Jarhuajpesïngachi nájkirukachi kurhaajka eska jarhaska “guerra, ka iatiru uandanhani guerreri ambe”

Nóteruchi no sési exesïngia engachi kurhaajka eska jarhaska “guerra, ka iatiru uandanhani guerreri ambe” (Mateu 24:6). Uánikua erachiichaksï no sési nitamakuarhixati ini ambe jimbo, joperuksï méntkisï jatsisïndi ambe engaksï uétarhinchani jarhajka. Kánikuachi sési pʼikuarheraspka engachi kurhaapka Aianhperakua 3, Grupueri enga Orhejtsïkuajka iámindu kúnguarhikuechani 2022 anapu, enga uandantapka eska Europa del Este erachiichaksï jarhuataaxaka máteru erachiichani engaksï no sési nitamakuarhini jaka guerra jimbo enga Ucrania úkuarhini jaka. ¿Ambe xáni únhaxaki para erachiichani jarhuataani nájkiruka guerra jaka? ¿Ka néna pʼikuastaasïni i ambe Ucrania anapu erachiichani?

¿Ambeksï uétarhinchasïni? ¿Nénaksï axakuasïni?

Jurhiatikua 24 de febreruni de 2022 jimbo, meru jiáni enga ueenakuarhipka guerra, Grupu enga Jarhuajperata Íntspijka, arhutaspti sentabu para jarhuataani juchaari erachiichani, ka Ucrania anapu Beteli ueenaspti piáni ambe. Ka tátsekua, 27 Grupuecha para Jarhuajpeni, ueenasptiksï etsakuni ambe enga xáni piánhapka.

Ístu, erachiicha engaksï jaka Kʼumanchikuarhu nani engaksï Interu Parhakpini anapu Jeobaeri Testiguecheri Ánchikuarhita Exejka, ueenasptiksï exeni nénaksï jarhuatapirini Ucrania anapu Betelini. Grupu enga Jarhuajperata Íntspijka ka enga Publikasionicheri ambe Exejka, arhisptiksï Grupuni enga Iámu Parhakpini Exejka ambe enga xáni Piánhajka eska ánchikuarhipiringa Ucrania ka Polonia anapu Beteliicha jingoni paraksï jarhuajpeni. Pauani pauani, tánguarhintasïreendiksï Ucrania ka Polonia anapu Beteliteecha engaksï arini grupuecharhu jaka, enga Exejka ambe ka ambe Piáni, enga Axajka ambe, enga Legalesiri ambe Exejka ka erachi ma enga Ucrania anapu Betelini orhejtsïkujka ka ístu máru erachiicha engaksï jaka Grupurhu enga Iámu Parhakpini Exejka ambe enga xáni Piánhajka, tánguarhintasïreendiksï paraksï exeni néna úni ini ánchikuarhitani.

Jay Swinney, erachi ma enga jaka Grupurhu enga Iámu Parhakpini Exejka ambe Piáni, uandantasïndi: “Orhetachi jatsisïreenga para exeni ambeksïsï uétarhincheeni erachiicha. Uékasïreengachi tʼirekua ambe íntsaani ka imani ambe engaksï máru erachiicha pʼindepkia úrani paraksï limpiu jarhani. Joperu no solu jindeespti míteni ambeksïsï uétarhinchani japi, sino ístu eska sóntku ka sési niárapiringa Ucrania ima ambe engachi axapiringa”.

Para 9 de marsuni de 2022 jimbo, mítesptiksïa ambeksïsï axapirini. Pori ejemplu, kajeechanksï uaaspti imani ambe jingoni engaksï sánderu uétarhinchapiringa, komueska kʼuiripeta ka kurucha boti jatarini, sereali ambe, arrosu, tʼatsïni, xapu ka papeli roiu. Erachiichaksï exespti eska para ini ambe axakuani Ucrania anapuechani ka paraksï 4 semana marhuatani, uétarhipirindi ma 65 dolarisï para ma kʼuiripu. Ka jimbokaksï uánikua erachiicha uétarhinchapiringa ini ambe, Grupu enga Jarhuajperata Íntspijka uandaspti eska arhutanhapiringa kánikua sentabu para inde ánchikuarhita. Joperu, ¿nénaksï etsakuntapirini indeni ambe ka nóksï peligrurhu jarhani?

