Tata Diosï Jeobajtsïni jarhuataspti tsikini nani engachi ikaranheenga

Mats ka Ann-Catrin nirasptiksï Galaadiiri jorhentperakuarhu 1979 jimbo, ka jima uératinksï marhuasti Irán, Mauricio, Myanmar, Tanzania, Uganda ka Zaire. Jack Redford, erachi ma enga Galaadi jorhentpienga, íntsaaspti indeni konsejuni enga kánikua jarhuataapka méni engaksï mótsienga máteru asignasionirhu. Ju je kurhaani imeecheeri eksperiensia.

Aiangujtsïni je nénajtsï mítespi Tata Diosïiri ambe

Mats: Juchiiti taati Polonia irekaspti enga Segunda Guerra Mundial úkuarhipka, ka jima exespti eska Iglesia katolika no úsïreenga eska na jorhentpienga. Joperu, ima uandasïreendi: “Jati relijioni ma enga sési jimbo jorhentpijka ambe enga ísïika”. Tiempu jingoni exespka eska ísïipka. Tsitisïreenga piaani libruechani engaksï úrakateepkia, ma jurhiatikua piákuarhispka libru asuli ma enga arhinheenga La verdad que lleva a vida eterna. Kánikua tsitispka ini libruni ka ma chúrikua jimbojku iámu arhintaspka. Ka pauandikua seguru jarhaspka eskani mítespkia ambe enga ísïika.

Ka abrili 1972 uératini uánikua publikasionichani arhiantaspka Jeobaeri testiguecheeri ka kurhanguspkia ambe engani antesi uékeenga míteni Biblieri ambe. Ísï pʼikuarheraspka eska ima achamasï enga Jesúsi uandapka enga exentapka perla ma ka íntspikuarhini iámu ambe para piáni perlani. Jíjtuni májkueni úspka, erakuspka marhuakuni Tata Diosïni enbesi de nirani unibersidadirhu parani doktoriini (Mat. 13:​45, 46). Ka itsï atakuarhiska 10 de disiembrini 1972 jimbo.

Ma uéxurhini jimbo, juchiiti taatiicha ka juchiiti ermanu sánderu sapichu niárastiksï míteni Biblieri ambe ka ístuksï itsï atakuarhispti. Juliu de 1973 jimbo prekursori regulari úkuarhispka. Juchiiti kúnguarhikuarhu jarhaspti prekursora ma enga kánikua sési jáxepka ka enga sési marhuakuni japka Tata Diosïni, arhinhasïreendi Ann-Catrin. Tsitijperaspkachi ka 1975 jimbo tembuperaspkachi. Tʼámu uéxurhinchi marhuaspka jini Strömsund, Suecia nani enga kánikua sési jándepka jimaksï uánikua kʼuiripuechaksï uékasïreendi jorhenguarhini Biblieri ambe.

Ann-Catrin: Juchiiti taati jiáni ueenaspti jorhenguarhini Biblieri ambe enga na kʼamarani japkia estudiarini unibersidadirhu jini Estocolmo. Nájkirukani ji solu tresi mesi jatiriipka, imarini paasïreendi tánguarhikuecharhu ka aianhpikuarhu. Joperu mama ikiasïreendi ka uékasïreendi xarhatani eska no ísïiska ambe engaksï jakajkujka Testiguecha, joperu no úspti. Tiempu jingoni imajtu itsï atakuarhispti. Ka ji jiáni itsï atakuarhispka engani 13 jatiriipka, ka engani 16 jatiriipkia, prekursora úkuarhispka. Engani na Umeå marhuapkia, jima enga kánikua uétarhienga para aianhpinhani, prekursora espesiali únhaspka.

Engani na uambuchapkia Mats jingoni, uánikua kʼuiripuechanchi jorhendaaspka Biblieri ambe. Ma jindeesti Maivor, uátsï ma enga jurajkupka deportini para sánderu marhuakuni Tata Diosï Jeobani. Maivor ka juchiiti ermana sánderu sapichu, márkuksï prekursoreespti. Uéxurhini 1984 jimbo tsimarhanksï niraspti Galaadi ka misionereestiksï Ecuador.

Uápurisïjtsï marhuaskia komu misioneruecha. ¿Ambeksïni jarhuataski “Tsikini nani engajtsï ikaranheenga”?

