Máteru tsimani erachiichaksï Kuerpu Gobernanti jingoni jarhastia
JURHIATIKUA 5 DE OKTUBRI DE 2024, ambakiti ambechi aiangunhaspka tánguarhikuarhu enga mándani uéxurhini úkuarhijka. Erachiichaksï Jody Jedele ka Jacob Rumph erakunhaspti paraksï Kuerpu Gobernanti jingoni kuenta úkuarhini. I tsimani erachiichaksï ióni marhuakustia Tata Jeobani.
Jody Jedele ka imeeri uarhiiti Dámaris
Erachi Jedele Misuri andajpenuspti (Estados Unidos). Imeeri taati jémbeechaksï jorhendaspti Biblieri ambe, ka jimeesïsïksï irekaspti nani engaksï namunitu Jeobaeri testiguecha japka. Jimbosï úpti míteani uánikua erachiichani engaksï jima nireenga aianhpini. Exeni na enga Tata Jeobaeri ireta xáni xénchpereenga ka májku k’éri jarhani, úspti eska ima sánderu xénchapiringa Tata Jeobani. Itsï atakuarhispti 15 de oktubrini de 1983 ka kánikua tsitisïreendi aianhpini. Ísï jimbo, enga na uéntapkia preparhu ueenaspti marhuani komueska prekursori regulari septiembrini de 1989 jimbo.
Enga ima ka imeeri ermana jémba sapichuepkaksï, taati jémbeechaksï someni pájtaasïreendi Beteli jimboksïsï tsitipti jima marhuani. Ka ísïksï úspti. Septiembrini de 1990 jimbo, erachi ueenaspti marhuani Wallkill anapu Beteli jimbo, ueenaspti ánchikuarhini limpiesarhu ka tátsekua Servicios Médicos.
Imani tiempu jimbo, jarhasptiksï kúnguarhikuecha engaksï utusï jimboepka ka engaksï Beteli no iauani japka. Sánhani arhixaptiksï kʼéni ka sánderuksï uétarhixaptia erachiicha. Ísï jimbo, erachi Jedele ueenaspti kúnguarhikuarhu ma nirani ka jorhenguarhini utusï uandani. Ka ísï tátsekua, mítespti prekursora ma enga Dámaris arhinheenga ka enga imeeri sirkuiturhu japka. Tátsekuaksï tembuperaspti ka niárasptiksï májku k’éri marhuani Beteli.
Uéxurhini 2005 jimbo Jedele ka Dámarisi, uéntasptiksï Beteli paraksï kuidariuani taati jémbeechani. Niárasptiksï marhuani komu prekursori regulari. Erachi uánikua uelta arhistatspispti Jorhentperakuarhu para Prekursoriicha. Ka imani lugari jimbo engaksï irekani japka, ánchikuarhispti Grupu jingoni enga jarhuataajka imeechani engaksï tratamientu ma uétarhinchajka ka ístu erachiichani engaksï Komiterhu jarhajka para Konstruksioni.
Ka 2013 jimbo, ménderuksï pʼímarhinhaspti Beteli para Warwick anapu Betelini úni. Jiáni uératinksï marhuastia Patterson ka Wallkill. Erachi Jedele ánchikuarhispti Erachiicha jingoni engaksï Beteli anapu Konstruksioniri ambe Exejka ka tátsekua imani Erachiicha jingoni engaksï Ospitalicheeri informasioni ambe íntspijka. Ka marsu de 2023 jimbo, erakunhaspti para jarhuajpeni Grupurhu enga Aianhpikueri ambe Exejka. Ka erachi i ambe uandantasïndi ima responsabilidadicheri enga jatsiapka: “Ménichanchi niárasïnga chéni engachi jimbanhi asignasioni ma intsïnhajka. Joperu engachi ísï pʼikuarheraaka jatsiskachi para miáni na enga xáni jukaparhakueka mintsikani Tata Jeobani, jimbokajtsïni imasï jarhuatajti úni ambe engajtsïni kurhachejka”.
Jacob Rumph ka imeeri uarhiiti Inga
Erachi Rumph California andajpenuspti (Estados Unidos). Nájkiruka imeeri amamba nóteru nireengia tánguarhikuecharhu, jánguarhintasïreendi jorhendani Biblieri ambe jiáni enga erachi Rumph sapichuepka. Erachi mándani uéxurhini nirasïreendi pʼorhembini imeeri nana kʼérini enga kánikua sési marhuakuni japka Tata Jeobani ka ima jarhuataspti paraka erachi uékapiringa sánderu míteni jurhimbikueri ambe. Ka enga 13 jatiriipka, kurhajkuarhispti eska nema jorhendapiringa Biblieri ambe. Ka 27 de septiembrini de 1992 jimbo itsï atakuarhispti enga tumbi sapichu máepka. Ka ístu imeeri amamba ménderu ueenaspti nirani tánguarhikuecharhu ka iámu imeri familia ueenaspti marhuakuni Tata Jeobani ka itsï atakuarhini.
Enga erachi Rumph tumbiipka, exesïreendi na engaksï xáni tsípikua jingoni jámeenga prekursoricha, ísï jimbo enga erachi uéntapka preparhu, prekursori úkuarhispti septiembrini de 1995 jimbo. Ka uéxurhini 2000 jimbo mótsispti Ecuador, nani enga kánikua uétarhini japka aianhpiriicha. Jima mítespti prekursora ma enga Canadá anapueka enga Inga arhinhajka, ka tátsekuaksï tembuperaspti. Engaksï apenasi tembuperapka, nirasptiksï marhuani ireta ma jimbo jini Ecuador enga namunitu aianhpiricha japka. Iásï k’éri kúnguarhikua máestia.
Tátsekuaksï niáraspti prekursori espesialiini ka ístu sirkuitueri orhejtsïkutini. Uéxurhini 2011 jimbo pʼímarhinhasptiksï para Galaadi nirani, klase 132 jimbo. Engaksï na uéntapka Galaadi, axanhasptiksï mámaru lugaricha jimbo ka niárasptiksï beteliteeni, misionerueni ka sirkuitueri orhejtsïkutiini. Ístu, erachi niáraspti arhistatspini Jorhentperakuarhu para Aianhpiricha Reinueri.
COVID-19 jimbo kʼuanhatsentasptiksï Estados Unidos. Ka p’ímarhinhasptiksï para marhuani Wallkill anapu Betelirhu. Jima, erachi jorhendanhaspti para ánchikuarhini Grupurhu enga Aianhpikueri ambe Exejka. Tátsekuaksï Ecuador anapu Betelirhu axanhaspti, ka erachi marhuaspti Grupurhu enga Ecuador anapu Betelini Orhejtsïkujka. Ka 2023 jimbo, Warwick axanhasptiksï. Ménderu eneruni de 2024 jimbo, erachi arhinhaspti para jarhuajpini Grupurhu enga Aianhpikueri ambe Exejka. Miántaparini nani enga xáni marhuakia, erachi uandantasïndi: “Ambe enga sánderu jukaparhakueka para Tata Jeobani marhuakuni, no jindeesti nani engari marhuakujka, sino eskari erachiicha jingonisï marhuakuni jarhajka”.
Kánikuachi jukaparharasïnga indeni ánchikuarhitani engaksï i erachiicha úka ka méntkisïchi sési kaasïnga (Filip. 2:29).