Jurhiatikua 13 de marsuni, tsimani erachiichaksï tsʼéjkuspti ini ambe: Polonia anapu Betelirhu uératini axasptiksï imani ambe enga piánhapka asta Ucrania anapu bodega ma jimbo enga ireta Leópolis (Lviv) no iauani jaka. Joperu antesi, Ucrania ka Polonia anapu Beteliteechaksï jarhuajpespti paraka i ambe úpiringa axanhani. Permisuksï petaspti paraksï úni fronterarhu parhikuni ka arhijpisptiksï eskaksï kʼuiripuechani niraxapka jarhuataani, ka ístuksï jánguarhintaspti paraksï ima trokeecha engaksï paapiringa, xarharani eskaksï imani ambe páxapka para kʼuiripuechani jarhuataani. Ka tátsekua, Ucrania anapu erachiichani jingoni, exesptiksï naniisïksï sánderu kókuani niárapirini badegarhu engaksï na inchaakupiringia Ucrania. Inde ambe niáraspti Leópolis ka no jamberi ma juarhiatikua jimbo, íntsaantasptiksï indeni ambe Grupuechani para Jarhuajpeni, ka juchaari erachiichaksï sési kʼuanhatsentaspti Polonia. I ambe kánikua sési uéraspti jimbokaksï erachiicha sési ánchikuarhispka ka ístu jimboka Tata Diosï Jeoba újchakuraaspka.

Sési uéraspti ambe engaksï úpka orheta, joperuksï erachiicha no jamberi ma tonelada (1 tonelada Estados Unidos anapu) úspti íntspintani inde ambeeri enga axanhapka. Joperu útasï ma 200 tonelada (220 tonelada Estados Unidos anapu) kuérataxapti para etsakuntani. ¿Nénaksï pápirini indeni ambe ka sánderu sóntku etsakuntani?

“Chíti ireta tsípikua jingoni aiatspikuarhiati”

Engaksï na arhintapkia juchaari pájinarhu jw.org jimbo na engaksï no sési nitamakuarhini jaka juchaari erachiicha guerra jimbo, uánikua kʼuiripuechaksï interu parhakpini anapuecha uékaspti jarhuajpeni. Imeecha engaksï iauani irekaka Ucrania uératini sentabuksï axaspti para Jeobaeri testiguecheri ánchikuarhita enga interu parhakpini úkuarhijka, jimbokaksï mítesti eska inde sentabu sési úrakuarhepiringa. Ka imeecha engaksï no iauani irekaka, úrasptiksï imeecheeri tiempuni, uinhapikuani ka ambe engaksï jatsikuarhepka paraksï jarhuajpeni. Íksï jindeesti máru ejempluecha.

Polania, uánikua kʼuiripuecha, komueska ‘ejersitu’ ma, uánikua ambeksï preparariispti kajeechani jimbo paraksï jarhuajpeni, ka uánikua sapiichaksï dibujuechani uaaspti paraksï axatspiani. Bartosz Kościelniak enga jaka Grupurhu enga Exejka ambe ka ambe Piáni, Polonia anapu Beteli jimbo, uandantasïndi: “Salmo 110:3, uandasïndi eska Tata Diosï Jeobaeri ireta tsípikua jingoni aiatspikuarhiaka. Uánikua xanhari arhintaspkia ini karakatani, joperuni no méni exexapka eska meru ísïiska ambe enga uandajka asta jiáni engani exekuarhipka na enga uánikua kʼuiripu niárapka para jarhuajpeni nani enga xáni uétarhini japka”.

Erachi ma enga kʼéri empresa ma jatsika (empresa internacional de logística), kuánetpeaspti trokeechani ka ima maiampispti gasolineeri enga xáni úrakuarhipka. Erachi uandasïndi: “Ini ambe úni, jarhuatasptireni parani xarhatakuani juchiiti erachiichani ka Tata Diosï Jeobani na engani xáni xénchaajka. Ka kánikua tsípisïnga engani aiakukuarhepka parani jarhuajpeni”. Para iámu kuenta úntani, jukari 7,700 litru (2.034 galones) gasolina úrakuarhispti para etsakuni ambe enga xáni piánhapka ka erachiichaksï úraspti imeecheeri tiempu ka uinhapikua paraksï manejariini sáno 48,000 kilometru (30,000 miia).