Mats: Somenijtsïni “móskuspti”. Joperu ma ambe engajtsïni jarhuatapka “pʼindeni” nani engachi axanheenga para marhuani jindeespti méntkisï ísï úni eska Jesúsi na jámapka (Kol. 2:​6, 7). Pori ejemplu, jánguarhintasïreengachi ísï irekani eska jima anapu erachiicha nani engachi niáreenga marhuani. Uékasïreengachi jorhenguarhini májkueni jámani ka eratseni eska imeecha. Engachi jánguarhinteenga ísïini eska Jesúsi, sánderu no úkua jukasïreendi nani uéjki marhuakuni Tata Diosï Jeobani ka tsípikua jingoni (Sal. 1:​2, 3).

Ann-Catrin: Paraka anhatapu ma enga móskunhajka uaaka seguiriini kʼéni uétarhinchasïndi eska jurhiata niárakuaka. Para jucha Tata Diosï Jeoba ísïisti komueska jurhiata (Sal. 84:11). Na engajtsïni sési kámeenga ka xénchani erachiicha, kʼéri kóntperata máespti para jucha. Pori ejemplu, nájkiruka juchaari kúnguarhikua sapichuepka jini Teherán (Irán) erachiichaksï ísï sési kámpisïreendi eska ima kʼuiripuecha enga Biblia uandaajka. Tsitipiringachi Irán pakarani joperu juliu 1980 jimbo, gobiernujtsïni nóteru jurajkusptia para aianhpini ka arhisptijtsïni eskachi 48 ora jimbo tʼuini uéakuntapiringia paisirhu, ka jimbojtsïnisï África axapti jini Zaire enga iásï arhinhajkia República Democrática del Congo.

Engani mítepka eskajtsïni África axapiringa, pʼiáraspka uerani. Chésïreenga jini nirani akuitsiicha ka pʼamenchakuecha jimbo. Joperu tsimani amiguecha engaksï ióni marhuapka jima, arhisptijtsïni: “¿Andi chá méni marhuaskia jima? ¡Asï jáma je chéni! Seguruchi jarhaska eskajtsï kánikua tsitiaka”. Ka ísïispti. África anapu erachiichaksï kánikua xénchpetiisti. Engachi na seisi uéxurhini japkia jima, gobiernujtsïni nóteru jurajkusptia aianhpini, jatsispkachi para uéakuntani Zaire. Joperuni ji ískuni pakaraspka engani kurhakuni japka Tata Diosï Jeobani eskajtsïni jurajkupiringa África pakarani jimbokani ueenani jámani no uékasïreenga jima nirani.

Ini uéxurhiniichani jimbo, ¿náki kóntperatechantsï niáraski jatsiani?

Mats: Ma ambe engani ji miájka jindeesti na engachi xáni sési pájpereenga máteru paisirhu anapu misioneruecha jingoni. Ka ístuchi kánikua tsípisïnga jimbokachi niáraska asta 20 kursuechani jatsiani mándani jucha. Miásïnga na engajtsïni xáni xéncheenga ka sési kámani África anapu erachiicha. Engachi Tanzania japka kúnguarhikuechani pʼorhembiani, ménisïchi erachiicho jamukuteni peerasïreenga juchaari kombini enga ístu marhuauenga parachi kʼuíni, ka erachiichajtsïni kánikua sési kámasïreendi ka jukari ambejtsïni íntskusïreendi (2 Kor. 8:3). Ambe ma engachi kánikua tsitienga jindeesti arhutani tiempu parachi uandontskuarheni. Pauani pauani, ante dechi nirani kʼuíni, Ann-Catrin ka ji uandantasïreengachi ambe engachi xáni nitamakuarhienga ima jurhiatikua ka diosmaiamukuachi arhisïreenga Tata Diosï Jeobani indeni ambe jimbo.

Ann-Catrin: Kánikua tsitispka uápurisï anapu erachiichani míteani. Ístuchi jorhenguarhiaska máru idiomechani komu fransesi, luganda, persa ka suajili ka exeskachi eskaksï kʼuiripuecha mámaru járhati pʼindekuechani jatsiaska. Ístuchi jarhuataaspka erachiichani paraksï mámaru ambe jorhenguarhini, jatsiaspkachi amiguechani ka kánikua tsípikua jingonchi marhuakuska Tata Diosï Jeobani imeecha jingoni (Sof. 3:9).

Ístuchi exeska mámaru ambe ka sési jásï ambe enga Tata Diosï Jeoba kueraaka. Engachi asignasioni ma intsïnheenga, exesïreengachi eska Jeoba méntkisï jima jarhasïreenga parajtsïni jarhuatani, ima jindeesti engajtsïni orhechipeenga. Iámindu kóntperatechani engachi niáraka jatsiani imani jimboesti.

¿Nénajtsï úski orhepani uérakuni imani ambe engajtsï úkua jukanchani japka?

