Echeri sánhani arhixati nóteru sési jándeni | ¿Ambe uandasïni Biblia?

“Kʼuiripuechachi uánikua ambe úxaka enga no ióni jimbo uaaka eska klima méntku mójtakurhiaka. Itsï niáraati ójchakuraani kʼérati ireteechani. Niáraati no sési aparhikuarhini komueska no méni aparhikuarhini japka. Uinhamu tarhiaati ka janini. Nóteru jauatia itsï. Uarhiatiksï uánikua animaliicha ka planteecha. Ka nóchi ísku uandaxaka. Sientifikuechaksï uandasïndi eska ísïmindu úkuarhiaka engaksï juramutiicha no mójtakurhiska na engaksï úrani jaka enerjiani” (Discurso de António Guterres, secretario general de las Naciones Unidas, en respuesta al informe del Grupo Intergubernamental de Expertos sobre el Cambio Climático del 4 de abril de 2022).

Periodiku The New York Times uandaspti:“Sientifikuechaksï uandaxati eska no ióni jimbo, sáno iámindu 423 parki nasionaliicha engaksï Estados Unidos jaka, nóteruksï sési jándeatia jimboka klima méntku mójtakurhixaka, ka sánderia jimboka sánhani arixaka sánderu no sési aparhikuarhini. Ini xáni no sési ambe enga úpiringa úkuarhini, sáno májkueniisti komu ambe enga Biblia uandajka: kurhunpekua ka iurhempekua ambe, na enga itsï úkuarhini jaka iámu ielu enga jaka, marirhu anapu itsï uémesïndi ka sánderu no sési aparhikuarhini” (artikulurhu “Flooding Chaos in Yellowstone, a Sign of Crises to Come” [Caóticas inundaciones en Yellowstone, un aviso de las crisis que vendrán], 15 de juniu de2022).

¿Uaa ménderu sési niántani iámindu ambe ixú parhakpinirhu? Enga ísïika, ¿né uaa sési peentani? Exe je ambe enga Biblia uandajka íri ambe.

Karakata jarhasptia eska ísï jánhaskuarhini japiringa

Biblia uandasïndi eska Tata Diosï “kʼamajkuantaaka imeechani engaksï ikichakua újka parhakpinini” (Jaŋaskuecha 11:18). I ambe enga ixú uandajka, jorhendasïndijtsïni tanimu ambe:

1. 1. Ambe engaksï kʼuiripuecha újka, no sési úkusïndi echerini.

2. 2. No para méntkisï xáni no sési jánhaskuarhiati.

3. 3. Tata Diosïsi uaati sési peentani iámindu ambe parhakpinirhu, ka no kʼuiripuecha.

Sési niántaati iámindu ambe echerirhu

Biblia uandasïndi “Echeri méntkisï jauati” (Eclesiastés 1:4). Para méntkisï irekanhaati ixú echerirhu.

• “Echeri jurhimbiticheriuati, ka jimaksï irekaati para méntkisï” (Salmo 37:29).

Iámindu ambe enga parhakpinirhu jaka, niáraati sési marhuani ménderu.

• “Desiertu ka echeri kʼarhiri kánikuaksï tsípini jauati, ka pákua enga no ma ambe újka tsikini, tsípini jauati ka ísï tsïpaati komueska asafrani” (Isaías 35:1).