Para 28 de marsuni, 15 jurhiatikua ísï tátsekua engaksï ueenapka páni ambe, 100 toneladaksï (110 tonelada Estados Unidos anapu) pásptia Ucrania, iámindu inde ambe jindeespti tʼirekua, limpieseeri ambe ka sïpiati ambe. Ka jimbokaksï uánikua erachiicha ka máteru kʼuiripuecha uánikua ambe intsïmbispka, kánikua sentabu patsakuarhispti jimbokaksï tʼuini uánikua kajeecha jarhaspkia mámaru ambe jatarini. Asta iásï jamberi, Jeobaeri testiguechachi jukari 190 tonelada (209 tonelada Estados Unidos anapu) ambe jingonchi jarhuajpeskia Ucrania. ¿Ka nénaksï pʼikuarherasïni erachiicha engaksï intsïnhaka indeni jarhuajperatani?

“Exespkachi na engajtsïni xáni xénchajka”

Engaksï kajeecha na niárapkia Leópolis, iámu Ucrania anapu Grupuecha para Jarhuajpeni, íntsaantasptiksï indeni kajeechani imeechani engaksï uétarhinchani japka. Uánikua inde kajeechaksï imani ireteechani jimbo pánhaspti engaksï jukari 1,300 kilometru (800 miia) iauani jaka Leópolis uératini. Nájkirukaksï erachiicha kánikua jánguarhintapka indeni ambe íntspintani, útasïksï kánikua tiempu páspti.a

Markus Reinhardt, erachi ma enga Ucrania anapu Betelini orhejtsïkujka, uandantasïndi: “Ini ambe jingoni enga úkuarhini jaka, uánikuaksï erachiicha exekuarhistia na enga xáni xénchpejka Tata Diosï Jeoba ka na enga marhuajka ísï úni eska imeeri kúnguarhikua na uandajka asta ante de no sési ambe úkuarhini. Pori ejemplu, iáminduechantsïni arhisïndi eskachi jatsiska para patsakuarhini tʼirekua ambe ka itsï para máru semaneecha. Ka Kiev anapu orhejtsïkuti ma enga Anton arhinhajka, uandasïndi: ‘Kánikuachi sési pʼikuarherasïnga engajtsïni Tata Diosï Jeobaeri kúnguarhikua tʼuini arhijkia ambe engachi uaaka ante de no sési ambe úkuarhini, ísï eska na jánhaskuarhini jaka iásï. Meru kánikuajtsïni jarhuatasti engachi tʼuini patsapkia itsï ka tʼirekua ambe’. Xáni sési engaksï erachiicha meru ísï úpka eskaksï na arhinhapka; inde ambe, úspti eska Beteli tiempu jatsipiringa para exeni néna jarhuataani erachiichani”.

¿Nénaksï pʼikuarheraspi erachiicha engaksï ueenapka jarhuatanhani? Míkola ka Zinaida engaksï Járkov irekaka, aiangusïndijtsïni: “Mintsitarhujtsïni niárachesïndi engachi exejka na engaksï xáni uandanhiajka erachiicha juchantsïni jimbo. Kánikua diosmaiamukua je tʼirekua ka sïpiati ambe jimbo. I ambe meru xarhatasïni eska Tata Diosï Jeobasï úni jaka ini ambe”. Valentina enga ístu indeni ireta jimbo irekaka, uandasïndi: “Jiáni enga guerra ueenakuarhipka, jatsisïreengachi para iauani formarikuarhini para tʼirekua ambe piáni ka ménisïchi no iámindu ambe úsïreenga piáni. Joperu Tata Diosï Jeoba exexapti ambe engachi nitamakuarhini japka, jimbosï úpti eskajtsïni erachiicha juáchepiringa kajeechani jimbo imani ambe engachi meru uétarhinchani japka. Enga kánikua no sési ambe úkuarhini jarhajka ka ma eratseni eska nóteru uaakia orhepani uérani, jiánirisï exejka na engakeni xáni sési kuidarijka Tata Diosï Jeoba ka imeeri kúnguarhikua. Kánikuari sési pʼikuarherasïnga engaksïni meru jiáni jarhuatajka engari xáni uétarhinchani jarhajka”.