Mats: Iámindu ini uéxurhiniicha jimbo jatsispkachi para orhepani uérani pʼamenchakua ambe jimbo komu malaria (paludismo). Ka juchiiti uarhiiti Ann-Catrin ménichani niáraspti operarinhani. Ka ístu juchiiti taatiichaksï jatiriixaptia. Joperu juchaari ermanuechaksï tekaantskua ka uékperakua jingoni kuidariuaspti ka kánikuachi agradesidu jarhaska indeni ambe jimbo (1 Tim. 5:4). Ménichanchi no sési pʼikuarherasïreenga jimbokachi iauani jarhaspka ka nóchi úsïreenga uánikua ambe úni juchaari taatiicha jimbo.

Ann-Catrin: 1983 jimbo, engachi Zaire japka, kólera pʼiraspka ka uinhamu pʼamenchaspka. Doktori arhispti juchiiti acheetini: “¡Iáiasï pa máteru paisi jimbo!”. Ísï pauandikua niraspkachi Suecia imani abioni jimbo enga mámaru ambe páni japka jimbokachi imantkusï exentapka.

Mats: Nájkirukajtsïni doktoriicha arhipka eska Ann-Catrin no úpiringa tsinakuarhini, úspti tsinakuarhini. Joperuchi kánikua ueraspka jimbokachi eratsesïreenga eskachi nóteru úpiringia misionerueni. Ka ma uéxurhini tátsekua kʼuanhatsentaspkachi Zaire ka ueenaspkachi marhuani kúnguarhikua sapichu ma jimbo jini Lubumbashi enga suajili uandanhajka.

Ann-Catrin: Engachi Lubumbashi japka, embarasada pakaraspka, joperu tsïtaspka charhakuni. Nájkirukachi no eratseenga sapiichani kaani, kánikua no sési pʼikuarheraspka engani tsïtapka charhakuni. Nájkirukachi kánikua no sési pʼikuarherani japka, Tata Diosï Jeobajtsïni kʼéri intsïmperata ma íntskuspti engachi no erokuarhini japka. Sánderuchi uánikua kursuechani jatsiapkia. Kúnguarhikuarhu orhetachi 35 aianhpiriicha jarhaspka ka menusi de ma uéxurhini jimbo 70. Ístuchi orheta 40 tánguarhisïreenga joperu tátsekua 220. Nóchi kueratasïreenga aianhpini ka kánikuachi sési pʼikuarherasïreenga na engajtsïni Tata Diosï Jeoba xáni újchakurani japka. Útasïchi miásïnga juchaari charhakuni ka uandasïngachi imeeri ambe ka tsípikua jingonchi erokuarhixaka imani jurhiatikuani engachi nóteru pʼameraakia mintsitani indeni jimbo jimboka Tata Diosï Jeoba sési peentaaka ambe iámindu.

Mats: Sánderu tátsekua, Ann-Catrin ueenaspti kánikua kuatarani pʼikuarherani. Ístujtsïni jíndeni arhispti eskani kánseri de koloni pʼiraspka, xáni uinhamu jarhaspka engajtsïni jatsipka para operarini. Joperu iásï sési jarhaskia ka Ann-Catrin jánguarhintaxati sési marhuakuni Tata Diosï Jeobani.

Míteskachi eskachi no juchajkueska engachi indeni uandanhiateechani jatsiaka. Jiáni enga xáni uándikperanhapka Ruanda 1994 jimbo, niraspkachi pʼorhembiani erachiichani jima engaksï nireenga kuájchakukuarhini. Exeni na engajtsïni xáni sési erokapka, na engaksï tekaantani japka ka na engaksï xáni mintsikeenga Tata Diosïni, kurhanguspkachi eska Tata Diosï Jeoba íntsaasïnga uinhapikua imeeri marhuariichani ambe uéjkiksï nitamanchani jarhani (Sal. 55:22).

Ann-Catrin: Ka ménderu 2007 jimbo nitamakuarhispkachi máteru ambe. Jiáni engachi Uganda nípka para jima anapu sukursali dedikariini. Enga na kʼamakurhipkia, niraspkachi Nairobi (Kenia) máteru 25 misioneruecha ka betelitecha jingoni. Ante dechi Kenia niárani, ma repentku juchaari karrilirhu mótsespti kamioni ma ka chokarispkachi. Ima enga manejarini japka ka máteru sinko erachiichaksï uarhispti, ka máteru pirenchi ma ospitaliirhu uarhispti. ¡Meruchi uékaxakaia eskaksï juchaari amiguechani tsíntaaka! (Job 14:​13-15).

