¿Andiksïsï Jeobaeri testiguecha pʼorhembijki kʼuiripuni enga jatsikia relijioni ma?

Exeskachia eska uánikua kʼuiripu enga jatsikia relijioni ma tsitisïnga uandontskuarhini Bibliaeri ambe. Ísïsti, jucha respetarisïnga ambe enga kʼuiripu erakuaka jakajkuni, ka jimbochisï no újka eska nema afuersa jiókuarhiaka juchari eianhperakua.

Engachi relijioniri ambe uandontskuarhijka, jánguarhintasïngachi úni ambe enga Biblia arhijka uandontskuarhiparini “kaxumbikua jingoni”, ka xarhatakuparini kʼuiripuni “janhanharhikua” (1 Pedru 3:15). Mítiskachi eskaksï máru no jiókuarhiaka juchari eianhperakua (Mateu 10:14). Peru, astakachi no uandontskuarhiaka kʼuiripu jingoni, nochi mítiaka nénaksï mókukuarhia. Ístu, imecheri irekua uáti mójtakuarhini.

Ejemplu ma, nema enga ma jurhiani kánikua okupadu jauaka para uandontskuarhini, jamberi máteru uelta enga no xáni okupadu jauaka uékaati tsípikua jingoni uandontskuarhini. Ístu, jamberi kʼuiripu niáraati jatsiani tsʼéjkukuechani engaksï uáka eskaksï jirinhaaka Bibliaeri jarhuajperata. Jimbochisï jánguarhintajka méntku úndani uandontskuarhini imecha jingoni.