sési jarhaski Tata Diosï Jeobani jingoni?

⁵ Santiagu kapitulu 5 arhisïndi eskachi jatsiska para arhiani orhejtsïkutiichani eskajtsïni jarhuataaka engachi exeaka eskachi nóteru xáni sési jarhaskia Tata Diosïni jingoni. Ka jatsiskachi para ísï úni ante dechi nóteru mintsikania Tata Diosïni. Ka ístu uétarhisïndi jingontku jámani, jimboka Biblia uandasïnga eskachi úpiringa eratseni eskachi sési jarhaska ka jini no ísïini (Sant. 1:22). Indeni ambeksïsï nitamakuarhipti Sardisi anapu erachiicha. Imeechaksï eratsesïreendi eskaksï sési jarhaspka Tata Diosïni jingoni, joperu Jesúsi arhiaspti eska no ísïispka (Apok. 3:​1, 2). Engachi exeska eskachi útasï tsípikua jingoni marhuakuxaka Tata Diosï Jeobani eska jiáni engachi itsï atakuarhika, arhikuekasïndi eskachi sési jarhaska (Apok. 2:​4, 5). Ju je eratsentani: “¿Seguirixaki tsípikua jingoni arhintasïni Bibliani ka eratsentani? ¿No kueratasïni tánguarhikuecharhu ka sési prepararikuarhisïni? ¿Seguirixaki jukaparharani aianhpikuani o sánderuni tsitisïnia tsípikuarhini ka jatsikuarhekua ambe jatsini?”. Ambe engachi mókuntaska xarhataati sinchi sánhani arhixaki jurajkuni Tata Diosïni. Ka engachi no ma ambe úska parachi sési peentani indeni ambe o engachi no sési ambe niátakia, jiájkani jatsiskachi para uandontskuarheni orhejtsïkutiicha jingoni.

6. ¿Ambe jatsiski para úni nema enga k’éri pekadu ma niátaka?

⁶ Enga nema k’éri pekadu ma újka enga jimbo úpiringa petanhantanhani kúnguarhikuarhu, jatsisti para uandontskuarheni orhejtsïkuti ma jingoni (1 Kor. 5:​11-13). Inde kʼuiripu uétarhinchasïndi eska jarhuatanhaaka para ménderu sési pájperantani Tata Diosïni jingoni. Tata Diosï Jeoba imani kʼuiripuechantkusï puákuantajti engaksï úkuecha jingoni xarhatajka eskaksï sési jimbo moántaskia. Pori ejemplu, enga nirajka ka aianguani orhejtsïkutiichani eska k’éri pekadu ma niátaska (Úku. 26:20).

7. ¿Ístuksï neecha uétarhinchasïni eskaksï orhejtsïkutiicha jarhuatauaka?

⁷ Orhejtsïkutiichaksï no solu imeechani jarhuatasïndi engaksï k’éri pekadu ma niátajka, sino ístu, imeechani engaksï nóteru xáni sési marhuakuni jakaia Tata Diosïni (Úku. 20:35). Pori ejemplu, ju je eratseni eskari uékaxaka no sési niátani ka eskari ísï pʼikuarherasïnga enajkiri no uaa pʼíngukuarhini jimbokari ante de Tata Diosï Jeobani míteni droga amberi úreenga, pornografia ambe exeni ori ísku jándikua ambe niátani. Joperu asï uandanhia, jimbokari no jandiajku jarhaska. Uaakari aianguni orhejtsïkutini ma engari míteka eskakeni meru kurhajchaaka. Imakeni jarhuataati ambakiti konsejuecha jingoni ka miátantaatikini eskari seguiriini jauaka sési pájperani Tata Diosï Jeoba jingoni engari no no sési ambe úska (Ecl. 4:12). Engari no sési p’ikuarherajka jimbokari útasï eratsesïnga imani ambe enga no sési jaka, orhejtsïkutiichaksïni jarhuataati ka miátantani eskari kánikua jukaparharasïnga sési pájperani Tata Diosï Jeoba jingoni jimborisï ísï p’ikuarherajka ka eskari no mintsinharhikuarhisïnga (1 Kor. 10:12).

