¿Nénajtsïni pʼímutantasïni Jesúsi?
Ambe enga Biblia uandajka
Jesúsi pʼímutantaasti ambakiti kʼuiripuechani jiáni engani íntspipka imeeri tsípikuani komueska sakrifisiu ma (Mateu 20:28). Jimbosï Biblia uandajti eska Jesúsi jindeeska “Pʼímutantspiti parhakpini anapuecheri” (1 Juanu 4:14). Ístu Biblia uandasïndi: “No nema jarhasti engaksï jimbo kʼuiripuecha uaaka pʼímutantskata uérani, jimboka echerirhu no jarhaska máteru nombri enga Tata Diosï erakuka parachi jucha pʼímutantskata uérani” (Ukuecha 4:12).
Jesúsi uarhisti iámindu imeecha jimbo engaksï mintsikajka imani (Ebreu 2:9; Juanu 3:16). Tátsekua, Tata Diosï tsítantasti Jesúsini ka kʼuanhatsentasti auandarhu komueska ánjeli ma (Ukuecha 3:15). Auandarhu uératini, Jesúsi “úsïndi pʼímutantaani para méntkisï imeechani engaksï imani jimbo andarhierajka [Tata] Diosïni, jimboka ima méntkisï irekaxaka para kómarhijpikuani” (Ebreu 7:25).
¿Andichisï uétarhinchajki eskajtsïni Jesúsi kómarhijpichiaka?
Jimbokachi iáminduecha pekadu úsïnga (Roma 3:23). Pekadujtsïni uarhikuarhu pásïndi ka ójkutakua máesti parachi sési pájperani Tata Diosï jingoni (Roma 6:23). Peru Jesúsi ísïisti eska “jarhuajpiri ma” para imeecha engaksï mintsikajka imeeri sakrifisiuni (1 Juanu 2:1) Jimboka Jesúsi íntspiska imeeri tsípikuani juchantsïni jimbo, uaatijtsïni uandapichini paraka Tata Diosï kurhauaka juchaari kómarhikuechani ka puácheantantsïni pekaduechani (Mateu 1:21; Roma 8:34). Tata Diosï mókuntasïndi ambe enga Jesúsi kurhakujka jimboka indeni ambesï ima jaiapanhintajka. Tata Diosï axasti Jesúsini Echerirhu “parakaksï parhakpini anapuecha pʼímutantskata uéraaka imani jimbo” (Juanu 3:17).
Parachi pʼímutantskata uérani, ¿solu uétarhisïni eskachi jakajkuaka Jesúsini?
Nómbe. Nájkiruka uétarhijka jakajkuni Jesúsini parachi pʼímutantskata uérani, ístu uétarhisïndi máteru ambe (Ukuecha 16:30, 31). Biblia uandasïndi: “Komueska kuerpu na uarhiri jarhajka no espiritu jingoni, ístu jakajkukua, no jindeesïndi jakajkukua enga nómbe úkuechani jingonijka” (Santiagu 2:26). Parachi pʼímutantskata uérani, jatsiskachi para:
Jorhenguarhini Jesúsiri ka Jeobaeri ambe (Juanu 17:3).
Mintsikani Jesúsini ka Jeobani (Juanu 12:44; 14:1).
Xarhatani eskachi mintsikasïnga Tata Diosïni kurhajchapariani imeeri juramukuechani (Lukasʌ 6:46; 1 Juanu 2:17). Jesúsi uandaspti eskaksï no iámindu imeecha engaksï arhipiringa “Tata” pʼímutantskatepiringa, sino imajku enga úpiringa ambe enga imeeri Taati jémba jaiapanhentajka (Mateu 7:21).
Seguirini jarhani xarhatani eskachi mintsikasïni Tata Diosïni, nájkirukachi uandanhiatechani jatsiauaka. Jesúsi uandaspti: “Ima enga tekaantaaka asta kʼamarhukuni jamberi, pʼímutantskata uéraati” (Mateu 24:13).