1925: sieni uéxurhini nitamastia

NO ÍSÏ ÚKUARHISPTI ESKAKSÏ NA EROKUARHINI JAPKA

Uánikua Biblieri jorhenguarhiriicha erokuarhixaptiksï eska 1925 jimbo Echeri niárapiringa paraisu máeni. ¿Andi? Ísï tátsekua erachi Albert Schroeder, enga Kuerpu Gobernantirhu japka, uandantaspti: “Eratsenhasïreendi eskaksï ima erakukateecha engaksï pakarani japka Echerirhu nipiringia auandarhu paraksï Reinurhu jarhani ka eskaksï ambakiti achamasïicha komu Abraáni, Dabidi ka máteruecha, niárapiringaksï tsíntani paraksï orhejtsïkuani kʼuiripuechani ixú Echerirhu”. Ka jimboka no ísï úkuarhispka eskaksï na erokuarhini japka, máru erachiichaksï niáraspti kánikua kómu p’ikuarherani (Prov. 13:12).

Nájkirukaksï ísï no sési pʼikuarherapka, sáno iámindu Biblieri Jorhenguarhirichaksï seguiriispti tsípikua jingoni aianhpini ka sánhani arhisptiksï kurhanguni eska ambe enga sánderu jukaparhakuepka jindeeska seguiriini aianhpini Tata Jeobaeri ambe. Pori ejemplu, exe je na engaksï úrapka radiuni paraksï iauanisï jamberi uandantani Biblieri ambe.

PEERAASÏNDIKSÏ MÁTERU RADIUECHANI

Engaksï na exepkia eska 1924 jimbo kánikua sési uérakuspka aianhpini radiu WBBR jimbo, Biblieri Jorhenguarhirichaksï úspti máteru radiueri estasioni enga sánderu iauani jamberi kurhakuarhipiringa, joperu iásï Chicago (Illinois) no iauani japirindia ka arhinhaspti WORD. Ralph Leffler, radiueri injenieru ma enga ánchikuarhipka para úni ini estasionini, uandaspti: “Asta ima chúrikuechani enga xáni tsʼirakuarhienga, jarhasptiksï kʼuiripuecha engaksï kurhauenga ini radiuni nájkirukaksï iauanisï anapuepiringa”. Jarhaspti familia ma enga Pilot Station (Alaska) irekapka enga ma 5,000 kilometru (3,000 miia) iauanisï japka. I familia úspti kurhaani ambe engachi ueenapka uandantani. Enga na kʼamarapkia programa, i familia karta ma karakuaspti imeechani engaksï jima ánchikuarhienga para diosmaiamukua arhiani jimboka kánikua uinhaperaantaspka i programa enga Tata Diosïiri ambe uandeenga.

I rebista enga inglesi jimbo uérapka 1 de disiembri de 1925 jimbo, uandaspti na enga xáni sési marhuani japka i radiu enga arhinheenga WORD, ka uandaspti: “Estados Unidos, nóksï uánikua radiuecha jarhasti engaksï xáni uinhapikua jatsika. I radiu úsïndi kurhaakuarhini asta kostarhu jamberi enga esterhu jaka ka ístu asta máteru kostarhu jamberi enga oesterhu jaka, asta Cuba jamberi ka asta iauani sánderu karhakua jini Alaska. Uánikua kʼuiripuecha engaksï no méni kurhaapka Tata Diosïiri jurhimbikueri ambe iásïksï uékasïndia sánderu ambe míteni”.

Jiánisï mismu, Biblieri Jorhenguarhirichaksï ístu uékasïreendi úrani radiuni para aianhpini Tata Diosïiri Reinueri ambe jini Canadá. Ísï jimbo, 1924 jimbo únhaspti máteru radiu enga CHUC arhinheenga, jini Saskatoon (Saskatchewan), i jindeespti primera radiu enga ueenapka uandantani Tata Diosïiri ambe jini Canadá. Joperu 1925 jimbo, exenhaspti eska inde estasioni jukari sapichuespkia ka uétarhisïreendi móskuni. Ísï jimbo, Sociedad Watch Tower piántaspti radiuni ka ístu kʼumanchikua ma enga antesi teatru máepka ka enga arhinheenga Regent Building, jini Saskatoon, piántasptiksï iámu ambe ka sési jájkuntasptiksï para úni úrani.

Kánikua sési jarhaspti jimboka ini radiu jimbo, ima kʼuiripuecha engaksï imani ireta sapirhatiicharhu irekapka engaksï iauani japka Saskatchewan uératini úsptiksï kurhaani ambakiti aianhperakuani. Pori ejemplu, uarhiiti ma enga Graham arhinheenga ka enga iauanisï irekapka, enga na kurhaapkia programani ma, karaspti para kurhajkuarhiani Biblieri publikasionicha. Erachi George Naish uandaspti: “Uarhiitiiri karakata xarhatasïreendi eska uékaxapka eskachi sóntku axakuapiringa. Ísï jimbo, axakuaspkachi iámu libruechani engaksï arhinheenga Estudios de las Escrituras”. Ka ísï no ióni jimbo, uarhiiti Graham uandantaxaptia Tata Diosïiri Reinueri ambe sánderu iauanisï.