8. Méni engachi no sési újka ambe ma, ¿jatsiskichi para aianguani orhejtsïkutiichani?

⁸ Nóri jatsiska para aianguani orhejtsïkutiichani méni engari no sési ambe uaaka. Pori ejemplu, engari no sési pʼikuastapiringa nemani ka kánikuari ikiani, úpiringari ísï úni eska Jesúsi na uandapka ka orhetari nirani imani erachini o pirenchini jingoni engari arhirperaka parari sési peentani ambe ma, enbesi deri orhejtsïkutiicha jingoni nirani (Mat. 5:​23, 24). Ísturi uaaka exeni ambe engaksï publikasioniicha uandajka para ma sánderu iatsitakuarhu jámani, sánderu tekaantskua jatsini ka úni pʼíngukuarhini. Joperu engakeni inde ambe no uaaka jarhuatani, uaakari arhini orhejtsïkutini ma eskakeni jarhuataaka. Ima ísï uaati eska úpka Filipusï anapu erachi ma enga Pablu arhipka eska jarhuatapiringa Ebodiani ka Síntikeni parakaksï sési pájperantapiringa (Filip. 4:​2, 3).

¿ANDICHISÏ JATSI PARA UANDONTSKUARHENI ORHEJTSÏKUTIICHA JINGONI?

9. Engachi k’éri pekadu ma niátaska, ¿andichisï jatsi para orhejtsïkutiicha jingoni uandontskuarheni nájkirukachi kʼuratseni jauaka? (Proverbios 28:13).

⁹ Engachi exeni jaka eskachi meru nóteru uaakia pʼíngukuarhini, ju je kurhakuni Tata Diosï Jeobani eskajtsïni jarhuataaka (Sal. 94:18). Ka engachi k’éri pekadu ma niátakia, jatsiska para uandantani ka nóteru ísï únia parajtsïni Tata Diosï pʼamojkuni ka puáchentani (arhinta Proverbios 28:13). Jamberichi kʼuratseni jauaka o exeni eskachi uétarhinchasïnga sánderu mintsikani ka balori jatsini para úni orhejtsïkutiicha jingoni uandontskuarheni. Joperu ju je no mirikurhini eskajtsïni Tata Diosï Jeoba íntsaaska orhejtsïkutiichani parajtsïni jarhuatani ka uinhaperantani ka parachi sési jarhani Tata Diosïni jingoni. Ísï jimbo, engachi nirajka imeecha jingoni, xarhatani jarhasïngachi eskachi mintsikasïnga Tata Diosïni ka eskachi kurhandirasïnga.

10. ¿Ambe úkuarhia engachi jískaska juchaari pekaduechani?

¹⁰ Engachi nirajka orhejtsïkutiicha jingoni parajtsïni jarhuatani, kánikuajtsïni marhuachesïndi ¿a no? Joperu engachi no uandantajka ambe engachi no sési úka, kánikuajtsïni no sési nichesïndi. Pori ejemplu, rei Dabidi enga ima no uandantapka ambe enga no sési úpka, nóteru sési jarhasptia Tata Diosïni jingoni, no sési pʼikuarhinhesïreendi ka no sési nitamakuarhini (Sal. 32:​3-5). K’éri pekadu ma niátani ísïisti komu atakuarhini ka engachi no úraska imani sïpiatini enga uétarhijka, sánderujtsïni no sési nicheati. Tata Diosï Jeoba mítesti indeni ambe ka jimbojtsïnisï arhijti eskachi niuaka orhejtsïkutiicha jingoni parajtsïni jarhuatani (Is. 1:​5, 6, 18).

11. ¿Ambe máteru ambe úpirini úkuarhini engachi jískaska pekadu ma?

¹¹ Engachi jískaska juchaari pekaduni, úpiringachi no sési úkuani máteruechani. Pori ejemplu, kúnguarhikuarhu nóteru sési ánchikuarhini japirindia Tata Diosïiri espiritu santu ka nóteru japirindia pínandikua (Éfes. 4:30). Ístu, engachi niáraska míteni eska nema kúnguarhikuarhu k’éri pekadu niátaska, jatsiskachi para arhini eskachi aianguauaka orhejtsïkutiichani.a Ju je no mirikurhini eska engachi no ísï úska, asta jucha jamberi úpiringa kulpa jatsini (Lev. 5:1). Xénchani Tata Diosï Jeobani jarhuataatijtsïni parachi jurhimbiti uandantani ambe enga úkuarhika. Ísïchi jarhuajpeni jauaka paraka kúnguarhikua pímbinhasï jauaka ka paraka ima kʼuiripu enga k’éri pekadu ma niátaka ménderu sési pájperantaaka Tata Diosï Jeoba jingoni.