Evguen, Irina ka Mikita, jatsisptiksï para uéakuntani Mariúpol, uandantasïndiksï: “Mintsita jingonksïni diosmaiamukua arhixaka jimbokajtsï xénchasïnga ka kuidariini juchaari familiani. Meru jiánijtsïni jarhuataspka engachi xáni uétarhinchani japka. ¿Arhiaksïni ambe ma? Ueenani jámani, eratsespkachi eskaksï kajeecheespka engaksï mámaru ambe jatarini japka, joperu engachi mítaapka, exespkachi na engajtsïni xáni xénchajka”.

Jiáni engaksï erachiicha etsakuntani jámani japka tʼirekua ambe ka mámaru ambe, meru xarharaspti eska Tata Diosï Jeobaeri espiritu jimboespka ka na enga úkuarhipka iámindu ambe nájkiruka guerra japka, “ka iatiru uandanhani guerreri ambe”. Ka ístuchi uaaka uandani eska úspka sési uérani chaari donasionichani jimbo engajtsï íntspipka para ánchikuarhita enga interu parhakpinirhu úkuarhijka, ka uánikuaksï úraspti donate.jw.org. ¡Kánikua diosmaiamu je jimbokajtsï tsípikua jingoni íntspiasïnga!

Sóntkuchi jarhuajpespka ka eska sési niárapiringa iámindu ambe

1. 

   24 de febreru de 2022: Grupu enga Jarhuajperata Íntspijka, sésikua íntspisïndi paraka arhutanhaaka sentabu paraka Ucrania anapu Beteli uaaka jima anapu erachiichani jarhuataani.

2. 

   24 de febreruni a 8 de marsuni de 2022: Ucrania anapu Beteli mámaru ambe piásïndi ka ueenasïndi etsekuntani úrapariani Grupuechani para Jarhuajpeni. Ístu mámaru ambe úsïndi para pʼirani ka etsakuntani imani ambe enga Polonia uératini axanhajka.

3. 

   9 de marsu de 2022: Grupu enga Jarhuajperata Íntspijka, sésikua íntspisïndi paraka mámaru ambe axanhaaka para Ucrania anapuechani jarhuataani.

4. 

   10 a 12 de marsuni de 2022: Máru erachiichaksï primeru xanhari nirasïndi Polonia uératini asta Leópolis (Ucrania) paraksï exeni néna páni tʼirekua ka máteru ambe.

5. 

   13 de marsuni de 2022: Ueenasïndiksï páni tʼirekua ka máteru ambe Polonia uératini asta Leópolis.

6. 

   14 a 16 de marsu de 2022: Polonia, Sukursalirhu anapu máru Erachicha engaksï Konstruksioniri ambe Exejka, ueenasïndiksï exeni nénaksï jatsiraa kajeecharhu tʼirekua ambe ka máteru ambe. Ini ambeksï úsïndi Kʼumanchikuarhu para Kʼéri Tánguarhikuechani uaani enga ireta Poznań no iauani jaka.

7. 

   17 de marsu de 2022: Ísï tʼámu jurhiatikua jimbo desde enga ueenapka Ucrania pánhani ambe, iásïksï ueenasïndia 13 tonelada (14 tonelada Estados Unidos anapu) páni asta Ucranieri fronterarhu.

8. 

   21 a 27 de marsu 2022: Uaasïndiksï sánderu kajeechani Polonia, ka Ucraniaksï axaasïndi. Ka no jamberi ma jurhiatikua jimbo, íntskuantasïndiksïa erachiichani engaksï sánderu uétarhinchani japka.

9. 

   28 de marsu de 2022: Nitamastia 20 jurhiatikua desde enga uandanhapka para jarhuajpeni, ka jiáni uératini, 100 tonelada (110 tonelada Estados Unidos anapu) axanhastia Ucrania arini ambe jingoni, tʼirekua, ima ambe enga úrakuarhijka para limpiu jarhani ka ístu sïpiati ambe.

Asta iásï jamberi, Jeobaeri testiguechachi jukari 190 tonelada (209 tonelada Estados Unidos anapu) axaskia mámaru ambe para Ucrania anapuechani jarhuataani.