JARHUAJPERATA PARA FAMILIAUECHA
Néna pʼíngukuarhini para no ikiani
Chári achati o uarhiiti uandasïndi o úsïndi ambe ma engaksïni kánikua ikiatajka ka chájtsï jánguarhintasïnga no xarhatakuni. Peru enga chári achati o uarhiiti exejka eska ambe ma no sési jarhaska, uénasïndiksïni uánikua ambe kurhamarhini para mítini ambejtsï úsïni. Inde ambeksïni sánderu ikiatasïndi. Enga inde ambe úkuarheaka, ¿ambejtsï úa parajtsï pʼíngukuarhini para no ikiani?
Ambe engajtsï jatsika para mítini
Sóntku xarhatani ikiatapu no sési útspisïndi. Estudiuechaksï xarhatasïndi eska jirejiresï ikiani, úsïnga eska nema presioni alta pʼiuaka, mintsitarhu pʼamenchani, kómu pʼikuarherani ka sïturhirhu malu jarhani. Ikiatapu, ístu úsïndi eska ma no úaka kʼuíni, uandanhiani, pʼamenchakua ambe xarhatani sïkuirirhu ka éjpurhu pʼamenchani. Jimbosï Biblia uandajti: “¡Támu peera ikiatapuni! Asï xáni sóntku kurhuraxe, jimboka inde ambe no sési útspisïnga” (Salmo 37:8, Nueva Traducción Viviente).
Jatanhetspeni ístu no sési útspisïndi. Jatanhetspeni májkuenisti komu pʼamenchakua ma enga incharinisï no sési útspejka. Por ejemplu, chájtsï úpiringa no janhanharpini o arhinchpeni jámani. Ka xásï kʼuiripu máeni, úpirindi úni eska úkua jukaaka májku kʼéri irekani ka úni eskaksï kʼérati problemecha jauaka temungurhirikuarhu.
Ambe engajtsï jatsika para úni
Exe je ambakiti ambe enga xarhatajka chári achati o uarhiiti. Tanimu ambe kara je chári uarhiitiri o achatiri engajtsï tsitijka. Engajtsï ikiaska ambe ma jimbo enga ima no sési úaka, eratsi je imani ambe engajtsï karaka. Inde ambeksïni jarhuataati no sóntku ikiani.
Bibliaeri konseju: “Inde jimbo diosmeiamukua arhi je” (Kolosasi 3:15, Táta Diósïri Uandakua Tata Jesukristueri Aiatsperakua).
Jorhenguarhi je puátspintani. Uénani jámani, jánguarhi je ísï exeni ambe ma eska chári achati o uarhiiti. I ambeksïni jarhuataati kurhangukuni ambe enga pʼikuarherajka ima, o eska na uandajka Biblia, ‘májku ambe pʼikuarherani’ eskaksï máteruecha (1 Pedru 3:8). Tátsekua, kurhamarhikuarhi je: “¿Sési jimborini xáni no sési ambe úchiski engani no úaka puákuntani?”.
Bibliaeri konseju: “Sési jásï ambesti [...] no jatanhetspeni” (Proverbios 19:11).
Iatsitakuarhu ka uékperakua jingoni uanda je ambe engajtsï pʼikuarherajka. Úra je uandakuani, ji. Por ejemplu, enbesdejtsï arhini “Norini sáni uandanhiasïnga engarini no uandajpajka pararini eianguni nani engari jarhajka”, uanda je “Ji uandanhiasïnga enga ióndakuarhuejkia ka no mítini siniri sési jarhaski”. Iatsitakuarhu uandani, jarhuataatiksïni no sóntku ikiani.
Bibliaeri konseju: “Ú je eska chári uandakuecha méntkisï sési eratsikateuaka” (Kolosasi 4:6).
Jingontku kurhaa je. Eskajtsï na uandaakia, jurajku je eska chári achati o uarhiiti uandaaka ka ístu eska kʼamaraaka. Tátsekua, máru uandakuecha jingoni arhi je ambe engaksïni arhika parajtsï exeni sintsï kurhangukuski. Solu kurhajchani, jarhuataatiksïni no sóntku ikiani.
Bibliaeri konseju: “Jorhenguarhi je iáminduecha sóntku kurhandini, peru ióndantsï mókukuarhini” (Santiagu 1:19).