¿NÉNAJTSÏNI JARHUATASÏNI ORHEJTSÏKUTIICHA?

12. ¿Nénaksï jarhuataasïni orhejtsïkutiichani imeechani engaksï no káni sési marhuakuni jaka Tata Diosïni?

¹² Biblia arhiasïndi orhejtsïkutiichani eskaksï jarhuatauaka imeechani engaksï no káni sési marhuakuni jaka Tata Diosïni (1 Tes. 5:14). Engari tʼu exejka eskari no sési ambe niátaska, jamberiksïni orhejtsïkutiicha kurhamarhiati ambe paraksï míteni na engari eratsejka ka pʼikuarherani (Prov. 20:5). Ka kánikuari jarhuatauaka engari jurhimbitku aianguaska iámu ambe nájkirukari úkua jukanchaka jimboka jimeesïsï no pʼindenhaska indeeri ambe uandanhani o jimbokari no xáni uandariiska o jimbokari kʼuratsexaka. Ka asï uandanhia engari no úska pʼímukukuarhini ambe engari uandaaka ka na engari uandaaka (Job 6:3). Orhejtsïkutiichaksïni jingontku kurhajchaati paraksï úni iámu ambe míteni ante deksïni konseju ma íntskuni (Prov. 18:13). Imeechaksï mítesti eska tiempu uétarhisïnga para úni jarhuatani erachini ma, ka eskaksï ménichani jatsisïnga para uánikua uelta uandontskuarheni erachi ma jingoni paraksï úni jarhuatani.

13. ¿Ambe máteru ambeksï uaa úni orhejtsïkutiicha parajtsïni jarhuatani? (Ístu exea imajeniichani).

¹³ Orhejtsïkutiichaksï jánguarhintaati paraksïni no imani ambe arhini engakeni sánderu no sési pʼikuastaaka. Sánderu sési, kómarhijpicheatiksïni ka t’uri uaaka exeni na enga xáni marhuajka kómarhikua jimbokari sési pʼikuarherantaaka. Ístuksïni aseiti atajtsïkuati Tata Diosï Jeobaeri nombri jimbo (Sant. 5:​14-16). I aseiti Tata Diosïiri Karakateesti enga jurhimbikua ambe uandajka. Ísï jimbo, orhejtsïkutiichaksï sési úraati Bibliani paraksïni sési pʼikuastantani, uinhaperantani ka paraksïni jarhuatani sési pájperantani Tata Diosï Jeoba jingoni (Is. 57:18). Biblia jingonksïni íntskuati konseju paraksïni uinhaperantani ka parari seguiriini jarhani jánguarhintani úni ambe enga sési jaka. Tata Diosï Jeoba imeechani úrauati parakeni arhini: “I jindesti xanharu. Jimini jáma” (Is. 30:21).

14. Ísï eska Galasia 6:1 na uandajka, ¿nénaksï jarhuatasïni orhejtsïkutiicha imani erachini o pirenchini enga no sési ambe niátaka? (Ístu exea imajeniichani).

¹⁴ (Arhinta Galasia 6:1). No sési ambe niátani arhikuekasïndi no kurhajchani Tata Diosïiri juramukua ma. Ka uaati sapichitu ambeeni o asta k’éri pekadu ma. Joperuksï orhejtsïkutiicha xénchaasïndi erachiichani jimboksïsï jánguarhintajti iatsitakuarhu jarhuatani imani enga no sési ambe niátaka. Inde uandakua enga ísï tradusirikuarhika “jarhuatani”, arhikuekasïndi na enga nema ma iatsitakuarhu sési pékuntajka únini imani kʼuiripuni enga pʼitsixurhajka. Ambakiti doktori ma jánguarhintasïndi iatsitakuarhu sési pékuntani kʼuiripuni enga pʼitsixurhajka para no pʼamerani. Ka orhejtsïkutiichaksï májkueni kámasïndi imani erachini enga no sési ambe niátaka, sésiksï kámasïndi paraksï no sánderu no sési pʼikuastani. Ístu Biblia arhisïndi mándani orhejtsïkutiini eska xéparini jámaaka, jimboka indejtu no perfektueska ka ménisï uaati no sési ambe niátani. Ísï jimbo, enbesi de orhejtsïkuti ma arhinchani o sánderu k’éri ambe exekuarhini ka no sési kámani erachini, jánguarhintaati kaxumbitiini ka pʼamojkuni imani erachini (1 Ped. 3:8).