Ka nájkirukachi nimarhikuarhikia, máruchi chétku pakaraska. Kánikua no sési pʼikuarherasïreenga, chúrikuechani chétkuni tsíjpanharhisïreenga ka ísï pʼikuarherasïreenga enajki mintsita anhaxurhipirinia. Ma ambe engajtsïni jarhuatapka jindeespti kómarhini Tata Diosï Jeobani ka arhiantani imani tekstuechani engachi sánderu tsitiajka ka ístu eratsentani. Ístuchi niraspka sikolugu ma jingoni. Iásïchi nóteru xáni no sési pʼikuarherasïngia, ka kurhakusïnga Tata Diosï Jeobani eskajtsïni jarhuataaka sési pʼikuastantaani imeechani engaksï májkueni jánguarhintani jaka orhepani uérakuani eska jucha.

Engajtsïni aianguni japka na engajtsï orhepani uérakuaka uandanhiateechani, uandaspkajtsï eskaksïni Tata Diosï Jeoba ísï páspka komueska “blankiu tsírku”. ¿Ambejtsï arhikuekasïni?

Mats: Ari uandakuecha “Tumebebwa kama mayai mabichi”, suajili jimboesti ka arhikuekasïndi, “Ísïjtsïni pásti komu blankiu tsírku”. Ísï eska kʼuiripu ma na jingontku pájka blakiu tsírkuni para no kakani, Tata Diosï Jeoba uékperakua jingontsïni kuidariisti nani uéjki engachi axanhapiringa marhuani. Méntkisïchi jatsispka ambe engachi xáni uétarhincheenga ka ménichani asta jukari jamberi. Pori ejemplu, na engajtsïni xáni pʼamojperakua jingoni kámapka Kuerpu Gobernanti, exeskachi eskajtsïni Tata Diosï Jeoba kánikua xénchasïnga ka jarhuatani.

Ann-Catrin: Jo ísïisti ambe enga Mats uandaka jimboka ma jurhiani uandajpasptijtsïni parajtsïni aianguni eska juchiiti taati uinhamu pʼamenchaxapka ka eska ospitalirhu jarhaspka. Mats apenasi sési pʼikuarheraxapti malaria jimbo ka nóchi jatsispka sentabu para Suecia nirani. Ísï jimbo, uandaspkachi eskachi íntspikuarhipiringa juchaari karruni. Ísï ma ratu jimbo uandajpasptijtsïni telefonu jimbo. Temungurhiri máespti enga mítepka ambe engachi nitamakuarhini japka ka uékasïreendijtsïni maiampicheni boletu ma abioniiri. Ka ísï tátsekua máteru pirenchijtsïni uandajpaspti enga jatiripkia. I pirenchi patsaxapti sáni sentabu kajitarhu ma enga arhienga “Para ima enga uétarhinchaaka”. Sóntkuchi exespka na engajtsïni Tata Diosï Jeoba jarhuatapka (Ebr. 13:6).

¿Ambejtsï jorhenguarhiskia ini 50 uéxurhini engajtsï páni jakaia marhuakuni Tata Diosï Jeobani tiempu kompletueri?

Ann-Catrin: Jorhenguarhiska eskachi úsïnga orhepani uérani engachi no xáni uandanhiaska ka mintsikani Tata Diosïni ísï eska na arhijka Isaías 30:15. Engachi mintsikaaka Tata Diosï Jeobani, ísïiuati enajki ima uarhipea juchantsïni jimbo (2 Crón. 20:​15, 17). Ka jimbokachi jánguarhintaska sési marhuakuni Tata Diosï Jeobani nani uéjkisïchi axanhani, uánikua kóntperatechanchi intsïnhaaska engachi no nani úpiringa intsïnhani.

Mats: Sánderu jukaparhakua ambe engani jorhenguarhika jindeesti eskani jatsiska para mintsikani Tata Diosï Jeobani ambe uéjkini engani nitamakuarhini jauaka, jimbokani ísï uaaka exeni eskarini ima jarhuataaka (Sal. 37:5). Méntkisïjtsïni jarhuatasti ísï eskajtsïni na aiachika. Ka exesïngachi eskajtsïni seguirixaka jarhuatani iásï engachi Beteli marhuani jakaia Myanmar.

Tsípikua jingonchi uékasïnga eska Tata Diosï Jeobani májkueni xénchauaka xarhatakuauaka imani tumbiichani engaksï uéjka sánderu marhuakuni Tata Diosïni. Ka seguruchi jarhaska eskaksï uaaka ísï úni engaksï jurajkuska eska Tata Diosï Jeoba jarhuatauaka parakaksï tsikini nani uéjkini engaksï ikaranhaaka.