¿Uétarhisïni eskani seguiriini jauaka manejariini?

Enga chaari familia o amiguecha uandanhiani jaka chánksïni jimbo, ¿ambeksïni jarhuataa exesïni sintsï seguiriua manejariini o nóteria?

Máru paisiicharhu gobiernu arhisïndi imeechani engaksï kʼériini jakaia eska doktori ma íntsauaka sïranda ma paraksï úni petantani lisensia. Jiájkani, erachiichaksï respetariuasïndi indeni leiichani (Rom. 13:1). Joperu nani uéjkijtsï irekani, ju je exeni ambe engajtsïni jarhuataaka exeni sintsï útasï uaa manejariini o nóteria.

EXE JE SINTSÏ UAA SEGUIRIINI JARHANI MANEJARIINI

Estados Unidos anapu Instituto Nacional sobre el Envejecimiento (NIA, inglés jimbo), uandasïndi eska sési jarhaska arini ambe kurhamarhikuarhi:

• ¿Úkua jukanchasïni exeani senialichani engaksï karretereecharhu jarhajka o úkua jukanchasïni exeni chúrikua?

• ¿Úsïndi iápurisï eraani ka pendienti jarhani?

• Engani manejariini jarhajka ka úkuarhini ambe, ¿úsïni sóntku anhaxustani karruni?

• ¿Ójkutaani jarhasïni máteru karruechani jimbokani jukarini iatsitapani jarhasïnga?

• ¿Someni sáno chokariskia, raiarini karruni o uátatani?

• ¿Ménisïrini polisia anhaxustakia jimbokani no sési manejarixapka?

• ¿Engani manejariini jarhajka kʼuíirasïni?

• ¿Nóteruni sési manejarisïnia jimbokani sïpiati arhaxaka?

• ¿Familiariicha ka amiguechaksï uandanhiasïni engani útasïni manejarijka?

Enga ma o tsimani ambe ísïika, uaakajtsï nóteru xáni manajariinia ka menusia chúrikua. Úpiringajtsï familiarini o amiguni ma kurhamarhini ojtsï jamberi ménderu nirani jorhenguarhini parajtsï exeni sintsï uaaka seguiriini jarhani manejariini. Joperu engajtsï exekia eskajtsï uánikua ambe nóteru úsïngia úni, sési japirindi eskajtsï nóteru manejaripiringia.a

BIBLIERI PRINSIPIUECHA ENGAKSÏNI UAAKA JARHUATANI

Jamberichi no uéjka jiókuarhini eskachi nóteru úsïngia manejariini. Joperu i ambe no chʼanakua ambeesti jimbokachi jatsiaka para exeni sinchi seguiriua manejariini o nóteria. Ísï jimbo, ju je tsimani Biblieri prinsipiuechani exeani engajtsïni jarhuataaka exeni ambe sánderu sésiua úni.

Jiókuarhini eskachi nóteru úsïngia uánikua ambe úni (Prov. 11:2). Engachi kʼériini jarhajkia, ueenasïngachi chkéni, nóteru uinhanharhinia, ni kurhaani o sóntku manakuarhini. Ísï jimbo, uánikuaksï nóteruksï úsïndia deporti ni chʼanani jimbokaksï kʼériiskia ka sánderuksï sóntku lastimarikuasïndia. Ka májkueniisti para ma karruni manejariini, juchachi jurajkusïnga engachi exejka eskachi nóteru úsïnguia sési manejariini parachi no no sési ambe úkuarhinchani (Prov. 22:3). Ísï jimbo, engajtsïni nema arhiaka eska uandanhiaxaka juchantsïni jimbo, ju je kurhajchani ka jiókuarhini ambe engajtsïni arhiaka (terukutanta je 2 Samuel 21:​15-17 jingoni).

Para no nemani uándikuni (Deut. 22:8). No jingontku manejariini kánikua no sési útspisïndi. Ima kʼuiripu enga karruni kámajka ka jini nóteru únia sési manejariini, uaati no sési úkuarhinchani o máteruechani no sési úkuani. Ka enga úska eska aksidenti ma jauaka ka uarhinhani, jamberi indeeri kulpeuati.

Engajtsï exeska eska sánderu sésiuaka nóteru manejariinia, asï eratsi je eskajtsï nóteru ambe ma uaakia úni o eskajtsï nóteru marhuakia jimbokaksïni Tata Jeoba kánikua xénchasïnga ka sési járhati kualidadiichanksïni execheasïndi komueskajtsï kaxumbitiiska, eskajtsï uandanhiasïnga máteruecha jimbo ka jiókuarhisïngajtsï eskajtsï nóteru úsïngia iámindu ambe úni. Tata Jeobaksïni jarhuataati, nóksï méni jurajkuati ka uinhaperantaatiksïni (Is. 46:4). Kurhaku je eskaksïni íntskuaka jánhaskakua ka eskajtsï uaaka exeantani ambakiti konsejuechani engaksïni jarhuataaka exeni ambe úni.