Kʼéri tánguarhikua rejioniri nitamataranhasïndi radiu ka telebisioni jimbo

Kʼéri tánguarhikua rejioniri 2020 no méni mirikurhinhaati. I primeru xanharisti enga iámu programa grabarikuarhika para interu parhakpinirhu anapu kʼuiripuecha ka ma ústi exeni interneti jimbo. Peru sáno iámindu juchaari erachicha Malaui ka Mozambique anapuecha úsptiksï jatsini kʼéri tánguarhikua nájkirukaksï no jatsipka interneti. ¿Néna úkuarhiski i ambe?

Grupu enga Jarhuajperata íntspijka ka Grupu Jorhentperakueri enga Orhejtsïkuajka iámindu kúnguarhikuechani sési exespti eska nitamataranhapiringa kʼéri tánguarhikua radiu ka telebisioni jimbo, jini Malaui ka Mozambique. ¿Andisï uétarhipi eskaksï indeni ambe úpiringa? Malaui jindeesti lugari ma enga interneti kánikua jukaparhaka, ísï jimbo, namunitu jima anapu erachichaksï jatsisti interneti. William Chumbi, enga ánchikuarhijka Grupurhu enga Malaui anapu Betelini Orhejtsïkujka, uandantasïndi: “Radiu ka telebisioni jindeesti ma ambe enga jarhuajpejka parakaksï erachicha no tsïtakuarhiaka kʼéri tánguarhikua rejioniri”. Luka Sibeko, máteru erachi enga ánchikuarhijka Grupurhu enga Malaui anapu Betelini Orhejtsïkujka, uandasïndi: “Enga no jindeepiringa radiu ka telebisioni jimbo, namunitu erachichajkuksïsï juchaari territoriurhu anapu Betelirhu úpirindi jatsini kʼéri tánguarhikua rejioniri”. Mozambique sáno májkueni úkuarhispti. Namunitu erachichajkuksïsï úpti piákuarhini selulari o tableti ambe, uánikuaksï úkua jukanchasïndi kontratarini interneti ambe.

Na enga úkuarhika i ambe

Pandemia COVID-19 jimbo, máru radiu ka telebisionichaksï nitamataraxaptia juchaari tánguarhikuechani mándani semana.a Juchaari erachichaksï kurhajkuarhispti radiurhu ka telebisionirhu eskaksï íntsaapiringa sánderu tiempu paraksï úni nitamatarani kʼéri tánguarhikua rejionini.

Jini Malaui juchaari erachichaksï uandanhiata ma jatsispti. Jimboka radiurhu ka telebisionirhu anapuechaksï soluksï jiárhitasïndi paraksï ma ora ísï xarhatani imeecheri programechani imeechani engaksï maiampijka para nitamatarani imeecheri programechani, jimbokaksï uandanhiasïnga eskaksï kʼuiripuecha kuatantaaka exeani programechani engaksï jukari ma ora durariuaka. Joperuksï arhiaspka eska juchaari ánchikuarhita jindeeska para kʼuiripuechani jarhuataani. Pori ejemplu, asta pandemiarhu jamberi, kʼuiripuechaksï úpirindi kurhaani ambakiti ambe Biblieri, i ambeksï jarhuatapirindi paraksï sánderu ambakiti kʼuiripueni ka tsípikua jingonksï irekani imeecheri familia jingoni. Engaksï ini ambe kurhaapka, radiurhu anapuechaksï sánderu tiempu íntsaaspti erachichani.

Jini Malaui, radiueri emisora ma ka máteru telebisioniri nitamatarasptiksï kʼéri tánguarhikua rejioniri. Íksï emisorecha iámindu paisirhu anapuechaksï úsïndi kurhaani. Jini Mozambique, 85 radiueri emisorecha ka máechakua telebisioniri nitamataraspti kʼéri tánguarhikua.

Úrasptiksï 28,227 dólarisïb paraksï nitamatarani kʼéri tánguarhikua rejioniri telebisioni jimbo ka sáno 20,000 dólarisï paraksï radiu jimbo nitamatarani tsimani paisicharhu. Paraksï úni nitamatarani kʼéri tánguarhikua radiu jimbo, jatsisptiksï para maiampini entre 15 ka 2,777 dólarisï, seguni nani enga jamberi niárapiringa emisora ma.

Juchaari erachichaksï sési úraspti donasionichani. Pori ejemplu, jini Malaui úsptiksï eskaksï emisorecha asta 30% ísï késkukuapiringa. Ísïksï úspti patsani 1,711 dólarisï. Ka máru emisorecha Mozambique anapuecha késkuasptiksï imeecheri presiuechani jimbokaksï Jeobaeri testiguecha ísï mítikateska eskaksï no jámasïnga sïpani ka eska sóntku maiampisïnga.

Erachichaksï diosmaiamukua arhisïndi

Juchaari erachichaksï kánikua agradesidu jarhasti jimbokaksï úspka exeni o kurhaani kʼéri tánguarhikua radiu o telebisioni jimbo. Patrick, enga jindeeka kúnguarhikuarhu anapu orhejtsïkuti ma jini Malaui, uandaspti: “Diosmaiamukuachi íntskuntasïnga imani Grupu enga Orhejtsïkuajka iámindu kúnguarhikuechani, jimboka ini ambe úspka juchantsïni jimbo ini pandemiarhu”. Máteru erachi Malaui anapu, enga Isaac arhinhajka, uandasti: “Nóchi jatsiaska máteru aparatuechani. Ísï jimbo, kánikuachi agradesidu jarhaska jimbokachi úspka kurhaani kʼéri tánguarhikua rejioniri radiu jimbo. Kʼéri intsïmperata máesti Jeobaeri kúnguarhikueri. Ini ambe jimbo, iámu juchiiti familiani marhuakuspti programa. Iásïchi míteskia eska Jeoba xénchasïnga imeeri iretani”.

Aianhpiri Mozambique anapu ma, niraspti imeeri orheta kʼéri tánguarhikua rejioniri 2020 jimbo. Ima uandaspti: “Telebisioni jimbo exeni kʼéri tánguarhikua miátantastireni eska Jeoba jindeeska Ima enga iámu ambe újka úni. Pandemia no úspti eskajtsïni Jeoba no íntskupiringa ambe engachi uétarhinchajka ka astajtsïni juchiniu pérachisti. Sési exeska eskaksï Jeobaeri marhuaricha xénchperasïnga ka seguru jarhaska eska i jindeeska relijioni jurhimbiti”.

Kúnguarhikuarhu anapu orhejtsïkuti ma enga Wyson arhinhajka, uandaspti: “Diosmaiamukua uékasïnga íntskuntani jántspirini enga mintsinharhikueka, jimboka méntku pendienti jarhaspti juchantsïni jimbo ini pandemia jimbo. Nóchi kánikua jatsikuarheska ka jimeesïsïchi irekaska nani enga no káni jatsikuarhinhajka. Joperu jimbokachi jatsiska kʼéri tánguarhikua radiu ka telebisioni jimbo, úskachi exeni ka kánikuajtsïni marhuachesti”.

Grupu enga Jarhuajperata íntspijka ka Grupu Jorhentperakueri ménderuksï úspti paraksï radiu ka telebisioni jimbo nitamatarani kʼéri tánguarhikua rejioniri 2021, máru lugaricharhu. ¿Nénaksï maiampisïni paraksï úni nitamatarani? Donasionicha jimbo enga iámu parhakpinirhu úkuarhijka, úraparini mámaru ambe engaksï exentajka donate.jw.org. Kánikuaksïni diosmaiamukua íntskusïnga jimbokajtsï kánikua intsïmpitiska.