AMBAKITI AMBECHI JORHENGUARHISKA JURHIMBIKUERI AMBE

Rebista inglesi jimbo 1 de marsu 1925 anapu, artikulu ma uéraspti enga arhinheenga “Nacimiento de la nación”. ¿Andisï xáni jukaparhakuepi i artikulu? Ióniisptia engaksï Biblieri Jorhenguarhiricha mítepka eska Noambakiti jatsiska organisasioni ma auandarhu engaksï jindeeka demoniuecha, ka ixú Echerirhu relijioni no jurhimbitiicha, kʼérati negosiuecha ka politikuecha. Joperu ini artikulu jimbo, “jántspiri enga mintsinharhikueka ka jánhaskatiini”, jarhuataaspti erachiichani kurhanguni eska Tata Jeoba ístu jatsiska organisasioni ma enga no májkueniika eska Noambakitiiri ka enga no sáni jaiapanhintajka Noambakitini (Mat. 24:45). Ístu, jántspiri enga mintsinharhikueka uandantaspti eska indeni guerra jimbo enga auandarhu úkuarhipka 1914 jimbo, Noambakiti ka imeeri demoniuechaksï petanhantaspka auandarhu ka kʼuanijpanhanksï Echerirhu (Apok. 12:​7-9).

Ka jimbokaksï máru Biblieri Jorhenguarhiricha úkua jukanchaspka jiókuarhini ini ambe, inde mismu artikulu uandasïreendi: “Ima enga arhintaaka ini rebista ka no de akuerdu jarhani indeni ambe jingoni enga ixú arhijka, sési japirindi eska tekaantapiringa sáni, mintsikani Tata Diosïni ka eska seguiriuaka sési marhuakuni imani”.

Joperu Tom Eyre, Gran Bretaña anapu enga jindeepka kolportori ma (enga iásï arhinhajka prekursori), uandantaspti ambe engaksï úpka sáno iámindu Biblieri Jorhenguarhiricha engaksï na arhintapkia ini artikuluni, uandantaspti: “Erachiichaksï kánikua tsípikua jingoni jiókuarhispti ambe engaksï arhinhapka indeeri ambe enga Apokalipsisi 12 uandajka. Engachi na kurhangupkia eska Tata Diosïiri Reinu uaxastanhaspkia auandarhu, kánikuachi tsípikua jingoni niraspka aianhpini ini ambakiti ambe. I ambejtsïni jarhuataspti sánderu aianhpini ka exeni eskajtsïni Tata Jeoba jorhendaxapka sánderu kʼéri ambe úni”.

KURHANGUSÏNDIKSÏ ESKAKSÏ JATSISKA PARA UANDANTANI TATA JEOBAERI AMBE

Iásï Jeobaeri testiguechachi sési míteskia ambe enga arhikuekajka Isaías 43:10. Ma parti arhisïndi: “Chájtsï jindeeska juchiiti testiguecha, juchiiti ánchikuarhiri engani ji erakuka -i ambeesti enga Jeoba uandajka-”. Ante de 1925 jimbo, juchaari publikasionichaksï no xáni uandasïreendi i karakateri ambe. Joperu tátsekua, inde mismu uéxurhini jimbo, 11 rebistecha engaksï inglesi jimbo uérapka, sánderu úrakuarhisptia i karakata Isaías 43:10 ka 12.

Enga na kʼamarani jámeengia agostu de 1925, Biblieri Jorhenguarhirichaksï kʼéri tánguarhikua ma jatsispti jini Indianápolis, (Indiana). Programarhu uandasïreendi máru ambe paraksï sési janokua ma íntskuni erachi Joseph Rutherfordini. Arhisïreendi: “Jurhaskachi ini kʼéri tánguarhikuarhu parajtsïni [...] juchaari Tata uinhaperantani ka ísïchi úni sánderu uinhapikua jingoni aianhpini imeeri ambe”. Indeni kʼéri tánguarhikuarhu enga ochu jurhiatikua jimbo kʼamakurhipka, erachiichaksï jorhenguarhispti paraksï sánderu aianhpini nani uéjkisï.