15. ¿Ambechi uaa úni engachi uandanhiata ma jatsiaka?

¹⁵ Juchachi uaaka mintsikaani orhejtsïkutiichani jimbokaksï imeecha míteska eskaksï no jatsiska para uandantani ambe engachi aianguauaka. Ístu, jorhendakataksï jarhasti parajtsïni Biblia jingoni íntskuani konsejuechani ka no ambe engaksï imeecha eratsejka, ka ístu paraksï pendienti jarhani juchantsïni jimbo ka jarhuatantsïni uandanhiateecha jingoni (Prov. 11:13; Gal. 6:2). Ísïisti, orhejtsïkutiichaksï mámaru jásïisti ka máruksï ióni páxatiia orhejtsïkutiini. Joperuchi uaaka aianguani ambe engachi nitamakuarhini jauaka. Joperu nóchi jatsiska para mándani orhejtsïkuti jingoni nirani jarhani astakajtsïni máechakua arhiaka ambe engachi jucha uéjka kurhaani. Nóchi uékasïnga ísïini eska ima kʼuiripuecha engaksï kurhandinchajka ambe engaksï imeecha uéjka ka nóksï uékani kurhaani ambakiti jorhentperakuani enga Bibliarhu pʼitakata jaka (2 Tim. 4:3). Engachi jucha uéjka aiangukuarhini ambe ma orhejtsïkutini ma, jamberijtsïni ima kurhamarhiaka sinchi aianguskia indeni ambe máteru orhejtsïkutiini ka náki konsejujtsïni íntskuski ima, ka jimboka i orhejtsïkuti kaxumbitiiska jamberi arhiati máteru orhejtsïkutiini eska jarhuataaka (Prov. 13:10).

AMBE ENGACHI JATSIKA PARA ÚNI MÁNDANI JUCHA

16. ¿Náki responsabilidadichi jatsiski mándani jucha?

¹⁶ Nájkirukajtsïni orhejtsïkutiicha kuidarijka ka íntsaantsïni konsejuechani, nójtsïni arhisïndi ambechisï jatsi para úni. Mándani juchachi jatsiska responsabilidadi parachi pauani pauani xarhatani juchaari uandakuecha ka úkuecha jingoni eskachi xénchasïnga ka eskachi uékasïnga sési pʼikuastani Tata Diosï Jeobani. Ka imajtsïni jarhuataati ambakiti ambe erakuni úni ka méntkisï kurhajchani (Rom. 14:12). Ísï jimbo, orhejtsïkutiichaksï Bibliani úrasïndi parajtsïni jarhuatani kurhanguni na enga exejka ambe ma Tata Diosï Jeoba ka eskachi jucha exeaka ambechisï uaa. Ísï jimbo, engachi eratsentaaka imani konsejuechani engaksï Bibliarhu jaka ka néna engachi uaaka úraani, jorhenguarhiakachi ísï eratseni eska Tata Diosï Jeoba ka imani ambechi uaaka enga sési jaka (Ebr. 5:14).

17. ¿Ambe uékasïni Tata Diosï Jeoba eskachi uaaka?

¹⁷ K’éri kóntperata máesti Tata Diosï Jeobaeri karichini, ima axasti ‘ambakiti karichi erangutini’ enga jindeeka Jesúsi, parajtsïni euajpintani ka jatsini sésikua parachi irekani para méntkisï (Juanu 10:11). Ístu, úrasïndi kúnguarhikuarhu anapu orhejtsïkutiichani para ísï úni eskajtsïni na aiachikia: “Jíksïni intsauaka karichi erangutiichani engaksï imani ambe uaaka ambe engani ji uéjka, ka imaksïni jorhendaati ka jánhastaatiksïni enga ísïiuaka enajkiksïni t’irekua íntskua” (Jer. 3:15). Ísï jimbo, na uéjkichi nóteru xáni sési marhuakuni jarhania Tata Diosïni ochi no sési jarhani imani jingoni, ju je uandajpaani orhejtsïkutiichani parachi arhiani eskajtsïni jarhuataaka. Ka ísïchi exeaka na enga Tata Diosï Jeoba sési úraani jaka orhejtsïkutiichani parajtsïni jarhuatani.