Sábadu 29 de agostuni, erachi Rutherford nitamataraspti arhijtsïkperata ma enga arhinheenga: “Seguirii je jánguarhintani”, ka ini arhijtsïkperata jingoni xarhataspti na enga xáni jukaparhakueka aianhpini, uandaspti: “Tata Diosï Jeoba arhiasïndi imeeri ánchikuarhiriichani:‘Chájtsï jindeeska juchiiti testiguecha, […] ka ji jindeeska Tata Diosï’”. Ka tátsekua juramukuaspti: “Jauata je posti ma paraksï ireteecha exeni” (Is. 43:12; 62:10). Tátsekua uandaspti: “Parhakpinirhu no nema jarhasti enga uaaka jauatani posti ma komu mínda, solu Tata Diosïiri marhuariicha engaksï jatsika imeeri uinhapikuani ka jimboksïsï imeeri testigueti”.

Enga erachi Rutherford na nitamatarapkia arhijtsïkperatani, arhintaspti dokumentu ma enga arhinheenga “Ambakiti ambe”, i dokumentu uandasïreendi eska Tata Diosïiri Reinujkusï uaaka úni eskaksï kʼuiripuecha jatsiaka pínandikua, tsípikua, sési irekani, sési jarhani, no pʼamenchani ka méntkisï tsípikua jingoni jámani”. Iáminduecha engaksï jima japka, tsípikua jingonksï jiókuarhiaspti indeni uandakuechani. Ka tátsekua inde dokumentu uánikua idiomeecha jimbo tradusirikuarhispti ka ístu imprimirinhaspti para aianhpikuarhu úranhani. Ka ma 40 miionisï etsakunhaspti.

Nájkirukaksï Biblieri Jorhenguarhiricha no jirejiresï arhinhapka Jeobaeri testiguecha sino asta namuni uéxurhinisï tátsekua, mítetixaptiksïa eska kánikua jukaparhakueska aianhpini Tata Diosï Jeobaeri ambe.

UEENASÏNDISKÏ PʼORHEMBIANTANI KʼUIRIPUECHANI

Parhakpinirhu, sánderuksï uániixaptia Biblieri Jorhenguarhiriicha, ísï jimbo, Tata Diosïiri kúnguarhikua arhiaspti iáminduechani paraksï pʼorhembiantani imani kʼuiripuechani engaksï uékapka kurhaani ambakiti aianhperakuani. Ísï tátsekua engaksï na kʼamarapkia etsakuni dokumentuni enga arhinheenga Ambakiti ambe, foietu Bulletin,a arini ambe arhiaspti: “Exe je ambejtsï uaa parajtsï pʼorhembiantani imani kʼuiripuechani engajtsï íntskuaka dokumentuni Ambakiti ambe joperu engajtsï no ma publikasioni jurajkukuaka”.

Foietu Bulletin enga eneru de 1925 jimbo uérapka, arini ambe uandaspti Biblieri Jorhenguarhiriiri ma enga Plano (Texas) anapuepka: “Kánikuajtsïni sési nichesïndi someni aianhpini territoriu ma jimbo ka eska jima engachi primeru uelta nirajka aianhpini. Ireta sapichu ma jarhasti juchaari territoriurhu engachi sinko uelta nikaia aianhpini arini diesi uéxurhini jimbo. [...] Nótki ióniisïndi enga pirenchi Hendrix ka juchiiti naandi nika ménderu aianhpini jima ka iásïksï ústi sánderu uánikua libruechani etsakuani”.

Panamá anapu prekursori ma karaspti: “Uánikua kʼuiripuecha engajtsïni no uékapka kurhajchani primeru uelta, sánderuksï sési kurhakuarhisptia engani ménderuni nípka. I uéxurhini jánguarhintaxaka sánderuni pʼorhembiantani kʼuiripuechani ka kánikuarini sési nichexati”.

NA ENGA XÁNI ÁNCHIKUARHITA JAPIRINGA

Kartarhu engaksï prekursoriichani mándani uéxurhini axaminhajka, erachi Rutherford uandaspti ambe engaksï xáni úpka 1925 jimbo ka ístu ambe engaksï seguiriipiringa úni. Ini ambe karaspti: “Jiniani uéxurhini, chájtsï úska sési pʼikuastaantani uánikua kʼuiripuechani engaksï kómu pʼikuarherani japka. I ánchikuarhitaksïni kánikua sési pʼikuastaspti chánksïni. […] Ka i uéxurhini, uaakajtsï Tata Diosïiri testigueni ka imeeri Reinueri ka jauatani posti ma komu mínda paraksï ireteecha exeni. […] Ju je iáminduecha seguiriini kʼéri ambe arhini juchaari Tata Diosïni ka juchaari Reini”.

Enga na kʼamarani jámeengia uéxurhini 1925, erachiichaksï exexapti na engaksï jámapiringa paraksï sánderu kʼéjkuani imeecheeri edifisiuechani engaksï Brooklyn (Nueva York) japka. Ka uéxurhini 1926 jimbo, Tata Diosïiri kúnguarhikua ueenapirindi sánderu kʼéri konstruksioni ma jingoni engaksï no méni úni japka.